أخر كلامي عن الM11 موضوع مهم جدااااااا

[rotana_cinemaa]

1_ الانوس عربية كويسة موفرة للبنزين وتقدر تمشيها ببنزين 80 عادي جدا قطع غيارها موجودة عند البقالين وتكاد تكون أقل سعر قطع غيار في مصر كل حاجة للانوس من قطع غيار مهمة جدا زي المساعدين والمارش والعفشة والماتور ذات نفسه كامل ب2500ج جديد أستيراد من بورسعيد يعني تركب العربية وانت مطمن وتفوت بيها من خرم أبرة وعارف ان لاقدر الله لو جرالها حاجة هتقدر تصلحها عند اي ميكانيكي أو اي كهربائي والشغل الي فيها موش كيميا ويوم متسمع حاجة تخض ويقولك هنغير مساعدين او هنغير طقم جلب ومقصات للعفشة او هنغير اي حاجة تلاقي نفسك بتصرف في حدود 300ج وتخلص مصلحتك عند الميكانيكي الي تحت البيت تسيبله العربيه وتطلع تنام تنزل بعد ساعاتين تلاقيها واقفة زي الفل وعشان العربيه منتشره جدا أكسسوارها موجود من الداليات لحد لو عايز زينون وتغير فوانيس وتركب شبوره وفرش وشماسات وعلامة الشركة واي شيئ في حدود 50 جنيه يعني ب500 تخليها bmw هههههههه

2_ طيب عيوب الانوس ايه بقي خفيفة جدا علي الأرض مفيش ثبات طيب ايه تاني شكلها بقي عادي ومألوف من سنة 1997 لحد دلوقتي متغيرش وبقت تاكس وبقت عربيه شعبيه زي الفيات 128 طيب الفرامل ووسائل الأمان والصاج بتاع العربيه جامد ولا ايه لا طبعا العكس تماما فرامل تيل بيتاكل وبيتغير وبيصفر لو نوعه وحش وسائل امان مفيش حاجة خالص صاجها ورق لو حد سند عليها بس هيطبقهالك اكتر حاجة هتعملها كل شهرين تلاتة هي تربيط او تغير العفشة مع تظبيط زوايا وترصيص

3_ ال m11 عربيه كويسة أستهلاكها في البنزين سواء كتير او قليل انت متقدرش تحط فيها أقل من بنزين 92 وده طبعا معناه انك لأي زيارة للبنزينة ولو مرتين في الأسبوع عايز تحطلك حوالي 20 لتر ب40 جنيه مثلا يعني الانوس كنت بفولها بنزين 80 بحوالي 40 جنيه كل أسبوع دلوقتي الm11 بحطلها 20 لتر في 20 لتر حوالي مرتين في الأسبوع ب80 جنيه يعني ضعف الأستهلاك تقريبا وده أكيد عبئ مادي عليا جديد
طيب قطع الغيار بقي العربيه جديده ملهاش قطع غيار برة التوكيل نهائيا ولا أي أكسسوار ولا حتي علامة الشركة عشان علامة الشركة في الm11 كبيرة عن الموجودة في اي موديل لأسبرانزا طيب انا كدة غصب عني لازم اتعامل مع التوكيل عشان الضمان وعشان هي برة موش هلاقي ليها قطع غيار اساسا طيب التوكيل بقي بيحتاج منك اولا حجز وتفضل بمشكلتك كتير لحد متاخد ميعاد طيب خدت الميعاد تضيع يوم أو يومين لو موضوعك متحلش في يوم واحد طبعا تقعد في التوكيل لما تورم من القاعدة طيب تيجي تدفع مثلا زي حلاتي كدة غيرت تيل الفرامل مثلا ب360 ج الي كنت بغيرو في الانوس وانا قاعد مع الميكانيكي مسافة مشرب واحد شاي ب45 ج التيل
تعالي بقي صيانه أجباريه حوالي كل شهر ونص لتربيط العفشة كل 5000ك وكل 3 شهور لصيانة الزيت والسكر والشاي وكدة يعني كل شهر ونص هتحجز وتروح تضيع يوم ده لو انت معندكش مشاكل خالص في العربيه والعربيه زي الفل من غير عيوب بقي باب تنك ميفتحش تكييف يبوظ لوحده صوت تسمعه هنا صوت تسمعه هناك ده انت كدة بس شغال في الطبيعي هتتذل يا معلم كل شهر مرة في التوكيل لأي سبب

