العودة   مصر موتورز مجتمع السيارات > السيارات الكورية والماليزية > شيفروليه الكورية CHEVROLET و دايو DAEWOO > كروز

كروز chevy gold logo


إضافة رد
 
أدوات الموضوع
  #1  
قديم 13-05-2015, 11:06 AM
shoooma shoooma غير متواجد حالياً
 
تاريخ التسجيل: May 2015
المشاركات: 1
shoooma is on a distinguished road
افتراضي تجربتى مع عصفور كــــــار كلينـــــــيك - صيانة فتيس شيفرولية كروز

السلام عليكم ورحمه الله وبركاته
تجربتى فى عصفور كار كلينيــك
نوع السيارة = شيفرولية كروز
الموديل = 2010
نوع الفتيس = استبترونك
الشكوى كانت = نتشة بين الاول والتانى
انا عارف ان فيه ناس كتير بتشتكى من حوار النتشه فى الفتيس ال6 سرعات وناس كتير ظلمت عربيات كتير بسبب ان التوكيلات مبتصلحش ومابتعترفش بفتيس بينتش عشان يغيروة ، لا لازم يكون بيهبد ولا بيرزع ولا مكسور عشان يرضوا يغيروة فالضمان ، بالرغم ان العيب ممكن يكون بسيط وتكلفة اصلاحه اهون الف مره من انك تغير فتيس كامل برقم خزعبلى ، خلونى احكيلكم اللى حصل ، للعلم العرض اللى عمله الباشمهندس ده كان عشان جروب الكروز موتورز تيم لانه عضو معانا فالجروب ومعاه بدل الكروز 3 عربيات كروز فكان معتبرنا اهل يعنى مش مجرد زباين.
المهم، العربية اول ما وصلت اتفتحلها بروفايل عندهم واتضافت لقاعده بيانات المركز واتفحصت فحص خارجى وبعدين اتعملها تيست درايف من المهندسين هناك واتسجلت كل الملاحظات فى ريبورت من 3 نسخ ونا مضيت عليه واخدت نسخه منه.
وبعدين طبعا المفروض انى كنت هنتظر فى ريست انتظار العملاء لكن باشمهندس اشرف اصطحبنى فى جوله يفرجنى فيها على المركز ككل وطبعا دخلت لاماكن فى المركز مهمه جدا ومفتكرش ان ممكن حد يوصلها وده شئ اقدره واحترمه جدا واعتز بيه وبثقة الباشمهندس فيا ، الإمكانيات الى شفتها يستحيل تكون فى مكان تانى فى مصر لان سياسة الصيانة فى عصفور كار كلينيك تختلف كليا وجزئيا عن اى مركز صيانة شفته ، اى مركز صيانه فى مصر حتى لو كان توكيل سياسته فى الاصلاح هى الاستبدال Policy of repair by replacement لكن السياسه دى هى سياسه استسهاليه واللى عايز يريح دماغه بيتبعها عشان يبيع قطع غيار وفى نفس الوقت ميتطلبش الاصلاح منه الدراسه والخبره والتأهيل كأفراد وكأجهزة ومعدات ، لكن فى المركز لقيت اجهزة تقدرتصلح ادق تفاصيل مكونات الفتيس والله على ما اقول شهيد ، كل جزئيه فى الفتيس قابله للاصلاح بمعدات خاصه بيها وليها معدات تانيه للاختبار لكل موديلات فتايس العربيات كلها والله بدون مبالغه وكل حاجه عليها الليبل بتاعها وتعليمه تشغيلها جنبها، وتأكيد الاصلاح قبل توصيلها فى الفتيس وتركيبه فالعربية عشان يتم اختبارها بعد التركيب على حمل العربية ، لانى فهمت من باشمهندس اشرف ان الاختبار على الاجهزة الخارجيه بدون تركيب الفتيس على العربية بالنسباله لا يمثل اكتر من 60% من تأكيد الاصلاح لان ظروف التشغيل والطريق ليها عوامل هو لازم يتداركها اثناء الاصلاح ، وده حسسنى بالتفانى فى الدقه اثناء الاصلاح وتأكيد جوده الاصلاح والضمير الصاحى.
