تجرربتى مع مركز المتحدة وصيانة ال50 الف كم هاااااااام جدااااااااا

[eng_yeso]

يا جماعة بجد المشكلة انهم افتكرو انهم كسبو منى 1850 جنية لكن فى الحقيقة على رأى استاذ svneleven دة عمل سمعة سيئة لنفسة وفى الاخر الموضوع غالى جدا ومبالغ فية اوى وفى الحقيقة انا اتخدعت فيهم بجد وعن نفسى ما اعتقدش انى هاروحلهم تاناستاذ svneleven انا عن نفسى روحت السبت وباردو كان التأخير وبالنسبة للاسعار هو ممكن يرد براحتة انا مش باكدب انا ممكن ارفعلكم صورة الفاتور لو عايزين انا اصلا تفتكرو لية ضيعت من وقتى وعملت الموضوع الكبير اوى دة عشان الناس ما تتخدعش فى حد وتجربتى دى تكون عبرة ليهم
وعن نفسى بقا لو هادفع المبلغ دة كلة يبقى اروح التوكيل احسن على الاقل هناك ناس مهندسين هيقابلوك وتعرف تتكلم معاهم وتاخد حقك مش الحتة المقطوعة اللى المركز دة فيها دة انت لو فكرت تتكلم ممكن يتاووك هناك يا عم ههههههههه
على العموم انا شرحت تجربتى وقولت رأى الشخصى وكل واحد عقلة فى راسة يعرف خلاصة يا رجالة

[محمود حسين المتحدة]

بسم الله الرحمن الرحيم

بصوا بئة يا شباب الموضوع شكله كبير اوى بصراحة طبعا احنا فى المتحدة مش متعودين نسمع كلام زى اللى مكتوب فى الموضوع الغريب ده بصراحة ( وده على فكرة بشهادة صاحب الموضوع وقبل منه مئات العملاء مش عايز اقول الاف لعدم المبالغة ولكنها فعلا بضعة الاف قليلة تناسب عمر المركز اللى هو سنتين ) ولو هتسمحولى انا لسة شايف الموضوع حالا فانا بس عشان اقدر اتعامل وارد على كل اللى قاله البشمهندس ياسر وبعض الاراء اللى بصراحة بردوا لى تعليق عليها اسمحولى انا بس هحتاج اراجع امر الشغل الخاص بالشمهندس ياسر وجمع بعض المعلومات عن الموضوع او بمعنى ادق هافتح تحقيق ادارى صغير كدة عشان بس انا مكنتش موجود فعلا فى المركز .
بس مبدأيا طبعا اكيد احنا مش مبسوطين من الكلام ده خالص وهو على فكرة اكبر بكتير كقيمة بالنسبة لينا يا بشمهندس ياسر من 1850 ج اللى حضرتك شايف اننا خطفنا حضرتك واستولينا عليهم من حضرتك واالحمد لله فعلا اننا محدش
( تاواك ) هنا عندنا فى المتحدة - ده على تعبيرك - لما بتقول (لو فكرت تتكلم ممكن يتاووك هناك يا عم ههههههههه )
باشا انا فعلا مش مصدق اللى بقراه والله . وحد بيشارك فبيقول حسبى الله ونعم الوكيل يا جماعة الموضوع مش كدة وياريت الناس تعرف تفاصيل الكلام اللى بتقوله دى سمعة مكان محترم ولو انه البشمهندس ياسر هيكون على حق فى اى شىء اكيد هو هياخد حقه ولكن بعد اذنكم انا هارد على حضراتكم بعد لما اشوف امر الشغل وارفعه على الموقع عشان كلنا نشوفه خصوصا انه فعلا بعض الاسعار اعتقد غلط مع انى مش خبير اوى فى الاسعار - وهكون حسن النية وده الطبيعى وحق الاستاذ ياسر علينا - لو فكرت انه بس البشمهندس ياسر نقلها غلط مش قصده حاجة تانية .
وطبعا انا لى حق الرد على كل كلمة اتقالت بس بصراحة الكلام كتير اوى فشكلنا كدة هنعمله مسلسل او مجموعة حلقات سهرة يعنى . لانه فعلا استاذ ياسر كان يومه معانا طويل طبعا انا من تجربته اللى قريتها دى حسيت ان الراجل شاف يوم مش حلو خالص . قابل صاحب ورشة مش ملتزم بيجى الساعة 1.30 ومهندس استقبال فاشل بيقول اسعار غلط للعملاء ويبطلج عليهم عند الحساب ومعاه وحش كاسر اسمه محمد رشاد . حاجة غريبة بجد
عموما اانا مش هتأخر عليكم فى الرد اصلا كلام زى ده ممكن يخللى الواحد عينه ماتشوفش النوم ولكنها ضريبة النجاح والشهرة و الحمد لله .
سلام مؤقت

[محمود حسين المتحدة]

المشاركة الأصلية كتبت بواسطة peter magdy لسة كنت بقول لواحد صاحبى علية بس بعد معاناة حضرتك معتقدش انى اقولة على المركز دة دايما فى مصر لما يكون الحاجة جديدة بتبقى كويسة و اول ما تعمل سمعة كويسة بيبوظ فورا للاسف

