تكاليف العمره الكامله

[حسام البورسعيدى]

للاسف مشكلة العمره انك صعب تحدد تكلفتها من غير ما تفتح الموتور وتشوف محتاج ايه ...

ولكن عموما تكلفه العمره الكامله للـ 128 مش هتزيد عن 1500 جنية ...

[حواش]

شكرا حسام باشا بس انا كده احترت خالص مستر استرا قال 2500 وحضرتك 1500 الفرق كبير ياريت حد يفترض ان كل حاجه خربانه في الموتور ياجماعه ارجوكم اسعار كل حاجه في العمره

[mr_astra]

المشاركة الأصلية كتبت بواسطة حواش شكرا حسام باشا بس انا كده احترت خالص مستر استرا قال 2500 وحضرتك 1500 الفرق كبير ياريت حد يفترض ان كل حاجه خربانه في الموتور ياجماعه ارجوكم اسعار كل حاجه في العمره

لا حضرتك اختلط عليك الامر انا متكلمتش فى فلوس لسة
عمل اربع شمايز 200 جنية
طقم بستم 250 جنية حاجة محترمة
طقم شنبر 120
توضيب الوش 300
طقم سبيكة 80 جنية
تجليخ كرنك 100
طقم جوانات 75
جوان اضافى 20
مصنعية للعمرة الكاملة من 350 الى 500
زيوت وفلتر وبنزين 240

[حواش]

شكرا مستر استرا بس ممكن اعرف يعني ايه توضيب الوش وهل كده عمره كامله مش ناقص حاجه وياريت تقولي الحاجات ديه استراد ولا جديد وهل يوجد انواع معينه تنصحني بيها معلش تعبتك معايا

[mr_astra]

ما فيش تعب ولا حاجة احنا اخوات
معنى توضيب وش السلندر يعنى عمل قواعد ودلايل للصبابات ولحام وتجليخ اى شفة او سوكة مكسورة او مشروخة
تركيب طقم صباب جديد وتركيب جلد صباب من الاخر الوش هاتجيبة من الخراط بيلمع اكنة جديد على التركيب على طول

وبكدة يبقى حضرتك عملت عمرة كاملة

والحاجت جديدة مش استيراد

اما انواع البضاعة فاحب اطمنك انة كولة مضروب ومغشوش ومقلد وبايظ وتالف وما يستهلش جية لكن هو دة السوق وهى دى قطع الغيار اللى بنتعامل معاها ... اى حد فى الدنيا بكرة يقدر يدخل قطع غيار البلد ولا فى رقابة ولا مواصفات قياسية ولا جهاز يقدر يحميك الا بفاتور وعشان تجيب فاتورة منة لله الى اخترع ضريبة المبيعات تمن الحاجة يزيد عليك 10% ومش هتلاقى حد من اساسة يديلك فاتورة عملنها للهيئات الحكومية بس
قطع الغيار المضروبة حدث ولا حرج بمنتهى الامانة نسبة نجاحها 5 % وخصوصا العربيات الاطالى كافة ...يعنى اية واحد قابلتة صدفة عمل عمرة كاملة كاملة والموتور نفخ وهى بتلين !!!!!انا مش ببشر عليك ولا حاجة اعوذ بالله لكن دى الحقيقة

اول امبارح كنت فى سوق السيارات بشترى عربية لصديق وصاحب العربية باين علية الاحترام اوى وبيحلفلى انة لسة عامل طقم شنبر وللاسف الموتور بينفخ .....انا مصدقة والله لكن اكيد قطع الغيار اللى راكبة مضروبة

طب انا عاوز اسالك سؤال هاتلى موتور فى مصر اتفك قبل كدة فية حاجاة ومش بيرشح زيت
هتلاقى معظم المواتير بتجيب زيت من عند الكرنك الامامى او المن عند اويل سيل الكرنك الخلفى او من الكامة او من الكرتيرة والميكانيكى يا عينى بيحط جوان جديد بعد ما بينضف مكان القديم وبيحط جملكة ويربط من نار بس لازم تلاقى تنفيس وخد بالك انا بيتكلم على صنيعى عندة ضمير ولا الاويل سيلات حدث ولا حرج دى بقى قصة عارف اية اللى بيحصل

الميكانيكى بيفك الاويل سيل القديم ويبعتك تجيب زية ودى غلط لان بالتاكيد الاكس اللى بيشتغل علية الاويل سيل اتاكل من قطرة جزء فاذاى الاويل سيل الاستاندر يشتغل والمفروض انى اخد الاكس اجيب على مقاسة وفى الاخر يطلع الاويل سيل اساسا بايظ ووجودة زى عدمة ساعتها بنضر نديق سوستة الاويل سيل بنقص منها جزء
معلش انا طولت عليك شوية بس حبيت اوضحلك الصورة وانورلك الطريق انت قادم على عمل اية
وبالنسبة للانواع انا برىء انى ادلك او ارسحلك نوع معين عشان ما تدعيش على
لكن وبدون ادنى مسؤلية على هات الحاجات اللى مش بتتقلد يعنى يؤلك دة طقم المانى او ايطالى تبعد عنة وخليك فى بلد منتجتها مش بتتقلد زى الكورى

تقبل مرورى