|
#1
18-10-2011, 10:44 AM
|
|||
|
|||
اللانوس و الافيو و اللوجان .. عن تجربة شخصية..
ايوه ..
انا كان معايا التلاتة .. اللانوس و بعدها الافيو و حاليا معايا اللوجان .. و لأني لقيت ناس كتير بتقارن بين العربيات دي .. و لانه انا استفدت من المنتدى كتير جدا و لسه باستفيد.. و لأنه محدش هنا بيبخل بمعلومة يعرفها..  فقلت اقارن انا ليكم بينهم من واقع تجربتي الشخصية .. انا كان معايا لانوس LS كوري بترولي زيرو موديل 99 .. و بعتها 2006 و جبت بعدها افيو LS كوري فضي زيرو موديل 2006 و بعتها 2011 و جبت بعدها لوجان فرنساوي مغربي فيراني بلاك لاين موديل 2012.. طيب .. قبل ما نبتدي لازم اوضح انه انا لا افقه شيئ في الميكانيكا ..  و انه انا شاب توكيلاوي .. اي حاجة بعملها في التوكيل مهما كانت غالية .. و لذلك انا اقدر اقارن بين العربيات كسواقة و اعادة بيع و خدمة ما بعد البيع .. انما ميكانيكا ... شكرا .. و علشان ننظم الموضوع هقارن الاول بين الافيو و اللانوس و اللي هيكسب منهم هقارنه مع اللوجان لتحديد السيارة الفائزة ..  و نبدأ التصفيات .. انا اول ما والدي باع اللانوس(ايوه كانت بتاعة والدي وانا كان معايا ابيزا بس ده موش موضوعنا دلوقتي.. و لا هو موضوعنا برده انه والدي بيشتري العربيات زيرو و بيبعها بعد 5 او 6 سنين و يجيب زيرو برده ) كان نازل يشتري لانوس تانية قام اخويا اقنعه و قاله لانوس بلانوس يبقى هات اللانوس الجديدة اللي هي الافيو ,, اجدد و اشيك و انضف .. و لانه والدي كان ضعيف امام الشيفروليه ( اصله عاش في امريكا كام سنة كده ) فجابها على الفور .. و اول احساس حسيت بيه لما سقتها .. ايه ده .. دي لانوس .. هي هي في السواقة .. نفس الاحساس و نفس الركوبة و بدون اي اختلاف .. بس الصبر طيب ..شوية كده و ظهرت بقى كل الاختلافات يعني في السحب ..هي هي و اللانوس و الافيو عموما عربيات جراية و احساس السواقة ..هي هي و بكرر دي زي دي .. مفيش فرق خالص .. العفشة .. في اللانوس عادية.. العربية ناعمة و موش بتحس اوي بالطريق و واطية جدا .. و هتحك بالعبيط ( انا كنت لما باركب اتنين اصحابي ورا كنت بنزلهم قبل المطبات و اعدي المطب و اركبهم تاني  )بس في الخمس سنين مسمعناش فيها صوت اما العفشة في الافيو .. فحاجة منيلة بنيلة  من بعد 30 الف و خبط ورزع و طقطة و تكة و ما شاء الله كانت بتعزف سيمفونية .. و مالهاش حل .. و تربط او تغير او تولع ..مفيش فايدة .. اه العربية كانت عالية .. بس انت حاسس بكل زلطة في الطريق .. و عمودك الفقري الله يكون في عونه .. مأساة.. التكييف .. في اللانوس متوسط ..موش تلاجة يعني ..بس لو مظبوط هتمشي على اتنين و هتبقى مبسوط.. و قعدنا الخمس سنين مقربناش منه .. اما في الافيو .. انا معرفش عملوا فيه ايه .. و لا له لازمة .. رحت ماليته في التوكيل 3 مرات في خمس سنين .. و علشان انبسط ( موش اسقع ) يا 3 يا اربعة.. ده غير تأثيره الواضح في سحب العربية .. القعدة .. من حيث الوسع الاتنين واحد و ان كنت شاكك ان اللانوس اوسع.. من حيث الراحة في الكراسي اللانوس اريح بكتييير انما الافيو كراسيها عالية و موش مريحة ( كل الكومباكت كده على ما اعتقد ).. التابلوه و التقفيل الداخلي .. الافيو احسن بلا شك و الخامات انضف طبعا .. بس برده تحس انك راكب عربية فقرانة .. مفيهاش جديد كده .. اللانوس