عيوب قاتلة في اللوجان 2010

[Mohamed Magdy]

اه نسيت اقول حاجة مهمة .. بالنسبة لنقطة عدم وجود فلتر بنزين هو فعلا عيب بس مش كبير قوى لان اساسا العربية مش محتاجة فلتر .. عربيتى عاملة 125الف كيلو ومغيرتش طرمبة البنزين غير من شهر بس وكان بسبب واحد حمار اديته العربية سافر بيها وحط بنزين 80 وكانت شغالة زى الفل قبلها ومنظفتهاش ولا مرة لحد ما غيرتها لولا الغبى اللى حط بنزين 80 اللى مينفعش لعربية كرو اصلا

[حسام البورسعيدى]

ده طلع موضوع للهجوم على اللوجان .. طيب ..


مبدئيا كده انا متاكد ان اكثر من 90% من اللى بيهاجموا اللوجان ومش عجباهم عمرهم مركبوها ولا جربوها ولا اتعاملوا معاها ..

الفكره كلها تتلخص فى انه مش حابب اللوجان واثناء ملاحظته اى عيوب فيها فى اى موضوع على النت او غيره تتكون تزيد من كرهه للعربية ويخليه ياخد قرار بانها عربية تعبانه وخرده زى المشاركات هنا ما بتقول ..

طيب .. علشان نبقى موضوعيين انا هبدأ بالرد على صاحب الموضوع اولا ...

انت يا باشا رايح تعمل صيانه تغيير زيت وفلاتر وجايب زيتك من بره ورايح تغيره فى التوكيل هو وفلتر الهوا وتدفع مصنعيه 350 جنيه ويمكن اكتر .. طب ده كلام ..

فى حين انك بمجرد مفك صليبه تغير فلتر الهوا واى صبى ميكانيكى يغييرلك فلتر الزيت والزيت ..

ايه المبرر انك تعمل تغيير زيت وفلتر بالمبلغ ده .. الا انك عاوز تبقى بتتعامل مع التوكيل وتريح دماغك .. ده منطق .. بس ساعتها متشتكيش من اسعار قطع الغيار او المصنعيات .. معروف اى توكيل فى الدنيا الاسعار بتبقى مولعه كده ..

طيب .. بالنسبه لفلتر البنزين .. انا عاوز اقولك ان فلتر البنزين اللى بيبقى راكب على طرمبه البنزين ده بيتغير عادى وطبعا مش لازم تغير الطرمبه ذات نفسها ولا حاجة .. والكورى بيبقى فيه نفس الفلتر ده بالاضافه للفلتر الخارجى ..
وهناك احتمال ان يكون فى فلتر تحت الكنبه زى الفيرنا فى اللوجان وحضرتك فهمت غلط (انا الحقيقه معرفش)

اما موضوع التكييف .. انتا برضو بتتكلم عن اسعار توكيل .. فى حين ان اللى ناس كتير متعرفوش ان العربية مشتركه فى قطع غيار من موديلات رينو اخرى .. زى الكليو والميجان 1 .. بعباره اخرى فى حاجات ممكن تجيبها استيراد .. زى التلاجه اللى حضرتك غيرتها بره واللى اعتقد انها استيراد .. بس طبعا الكهربائى جابهالك ع الجاهز فكانت اغلى من اللازم .. ولكن كويس اوى انك عملتها بره طبعا ..



ثانيا بقى وده المهم .. الناس اللى بتتهكم على اللوجان بدون تجربه ..

موضوع الموتور الـ 8 صباب اللى مزعل ناس كتير .. مين قال ان ده عيب الموتور .. الموتور 90 حصان .. تسارعه ممتاز على عكس ما يقال وده شئ مش جديد على الفرنساوى عموما انها عربيات جرايه ..
انا ادعو كل الناس اللى بتتكلم على اللوجان بدون تجربه .. جربها وجرب تسارعها وموتورها وانا متاكد انك هتغير رايك تماما فى الموضوع ده ..
يا جماعه .. الموضوع مش بالصباب .. الموضوع بتصميم الموتور والات الجر والفتيس .. كل ده بيأثر على عزم العربية ..

