الطريقة المثالية لحفظ السيارة (رفع السياره)

[hyundai2005]

منقول للامانه

[hoshos676]

انا عربيتي فيرنا وانا مسافر خلال شهر وهي موديل 2010 وجديدة عايز ارفعها معلش حاولوا تقوللي مكان كويس او قصدي جراج كويس ومضمون علما بأني من سكان فيصل وايه اللحاجات اللي مفروض اعملها علشان اما ارجع القيها تمام وشغالة كويس وهسافر سنة وهنزل اجازة شهر تقريبا ياريت الرد بسرعة يا جماعة بعد اذنكم...وشكرا

[RENAULT 18]

تسلم الأيادى يا باشا ................ موضوع مفيد جدا

تحياتى ::::::::::::::::::::::::: ::::::::::::::

[sad-bird]

انا عن نفسي اتكلم عن التجربة
المطلوب 2 كيلو شحم - 2- 3 كيس بودرة تلك 4 حمالات او حمير خشب أو حديد - قطعتين مشمع كبييييييييييييييييير بعرض 4 متر
1. دخل العربية الجراج بعد ما تغسلها ، افرش تحت منها قطعة المشمع الاولي
2. ارفع العربية على حمير خشب (لو ملقتش قول لاي نجار يجيب خشب شجر ويعملهولك بس القطع يكون مظبوط ومفيش اعوجاج فيها) يا اما على الحمير الحديد بس تحط بينها وبين العربية قطعة خشب او كارتون ، ومكان التحميل هتلاقيه على قاعدة العجلات جزء مربع موجود على قاعدة العجلات
3. التنك مليان بنزين على الاخر وتفوله لما تدخل الجراج ببنزين من الجركن يا اما تفضي التنك خاااااااااااااااالص ودي صعبة فالاولى انه يتملي للأخر
4. تنزل زي الباشا تنام تحت العربية وتقعد تلغوص بالشحم تجيب على ايدك وتمسح في الصاج من تحت
5. باقي الشحم اللي معاك تمسحه على باقي جسم العربية خصوصا ( العتب والاماكن اللي كان بيجي عليها مياه )
6. تحط عازل بين المساحات وبين الزجاج ( ورقة - حتة كرتون )
7. فك البطارية وسلميها لاي حد يشغلها على عربيته او فرغ شحنها خالص وشيلها لو بطارية جافة ( لكن الاولى انك تديها لحد يشغلها ويستفاد بيها او حتى تبيعها مستعمله وتجيب بطارية جديده )
8. املى الرادياتير مياه جديدة مع اضافة مانع للصدأ
9. فك الكاوتش من العربية ونمية على كرتون او خشب ورش عليه بودرة التلك ( ممكن تعمله بالشحم )
10 افرد المشمعة التاني فوق العربية واضغط عليه خليه يلزق فيها كويس وةيا حبزا لو يكون حجمه كبير ويوصل الارض وينزل تحت العربية علشان يقلل قدر الامكان اي وامل رطوبة
11 غطي العربية بالغطاء بتاعها
12 اقفل الجراج بعد ما تتأكد ان مفيسش اي حاجة معلقه ممكن تقع هنا والا هان او مياه مفتوحه او بتنقط

طبعا انا بتكلم عن جراج خاص وموجود في البيت اللي بيحصل بقى في الجراج العمومي الله اعلم بيه

عند العوده بالسلامة ان شاء الله
مطلوب 3 لتر جاز - قماش كتييير
1. هتجيب البطارية وتوديها تتشحن على ما تنزل العربية
2. تشوف الكاوتش ليه فيه هوا والا فضي لو فضي روح املاه هواء
3. فك الغطاء عن العربية ( وربنا معاك في التراب اللي هتلاقيه
4. شيل المشمع اللي على العربية واقلبه على ظهره واركنه
5. ركب الكاوتش
6. بل حته قماش قطن جاز وامشي بيها على العربية مرور عادي وسيبها 10 دقايق
7. امسح العربية تاني بالقماش في الاماكان اللي هتستعملها ( الابواب الجناب )
8. اغسل العربية غسله نضيفة لو فيك صحة لومفكش صحة لما تنزل على اي بنزينه بقى
9. ركب البطارية بعد الشحن وسمي الله ودور وسيبها تسخن براحتها على السلانسية
10. نزل العربية من على الحمير الخشب
11. سمي الله واتحرك وعلى اقرب بنزينه كمل غسيلها

طبعا لو انت راجع في الشتاء فخلي الشحم اللي تحت زي ما هو هينفع برضة في حمايتها من الرطوبة لو في الصيف هو هيسيح لوحده من الحرررررر اللي احنا فيه ويسقط او في البنزينة مع الغسيل
بعد ما العربية تخرج من الجراج اقلب المشمع على ظهره وكب عليه جاز واغسله بيه كويس وسيبه ينشف علشان تستعمله السنة اللي بعدها لو مش عاوزة ومستغني عنه ابقى شوف حد محتاجه اديهوله
واي خدمة

[hoshos676]

شكرا بجد مش عارف اقول لحضرتك يه شكرا ليك يا باشا.... بس معلش لو تقدر تقولي اجيب الحاجة منين الخشب او الحمالات اللي هتترفع عليها العلربية هل في مكان متخصص ولا ايه...تاني حاجة معلش هل في واحد متخصص مثلا يعرف يعمل الحاجات اللي حضرتك قلت عليها علشان انا بصراحة خايف اعمل حاجة تطلع غلط..وياريت لو حضرتك عندك صور للحاجات ديه ياريت تعرضها ..معلش تعبك معايا بس استحملني شوية...شكرا ليك بجد