طب الخلاصة ايه بقي

الخلاصة أن الي يشتري الm11 لازم يكون أستخدامه خفيف أولا عشان هي موش بتاعة شقه وجري وتنطيط ولازم كمان يكون ماديا معلهوش أقساط ومتجوز ومخلف ومدارس وبلاوي سوده انتو عارفينها لأ يكون ماديا مستريح أوي طيب ايه تاني يكون رايق بقي وفاضي وأعصابه هاديه عشان يستحمل ذل التوكيل والكلام الي يحرق الدم منهم ويقتنع انه راكب عربية جديدة شكلا وموضوعا علي السوق المصري وغير منتشرة عشان سمعة الصيني السيئة وكمان قرب سعرها من التيجو مخلي التيجو تكسب طبعا وتنتشر أكتر فميزعلش بقا من ندرة قطع الغيار والأكسسوار ويمشي براحه كدة ويقرا عدية ياسين كل ميركب عربيته ولما يجي يركنها بعد ميروح يحمد ربنا انه رجع بيها سليمه محصلهاش حاجة وهو ماشي ولو ينفع يبات جمبها يكون أحسن عشان انا عربيتي أتسرق منها وهي واقفة في الجراج علامة الشركة وكلمة أسبرانزا و حروف m11 الي موجودين علي شنطة العربية وموش عارف ولا لاقي مكان فيه العلامة لحد دلوقتي ههههههههههه تصورو علامة موش موجوده وربنا يستر

طيب مميزات ال m11 ايه بقي الشكل الجامد والجديد بيخليك مميز وأكثر فشخرة كأنك راكب bmw طيب الثبات جامد جدا أجري يا عم ودوس بأعلي سرعة أنت ثابت وراسي علي الأرض طيب الصاج بتاعها ناشف وجامد وحديد زي الفل طيب التكييف تلاجه بجد موش هتقدر تستحمله ولا هتحس انه شغال لأن أداء العربيه موش هيتغير زي الانوس مثلا وهو شغال بتكون الانوس بطة بلدي تقيلة جدا طيب ظبط الزوايا والترصيص ولا العفشة أنسي الموضوع ده تماما عفشة جامدة والعربية عاليه موش هتحك منك ابدا علي اي مطب مهما ركب معاك عدد وأوزان تقيلة

يبقي يتاخد عسل الm11 بمر التوكيل والذل بتاع التوكيل وتصبر لحد متلاقيلها قطع غيار وأكسسوار
يتاخد الانوس عربية عاديه شكلا وموضوعا لكن مريحة في المصاريف ومريحة مفيش قلق ممكن تجمع لانوس عند اي ميكانيكي صحبك تقولو اعملي واحدة واسعة شويه هيعملهالك
يارب أكون قدرت أوصل معلوماتي أو معاناتي أو خبرتي البسيطة ويستفاد منها المقبل علي الشراء وشكرااااا وأسف للأطالة محمد ::0111601005

انتا تريح دماغك وتقضيها مواصلات من في البلد ديه مرتاح مديا بس ربنا ينتقم من اللي عمل فينا كدا ووصلنا للمرحله ديه

[tarek elbadry]

تقرير حيادى وواقعى وزى الفل
تسلم ايدك
بس بجد الانوس عربية محترمة جدا وحمالة اسية
m11عاوزة صبر لما تنتشر وينزلها قطع غيار برة التوكيل ها تبقى قنبلة

[agiad_doctor]

طيب انا عندي سؤال لو سمحت امال كل العيوب اللي بيتكلموا عليها من المتور الل يبيسقف ومشالكل الزجاج وكل اللي بيتكتب هنا ده ايه رايك فيه؟؟

[luckyman]

rotana_cinemaa شكرا لك تقييم اكثر من رائع وواقعى وفعلى مية مية يا روتانا سينما انت راجل بروفيشنال
لكن اتوقع مع الانتشار والوقت مشاكل الاسبرانزا تبدا تحد منها نتيجة انها انتشرت وبالتالى القطع والناس اللى حتفهم فيها على قفا مين يشيل لانه تقريبا كدة نفس حكاية اللانوس بتتكرر ولك منى كل الشكر والاحترام تحياتى الحارة
ياريت الناس تقرا تقييمك لانة فعلا حقيقة والخلاصة لا اكثر ولا اقل والقرار والاختيار لهم وشكرا