دخلت مخازن لقطع الغيار شفت مكونات لجميع انواع الفتايس فيه الجديد وفيه المستعمله، ودخلت مخازن المعدات الخاصه ، والله بدون مبالغه تخيل اى معده خاصه ليها علاقه بصيانه الفتيس ايا كانت هتلاقيها فالمخزن ده، وبعدين دخلت مخزن الفتايس الجاهزه على التركيب انواع عربيات كتير ، وكل الفتايس ملفوفه استريتش حتى التراب ميعرفش يوصلها، واخيرا دخلت فتايس الاسكراب بطنى جالها مغص من المنظر ، المهم ان فتايس الكروز كان ليها نصيب كبير من الاسكراب، المهم طلعنا على ورشة صيانة البدى فالف وبعدين ورشه صيانة الجير بوكس ، وبعدين ورشة صيانة التورك كونفرتور ، وبعدين ورشة صيانة الكنترول موديول ، وبعدين منطقة الغسيل لقيت فيها غساله زى غسالة الاطباق بس بالكيماويات للفتايس وبيدخل الفتيس فيها (بعد الطين بطين) يطلع منها زيييييييييرو بيلمع والله بمعنى الكلمه بيطلع يستحيل يتقال عليه انه كان راكب في عربية قبل كده ودى نقطة تقلق من التوكيل على فكرة ، المهم ان الميزة انك فى المركز هناك مش هتقف على قطعه غيار ولا هتلف عليها وتنزل الحرفيين والكلام المتعب ده ، انا فاكر كان فيه واحد زميلنا عالجروب بيدورعلى قطعه فالفتيس ومش لاقيها بقاله فترة كبيرة والعربية عطلانه ومش عارف يكمل اصلاحها عشان القطعه دى ، كان اسمها المجموعه الشمسية ، اهى دى شفت رف هناك عليه يجى 4 بتوع كروز لواحدها ،
اثناء الجوله اللى طلعناها ، اكتر حاجه لفتت انتباهى هناك كانت النضافة والنظام ، بصراحة المكان لا ينتمى لاسلوب الصيانة فى مصر بصفه لا من قريب ولا من بعيد حتى ، العربيات حتى ملهاش الحق انها تطلع العادم بتاعها وهى دايرة داخل المركز ، اول ما بتدور العربية بيتركبلها خرطوم فالشكمان وبيتم شفط العادم طول فترة تشغيل العربية عشان الجو داخل المركز ميتعبقش بالعادم ، انا كنت فاكر الموضوع متعلق بالصحه ، لكن الموضوع طلع عشان جودة الهواء اثناء عملية الاصلاح ، لدرجه ان فيه مرحلة من مراحل صيانة البدى فالف بيدخل جوة شامبر وايد المهندس اللى هيعمل الصيانة بتدخل داخل جوانتى متركب فالشمبر ده كأنه بيعمل عملية حقن فى منطقة نظيفة وخايف من انتشار عدوى ، عندنا فالادوية بيسموها Class A LAF لو حد اشتغل فالادوية والاجهزة الطبية هيفهم قصدى بقيت حاسس فعلا انى فى عيادة ولا مستشفى مش فى مركز صيانة واصلاح عربيات.
المهم نرجع لعربيتى ، نزلت تانى للعربية لقيت الباشمهندسين خلطوا التست درايف ورجعوا وكانوا موصلين عدادات صغوط عالعربية اثناء التست درايف واحد سايق وبيبلغ قيم عدد لفات الموتور والتانى قاعد جنبه ومعاه سجل وبيسجل فيه قيم الضغوط على كل مدى لعدد لفات الموتور، ده اللى عرفته فى تانى تست درايف طلعت معاهم وهما بيعملوه لما ركبوا الكارته التانية، عشان منسبقش الاحداث اكملكم الاول ، اول ما رجعوا بالعربية رفعوها عالونش نزلوا الزيت من الفتيس كله وفكوا الكارتيرة وهنا كانت المفاجئه ، بواقى المنتج بتاع الفتيس اللى كنت حقنته لو فاكرين وقلتلكم عليه كانت موجوده فى صورة سائل رصاصى بكمية قليلة اوى ، الباشمهندس سجل كل ملاحظاته وطلعنا غرفة اجتماعات كده ومعانا كل معطيات المناقشة وطبعا باشمهندس عصفور ابو الواجب كله كان كريم جدا فى ضيافتة وده يدل على اصله الكريم ، وقعدنا نتناقش فى العيوب اللى ظهرت من وجهه نظر المهندسين ، والملاحظات كانت نتشه بين الاول والتانى ، وتاخير فى السادس وده كان مفاجئه بالنسبالى لانى عمرى ما حسيت