طريقة تغيير زيت الفرامل بالكامل ( فرامل + دبرياش ) بالصور

[عصام غنايم]

طبعاٌ كلنا عارفين اهمية منظومة الفرامل فى اى سياره

والمنظومه تدى بتعدمد تماماٌ فى عملها على زيت الباكم

ولذلك عملت موضعى ده لتوضيح بعض الامور الخاصه بدورة الفرامل وكيفية صيانتها

وعلى فكره الطريقه دى تنفع فى كل العربيات مش الدايو بس

بس انا هنا موضح الطريقه على عربيتى ( دايو لانوس 2008 كامله ) وطبعاٌ متعدله

ياريت الموضوع ينال اعجابكم

و لما يعجبكم متنسوش الدعاء ( بالشفاء لى ولزوجتى ولاولادى وبالستر وسعة الرزق )



بسم الله

هنبدأ موضوعنا

بنبزه تعريف مختصره عن زيت الفرامل او ( زيت الباكم )

زيت الفرامل ( الباكم ) من المكونات الاساسيه لمنظومة الفرامل فى اى عربيه ويمكن يكون اهم مكون
لان لاقدر الله عند وجود تسريب زيت فلا يوجد فرامل اصلاٌ

زيت الباكم هو السائل المسؤل عن توصيل الحركه الفرمليه من الماستر العمومى ( الموجود فى صدر العربيه فوق السيرفو ) الى المساتر الفرعيه فى الاربع عجلات واحداث الحركه الفرمليه

خواص السائل ده انه ( اصفر شفاف , ذو لزوجه خفيفه , قوامه مقارب لقوام الماء , يتحمل درجات حراره عاليه بدون تغير فى خواصه , درجة غليانه تقريبا 260 درجه مئويه ( بالنسبه لل DOT 4 ) , مزيل للدهانات , سام للانسان , شره للرطوبه )


زيت الباكم انواع
( DOT 3 , DOT 4 ) لسيارات الركوب
( DOT 5 ) للنقل الثقيل والاوتوبيسات


طيب ليه بنغيره ؟

لما بيكون الزيت ده فى حالته الجيده بيقوم بوظيفته الفرمليه جيداٌ

ولاكن بعد فتره من التشغيل خواص السائل ده بتتغير وبالتالى ادائه بيتأثر بالسلب

وده بيبان من لونه بيتغير من الشفاف الى الغامق وبنلاحظ وجود شوائب فى القربه

ولذلك ينصح مصنعو السيارات باستبداله بالكامل سنوياٌ بغض النظر عن الكيلوات المقطوعه نظراٌ لشراهته الكبيره للرطوبه والتى تخفض درجة غليانه من 260 درجه مئويه الى 165 درجة مئويه


بعد معرفنا الجزء النظرى من الموضوع نخش على الجزء العملى وهو تغيير الزيت


( الطريقه دى تنفع لكل العربيات )


بسم الله

هنبداء بفتح الكابوت هنلاقى على صدر العربيه السيرفو وهو عباره عن اسطوانه سوداء مثبته من ناحية بصدر العربيه ومن الناحيه الاخرى مثبت عليها الماستر العمومى وعليه قربة زيت الباكم



هنفتح قربة زيت الباكم ونشيل الغطاء بتاعه على جنب بعد ما نفصل فيشته ونصفى الزيت الموجود فى انبوبة القياس الموجوده تحته



هنجيب سرنجه 10 سم من اى صيدليه وهنبداء نشفط زيت الباكم القديم من القربه ونرميه بره

( طبعاٌ بحزر وبعيد عن البويه لانه مزيل للبويات )

بعد ما فضدينا الزيت القديم

هنملا زيت باكم جديد لحد ما نوصل لعلامة MAX اللى فى جنب القربه

طيب نوع الزيت الجديد ايه ؟

الكاتلوج بيقول غير يا اما بزيت ( DOT 4 ) او ( DOT 3 )


انا عن نفسى بحط زيت (DOT 4 ) لان خواصه ودرجة تحمله اعلى من ال ( DOT 3 )

عندك فى السوق انواع كتير واسعار كتير

انا بفضل اللوكهيد الانجليزى او ال ATE SL الالمانى

هشتغل ب SL الالمانى
ودى صورته



هنام تحت العربيه من وراء الناحيه اليمين يعنى اللى جنب السواق من وراء ودى ابعد ناحيه من ماستر الفرامل

1 هنبص على الكالبر او الدشمه من جوه هنلاقى مسمار 9 او 10 مفتوح من فوق ومتغطى بغطاء كاوتش هنشيل الغطاء وهنبداء نفك المسمار ده لحد ما ينزل زيت بغزاره



( طبعا نبعد الزيت عن ايدينا ولو لمس اى جزء من الجسم نغسله بميه بس كويس لانه زيت حامى ولو اتساب على الجلد بيسبب التهابات )

