توكلت على الله و استقريت على الماروتى - ارجو دخول اصحاب الخبرة فى الماروتى

[أحمد السويسى]

أولا السلام عليكم

ثانيا أنا مش بهبطك لكن بديلك كل اللى حسيته بالعربية

أنا لسا بايعها انهارده والله موديل 2007 وانا اول يد جبتها زيرو

العربية من ساعة مجبتها واتضايقت منها خشنة شوية وضيقة جدا

بصراحة من ساعة مجبتها وانا كنت كارهها بس بقول تقضى وخلاص

وزمايلى فى الشغل كان كل اللى ييجى يشتريها انصحه واقول اللى بيحصل معايا

لكن هى موفرة جدا فى البنزين وده على حساب السرعة على فكرة

لو العربية فى حالة ثبات وحبيت تجيب بيها 100 كيلو يلزمك دقيقة

لو انت ماشى على 100 وهديت فجاة عشان تجيب ال100 تانى

شغلانة _ كلمت التوكيل قبل كده عشان اركب تكييف

قال بيركب بس احنا مبنركبوش عشان بيأثر جدا على الموتور

الميزتين الوحيدين اللى شفتهم فى العربية البنزين وقطع الغيار

أنا عارف إنى سديت نفسك لكنى كلمتك بمنتهى الأمانة

لو دورت على مواضيعى فى المنتدى هتلاقى انى عرضتها للبيع

تقريبا 2008 يعنى من ساعة مجيبتها مغورتهاش إلا دلوقتى

وبعتها ب 26000 بالعافية

رأيى إصبر وهات حاجة أحسن على الأقل صينى أو إعلى وهات

التو 1100

وربنا يوفقك وييباركلك فى اللى هتجيبه

[حبيب الناس]

المشاركة الأصلية كتبت بواسطة tobgy استاذ حبيب الناس اسم على مسمى انا مش عارف اقول لحضرتك ايه بصراحة بجد حضرتك قولتلى كل اللى انا كنت عايز اعرفه الف الف الف الف الف شكر لحضرتك

يا باشا العفو ولا شكر ولا حاجه ولازم علي كل واحد عنده معلومه ميبخلش بيها علي حد واحنا هنا كلنا بنساعد بعض واي سؤال عن العربيه انا تحت امر حضرتك