بيها و الريفيرس كان مش مظبوط ونا فعلا احيانا كنت لما بحط الفتيس عالريفيرس كان احيانا بيهز العربيه خفيف ونا مكنتش فاهم ان ده غلط ، المهم ان ادق التفاصيل فى الفحص المبدئى ظهرت ، بعدين عرفونى هما ناويين يعملوا ايه عشان يشركونى فأتخاذ القرار ، ونا طبعا اكتفيت انى اكون مستمع واشوف الصح ايه عشان يعملوه ، بعدين كان الفنيين تحت بيفلتروا الزيت وطلعوا تقرير بحاله الزيت عشان نعرف حالة الجير بوكس من جوه ، وكانت المفاجئه ان بعد ما الزيت اتفلتر على فلتر 8 ميكرون مطلعش اى رايش معدنى فيه نهائى على حلقة الفلتر بالمغناطيس ، لكن لما الباشمهندس استغرب من السائل الرصاصى اللى لقاة فالكرتيرة فحكيتله على الحقنه اللى حطيتها فالفتيس وعجبته جدا وقاللى انه هيبعت يجيبها ويبعتها لكولمان تيلور فى امريكا عشان يقيموها طالما منعت الرايش نهائى خصوصا انى حاططها بقالها حوالى 10 الاف كيلو بعد تغيير زيت الفتيس ، ونا اصلا لقيت عنده منتجات فالمخازن خاصه بالعمرات والترميمات كنت شفتها على الانترنت وبتمنى اعرف اجيبها بس كلها امريكية وملهاش وكلاء فى مصر ومش هتعرف تشحنها لمصر بسهولة ، المهم طبعا حالة الزيت وعدم وجود رايش طمن قلبى شوية على حاله الجيربوكس وهنا ظهرت الامانه فالتعامل مع الباشمهندس لانه قاللى بنسبه 80% مش هنفتح الفتيس لان حاله الزيت بتقول ان الوضع جوة مطمئن لكن هو كان قلقان بس من الزيت القديم اللى فى التورك كونفرتور ليكون فيه رايش قديم اوى من عمر العربية واللى مش هيقدر يوصل له بدون فك الفتيس ، المهم قاللى كده نسبه 80% العيب مش عيب مركب ، وان كده الكارته مسجله ضغوط عاليه واحتمال كبير جدا يكون العيب فيها ، لكن تخيلوا بعد كل الاختبارات دى كلها متطرقش للاستنتاج النهائى فالتحليل ، لان كل همه يوصل السبب الجذرى للنتشة ، المهم انه فك الكنترول بتاع عربيتى وجاب كنترول من عنده مستعمل وركبه فى عربيتى وركب الكنترول بتاعى فى عربيه الباشمهندس محمد صابر علشان يدرس مشاكله لمده يومين قبل الاصلاح ، وده اللى انا بصراحه اعجبت بيه جدا ، المهم اخدنا العربيه وطلعنا تانى نعمل تست درايف وكانت النتيجه مفاجئه بصراحه ، العربية زيرو والحمد لله ، ولا اى عيب ظاهر ، ومفيش اى احساس بالنقلات والسلاسه والنعومه والتجميع السريع، دخلنا تراك التست درايف وهو طريق كده جانبى فى طريق اسكندريه عاليمين والشمال زراعه وفاضى، وبدأ التست الباشمهندس احمد والباشمهندس محمد واحد سايق وبيبلغ قرايات عدد لفات الموتور والتانى بيسجل وبيقرى الضغط وموصلين الابتوب وعاملين اونلاين مونيتورينج للعربية لكل حساساتها وقراياتها ، وبعدين مره يجربها عالقياده الايكونمى ويسيبها تنقل على 2000 رايح جاى مسافه حوالى نص كيلو ، وبعدين مره تانية عالقيادة العادية ويسيبها تنقل مابين 2500 و 3000 و يسجل كل قراياته وملاحظاته مسافة نص كيلو رايح جاى برضه ، ومره عالقيادة الرياضية على 4000 مسافه نص كيلو رايح جاى ، وبعدين جربها عالفل ثروتل وقرص عال6000 وقتها العربية كانت عايزة تطير والله وسألته على انطباعه قاللى ماشاء الله لا فيه تقديم ولا تأخير ولا نتش، المهم اخر تست درايف عملته بنفسى والحمد لله اتبسطت اوى من اداء العربية ، ورجعنا المركز تانى ، المهم وقتها طلعنا تانى