تقسيط مباشر من شركة رينو

[محمد_ الليثى]

فى اطار مشاركة المعلومات اللى متعودين عليها فى منتدانا الجميل ..احب اقولكم انى رحت رينو مصر الجديده ومضيت الابلكيشن بتاع استعلام كونتكت كار

وسالته على التأمين قالى براحتك لو عايزه مع كونتكت بيعمل حوالى 5% ومصر للتأمين بيعمل حوالى 3% وكسر من عشره مش فاكر كام

وبطبيعة الحال وبغض النظر عن النسبه انا قلتله عايز مع مصر للتأمين بلاش شركة خاصه فى موضوع التأمين ده
قالى عموما هى الخطوه دى مش دلوقتى دى عند الاستلام بتشوف الشركه اللى انت عايزها وتمضى معاها

دعواتكم بسرعة وصول العربيه بقى وهشاركم لو فى اى جديد

[محمد_ الليثى]

زى ما وعدتكم باطلاعكم على كل جديد..

أأسف انى اقولكم انى لغيت الحجز بعد الزياده المبالغ فيها للسانديرو 9000 جنيه على سعر التوكيل !!!
وذلك بعد معرفتى بالزياده(بالصدفه) ايوه بالصدفه.. واليكم الموقف

كنت فى معرض اوتو كار فورملا اللى اتعمل من حوالى شهر وبفرج واحد صاحبى على السانديرو فى قسم رينو.. جت البنت اللى بتعرف العميل على العربيات وبدأت تقولنا المميزات وكده ووسط كلامها الاقيها بتقولى ودى عامله 92000 على سعر التوكيل

قلتلها ازاى ده انا حاجز على فكره.. قالتلى اه ما الاسعار كلها اترفعت بعد موضوع الدولار

رفعت التليفون على مدير فرع مصر الجديده اللى انا حاجز منه وقابلته كان موجود فى المعرض ( راجل محترم جدا بالمناسبه)

قلتله انا ازاى اعرف ان العربيه اترفع سعرها بالصدفه!!!
طيب افرض كانت العربيه جت وانا لسه معرفش.. لايمكن امضى ووقتها هتقولى ايه العمل انا جبتلك العربيه وانا هقولك مش ده السعر اللى اشتريت بيه وندخل فى قصه انا وانتم ؟!!
وكمان السعر يتغير عليا ليه وانا حاجز ما انت كده غيرتلى الحسبه اللى انا كنت حاجز عليها واخترت العربيه على اساسها.. امال انا بحجز ليه ؟!!!

قالى للاسف الاسعار اتغيرت على الكل سواء حاجز جديد او قديم او بيشترى من معرض"ده غير الاوفر برايس بالنسبه للمعرض كمان" طيب خلاص نرفع المقدمه شويه.. قلتله مقدمة ايه يا افندم اللى ارفعها انا هجيلك بعد المعرض اسحب اللى دفعته انا ايه اللى يخلينى اركب عربيه ب 92000 جنيه ده غير تراخيصها ومصاريفها

قالى اللى تشوفه يريحك اعمله انا تحت امرك وشكرته.. وماشى فى اجراءات السحب بقالى اسبوع اهو ومستنيهم يرجعولى الفلوس واسلمهم وصل الحجز

ودى كانت قصتى ومع السلامه رينو