واكبر دليل على كده اسبرانزا 516 -اللى انا معجب بيها كتير- ولكن موتورها 16 صباب وسحبه سئ فى طلعه العربية بالذات ومحتاج حرق على الاول والتانى .. جربوا الـ 516 وهتعرفوا معنى كلامى ..

طب ما الانوس 8 صباب وكمان 1500 cc وموتورها اصغر وكتير بتحصل مشاكل فى البوابه بتاعته والحساسات .. والافيو 8 صباب .. بس الفكره علشان متكلمناش كتير فى موضوع ال8 صباب فيهم فمعلقش مع الناس ..

اما فى اللوجان بما انها كانت (قبل غلو سعرها المبالغ) طفره فى السوق المصرى .. فكان اكيد لازم تحصل تقارير كتير عنها من ملاكها ومجربيها -وانا ليا الشرف ان اكون احد اصحاب تلك التقارير- فبالتالى وضوح اكتر للمميزات والعيوب ..وبطبيعه الحال .. اللى عاجباه اللوجان اهتم بالمميزات واللى مش مقتنع بيها ركز على العيوب .. ده طبعا ناهيك عن ان فى ناس موضوعيين وحياديين يهتموا بمعرفه المعلومة عن العربية ومواصفاتها وتجارب ملاكها بغض النظر عن اذا كانوا من انصارها ام لا ..

انا قلت وبقول وهقول .. اللوجان (قبل ما تغلى) كانت افضل عربية فى فئتها السعريه .. ولا يصح اطلاقا مقارنتها بالفيرنا لانها تتفوق فى كل حاجه ما عدا حاجتين فقط لا غير .. (موتور الفيرنا الاقوى واسعار وتوافر قطع الغيار) ..

وانا قلت برضو قبل كده .. الاوروبى عربيات قيمه اكتر من الكورى (بشكل عام) وقصاد الرفاهيه الاكتر طبيعى تكون الصيانه اغلى شويه (مفيش حاجة ببلاش) ..

انا بالنسبه ليا العربية داخله على 40 الف .. والحمد لله مشفتش منها حاجه وحشه تذكر .. واسعه جدا .. ناعمه فى البلد وثابته فى السفر .. سرعه 180 واكتر ومبتقولش لأ (وده دليل على قوه موتورها) .. امكانيات اكتر من كل منافساتها حتى الخدمه فى التوكيل ممتازه بشهاده من تعاملوا معه (مش انا .. انا بعمل صيانه بره) ..

اخيرا انا والله والله والله ما بدافع عن العربية علشان معايا اطلاقا .. وكل اللى يعرفونى يشهدولى بالحياديه والحمد لله .. حتى لما عملت تقريره من حوالى سنتين اتكلمت عن عيوب العربية قبل مميزاتها .. ولكن كلامى ده لتصحيح افكار مغلوطه عند بعض الناس عديمى الخبره العمليه بالعربية للاسف .. مع احترامى الشديد لكل الاعضاء اللى شاركوا فى الموضوع ..

وانا كلامى عن تجربه طبعا مع عربيتى اللوجان لاكتر من سنتين وتجربه طويله مع الفيرنا 2011 فى جميع الظروف وكمان تجارب مع اسبرانزا 516 .. وده لمزيد من الحياديه وان الكلام يبقى مبنى على اساس اكيد مش اشاعات او سمع من الناس ..

طبعا لولا اختلاف الاذواق لبارت السلع .. وشئ طبيعى جدا ان يكون فى تباين فى الاراء ولكن الحياديه ما تزال امر ضرورى ...


اسف جدا للاطاله .. وارجو تقبل كلامى بمنتهى الموضوعيه واعتذر لو تسبب كلامى بمضايقه احد ...

تحياتى ..........