مكتب الاجتماعات ومعانا التقارير تانى واتناقشنا تانى وفى نفس الوقت جالنا تقرير حالة الكنترول بتاعى على العربية التانية وقيم الضغوط والقرايات اللى اتسجلت، وطلعنا من النقاش ده ان الكارته بتاعتى فيها عيب 2 سولينويد او 3 والله اعلم هتبان لما يتم اختبارها عالاجهزة ويفك السولينويدس واحد واحد ويتم اختبار كل واحد على حدى وقياس مقاوماتهم وكلام كبير، المهم طلعت صليت الضهر والعصر جمع قصر لانى على سفر وبعدين لقيت الباشمهندس بعت جابلنا غداء اقسم بالله كنت حاسس انى فى بيتى وبين اهلى من كرم ضيافته وبشاشته واستقباله، المثل بيقولك لاقينى ولا تغدينى ، لا الراجل ده عمل الاتنين.
المهم الباشمهندس عصفور قاللى خلى الكنترول اللى فى عربيتك وامشى بيها كده وعرفنى اى تفاصيل او ملاحظات عشان لو فيه اى حاجه فالجيربوكس برضه نعرفها ، وعرفنى انه هيصلحلى الكنترول القديم بتاعى الاول قبل ما يفكر يركبلى كنترول مستعمل من عنده زى اللى فيها او ان كان هيسيبلى اللى فيها ، لكن عشان تكلفة اصلاح الكنترول القديم طلعت اقل من قيمة الكنترول المستعمل يبقى انا اولى بالفرق بدل ما ادفع تمن كنترول مستعمل ، وده تصرف امين جدا جدا جدا منه ، لانه الاولى بأى مركز صيانة انه يطلع قطع غيار من عنده واهى مكسب ليه فالاخر ، المهم لما تطرقنا للتكاليف والله العظيم طلع ارخص من الاسعار اللى شفتها حتى فالحرفيين ، الكنترول المستعمل عند الباشمهندس قاللى عشان الجروب وعشانى ب4000 جنيه ده فى حاله ان الكنترول بتاعى تكلفه اصلاح السولينويدس اللى عطلانه فيه وصلت للمبلغ ده ، يعنى لو جت على سولينويد ولا اتنين ولا تلاته هتبقى تكلفة الاصلاح اقل من 4000 جنيه ووقتها انا اولى بالفرق ده لكن لو لقى ال7 بايظين ولا 6 منهم بايظين وبيعلقوا وقتها هركب واحد مستعمل اولى من انى اصلح الكنترول القديم ودى نقطه تتحسبله وانا اكاد اجزم انك يستحيل تلاقى حد اصلا فى مصر بيصلحلك TCM انا دورت وماسبتش حته فى مصر الا وسألت فيها واول ما سألت الباشمهندس ليه الناس بتصلح الBCM لكن محدش بيصلح ال TCM ابتسم وقاللى هتشوف كل حاجه بعنيك وفعلا ده اللى حصل.
ولما سألته ليه مش هنركب كنترول جديد ، يعنى انا قلتله لو اضمن او اريح وخصوصا ان الجديد عليه ضمان ، هو قاللى مقدرش احطلك كنترول جديد الا لما اكون ضامن ادق ادق تفاصيل الفتيس بحيث انه يفتح الفتيس ويطلع حته حته فيه ويستبدل اى قطعه فيها حتى خربوش ولا تآكل خفيف ، ويغسل البدى فالف والجير بوكس فالغساله اللى حكيتلكم عليها دى ، ويتحط التورك كونفرتور عالووشر بتاعه فترة كافية لانه يتأكد انه نضيف جدا وان التوربين بتاعه مش متعلق فيه اى رايش ، عشان يضمنلى الكنترول الجديد ، والجميل فالموضوع انى لما قلتله يعنى لو حد جالك وعمل عمره كاملة وكان الكنترول بتاعه بينتش او بايظ او بيأخر وحضرتك عملتله العمرة واتأكدت بنفسك وركبتله كنترول جديد هتضمن الفتيس قد ايه ، كان رده انه ضامنه عشرة الاف كيلو او سنه كامله ايهما اقرب .
لكن للاسف جالى تليفون عكنن عليا فرحتى باللى بحكيلكم عليه ده وعرفت ان جدتى توفت الله يرحمها واضطريت انى اطلع عالمنصورة والباشمهندس محمد صابر طلع معايا بعربيته وصلنى لاول الطريق الدولى وعرفنى الطريق والحمد لله على كل شئ.

