مقابلة مصر موتور فرع الكويت الأولي ( بالصور)

[Payoo]

والله روح طيبه ومشاعر جميله والأجمل إن "مصر موتروز" هو إللي جمع الحبايب ولم شملهم

ربنا يديم المحبة على الجميع وينزع من القلوب الشر والغل والحسد

كل سنة وانتم طيبين

[ayman abdelrazek]

ايه الجمال ده ياجماعه
مقابله اكيد كانت رائعه محمد كمال باشا وشريف منسى باشا
الله ينور وربنا يديم الموده والحب اللى بيجمع الجميع
بس ماشاء الله ايه العجل(بفتح العين) الجاااااااامد ده معندكوش 128 ولا ايه
ربنا يزيد ويباراااااااااك يارب
وكل عام وانتم بخير

[ahmed_kamel]

تم رصد أماكن المقابله عبر الأقمار الصناعيه الخاصه بمصر موتورز
وسنوافيكم بأسرار المقابله وتسجيل صوتي لكل مادار بهىا

كل سنه وإنتوا طيبين يارجالة مصر بالكويت

[horas3000]

المشاركة الأصلية كتبت بواسطة bmkbmk اما بالنسبة للمقابلة فهى كانت بجد من اسعد المقابلات فى حياتى لدرجة انهم جم مشونا من الكافيه عشان هيقفلوا يعنى المقابلة استمرت خمس ساعات مروا عليا بسرعة جدا و الاستاذ شريف راجل فى منتهى الاحترام و لما قعدت معاه حسيت انى اعرفه من زمان و اتكلمنا فى مواضيع كتير جدا ... وبدأت المقابلة الساعة 7 مساءا و الحمد لله الجو كان كويس احسن بكتير من امبارح و قفت انا و شريف باشا فى البركينج اللى جنب بيته و سلمنا على بعض و اتكلمنا شوية و بعدين بصيت على العربية التعبانة مووت بتاعته ... ما شاء الله عربية وهمية و مش محتاجة رأيي انا علشان احكم عليها .. يكفى انها تحمل العلامة الالمانية العريقة (بورش)بس الفكرة ان انا محتاج عربية اوسع سنة علشان عربيات الاطفال و كراسى الاطفال و قررت انى استنى شوية وقت لما البنانيت يكبروا و اقدر اجيب عربية تكون داخلة دماغى مش مناسبة لظروفى العائلية و خلاص و بعدين بدأ التست درايف و اسمح لى يا شريف باشا اتغزل فى عربيتك شوية و اول ملحوظة طبعا ان المفتاح على الشمال و البورش كلها كدة .. الجهل وحش برده.. الواحد بقى مش متعود على البورش و طبعا العربية اول ما تركبها تحس انك قاعد فى صالون ..فرش جلد من النوع الفاخر و الاضاءة اللى من كل اتجاه ايه الشياكة دى و الاوبشنز دى ... ما شاء الله ما شاء الله ربنا يبارك فيها يا باشا و يهنيك بيها و بعدين لفينا بيها شوية على طرق الكويت السريعة و اللى للأسف كانت زحمة النهاردة علشان العيد و سقت العربية على المود العادى و المود الرياضى و كانت اكتر حاجة قلقان منها انى سايق عربية 4 * 4 يا ترى هتدينى اى احساس فى الثبات .. طبعا كان الاحساس انى سايق سيدان تقريبا و ثبات ما شاء الله زى الفل .. بس فى الاول حسيت ان العربية مابتشدش كويس و انا عربيتى برده بتجرى ... (كابريس) و بعدين خدت بالى من الفرق فى عزل الصوت و الهدوء داخل مقصورة الركاب اللى طبعا فى صالح البورش و ده حسيته لما بصيت للعداد و لقيته 120 فى الدوسة .. و قلت لنفسى يا عم هى بتشد و بتجرى بس انت اللى مش حاسس و بعدين قلت كدة للاستاذ شريف و على السبورت مود طبعا العربية بقى بتتلكك انك تهوب ناحية دواسة البنزين علشان تطلق العنان للوحش النائم تحت الغطاء الامامى ذو 4800 سى سى و 385 حصان .. حاجة كدة افلام يعنى ربنا يبارك لك فيها يا باشا بس و انتهى التست درايف و رجعنا خدنا الكابريس و رحنا صورنا العربيات فى حتة نور لأن الصور الاولانية كانت ضلمة شوية وبعدين على ستاربكس جمعية السالمية و قعدنا لحد الساعة 12 تقريبا لحد ما جم قالولنا انهم هيقفلو و كنا طبعا نفسنا يكو معانا اعضاء اكتر بس ان شاء الله متعوضة المرة الجاية و ان شاء الله نشوفكم جميعا على خير

