الزيوت المعدنية والتخليقية ... حاجة تحير

[bassam zaki]

الزيوت المعدنية والتخليقية أيهما الأفضل ... أيهما الأعلى أداءا
ناس كتير بتتكلم في الموضوع ده بس أكترهم بيفضل الزيوت
التخليقية عن المعدنية .. أنا كنت ب أستخدم زيت معدني وعمري
ما إستخدمت زيت تخليقي خالص بس من فترة بسيطة غيرت مكنة
العربية بتاعتي وجبت مكنة إستيراد هيونداي 1500 سي سي أتوماتيك
ولما غيرت الزيت إستخدمت زيت موبيل xhp 20w وبعد فترة ناس
كتير شككتني في زيت موبيل ده وقالولي لازم تحط للمكنة زيت تخليقي
وقالولي حط زيت شل ألترا ولما جيت أغير ل زت شل ده رجعوا قالوا
مينفعش تغير من زيت معدني لتخليقي فا أنا عايز أعرف أعمل إيه ...؟
أغير لزيت تخليقي ... ولا أستمر مع الزيت المعدني ولو أستخدم زيت
معدني إيه أفضل زيت معدني ممكن أعتمد عليه ..؟ نرجو المساعدة ونأسف لللإطالة

[ramy safwt]

اللى بيحكم نوع المكنة بتاعتك تاخد معدنى ولا معملى " تخليقى " نوع مكنتك تاخد معملى

بطل سماع كلام الناس و اقراء اليوزر مانيوال بتاع العربية

الشيل هيليكس الاصفر 5000 غالى بس مريح و فى زيوت 10000 بس ممكن تعوض عنها ب معزز زيت

لما تيجى تغير من معدنى لمعملى سيب طبة الكرتيرة و سيبها ربع ساعة بعد ما تنزل زيتها كله

ممكن تعمل حمام زيت :-

1- ترفع العربية و تجيب اعلى غيار
2-تسيب طبة الكرتيرة مفتوحة تحط نص كيلو من زيتك الجديد
3-وتلف العجلة عشان تحرك الفتيس و الكرانك و البساتم
4-تنزل العربية و تسيبها تسقط الزيت
5-اقفل الطبة كويس و عبى زيتك عادى

[نبيل عبدالرحمن]

الزيت المعدني هو زيت مستخرج من البترول بعد تكريره وهو الزيت الذي نستخدمه منذ عشرات السنين.. أما الزيت التخليقي فهو زيت تم تعديل تكوينه الكيمائي في المعامل لتكون له خواص مختلفة عن الزيت المعدنى، وهناك نوع من الزيوت نصف تخليقية وهي مزيج من الزيت المعدني والزيت التخليقي.
مميزات الزيت التخليقي:
- ثبات كيمائي وفيزيائي أفضل من الزيت المعدني فلا يتحلل أو يفقد لزوجته بسرعة.
- يوفر في استهلاك الوقود لإنه يساعد علي تحرك أجزاء المحرك بسهولة أكبر ويقلل الاحتكاك الي أقصي درجة.
- يحافظ على الموتور عند إدارة السيارة في الصباح (وهي الفترة التي يحدث خلالها أعلي تآكل للأجزاء الداخلية للمحرك لأن الزيت يكون موجود في قاع حوض الزيت - في الكارتيرة- وعند التدوير يبدأ الزيت في الصعود لتغطية كل أجزاء المحرك الداخلية).. في حالة الزيت البترولي يكون قوامه ثقيل ويأخذ وقتا حتي يصل الي درجة اللزوجة المطلوبة لكن الزيت التخليقي تكون لزوجته ثابتة في درجات الحرارة المنخفضة وفي درجات الحرارة العالية مما يجعله يصل بسرعة أكبر من الزيت البترولي للأجزاء الداخلية للمحرك مما يقلل تآكله فيوفر له عمر أطول.
- سرعة تدفق أعلى من الزيت البترولي مما يساعد علي القيام بعملية التزييت بكفاءة أعلي.
- معدل بخر أقل.
- أداء أحسن في درجات الحرارة العالية جدا والمنخفضة جدا.
لكن عيب الزيت التخليقي أنه يجب أن يستخدم في محركات تستخدم بنزين خالي من الرصاص.
هل ممكن الاستغناء عن الزيت البترولي الذي نستخدمه في المحرك منذ فترة واستخدام زيت تخليقي بدلا منه؟
مكن بعد تفريغ المحرك من الزيت البترولي ثم وضع (فلش) ثم ادارة المحرك لعدة دقائق ليقوم الفلش بإزالة كل بقايا الزيت المعدني ثم تفريغ الفلش من المحرك ثم إضافة الزيت التخليقي.. ولكن يجب عدم استخدام الزيت التخليقي في المحركات القديمة لأنه يؤدي الي إضعاف المحرك وتقليل كبس الموتور لأن المحرك القديم يكون علي أجزاءه الداخلية رواسب وعند إضافة الزيت التخليقي فإنه يزيل هذه الرواسب مما يزيد من مقدار الخلوص بالأجزاء الداخلية للمحرك فيؤدي الي تهريب كبس المحرك.

الاحتياطات الواجب مراعتها عند استخدام الزيت التخليقي:
- عمل قياس لمستوي الزيت كل أسبوع أو أسبوعين.
- تغيير فلتر الزيت في كل مرة يتم فيها تغيير الزيت.

- فحص عدم وجود تسريب زيت من المحرك بشكل دوري.

- تغييره فورا عند زيادة درجة حرارة محرك السيارة علي 100 درجة -لأي سبب من الأسباب- لمدة تزيد علي 5 أو 10 دقائق (وهو ما يسمي الأوفر هيتنج) لأن الحرارة العالية تفقده خواصه فلا يؤدي مهامه بحماية المحرك بل يضره، وهذه النقطة تنطبق أيضا علي الزيت المعدني.

[bassam zaki]

شكرا للإهتمام

[احمد على 1999]

انا عادى بقلب معدنى لو مزنوق فى فلوس و برجع احط تخليقى عادى
بحط شل الترا و عامل 260 الف و بغيره على 25 الى 30 الف كم عادى برضه