وادى الريبورت اللى بعتهولى الباشمهندس بعد الصيانة عالايميل عشان يعرفنى عمل ايه فالعربية :

Dear Hesham,
Please check and confirm
الاستقبال والكشف المبدئي:-
1-استقبال سيارة العميل وتعبئه الاوراق اللازمه للتوقيع واستيلام نسخه من الاوراق.
2-كشف عام علي جميع سوائل وزيوت السيارة.
3-الكشف علي مستوي وحاله الزيت .
4-كشف اكود باستخدام الكمبيوتر جنرال موتور( MDI).
5-اختبار طريق باستخدام اجهرة قياس وتحديد الضغط.
6-كشف علي الكهرباء الخاصه بالسيارة.
7-تم فلتره الزيت ولم يكشتف وجود اي رايش معدني.
ملحوظات بعد الكشف:
1-تسريب مياه في دائرة السخان.
2-تأثير سلبي علي دائرة الكهرباء نظرا للاكسسوارات والاضافات التي تم تركيبها عن طريق العميل.
3-تأخير في النقله السادسه(Delayed shift late).
4-النقل من الاول للثاني غير طبيعي (Harsh engagement).
التوصيات والاصلاحات:
1-تحليلل نتائج الكشف ادت الي حصر المشكله بنسبه 80% في كارته الفتيس.
2-لحل المشكله يلزم اصلاح كارته الفتيس او تغيريها بكارته سبق اصلاحها او كارته جديدة ولكل حل سعر مختلف.
3-نظرا لعدم وجود رايش وبالكشف علي الفتيس بعد تغير الكارته لم نلاحظ اي دلائل تشير الي ضرورة فك الفتيس لعمل اللازم ولا يوجد ضمان كامل علي حاله الفتيس.
4-حتي يتثني للعميل الرجوع بالسيارة في نفس اليوم قررنا تركيب كارته مستعمله تم اختبارها علي سيارة خاصه بنا لمدة 2000 كيلومتر في ظروف قياده مختلفه.
5-تم تجربه السيارة عن طريق المهندس المختص والعميل.
6-كارته العميل تحت الاصلاح.
7-لن يتم محاسبه العميل علي الكارته المستعمله حتي يتم التأكد من قابليه كارته العميل للاصلاح وذلك لمصلحه العميل في حاله تم الاصلاح باقل من تكلفه الكارت المستعمله.
8-سعر الكارت المستعمله بالمصنعيه 6000 جنيه ولكن سوف نقوم بمحاسبه اعضاء الجروب ب 4000 جنية فقط علما بان سعر الكارت الاستعمال في السوق كلكم تعرفونه جيدا.
قائمه اعمال لم تنجز بعد وذلك بسبب حاجه العميل للرجوع بالسيارة:
1-مراجعه ونظافه وعزل الوصلات الكهربائيه الخاصيه بالسيارة.
2-نظافه دائرة التبريد باستخدام الجهاز المخصوص.
ملحوظات هامه :-
خلال فترة تجربه السيارة يراعي سرعه اخطار المركز في اي من الحالات الاتية :-
a.الاحساس بأي تغيرات في النقلات.
b.اضاءه لمبه الاعطال بالتابلوه.
c.وجود تسريب زيت اسفل السيارة .
d.في حاله اجراء اي اصلاحات مياكنيكه او كهربائه بالسيارة وذلك للمحافظة علي سلامه الفتيس ,فبعض الاصلاحات يكون لها تأثير سلبي كبير علي الفتيس.
e.مكالمه تليفونية صغيرة للاستعلام او الاستشارة ستوفر مجهود وتكاليف لصاحب السيارة .
Regards

