من فضلك ... إقتنى هذة الكراكيب فى سيارتك !!!

[zing0]

تجهيزات فى سيارتك و ليست كراكيب
================
قد نظنها كراكيب و أشياء ليس لها قيمة و تحميل بدون داعى و لكن لها أهميتها.
قد يتعرض أى شخص لموقف على الطريق أو يرى فيها غيره و لا يستطيع عمل شئ و لا تقديم المساعدة لعدم توافر الأدوات اللازمه. لذلك وجب (قدر الإمكان) تواجد هذة التجهيزات فى سيارتك: الموضوع حصرى و مصرى موتورزاوى.

أولاً داخل شنطة العربية:
------------------
- كوريك و صليبة عجل و إستبن (فى ناس بتشيلهم على أساس إنهم ملهومش لازمه)
- كمبروسر هواء (حتى لو أرخص نوع أبو 40/50 جنية)
- شنطة عدة خفيفة تحتوى على:
مفك عادة/صليبة -مفك رفيع - بنسه - شكرتون - مترين سلك توصيل 1 مم - مقص صغير أو سكينه - فيوزات (قد تستبدل بسلكة شعر كحلّ مؤقت) - طقم كهربا للإشعال العادى (إبلاتين و كوندنسر و طقم بوجيهات حتى لو مستعملة نضفهم و شيلهم إستبن) - لمبة عادية 5 وات بالدواية بتاعتها و وصلها سلكين لتوصيلها مباشرة على البطارية - قطعة صنفرة ناعمة - سير كاتينه (حتى لو مستعمل) و سير دينامو - علبة فيها شوية مسامير و صواميل و ورد و كوليهات جميع الأحجام - مفاتيح من رقم 8 إلى 23 (الأكثر إستخداماً مقاسات 8/10/13/17 و قد يختلف من سيارة لأخرى)
- جركن/زجاجة مياه كبيرة لغسل الأيدى
- زجاجة مياة مقطرة لدورة التبريد (الريداتير)
- كيس بريل لغسل الأيدى
- فوطة نضيفة و أخرى زفرة (مخلوطة شحوم و زيوت للتنظيف)
- لتر زيت سايب (أو باقى غيار الزيت فى الجركن)
- قمع / سرنجة 10 سم لتزويد الزيت
- أكياس / شنط بلاستيك
- سجادة صغيرة أو قطعة كرتون علشان تنام عليها لو هتضطر تنزل تحت العربية (قد تستخدم الدواسات كبديل)
- حبل قطر للجر أو سلسلة حديد (متر و نص عالأقل).

ثانياً داخل السيارة:
----------------
- مناديل طبعاً
- مشط جيب
- كيسين معطر
- زجاجة مياة للشرب مش مركونين (علشان الحرارة داخل السيارة بتغير تركيبتها الكيميائية)
- شريط بنادول/أسبيرين/نوفالدول/أبلونج نوفالجين (أى حاجة علشان الصداع)
- فلوس (50 جنية عالأقل) لزوم الطوارئ (مرة رحت أفول و إكتشفت إنى نسيت المحفظة ربنا ستر و كان معايا واحد زميلى) - ملحوظة: متسيبش مبالغ كبيرة فى العربية و لا أى حاجة قيّمة علشان البلد دلوقتى حالها حال, و ربنا يستر طريقنا.
- فلوس تانى (بس المرة دى فكّه - عملات معدن يعنى) ليها مليون لازمه.
- قلم و نوت بوك صغير و تكتب فيه أرقام تليفونات هامة ( زى رقم أخوكم zing0 مثلاً) !!!
- كارت شحن موبايل (إحتياطى) و بطارية إستبن مشحونه طبعاً يبقى أحلى واجب.
- الطفاية (خليها تحت الكرسى علشان تبقى قريبة و ربنا يسلمنا).

كفاية كدة العربية بقت مليانه كراكيب, بس المهم النظام علشان لجان المرور متعاكسش و تقدر كمان توصل للعدد بسهولة عند الحاجه.
======================
حد عنده أى كراكيب يحب يضيفها؟

[zing0]

نسيت حاجه ممكن نكركب بيها تانى:
أرنديد - سيليكون حرارى - جملكه - أنبوبة أمير (إللى بيقولوا ساعات عليه سوبر جلو)

[myson medo]

مشكوووووووووووووووووووووو ووووووووووووور

[nktis]

تسلم الايادي و ربنا يجازيك خير ,,, بجانب جركن بنزين في الشنطه للطواريء .

- شريط بنادول/أسبيرين/نوفالدول/أبلونج نوفالجين (أى حاجة علشان الصداع)

زانتاك اقراص او اي حاجه للحموضه عشان المسكنات بتعمل حموضه ,,, و شريط برمبران او موتليم او درامينكس لما ينزل عشان لو فيه فرد بيرجع او بيجيله غثيان من الركوب .,,. و ربنا يكفينا و اياكم شر الطرقات .

[eng/walaaeldeen]

السلام عليكم
موضوع جميل انا عربيتي مليانه كراكيب بس بصراحه بتنفع وقت الزنقه
واحب اضيف لمبة للكشاف الأمامي
بلدوسه
طقم ريش مساحات
والله المستعان