الدليل العجاب في دهان الخشب والابواب

[AbOnOrA]

Wood Painting 101
الدليل العجاب في دهان الخشب والابواب
ازاي تطرد النقاش وتعمل دهانات الخشب بنفسك
بالخامات والاسعار والتركات
النقاشين والاسترجيه واصحاب القلوب الضعيفه يمتنعون
حصريا علي اجمد جروب ديكور في مصر

فى الحقيقة معرفتى عن الابواب من كام سنه كانت تتلخص فى انه البتاع المستطيل ده اللى فيه اكره وبيفتح ويقفل !

ده من حيث الوظيفة اما من حيث الشكل فالدهانات الاكيه مع شويه ( نفض) جاز وقلب قلب قلب وادهن باللون اللى انت عايزة

اما دهان الاستر والبولستر وغيرها من الدهانات اللى بتستخدم اساسا فى الموبيليا لاظهار جمال الخشب فديه بالنسابالى كانت سحر وعلم كهنوتى خفى وبالطبع مكلف جدا جدا وبالطبع لجأت لدهان الابواب لاكيه وكانت صيحه العصر وقتها الاكيه المغسول والاسبونج وحاجات ما انزل الله بها من سلطان جربتها كلها تباعاً

وبعد اكثر من عشر سنين جواز اكتشفت ان الابواب كلها ( لاكيه ابيض ) تحولت الى وايت بورد للعيال مابين رسومات رسياليه او يفط دعائيه ليهم برضو

الولد مثلا حاطط بانتن والبنت سندريلا ده غير محاولات البنات لفرض سيطرتها على الولاد بكتابه اساميهم على الاوضة وباختصار معارك على مدى سنين اتحفرت على الباب نتجيتها كانت ان بشكله المألوف كباب اختفى تحت وطئه اياديهم المخربة الصغيره ، اما من الناحيه الوظيفيه اكتشفت ان ابعاد الحلوق اللى راكبه مش قياسيه باى شكل من الاشكال وبالتالى فانا محتاج ابواب وحلوق وما يتبعه من تكسير ومحارة

ومن هنا اصدرت فرامان بان جه الوقت لتغيير ابوب غرفتين ملاصقتين فى اطار حملة موسعة لاعادة النظام لبيتنا العزيز

ومن ثم اعدد الخطة بالتعاون مع زوجتى واولادى واقتناصا لفرصة اجازة نص السنة وكانت كالاتى

1- مرحلة الاعداد للمعركة بتكديس الاثاث ورفع المفروشات وخلافه استعدادا للبهدلة اللى هنشوفها

2- بداء البهدلة اللى هنشوفها بفك الابواب والحلوق وما يستلزمة من تكسير فى الحوائط ورفع الرتش

3- استدعاء عمو النقاش وسؤاله مبدئيا عن مستلزماته والمصنعيه وخلافه وافاد ان الموضوع سهل خالص ويخلص فى يوم شغل وهو نفسه هيدهنهم ويركبهم ماعدا التكسير كده ميه ميه

خد بالك (( النجار حاجة والنقاش حاجة والاسترجى حاجة تالته خالص ))

4- نزلت اشتريت جوز ابواب بالحلوق بتاعهم

خد بالك (( الابواب والحلوق انزل اشتريها بالمقاس بالظبط وقيس بنفسك بالمتر وبدقة النص سنتى بفرق ومهما كان الشغل معمول بالمكنه المكنه بتغلط واللى على المكنه بيغلط فراجع على كل حاجة كويس قبل ما تشترى او خد معاك حد بيفهم ))

5- ليسته طويله من المشتريات كاكسسوارات للابواب وخامات دهان هذكر اهما زى

مستلزمات الدهان

سيلر ( كيلو – 1.5 كليو ونص ) تكفى للبابين بالبرور والحلوق

+ عبوة لون بحسب الدرجة المطلوبة

عبوة سيلر باكين

طينة محروقه – سبيداج = للمعجون

تنر (( الدبابة )) جيركن شكله وحش كده وب 18 – 20 جنيه معرفش ليه ولازم النوع ده علشان قوى كفايه لانه يذيب السيلر

قطن وفرش – 1 و 3 بوصة – وسنفرة وجوانتيات (( قفازات))

لاصق ((تيب )) ده بيستخدم لتغطيه الحيطة او الاماكن اللى مش عايزين تتاثر بالدهان

مستلزمات النجارة

الابواب والحلوق والبرور (( عيدان الخشب ))

مفصلات واكر وكوالين ومسامير وكانات

والعدة شاكوش وكماشه وميزان ميه وشنيور ومفكات وازميل ومنشار

المدة الزمنيه

المتوقع يوم – يومين تركيب ودهان + نص يوم مشتريات لو هتشترى بنفسك

الفعلى : اسبوع

الصنايعية المطلوبين لو مش هتعمل كل حاجة بنفسك وبالترتيب كالتالى

صنايعى نحات / لتكسير الحوائط وعمال لنقل الرتش

نجار / لتركيب الابواب كمرحلة اولى ثم تركيب الكاولين والاكر مرحلة اخيرة

صنايعى مرمات محارة

استرجى او نقاش / دهانات الابواب والحلوق وممكن الحوائط من اثار التكسير

(( ممكن صنايعى واحد يعمل اكثر من وظيفة طبعا لكن غالبا دول كلهم كوم والاسترجى كوم تانى غير كده ادهنه بنفسك مش هتفرق ))

خطوات التركيب

بعد تكسير الحوائط بناء على مقاسات الابواب والحلوق بيتم تركيب الحلوق ثم الابواب وخد بالك من تعليم مكان المفصلات من ناحيه والكوالين من ناحيه تانية وعدلة رسمة الباب وخاصة لو بابين جمب بعض علشان لو النجار مسطول ممكن يدمر الباب او يخلف الشكل لو مخدتش بالك

