مشكلة فى استهلاك البنزين 40 لتر= 300كم !!!

[meroslave]

المشاركة الأصلية كتبت بواسطة sam ram لا طبعا 300 كلم على 40 لتر رقم كبييير جدا الا لو العربيه فيها مشكله او مشغل الاوفر درايف على طول المتوسط العادي 8 - 9 لتر لل 100 كم = 11 - 12.5 كم للتر = يعني الصفيحه تعمل 220 - 250 كم وتزيد مع زياده الزحمه و الاشارات و الشد والكيك داون لكن مش لدرجه انها تاكل بنزين للدرجه دي !! 300‏ كم على 40 لتر ... يعني ال100 كم ب 13.33 لتر ده استهلاك ال 2000 سي سي ميعملش كده !!!

سبب مشاركتى

هوه رد فعلك ده!!

بقول نفس كلامك بالضبط

بس المشكلة وعرفتها

لو عندك اقتراح قولو وانا معاك

وشكرا على ردك

[sam ram]

المشاركة الأصلية كتبت بواسطة meroslave سبب مشاركتى هوه رد فعلك ده!! بقول نفس كلامك بالضبط بس المشكلة وعرفتها لو عندك اقتراح قولو وانا معاك وشكرا على ردك

يا باشا واضح ان في مشكله في العربيه ولازم حضرتك توديها لمركز معتمد او متخصص طالما مش محبذ التوكيل
مع ان ابو رواش مس بالسوء ده .. هو زحمه و ضغط جامد لكن حيكشفو على العربيه و يعرفو مشكلتها و يصلحوها كويس ان شاء الله

كان نفسي افيدك بس واضح ان حضرتك سألت كتير وللاسف معنديش الخبره الكافيه اللي اقدر افيدك بيها في مشكله ميكانيكا

لكن الحاجات العاديه اللي ممكن تزود استهلاك البنزين عن المعدل الطبيعي
ضغط هوا في العجل قليل
اوزان كبيره زياده في العربيه
مشغل الاوفر درايف على طول
الكيك داون بيزود الاستهلاك جامد بس المعدل ده معناه انك دايما ماشي كيك داون !!
ان العربيه طول الوقت ماشيه على سرعات كبيره فوق ال 150 كم/س مثلا
زوائد على جسم العربيه زي شبكه شكلها غير انسيابي و بالتالي في السفر و على سرعات عاليه مقاومه الهوا تعاكس العربيه جامد وتزود الاستهلاك
تسريب في دوره البنزين وكان يبان تحت العربيه و هي واقفه بعد مشوار


ده غير عيوب ميكانيكيه زي الفلاتر (بنزين وهوا) و البوجيهات و طلمبه البنزين والبوابات و السوفت وير
مزيج غني .. يعني العربيه مبتاخدش هوا مع البنزين والحرق اغلبه بنزين بس
فرامل اليد مشدوده و دي تعمل مشاكل اكبر و اكتر
تيل مش مظبوط وكنت ساعتها حتحس بيه او تسمع صوته
ار بي ام مش مظبوط او العربيه بتنقل على ار بي ام عالي وكان يبقى صوتها عالي وواضح

وديها لدكتور يا ياباشا يكشف عليها و يعرف العله فين بدل ما الواحد بيخمن كده وممكن يحيرك زياده ptmnlo123per1106
وان شاء الله تطلع حاجه بسيطه و تتظبط معاك
واسف اذا كنت مقدرتش افيدك اوي

[أشرف الشفقى]

أنا كنت فاكر إن الأوفر درياف ده بيوفر فى البنزين مش العكس. إللى كنت فاهمه إن الأوفر درايف بيخلى العزم أقل وال آر بى إم أقل بس العربية تمشى بسرعة (على حساب العزم) يعنى تنفع فى السرعات العالية (لكن مش فى مطلع مثلاً).
http://en.wikipedia.org/wiki/Overdrive_(mechanics)

[sam ram]

المشاركة الأصلية كتبت بواسطة أشرف الشفقى أنا كنت فاكر إن الأوفر درياف ده بيوفر فى البنزين مش العكس. إللى كنت فاهمه إن الأوفر درايف بيخلى العزم أقل وال آر بى إم أقل بس العربية تمشى بسرعة (على حساب العزم) يعنى تنفع فى السرعات العالية (لكن مش فى مطلع مثلاً). http://en.wikipedia.org/wiki/Overdrive_(mechanics)

كلام حضرتك مظبوط تماما
هو العادي ان الاوفر درايف يبقى دايما شغال وبيبقى ساعتها نوره مطفي في التابلوه
لما نفصل الاوفر درايف لمبته تنور OD off
فلما كتبت مشغل الاوفر درايف على طول كنت اقصد تشغيل لمبه الاوفر درايف بالتابلوه و بالتالي بيكون الاوفر درايف مش شغال
اعتذر عن الخطاء الغير مقصود و شكرا على التصحيح

[meroslave]

معلومة للمتابعة

انا كشفت على العربية فى مركز معروف قوى

متخصص بس فى الاستهلاك والعوادم وصيانة الكاربيراتير والحقن الاليكترونى


كشف على العربية بجهازين مختلفين

وكشف على العادم وكشف على البوجيهات


والنتيجة

انه قاللى ان العربية سليمة 100% ومفيش اى مشكلة

والعادم بيقول ان البنزين بيتحرق كلو

والبوجيهات نظيفة تماما ومفيش هباب عليها يعنى الحرق مضبوط


والمفاجأة انى سألت المهندس قبل ما اعمل اى حاجة عن استهلاك الماتريكس الاوتوماتيك

قالى 185 كم لكل 20 لتر داخل المدينة

200 كم لكل 20 لتر خارج المدينة

يعنى فى أحسن الحالات

1 لتر = 10 كم !!

وده تقريبا استهلاكى


......

واقفل المحضر فى ساعته وتاريخة