2 هنقوم من تحت العربيه ونسيبه يفضى ونبص على القربه لحد ما نلاقى الزيت وصل لعلامة MIN

هننزل تانى ونقفل المسمار ده كويس ونغطيه تانى ونكب شوية ميه على كل الاماكن اللى الزيت لامسها علشان مياكلهاش

3 هنقوم ونزود القربه بالزيت الجديد لحد ما نوصل لعلامة MAX


هننزل على الفرده التانيه من وراء

ونكرر الخطوات من 1 الى 3



وبعدين الفرده اليمين من قدام

اللى جنب السواق هنلف الدركسيون للناحيه اليمين على الآخر علشان نطول الدشمه من بره

ونكرر الخطوات من 1 الى 3



وبعدين الفردة الشمال قدام بتاعت السواق

هنلف الدركسيون الى الناحيه الشمال على الآخر

ونكرر الخطوات من 1 الى 3



كده احنا خلصنا الاربع فرد

باقى ايه ؟
؟
؟
؟
الدبرياش

لأن كلنا عارفين العربيات اللى الدبرياش بتاعها على زيت باكم بتأخد من نفس قربة الفرامل

( طبعا فى عربيات الدبرياش بتاعها على وير دى بالنسبالها الموضوه خلص كده )


بالنسبه للدايو

هنبص جنب مقاس الزيت بتاع المكنه هنلاقى ماسورة زيت الباكم واصله لبستم ماشة الفتيس وهنلاقى نفس المسمار اللى شفناه على العجل موجود عليها

هنكرر الخطوات من 1 الى 3



بكده احنا غيرنا زيت دورة الفرامل والدبرياش بالكامل

الطريقه دى برغم بساطتها الا انها فيها مميزات كتير

اولاٌ

اننا اتأكدنا ان الزيت اللى فى القربه فوق و حتى الزيت الموجود فى المواسير
اتغير بالكامل

ثانياٌ

اننا اتأكدنا من خلو مواسير التوصيل وبالتالى الدوره كامله من الشوائب والمواد الغريبه اللى بتسبب سؤ الفرمله وايضا حدفة العربيه شمال او يمين مع الفرامل الفجائيه لو كانت احد المواسير ضيقه او فيها هواء

ثالثاٌ

استنزفنا الهواء الموجود بدورة الفرامل بالكامل ( ودى مهمه اوى )


ملحوظات هامه

لازم تتأكد من ربط جميع المسامير اللى فكتها بأحكام ( دى فرامل يعنى مش لعبه )

بعد ما نخلص كل حاجه هنملى القربه زيت بس ما نوصلش لعلامة MAX علشان لما نغير التيل بتيل جديد مستوى الزيت هيعلى شويه



طبعاٌ مننساش نقفل غطاء القربه بأحكام ونوصل فيشتها تانى

نغسل كل الاجزاء اللى اتعرضت لملامسة زيت الباكم بالماء جيداٌ



بكده الموضوع خلص اللى عنده اى استفسار يتفضل


بس متنسوش اللى طلبته منكم اول الموضوع


وسلام مؤقت

[hazem_khidr]

الف شكر يا ابو فارس علي الموضوع الرائع و المميز
كل يوم بتثبت فعلا مدي فهمك و عشقك للسيارات
تحياتي اليك مع تمنياتي بحياه سعيده دائما انت و الاسره الكريمه

[mahdyez]

تسلم ايديك ياباشا موضوع جامد 0000 وربنا مايحرمنيكش من هديتك
واسال الله العظيم رب العرش العظيم ان يسترها عليكم ويوسع رزقكم
امين يارب العالمين
ياريت مشرف القسم يثبت الموضوع

[عصام غنايم]

الف شكر يا ابو فارس علي الموضوع الرائع و المميز كل يوم بتثبت فعلا مدي فهمك و عشقك للسيارات تحياتي اليك مع تمنياتي بحياه سعيده دائما انت و الاسره الكريمه

لاشكر على واجب

ولك منى كل التحيه ولكل المشرفين والاعضاء فى هذا المنتدى المتميز

[عصام غنايم]

تسلم ايديك ياباشا موضوع جامد 0000 وربنا مايحرمنيكش من هديتك واسال الله العظيم رب العرش العظيم ان يسترها عليكم ويوسع رزقكم امين يارب العالمين ياريت مشرف القسم يثبت الموضوع __________________

ربنا يبارك ليك

انت انسان محترم وتستاهل كل خير

الهم اعطه بكل حرف دعى لى به بيت فى الجنه وبارك له ولكل المؤمنين

انا مش محتاج من القاهره الا انى اشوفك على خير

صدقنى اكبر مكسب جنيته هو معرفة كل الناس المحترمين هنا

وكما قال المثل

معرفة الرجال كنوز