المشاركة الأصلية كتبت بواسطة أحمد السويسى أولا السلام عليكم وعليكم السلام ورحمة الله وبركاته ثانيا أنا مش بهبطك لكن بديلك كل اللى حسيته بالعربية كلامك معقول ومنطقي واحنا هنا كلنا مبقولش غير الصراحه أنا لسا بايعها انهارده والله موديل 2007 وانا اول يد جبتها زيرو ربنا يرزققك بأحسن منها إن شاء الله وبرضه تكون زيرو العربية من ساعة مجبتها واتضايقت منها خشنة شوية وضيقة جدا من ناحية الخشانه انا اول مره اسمع حد بيقول العربيه ده خشنه الكمال لله واحده ومفيش عربيه كل انتاجها بيكون بدون اخطاء 100 % ممكن كان زيت الفتيس ناقص او كان فيه مشاكل في الات الجر كان لازم تكشف عليها وتعرف السبب ايه لكن مش كل العربيات الماروتي فيها خشانه من اول ما انتجت سنه 1983 وبالنسبه لضيق العربيه بالفعل العربيه لازم تكون ضيقه بفعل حاجمه الصغير جدا مثلها مثل الميني كوبر في الحجم مع فرق السعر بصراحة من ساعة مجبتها وانا كنت كارهها بس بقول تقضى وخلاص عمر ما كل الناس اجمعت علي ماركه واحده من العربيات ولو حصل ده مكناش شوفنا مراكات كتيره ماشيه في شوارعنا وزمايلى فى الشغل كان كل اللى ييجى يشتريها انصحه واقول اللى بيحصل معايا ربنا يجازيك خير علي النصيحه وده واجب كل مسلم لكن هى موفرة جدا فى البنزين وده على حساب السرعة على فكرة كلامك منطقي 100 % يعني العربيه ده ميفعش اجيب بيه اكتر من 140 كم في الساعه علشان كده موفره في البنزين لو العربية فى حالة ثبات وحبيت تجيب بيها 100 كيلو يلزمك دقيقة لا والله في اقل من دقيقه بكتير وانا كفيل بأثبات ذلك والعربيه بقالها معايا سنتين موديل 2008 لو انت ماشى على 100 وهديت فجاة عشان تجيب ال100 تانى اكيد هديت لحد ما سرعتك وصلت اقل من 40 كيلو وكملت وزوت السرعه وانت علي نفس الغيرا الرابع لازم تاخد معاك وقت علشان تجمع سرعه الطبيعي ترجع للغيار الثالث ولما سرعتك تزيد لحد 60 انقل تاني علي الرابع هتوصل ل 100 كم في ثواني شغلانة _ كلمت التوكيل قبل كده عشان اركب تكييف التوكيل دول فشله وبيحبو يريحو دماغهم العربيه ده كانت بتزل مصر مكيفه لحد سنه 95 وهيا الان موجوده خارج مصر مكيفه وكمان فيه منها انجكشن وده كله بره مصر لكن هنا بيحاولو يقللوو التكلفه علشان مكسبهم يزيد لو عرفو يجيبو العربيه من غير بيبان ولا كاوتش هيعملوها لكن العربيه ده من مصنعها مجهزه لتكييف وكاسيت وسنتر وانزار لكن مش راكينين بيركبو بره التوكيل ولو ركبو للأسف العربيه بتخرج بره الضمان انا ركبتهم بعد ما الضمان خلص والعربيه الحمد لله ماشيه معايا بالتكييف زي الفل وبدون اي مشاكل قال بيركب بس احنا مبنركبوش عشان بيأثر جدا على الموتور اه بالتأكييد بيأثر علي الماتور زي اي عربيه بتكون مكيفه اول ما التكييف بيشتغل سحب العربيه بيقل لكن مش كتير وممكن نتفاده ده بدل ما نحط لها بنزين 80 نحط بنزين 92 مش هتحس خالص بفرق التكييف غير مع النقل الاول والثانيه والمارشيدير هتحس بفرق بسيط جدا في السحب لكن علي السرعه الثالثه والرابعه مفيش اي تأثير يزكر وعن تجربه شخصيه الميزتين الوحيدين اللى شفتهم فى العربية البنزين وقطع الغيار اكيد كل الناس اجمعت علي النقطتين دول واحب اضيف لحضرتك كام ميزه كمان عن تجربه شخصيه العربيه ده ممتازه في المناوره لصغر حجمها يعني تعدي من اقل خرم بين عربيتين من غير ما تتخربش ممكن تركنها في اي مكان ضيق وده ميزه كل الناس برضه تشهدلها ممكن تقفل ضهر الكنبه الخلفيه هتتديك وسه رهيب للشنطه نقلت بيها ديب فريزر مره وسرير نوم 120 بالملل والمرتبه والفخدين وكان زوجتي معايا في الكرسي الامامي تقبل اي نوع من البنزين واي نوع من الزيوت تكلفه اصلاح عيوبها رخيصه جدا كان كوبري اكتوبر واقف ومره واحده ست خبطني من ورا فخبت انا في اللي قدامي باظت الشنطه الخلفيه والكابوت والعربيه تشوفها تقول خلاص اتدمرت مش هتنفع تاني صلحتها ومش باين فيها اي عيب وكل ده مكلفنيش 1000 جنيه شامله اكصدام خلفي وامامي 2 فانوس خلفي وامامي شبكه اماميه واخره السمكي واجرة البهيجي اللي رش الكبوت اكيد ممتازه ومميزات تانيه كتير لا يتسع المقام لذكرها أنا عارف إنى سديت نفسك لكنى كلمتك بمنتهى الأمانة بشا الصراحه عمرها ما تسد النفس لكن كل واحد وله احلام في الحاجه اللي بيشتريها انت ملقتاش في العربيه اللي معاك او انت حسيت ان المبلغ اللي انت دفعته فيها مش مساوي لقيه الخدمات اللي بتاخده من العربيه معشان كده مكنش فيه قبول ولا ارتياح نفسي للعربيه وبجد الواحد لما بيكون مش طايق عربيه لو كانت احسن من مرسيدس والبي ام بتكون وحشه في نظره ولو لم تختلف الازواق لما تعددت السلع لو دورت على مواضيعى فى المنتدى هتلاقى انى عرضتها للبيع تقريبا 2008 يعنى من ساعة مجيبتها مغورتهاش إلا دلوقتى وبعتها ب 26000 بالعافية رأيى إصبر وهات حاجة أحسن على الأقل صينى أو إعلى وهات اعتقد انها افضل من الصيني اللي يبهرك بأمكانيته الكتير وهو جديد لكن عمره مش طويل التو 1100 الالتو افضل منها لكن فيه فرق في السعر كبير مع العلم الالتو نفس حجم الماروتي ونفس السعه الداخليه ووفيه منها 800 سي سي نفس الماروتي بالظبط لكن فق سعرها حوالي 6000 جنيه والفرق فقط في الاسم وشكل افوانيس مش اكتر لكن اللي عازو يجيب التو متكنش اقل من 1000 سي سي انجكشن علشان يحس بالفرق واكيد هيحس بفرق الفلوس وفي لحله ده الشفورليه اسبرك هتكون افضل منها وهتكون تقريبا بنفس السعر وربنا يوفقك وييباركلك فى اللى هتجيبه اسف اني طولت عليك لكن انا حبيت اتكلم بصراحه زاي ما انت اتكلمت بصراحه وربنا يوفق الجيمع للي بتمناه