و الله يا محمد باشا انا اسعد بالمقابلة دي و فعلا انا كمان كنت حاسس اني اعرفك من زمان. ان شاء الله لينا لقاء تاني و حتي كل واحد يعرف التاني علي صحابة و زميلة بما ان الطيور علي اشكالها تقع لاني بصراحة مبصدق الاقي حد يكون مصري بس يكون بالاخلاق و الفكر ده (بعيدا عن تصرفات اغلب المصريين في الغربة) لان هم دول اللي بينفعوا الواحد و يبقوا سندة في الغربة. و ربنا يديم المعروف

المشاركة الأصلية كتبت بواسطة sam ram ربنا يجمعكم في الخير دايما وان شاء الله المقابله الجايه تكون في المحروسه واتشرف بمقابلتكم ولو يا محمد باشا الصالون ضيق شويه ارشح لك الماتريكس .. صالونها واسع جدا و عائليه جدا جدا ... بس للأسف الاوفر درايف بطئ شويه عن السبورت مود في البورش ربنا يباركلم في عربياتكم ويرزقكم بالاحسن منها ... بس سؤال يا محمد باشا ... لو الكايين صالونها صغير .. بتفكر في ايه طيب ؟؟

تسلم يا باشا و ربنا يكرمك
و علي فكرة الماتريكس صالونها اوسع او يكاد يكون مساوي للكايين بالفعل هو فرق الارتفاع و الشنطة في الكايين اكبر

المشاركة الأصلية كتبت بواسطة ahmed_kamel تم رصد أماكن المقابله عبر الأقمار الصناعيه الخاصه بمصر موتورز وسنوافيكم بأسرار المقابله وتسجيل صوتي لكل مادار بهىا كل سنه وإنتوا طيبين يارجالة مصر بالكويت

و انت طيب يا احمد باشا
و صعب تكون رصدت المقابلة لاننا موهنا و مروحناش عالم المانجو و لا ضربنا صمدي و خدنا دورة مكوكية في شوارع الكويت لا انا و لا كيمو نعرف ناخدها تاني يعني حتي لو عذبتونا مش هنقول حاجة غير اللي مكتوب في المحضر فوق

[AbOnOrA]

بصراحة والله يا كيمو ويا حورس انتو فرحتونى جداً واعتقد فرحتو المصراوية كلهم بالخطوة الجميلة ديه
الصور والتست درايف والتغطية روعة والاهم من كل ده الروح الحلوة بينكم اللى بتثبت بجد ومن الاخر وبدون شعارات ان المصريين ولاد حضارة ومدنية وبالبلدى ولاد بلد وجدعان دايماُ وفى كل مكان وبكل صورة

والله بجد مش كلام شعارات او مجاملة وهقولكو ليه
المصريين شعب اجتماعى جدا فى الاساس وده خلى اللغة عنده راقية جدا ومرنة جداً واحيانا قد تكون اقرب للامتاع والاستمتاع منها لوسيلة تواصل وحوار
يمكن ناس بتشوف ان ده رغى او ان الشعب المصرى كلامنجية
لكن انا بشوف ده نتيجة لإجتماعيتنا وترابطنا وبراعتنا فى التواصل
وده اللى بيخلى العرب كلهم بيحبو لغتنا وافلامنا وثقافتنا الشعبية بجميع اطيافها
وده اللى بيخلى المصرى يستمتع بحواره مع مصرى زيه اكتر من اى حد تانى وحتى لو ملوش علاقات شخصية بحد بيدور على فيلم ولا تمثيلية مصرى يشبع ودانة من الكلام المصرى
وده برضو اللى بيخلى المصرى يتعامل ويتكلم مع كل البشر ويندمج بسهولة اكبر من ناس تانية مع مجتمعات كتير
وديه المدنية
وده اللى بيخلينا فى كل بلاد الدنيا نفضل مرتبطين ببلدنا سواء بالفضائيات او بالانترنت او فى محيط الجاليات ونفضل دايماً محافظين على روح ابن البلد المصرى فى اى مكان

لفت نظرى انكم وان كنتو اتنين بس قضيتو وقت طويل بدون ملل او فتور
لفت نظرى ان واحد فيكم وصل التانى مش سلام سلام من هناك وكل واحد روح بيتهم
روح ابن البلد والصاحب الجدع فينا دياما الحمد لله وياااااااارب تفضل دايماً

معلش انا طولت عليكم جدا انا عارف

تسلمو يا جماعة وفى انتظار مقابلات تانية بينكم ويارب دايما تتجمعو بالخير وعلى الخير وتكونوا صحاب واخوه للابد
ptmnlo123per122