وأخيراً، الحمد لله والشكر لله على معرفتى بباشمهندس عصفور لانى بحب الكروز وكنت قلقان من انى راكب ال2010 لكن اللى اكتشفته اننا (ملاك الكروز 2010) معانا ثروة والله ، وخلاص كل مشاكل الفتيس اتغطت بوجود الباشمهندس عصفور لانه ورانى اللى يطمننى فعلا ونا راكبها ، خصوصا موديل الفتيس اللى فال2010 تم دراسته دراسه خاصه جدا لمده 6 شهور وعرفوا كل عيوبه وطريقة تداركها وتصليحها والحمد لله كل قطع غياره من اصغرها لآكبرها موجوده عنده.
باشمهندس عصفور على الصعيد الشخصى مفيش كلام يوصفه يوفى حقة ، لكن انا فعلا سعيد جدا بمعرفتى بيه ، معرفة خير ان شاء الله ، والف شكر يا باشمهندس على حسن وكرم ضيافتك اللى ماشفتهاش غير فى اهلى والله على ما اقول شهيد.


فريق عمل عصفور كار كلينيك ، اقسم بالله العظيم نادر ما تجد مثلهم فى مصر ، لا هتلاقى زيهم مؤهل ولا خبرة ولا دقه ولا نضافه ولا تفانى فالعمل


اللى قابلتهم وشفت شغلهم وعرفت مؤهلاتهم هما:
باشمهندس محمد اشرف عصفور / مدير الصيانة الميكانيكية فى شركة ابو ظبى للخدمات البترولية


باشمهندس يوسف محمد اشرف عصفور / "اينشتاين" واللى ربنا هيكرمه وهيقابله هيعرف قصدى ، ده مهندس ميكانيكا ، وخريج من كولمان تيلور ترينينج اكاديمى للترانسميشنز ، مش عايز احسسكم بالمبالغه فالوصف بس ده فعلا وصفه لازم أبالغ فيه لو وصفت ، هذا الشبل ما ذاك الاسد.


باشمهندس محمد صابر / ماستر هندسه نوويه وتعليم باشمهندس عصفور ، واللى اصلا كنت قابلته اول مره ، خبره تنم عن انه اتعلم على ايد خبير فعلا ، واخ وصديق اعتز بيه العمر كله ، ربنا يديم المحبه


باشمهندس احمد ابو عرب / مهندس ميكانيكا وماشاء الله عليه شاطر جدا جدا ودقيق فالوصف وحافظ الكروز بادق تفاصيلها ، تشخيص سريع وخفه ظل وقبول عالى ، ربنا يباركلك فى عيلتك كلها يا باشمهندس عصفور ،



للعلم ، كلهم من عائله عصفور ، والمركز فاميلى بيزنس عشان كده تحس انك وسط اهلك هناك ونضافه بيتك فعلا ، والتزام ودين وهدوء ونظام.


المهم اخدت العربية وطلعت مشوار ما يعلم بيه الا ربنا ، ودخلت فى طرق سريعه وطرق زراعيه وطرق مكسرة وبلاوى متلتله ، وماشاء الله العربية ما قصرتش ومفيش اى نتش ولا تاخير،



وللاسف تانى يوم حصل عندى حاله وفاة تانية فى عائله والدتى وطلعت من المنصورة على بنى سويف فى مشوار قاسى جدا وطرق زفت خالص ، المهم ان العربية مشيت بعد الصيانة مباشرة حوالى 700 كيلو متواصل وماشاء الله عليها زى الساعه لا بتقدم ولا بتأخر ولا بتنتش ولا الهوا ، هونت عليا كتير فالظروف الصعبه اللى حصلت.

فلماحبيت اجرى واجرب بعد نص ساعه مشى على سرعه 120 ، والله العربية جابت 210 بس للاسف انا الكاوتش عندى بعافيه شوية فمجاليش الجراءه انى امسك الموبايل واصور خصوصا ان الدنيا كانت ضلمة والنور عندى زى الزفت عايز يتغير ، لكن لو كنت بحب كروزتى قيراط قبل ما اروح لباشمهندس عصفور ، بعد ما رحتله بقيت بحبها فدااااااااادين.