تابلوها هو هو بقاله 13 سنة  و بالنسبة للاضاءة الداخلية الاتنين واحد.. صوت الموتور .. هنا تتفوق الافيو .. صوتها هادي و عزلها احسن من اللانوس .. بس ساعات .. الاربي ام بتاعها بيعلى لوحده و تزعق من غير ما حد يقربلها و لا يجي جنبها .. وبرده مالهاش حل الشكل الخارجي .. الافيو احسن طبعا .. و دي مسألة اذاوق .. التوكيل .. طبعا هم الاتنين واحد دلوقتي .. بس انا كان معايا اللانوس ايام ما كانت بتاعة ابو الفتوح .. و ابو الفتوح كان احسن بمراحل من منصور .. الاتنين دباحين .. و منصور اكثر تنظيما من ابو الفتوح .. بس الخدمة في ابو الفتوح احسن و اسرع .. انت لازم تتطلطع في منصور 5 ساعات علشان شغل في العربية مياخدش نص ساعة .. و حاجة كمان كانت بتضايقني اوي في منصور .. بيبوظوا نضافة العربية و بيطلعهولك بشحمها .. حركة هايفة بس بتضايق ..  و روتيني شوية منصور .. بس موش بطال .. و منصور بيوفر كل قطع الغيار .. و ان كان طبعا معروف انه اللانوس قطع غيارها منوفرة بره التوكيل بالعبيط .. و اي سباك بيشتغل فيها دلوقتي .. بس انا معرفش لاني ماليش في الشغل بره التوكيل.. اعادة البيع : لانوس ثم لانوس ثم لانوس عربية بقالها 13 سنة في السوق شكلها متغيرش بقت عاملة زي طابع البوستة .. تتباع في هوا .. على عكس الافيو تقيييييييييلة جدا في البيع .. و خصوصا علشان حكاية تغيير شكلها دي .. و هي تقيلة عامة في البيع .. النتيجة : اللي يقولك اللانوس و الافيو عربية واحدة.. يبقى غلطان .. اللانوس احسن ميت مرة من الافيو .. هو هو نفس السحب .. و هي هي نفس الامكانيات .. و هو هو نفس احساس السواقة .. و هو هو نفس التوكيل و نفس الماركة .. بس عفشة اللانوس احسن .. و تكييف اللانوس احسن .. و قعدة اللانوس اريح .. و سعر اللانوس ارخص (بحوالي 8 الاف جنيه تقريبا). و قطع غيار اللانوس ارخص .. و اعادة البيع في اللانوس احسن .. يعني - و عن تجربة شخصية - اللانوس تكسب  فلو بتقارن بين اللانوس و الافيو اشتري لانوس و انت ضميرك مرتاح .. طبعا تتفوق الافيو عن اللانوس في توافر الفتيس الاوتوماتيك .. بس انا بقارن ما بين المانيوال ( الاتوماتيك سعره فوق اوي ).. و كده نبقى خلصنا الجزء الاول من المقارنة .. و نقارن المرة الجاية بين اللانوس و اللوجان .. و مستني اسمع رأيكم .. و تقبلوا سلامي 
__________________
Dr.wael el7yran
|
|
#3
18-10-2011, 12:04 PM
|
||||
|
||||
رد: اللانوس و الافيو و اللوجان .. عن تجربة شخصية..
اسلوب جميل فى الحوار,كمان عن خبرة فى التعامل واكيد لك خبرة ولو بسيطه فى الميكانيكا,لذلك ارجوا من حضرتك ان تعرض بعضها ولو من بعيد,وعلى العموم اشكرك على موضوعك ومتابع بأهتمام ومنتظر بفارغ الصبر
__________________
|
|
#4
18-10-2011, 12:17 PM
|
||||
|
||||
|
رد: اللانوس و الافيو و اللوجان .. عن تجربة شخصية..
يا باشا شكرا على الموضوع الراائع
وهى فعلا مقارنه مهمه جدا  فى انتظار باقى الموضوع 
__________________
سبحان الله و بحمدة
سبحان الله العظيم
|
|
#5
18-10-2011, 12:23 PM
|
||||
|
||||
|
رد: اللانوس و الافيو و اللوجان .. عن تجربة شخصية..
أكيد نتيجة المقارنة النهائية واضحة
وأكيد برضه هنستفيد منك كثير شكراً جزيلاً 
__________________
لوجي الجميلة  أنضموا لحملة المليار صلاة على الرسول صلى الله عليه وسلم
|
 |
|
|
