بص يا صاحبى و استحمل عشان انا رغاى شوية و انت اللى فتحت الموضوع
والدى الله يرحمه جاب اللادا سنة 1997 موديل 1995 زيرو من المعرض المهم و بإختصار كان ساعتها فى عربيتين فى السوق فى نفس الفئة السعرية او متقاربين الا و هما اللادا و الـ 128 نوفا و طبعاً اكيد اللادا تكسب على الاقل تقفيل بلدها و مستوردة مش متقفلة فى ورشة النصر للسيارات و كان لسه نازل ساعتها الهيونداى اكسيل و الدايو لانوس و الكيا برايد العصفورة و الشاهين و قيل فيهم ما قال مالك فى الخمر بالسوء طبعا لدرجة انه اشيع انى الهيونداى اكسيل و هى بتجرى الاكس الخاص بالعجلة الخلفيةبيتكسر و نفس الكلام اللى بيتقال دلوقتى عن الصينى و عشان كدة دايما بقول الصينى هيعمل زى الكورى يوماً ما.
و لرغبتنا فى عدم المغامرة بالقرشين اللى ساعتها كانوا لا بأس بهم فقررنا اننا نجيب اللادا و من ساعتها و هى معايا من بعد والدى الله يرحمه و كل ما افكر فى التغيير تحصل حاجة تعطلنى بس ربنا يسهل الشهر الجاى و ابيعها و اركب زيرو و مش هبيعها كرها فيها لكن نفسى فى حاجة ناعمة شوية و تكييف و كدة.
أما عن رأيى فى العربية:
خد عندك مميزات
مميزاتها:-
- عربية ممتازة و عملية جداً.
- عالية عن الارض.
- قطع غيار رخيصة و متوفرة.
- عربية اقتصادية الى حد كبير و موفرة فى البنزين.
- لما تطلب منها الجرى مش بترفض بس محتاجة وقت عشان تجمع سرعة و ده عشان
- ثقل بودى العربية و صاجها المتين.
- ثابتة جداً و ده موضوع نسبى شوية يعنى نسبة الى التكنولوجيا القديمة المستخدمة فى صناعتها تعتبر ممتازة.
- شنطتها واسعة مقارنة بمثيلاتها او بنفس فئتها.
- الكابينة من الداخل ليست بالضيق الذى وصفته حضرتك و ده برضه موضوع نسبى.
- العربية ممكن يكون فيها عطل بسيط و ماشية معاك متقولش لا (عكس الجديد ممكن حساس هايف يوقفها).
- اصدامات صلب و ليست فبر.
- سهلة الصيانة.
- تتغذى
على اى نوع بنزين من 80 - 90 - 92 و لو انى ال 80 بهدلى الكربراتير حاليا بحط 92 لعدم وجود 90 .
- عفشتها عندى ناعمة جدا (برضه ارجع و اقولك نسبة الى تكنولوجيتها القديمة يعنى متقارنهاش بعفشة هيونداى النترا مثلا) لكن اركب 128 و لادا هتسب للـ 128 بس بشرط الاهتمام الدائم بها!
- جبت بيها 160 فى طريق الطور - شرم الشيخ يعنى مقفل عداد و كانت ثابتة و كويسة اوى بس ممكن يكون الهوا كان معايا مش فى وش العربية
و كمان اخدت بيها مطب و انا راجع كان على سرعة عالية و العربية كملت عادى جدا و واثق انى لو معاية عربية جديدة كانت اتبهدلت تماما.
- سخان للتدفئة شتاء يجعل السيارة مثل الفرن و ما شاء الله مازال يعمل بكفاءة حتى الان لدى و المفروض بها مروحة صيفا لكن حفاظا على صحتك و اعصابك لا تشغلها صيفا نهائيا لاحتمال حدوث اختناق
.
العيوب:
- السيارة لا يوجد بها اى وسائل رفاهية من قريب او من بعيد الا الكاسيت (جبناه على حسابنا كمان هو و السماعات) و السخان الشتوى اللى قلت عنه فوق.
- عيب قاتل و خطير الا و هو نظام العفشة القائم على بيض العفشة الذى يحتاج كما قلت لصيانة دائمة و الا فربما تجد السيارة و قد انفتحت احدى عجلتيها الاماميتين للخارج و نامت السيارة عليها كمن كسرت قدمه
و عند ذلك الوقت لن ينفعك سوى الونش لنقلها.
- تصميم قديم و مقاوم للهواء مما يجعل من اندفاع السيارة و تجميعها للسرعة مهمة صعبة.
- علو صوت الموتور خاصة على السرعات العالية.
- عدم وجود شئ يسمى عزل تعتبر فاتح الشباك زى قافله تقريبا.
- و لا يخفى عليكم ثقل الدركسيون و الفتيس و الأبواب و كل شئ بالسيارة و هذا شئ مشهورة به اللادا رغم انى البولونيز تتفوق عليها من ناحية الثقل.
- تقفيل مقبول ساعة الشراء بعد عدة سنوات اصبح غير مقبول تماماً و لا يرقى للسيارات الجديدة حتى المجمعة محلياً لان التقفيل الروسى فى ذلك الوقت كان الفكر الشيوعى يسيطر عليه قليلا و من المعروف انهم بيعملوا حاجة اى كلام من ناحية التقفيل بس ممكن تعيش معاك العمر كله.
- الموتور خشن نوعا ما.
فى المجمل السيارة صفقة ليست خاسرة فى ذلك الوقت و بذلك السعر و لكن بأسعارها الحالية و خاصة المجمعة محليا فلا انصح بها تماما الا من يريد سيارة سيدان او ليس معه ثمن الـ 4*4 و يتطلب منه عمله نقل اشياء ثقيلة او التنقل لاماكن وعرة بعض الشئ يعنى سيارة شغل.
اما لو لاحد ما للتنقل اليومى و داخل و خارج المدينة و السفر فهنالك موديلات اخرى يمكن شراؤها اعتقد انها ستكون افضل كثيرا.
و اللادا بتصنع موديلات رهيبة برة مصر بس توكيل الامل توكيل فاشل و هو سبب فشل السيارة فى مصر فى الحقبة الأخيرة فبالرغم من انتشارها بشكل لا بأس به الا اننى مازلت مصمم انه توكيل فاشل لان الموديلات الحديثة لو نزلت مصر ستلاقى نجاحا كبيراً.
و شكراً لصاحب الموضوع و اسف للإطالة و حاسس انه حيقولى متخشش ترد على مواضيع ليا تانى
.
رد: في حد عاجباه اللادا ؟؟؟