المركز فى العامرية - قبل اسكندرية
وليه صفحة عالفيس بوك واكيد اللى هيدخل جروب الكروز موتورز تيم هيستفيد من الاوفر بس يحط لوجو الجروب قبل ما يروح ويبلغهم انه من طرف الجروب

والله على ما اقول شهيد ان كل كلمه كتبتها 100% حقيقة

م/ هشام القزاز
رد مع اقتباس
  #2  
قديم 13-05-2015, 08:27 PM
الصورة الرمزية محمد فيصل
محمد فيصل محمد فيصل غير متواجد حالياً

من انا؟: العبد الفقير لله
التخصص العملى: مهندس ميكانيكا السيارات
هواياتي: القراءة فى الموضوعات الفنيه وبالاخص فنيات السيارات
 
تاريخ التسجيل: Jun 2010
الموقع: الاسكندريه
المشاركات: 3,469
محمد فيصل has a reputation beyond reputeمحمد فيصل has a reputation beyond reputeمحمد فيصل has a reputation beyond reputeمحمد فيصل has a reputation beyond reputeمحمد فيصل has a reputation beyond reputeمحمد فيصل has a reputation beyond reputeمحمد فيصل has a reputation beyond reputeمحمد فيصل has a reputation beyond reputeمحمد فيصل has a reputation beyond reputeمحمد فيصل has a reputation beyond reputeمحمد فيصل has a reputation beyond repute
افتراضي رد: تجربتى مع عصفور كــــــار كلينـــــــيك - صيانة فتيس شيفرولية كروز

كل الشكر والتحية لنقل التجربة
بارك الله لك فى سيارتك
بارك الله لكل صانع ماهر اتقى الله فى عمله
__________________

رد مع اقتباس
  #3  
قديم 13-05-2015, 11:35 PM
الصورة الرمزية نبيل عبدالرحمن
نبيل عبدالرحمن نبيل عبدالرحمن غير متواجد حالياً
مدير عام المنتدى
من انا؟: مهندس انشائى بالمعاش
التخصص العملى: خبير مدير عام مساعد بقطاع البترول سابقاً
هواياتي: رياضة التجديف وألعاب القوى ( أيام الشباب طبعاً )
 
تاريخ التسجيل: Oct 2009
الموقع: اسكندرية
المشاركات: 4,555
نبيل عبدالرحمن has a reputation beyond reputeنبيل عبدالرحمن has a reputation beyond reputeنبيل عبدالرحمن has a reputation beyond reputeنبيل عبدالرحمن has a reputation beyond reputeنبيل عبدالرحمن has a reputation beyond reputeنبيل عبدالرحمن has a reputation beyond reputeنبيل عبدالرحمن has a reputation beyond reputeنبيل عبدالرحمن has a reputation beyond reputeنبيل عبدالرحمن has a reputation beyond reputeنبيل عبدالرحمن has a reputation beyond reputeنبيل عبدالرحمن has a reputation beyond repute
افتراضي رد: تجربتى مع عصفور كــــــار كلينـــــــيك - صيانة فتيس شيفرولية كروز

والله حاجه تفرح إن فى عندنا فى مصر ناس بهذه الكفاءة وبهذه المراعاة فى الضمير مع إن ده اللى مفروض يكون فى أى صنايعى ، ربنا يبارك فيهم آل عصفور ودعواتنا لهم بمزيد من التقدم
__________________

م . نبيل عبد الرحمن
مصر موتورز
الإسكندرية
رد مع اقتباس
إضافة رد

أدوات الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
إستدعاء شيفرولية كروز بسبب خطأ بنظام التوجيهإستدعاء شيفرولية كروز بسبب خطأ بنظام التوجيه Print Tell a Friend بقلم » احمد الحداد | بتاريخ » 9 أبريل 2011 | فى تمام الساعة » 6:39 م | التعليقات » 0 chevrloet cruze 2011 إستدعاء شيفرولية كروز بسبب خطأ بنظ zoom man كروز 2 05-05-2011 10:43 PM
تجربة مفصلة - شيفروليه كروز أحمد فاروق سيد كروز 2 21-05-2010 12:28 PM

 MasrMotors غير مسؤول عن أي اتفاق تجاري أو تعاوني بين الأعضاء
التعليقات المنشورة لا تعبر عن رأي MasrMotors ولا نتحمل أي مسؤولية قانونية حيال ذلك ويتحمل كاتبها مسؤولية النشر


الساعة الآن 04:07 PM.


Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017