شوية نصايح فى غسيل العربية 😉

[نبيل عبدالرحمن]

بما أن الشتا هدى شوية فى بعض المحافظات و فى محافظات الشتا خلص فيها .. و شتا يعنى طين على العربية و بهدلة ...
قولنا نقولكم شوية نصايح فى غسيل العربية 😉
هنتكلم انهاده فى موضوع مهم 😃
وحيوى رغم ان ناس كتير ممكن تشوفه مالوش لازمه 😠 😒
هنتكلم فى انك ازاى تغسل العربية فى مغسلة او لو انت عايز تغسلها بنفسك ☺ ؟
اول حاجه لما تيجى تخش المغسلة اوعى واياك تفتح كبوت العربية وتخلى الفنى بتاع المغسلة يغسل الموتور بالمية 😈
عارف لية ؟ 😉
الحركة دى بتطير كنترول وبتطير شوية حساسات حلوة كدة بقا😬
فبلاش احسن ✋
وحتى لو مطيرتش يبقى ان شاء. الله هتتاخر فى الدوارة بالاضافه ان ممكن تلاقى بوجية قطع وكمان هتلاقى العربية دايرة بالعافية وهتلاقى اللمبة الملعونة بتاعت Check Engine
نورت 😭
وطبعا الفيش هتبقا غرقانه مياه وفيشة الكنترول لو هو فى الحوض ودا هيسبب عيوب كتير 😑
نخش على غسلة العربية 😉✌
لازم تكون متاكد وقافل الازاز كويس عشان بتاع المغسلة بيشتغل بمسدس ضغطه جبار
والضغط دا ضغط غشيم يعنى
لو فية اى فرق بسيط او فى فتحه صغيره مهما كان حجمهاالعربية هتغرق ماية من جوا
توصى علي الفنى وهو بيغسل الكارتيرات بتاعت العجل ميتوصاش اوى ويطول المدة وبالذات قدام عشان كده هيدخل مياه بردوا على الموتور 😉
انا واحد من الناس مبحبش اغسل الموتور الا كل فين وفين وفين ☺
وغسل الموتور الصح بيبقا بمسدس هواء بيركب فيه ازازة كده اسمها بنتة وبتتملى بنزين 😉
وبتغسل بضغط الهوا اللى بيخرج معاه بنزين
وطبعا الكلام دا كله والبطارية مفصولة
وطبعا تحاول على قد ماتقدر متجبش بنزين على اى حاجه بتلف زى الدينمو وطرمبة المياه وطلمبة الباور عشان البلى بتاعهم ميبوظش 😉
وتبعد بردوا عن اى حاجة فيها جلد او كوتش زى قيعان المياه
وقواعد الموتور عشان اللبنزين بينشف الجلد على المدى الطويل
و فى طريقة كمان
1 - تغطى علبة الفيوزات و البطارية بكيس بلاستيك و تقفل عليهم
2 - فوطة مليانة جاز و تبدأ تمسح فى الموتور
هتلاقية نضف معاك و رجع شكلة جديد
و متقلقش بعد غسيل الموتور تلاقى الموتور بيدخن دخنة بيضا
دة عادى نتيجة الجاز
وانت فى المغسلة خلى الفنى بتاع المغسلة يجيب مسدس الهوا وينفخلك الرادياتير وسرفانتينة التكيف على قد مايقدر عشان اداء التبريد يبقى احلى وخليه بالمره يفك الفلتر بتاع الهواء ويعمل نفس الموضوع وينفخه نفخه حلوة كدة العربية هتفوق جامد معاك 😃
نيجى بقى
لو انت عايز تغسل العزيزة الغالية بنفسك 😀😀
خرطوم الماية الجميل 😂😂
الجردل اللى فيه ماية ببريل
سفنجة بنت حلال كده وتكون ناعمة😂
وابد يابطل بالسقف ☺
و لف على العربية كلها وابدا اشطف بالخرطوم وخش على الكارتيرات واغسلها واهتم بيها عشان بتبقى شيلة تراب وطين كتير 😃
هتقولى ما انت قولت فوق متتوصاش بالكارتيرات هقولك فوق كانت مغسلة فيها مسدس ضغطه غشيم انما انت معاك خرطوم مياه ضغطه ضغط الحنفية 😀
بتستنى اما العربية تنشف خالص وتلمعها بفوتة زفرة كده
( فوتة زفرة كده وجايلك فى السريع ) كركر استايل 😃
ياسلام بقا لو مزاجك رايق والغزالة عندك رايقة بقى ساعتها😂
هاتلك علبة بولش وعلبة كومبوند وكيس قطن
وتعالى على اى حتة فيها حكه وابدا بالكومبوند وبعد ماتخلص بالكومبوند خش بالبولش هتلاقى العربية بقى شكلها حلو و بتلمع 😃😃
اه وبلاش تقرص اوى ✋✋ بالكومبوند عشان متسحقش البوية وتبهت وانت مش واخد بالك 😃
ياسلام بقا بعد الغسلة التمام دى تجيب فواحة كدة شكلها شيك واسبراى معطر وملمع للطابلوة ياه على الجمال 😂😂
عشان احنا شعب بنحب الافورة شوية بلاش غسيل العربية عمال على بطال
هى مرتين فى الشهر حلوة اوى ( عشان البارومة يا اخى )
#‏ميصحش_كدة 😃
معلش طولت عليكم بس كان لازم اقولكم على الغسيل الصح

[AbOnOrA]

نصائح قيمة يا باشمهندس نبيل تسلم ايدك

[Ahmed_Esmail]

الف الف شكر يا اخى على النصائح الغالية دى