استلم الابواب بالمقاسات والابعاد وبتفتح وتقفل كويس تماما مع اعتبار وجود مفروشات او سجاد وتمدد وانكماش الخشب فميبقاش فيه اي عوائق او خشونه ويكون سلس تماما

لو كله تمام يبقى قوام قوام تجيب اللى هيقفل المحارة علشان الابواب تثبت على الوضعيه ديه وتجنب دق اى حاجة او فتح وقفل الاابواب اثناء جفاف المحارة علشان متعملش شروخ ومشاكل بعد كده

ما سبق غالبا لازم ياخد يوم علشان تتساب المحارة تنشف وممكن يومين لو الجو برد

كده جه دور النقاش او الاسترجى وهنا هذكر بنقطتين

اولاً: فكرت اجيب ابواب مدهونه جاهز او اخد البابين فى العربيه واوديهم لواحد استرجى يدهنهم بس خفت من التجريح اثناء التركيب وطبعا التكاليف والنقل والوقت اطول

ثانيا : كان المفروض اجيب استرجى او متخصص فى دهانات الخشب تحديدا لكن نقاش عمومى ده غالبا مش هيديك الفينش اللى انت عايزة خاصة لان دهان الاخشاب بياخد مجهود وخدمة اكتر وبالتالى وقت كمان فلو اى حد وعدك يعمل كل دول بفلوس اقل تاكد انه هيطلع نتيجة تانيه خالص غير اللى انت عايزة فياتدى العيش لخبارة يا تخترع على مسئوليتك زى مانا عملت لكن فى كل الاحوال يفضل تبقى فاهم الحكايه ماشيه ازاى

وبعد دور النقاش او الاسترجى بيجى دور النجار تانى علشان يركب الكوالين والاكر وخلافه ويراجع على تركيب الباب لو فيه اى حاجه خلفت

خطوات الدهان بنفسك

اللون الاساسى (( البطانة ))

1- قم بتنظيف الابواب من اى اتربه او زوائد خشب باستخدام قطن مبلل بالتنر او السنفره احدهما او كلاهما حسب حاله الخشف

2- امزج محتوى السيلر مع التنر واستمر فى التقليب مدة عشر دقائق او اكثر ثم ابداء باضافه اللون مع التقليب

3- ابداء الدهان باستخدام القطن المبلل بالدهان او الفرشه

(( اللون النهائى ))

(( فكرة : دهان السيلر انه بيسد مسام الخشب ويصبغها باللون مع الحفاظ على درجة من الشفافيه ))

درجة الشفافيه ديه هى ميزة النوع ده من الدهانات علشان بتظهر جمال نقشه ثمرة الخشب

كل وش هتديه هيقلل درجة الشفافيه ديه وهيديك لون اغمق فى بعض المناطق (( بنى محروق ))

وبالتالى عدد الاوشاش (( مرات الدهان )) يتوقف على درجة اللون المطلوبه

(( الفينيش ))

لو عايز تحافظ على اللون مط (( matt )) مطفى – يبقى ممكن تسيبه زى ما هو او تديله وش سيلر من غير لون مخفف بتنر بس

لو عايز فينيش لامع يبقى هتديله وش (( فلوت ))

الفينيش الامع

فلوت باكين

باستخدام الفلوت (( كمية كيلو تكفى كل ما سبق )) وبيتم اذابته او تخفيفه بالنفض (( اسمه كده تجيبة من الموان ))

ميزة الفلوت انه غير اللمعه بيدى طبقة عزل للخشب بتحافظ عليه من الاحتكاك او التاثيرات الكميائيه

وبس كده شوية ملحوظات اخيرة واى سؤال يشرفنى الرد عليه من خلال التعليقات فى الموقع والجروب ان شاء الله

(( خد بالك ))

شراء المستلزمات فيه فروق اسعار كبيرة حسب الخامات والانواع والاماكن فلازم تبقى عارف محتاج ايه بالظبط

وانت شغال فى الدهانات خد بالك من ايدك ووشك وعينيك واتبع تعليمات السلامة فى الاعمال المماثله انا بفضل الجاونتى واحيانا نضاره وطاقيه وملابس مناسبة للشغل كمان الارض والحوائط خلى جمبك قطنه مبلوله بتنر علشان تشيل اى بقع او تسييل

لو ملكش خبره وهوايه الدهان والرسم اصلا منصحكش تعمل حاجة بنفسك ولو عندك خبره برضو جرب فى حاجة صغيره الاول

الاتربه عدوه اى نوع دهان فحاول تشتغل فى مكان مفيش فيه تراب خالص

ابعد مكونات الدهانات عن متناول الاطفال

مع تمنايتى بتجارب سعيدة ونهايات مرضية

[ahmed_eng2001]

موضوع كبيييير ... حروح اعمل حاجة سخنة و اجى اقرأ و استوعب .. مشكور على المجهود مقدما و حتى تمام القراءة

[ahmed_eng2001]

كلام جميل .... و كنت اتمنى ان تكون الحاجة شغل شخصى ... بس معلومات ظريفة و مفيدة

[AbOnOrA]

تسلم يا احمد نورت الموضوع بحضورك وتعليقاتك
بالنسبه للشغل اللى عملته ده كان لبيتى وبالتالى شخصى او انا مش فاهم تقصد ايه بشكل شخصى ؟؟
ولو عندك اى استفسار يشرفنى طبعا

[ahmed_eng2001]

ربنا يباركلك ... انا كنت اقصد انك كنت اشتغلت بايدك ... من غير صنايعية ... تكون انت الصنايعى