اولا انا بشكر حضرتك علي ردك الصريح ناحية العربيه الماروتي وردي علي كلامك داخل الاقتباس

[أحمد السويسى]

شكرا حبيب الناس لمداخلتك انا حسيت العربية خشنة فى المطبات

مش فى الغيارات ولا الدركسيون بالعكس

وبالنسبة للصينى الاف ثرى الكل بيشكر فيها واصحابى معاهم من أكتر من 4 سنين وماشاء الله عليها مفيهاش مشاكل

بعكس معظم الصينى اللى بيكون فيه مشاكل وقطع غياره مش متوفرة

صينى عن صينى يفرق يا باشا
انا لما بعت فكرت فى الفيرنا او اللانوس _ لقيت دى عيوب كتير

ودى عيوب كتير وانا شايف إن الأف ثرى عيبها الوحيد هو إعادة البيع

شكرا ليك واتمنى الأفادة من خبرتك يا جميل- بارك الله فيك

[حبيب الناس]

يا باشا انت بتتكلم علي عربيه 1600 سي سي 108 حصان الماروتي 800 سي سي 36 حصان لازم يكون فيه فرق طبعا لكن احنا بتكلم عن عربيه كويسه ومش عامله مشاكل وبتاعه مشاوير داخل البلد فرين او ثلاثه وسعرها حنين وتصميمات يابني تقفيل هندي يعني مقبوله
وده بعض صور العربيه BYD F3

[مورو]

بصراحه يا استاذ طوبجى انا مع الاستاذ احمد السويسى وبعدين الماروتى مش رخيصه برضوا دى 38000 - يعنى ممكن تصبر شويه وتجيب عربيه اكبر من كده - معلش ممكن يكون كلامى ميوافقش هواك لكن دى نصيحتى .