تقرير عن زيارة المتحدة للصيانة الإثنين 17/3/2014

[aboomarahmad]

السلام عليكم ورحمة الله وبركاته
الإخوة في التيجو الأعزاء
من زمان اوي وانا حاسس اني مش راكب عربية 2000 سي سي....العربية مخنوقة...تقيلة....بتجر حاجة من ورا...مش عارف...بيني وبينكم وصلت اني كنت فاكر انها كدة عشان صيني بقة والبودي تقيل و...و..و....يعني بأقنع نفسي وخلاص
وخاصة بعد مركبت عربية الشغل وكانت فيرنا اوتوماتيك بردو بس ما شاء الله طلقة....ماشي وعشت على كدة
لحد من اسبوع واحد صديق حميم جدا ليا معاه اختها ونفس الموديل...جاني وخلاني اسوق عربيته لا لشيء إلا اني حافظ مصر الجديدة لآنه من الجيزة....صدفة يعني
أفاجأ ان العربية غير بتاعتي خاااااااالص....ماشاء الله طلقة بردو....ادوس سنة بنزين الزق في الكرسي!!!!! ايه الخيبة دي؟
قررنا نروح المتحدة وكان العيب في وجهة نظرنا بين حساس الفرامل او بوابة الثروتال او فقط بوجيهات او اي حاجة تانية همة يكتشفوها....الفرامل قافشة مثلا...
المهم...رحنا امبارح قابلنا ا/محمود وكالعادة كأننا اصحاب المكان...الله يكرمه والله....قابلنا المعلم سحس الشهير بالأسطى حسين....طلع يجرب العربية ورجع منشكح وقاللي العربية الحمد لله تمام بس ننظف بوابة الثروتال ونكشف على البوجيهات
انا كنت مغيرها من 8000كم بس من حوالي سنة ونص لآن العربية مش بتمشي كتير
الحمد لله نظفها وكشف على البوجيهات لقاها كويسة....نظفها وركبها تاني وكشف على فلتر الهواء ونظفه لقاه كويس الحمدلله
حط العربية على جهاز كشف الكدب.....قصدي الأعطال تمام التمام ولله الحمد والمنة
طلعت اجرب....الحمد لله العربية فكت اوي عن الأول وكانت زي الفل......لكن بردو مش زي عربية صديقي المحترم
التانية تدوس بنزين خفيف تلاقيها نتشت منك لأودام بحيث انك ترجع انت لورا....المهم روحت وجربتها على الدائري ما شاء الله عربية تانية خالص....جيب بجد
صديقي اقترح عليا اعمل حاجة هو عملها هية اللي خلت عربيته كدة....اني اجيب منظف انجكشن Injection Clesnerواحطه في التانك وامشي بيها شويه حوالي 20-25كم كدة وقاللي هتلاقيها حاجة تالتة
عملت كدة النهاردة الصبح هوة ب41ج. من on the run وطلعت مشيت طريق السويس ورجعت...عملت حوالي 35كم
بس للأسف هية هية ما زادتش عن امبارح......
المهم عايز اشكر ا/محمود والأسطى سحس على معاملتهم أولا وعلى الواجب اللي عملوه ثانيا وعلى الضمير في الشغل ثالثا وده الأهم والحمد لله.....
على فكرة دي تاني مرة بس اروح فيها عندهم...كأنهم من بقية العيلة......ده ذكاء في الشغل انه بيشتري العميل وبيكسبه
يعني الواحد لو ربنا اراد وغير العربية بردو ان شاء الله هروحلهم

م.ياسر جادو

[AbOnOrA]

الف شكر على التقرير يا باشمهندس ياسر والشكر موصول للمتحدة طبعاً ياريت كل المراكز تتعلم اهمية client satisfaction ده وتتاكد ان ليه تاثير مباشر على return on investment (ROI)

بس سيبك انت المهم عربيتك يا سيدى والفرق بينها وبين عربية صديقك هو ما يطلق عليه بالبلدى عربيه متفتحه بمعنى انه من ساعة ما جابها عامل الموتور بشكل رياضى اكتر مع الاهتمام بمنظومة الخلط والاشعال
يعنى اللى الحاجات اللى هو بص عليها برضو
البوجيهات ، الفلاتر بالاخص الهواء ، البوابة ، الانجكشن ، خروج العادم كل ده اكيد تمام بس زى ما قوتلك انت علشان مبتجريش بالعربيه كتير

منظف الانجكشن ده تاثيره نسبى ومحتاج بعد ما تستخدمة تغير فلتر بنزين ويستحسن تعملة قبل الصيانة الدورية وبعد ما تخلص التفويلة ديه تغير كل الفلاتر

اداء طلمبة البنزين كمان مهم فى التسارع بس المفروض ان لو فيها حاجة كانت بانت على الجهاز

غير كدة الكاوتش نقشه ومقاس وضغط الهواء فيه مؤثر على السحب

تانى علشان متتوهش منى اعمل صياناتك الدورية بانتظام ولو هتستخدم المنظفات ديه غير بعدها الفلتر واهتم بتغيير الزيت ونظافه فلتر الهواء والبوجيهات وابقى احرق على الغيارات شوية واجرى بيها علشان تفتح الماتور بس كده

[aboomarahmad]

شكرا على ردك وإفادتك.....تصور ان كل الناس قالتلي بردو كدة....اجري بالعربية...العربية محتاجة تتفتح!!
اقرص على الغيار....ايه ده؟
دا انا عمري في حياتي وانا بسوق فعليا من 1988 تقريبا عمري ما قرصت على العربية اللي تحت رجلي....بخاف افوت الموتور...ههههه
طيب اذا هية الحكاية كدة بسيطة....نقلب الفتيس مانيوال بالستيب ترونيك ونطلع طلعة كدة طريق السخنة وربك يسهل.....
وان شاء الله نفيدكم بالنتيجة

وشكرا مرة تانية على الإفادة