يابشا خليك معانا للاخر وبعد كدة حضرتك اعمل اللى انت عايزه ...احنا على حد تعبيرك عملنا سمعة كويسة وده على فكرة شىء مش سهل فى مجال شغل زى بتاعنا لدرجة ان حضرتك كنت بتوصفنا لواحد صاحبك . وعايز اكد لحضرتك اننا ناس تعرف تحافظ على القمة لانه باختصار احنا مش هواة وبالنسبة للشغل انا هاكتفى فقط برأى كاتب الموضوع ( لو هتروح تعمل صيانة عندهم هتاخد شغل كويس ) واما الاسعار فواضح ان الموضوع فيه سوء تفاهم واكيد هيبان بس هو عموما احنا حضرتك مش الارخص ولكن احنا سياسة التسعير عندنا ليها قواعد واصول الناس كلها بترتاح فيها والا كنا نكون قاعدين بدون عمل وطبعا بدون سمعة
وعموما انا هانتهزها فرصة واعيدها تانى هنا ....
بص عشان اريحك ثوانى هاجيبلك كوبى من اللى انا كاتبه بنفسى فى الموضوع اللى عرفنا بمصر موتورز من خلال استاذ احمد فاروق ومثبت هنا فى نفس القسم من ضمن المنتدى
وبالنسبة لسياسة التسعير فانا هاوضحها من خلال شرح لشعار المركز اللى هو ( لسنا توكيل .. ولسنا ورشة .. لكن حاجة جديدة )
وده معناه اننا من حيث الحجم والامكانيات والتجهيزات والفنين اعتقد نصلح اننا نكون مركز خدمة معتمد يعنى توكيل ولكننا لسنا توكيل
وايضا لسنا ورشة بالرغم من ان اسعار المصنعيات لدينا تعتبر قريبة جدا من اسعار الورش ( اللى بتفهم فى النوع ده من السيارات )
على سبيل المثال مصنعية تركيب الكاتينة فى ال 516 بتكون فى التوكيل 350 ج عندنا هتكون 150 ج
مثال تانى تركيب المساعدين امامية او خلفية فى التوكيل بتكون 180 ج عندنا هتكون 60 ج غير اننا ممكن نعمل خصم فى المصنعيات ولو بسيط فى حالة ان السيارة يكون فيها شغل كتير يعنى مثلا لو حضرتك بتغير الاربع مساعدين المفروض تكون 120 ج وساعتها ممكن نمشيها 100ج فقط وهكذا
بالنسبة لقطع الغيار ممكن العميل يشترى قطعة الغيار واحنا بنركبها له وفى نفس الوقت احنا بنحاول على اقصى جهد اننا نوفر قطع الغيار لدينا وفى حالة ان حضرتك بتشريها من عندنا بتكون تقريبا بنفس الاسعار اللى ممكن تشتريها به من اى محل بتتعامل معاه وبيكون فى فرق بسيط يعنى من 5 الى 25 ج على حسب القطعة فى مقابل توفير الوقت غير اننا بنعمل ضمان بجد على قطع الغيار الاصلية مثل الضمان المتبع من التوكيلات للمسافات والمدد يعنى لو طقم كاتينة بيكون ضمانه 40000 كم او سنتين وبالنسبة لباقى قطع الغيار الاصلية بيكون 5000 كم او 3 شهور ايهما اقرب
باختصار احنا بنعمل شغل توكيلات باسعار الورش

[محمود حسين المتحدة]

المشاركة الأصلية كتبت بواسطة طارق المحلاوى

استاذ طارق مش فاهم ردك على الموضوع معلش انا معرفش اوى فى الصوروالابتسامات .. لو شرح بسيط فقط للمعنى او لو حد يشرحالى على السريع . بس هو الاكيد ان حضرتك مش مبسوط .. عموما ربنا يكرم انشاء الله

[طارق المحلاوى]

المشاركة الأصلية كتبت بواسطة محمود حسين المتحدة استاذ طارق مش فاهم ردك على الموضوع معلش انا معرفش اوى فى الصوروالابتسامات .. لو شرح بسيط فقط للمعنى او لو حد يشرحالى على السريع . بس هو الاكيد ان حضرتك مش مبسوط .. عموما ربنا يكرم انشاء الله

أستاذ محمود ..الحقيقة الغرض من الصور هى الأستغراب الشديد من الموضوع لأنى متابع جيد لأخبارمركز المتحدة فى هذا المنتدى ومنتدى اسبيرانزا كلوب وسمعتة الطيبة جدا ولو تفتكر انى قلت لحضرتك انى ناوى أزوركم لعمل بعض الشغل فى عربيتى رغم انى من المحله الكبرى ولكنى لسه مشغول ..وكنت ناوى اقول لحضرتك فى نفس المشاركة أن تقوم بالرد السريع والحقيقة انت طلعت عند حسن ظنى وماكدبتش خبر ورديت ..وأرجوا التفسير السريع بعد ما حضرتك تبحث وتحقق فى الموضوع ..وكلى ثقة فيكم ..تحياتى لصاحب الموضوع وللأستاذ محمود....