ارجو المساعده بالله عليكم

[Muhammed_Kamel]

السلام عليكم ورحة الله

انا بكتب الموضوع ده وطبعا نفسيتي تحت الصفر وارجو المساعده بالخبرات الموجوده
في المنتدي هنا

انا لسه جايب عربيه hyundai accent 2006 الشكل القديم
جبتها من اسبوعين تقريبا ومن يومين بس اكتشفت انها فيها جزئين في العربيه من ورا فيه صدا قوي وجزء في العربيه من قدام فيه صدا اعتقد انه وصل لاني اوصفه بالبارومه
واكتشفت برده ان تقريبا ان الزجاج الخلفي تم احلاله مسبقا وتركيبه مره اخري وسبب اني شكيت في كدا ان الزجاج مش راكب زي ما بتيجي من الشركه ( وبكده بدات اشك ان ممكن صاحبها اللي انا واخدها منه يكون كان بيحاول يعملها اي علاج مؤقت والله اعلم واظن ان انتوا ممكن تقولولي اذا كان ده شك ولا المفروض ابقي متأكد طالما ان الزجاج اتحل )
مع العلم ان العربيه مفيهاش اي رش ولا بره ولا جوه والعربيه ممكن تقول عليها في حاله الزيرو لانها عامله 26 الف كيلو بس والصالون حتي لسه ب الاكياس بتاعته
فمش عارف بقي ده كان سوء تخزين منه لانه مكنش بيركبها كتير ولا ايه


وارجو منكم ان تفيدوني في كيفيه حل هذه المشكله لاني بسمع دايما ان البرومه دي بدايه النهايه للعربيات
وهل لو انا عالجتها ممكن ترجع تاني ولا لا وهتنزل من تمن العربيه ولا لا
ارجو النصيحه بالله عليكم


ولتوضيح الاماكن اللي شوفت فيها البرومه عملت الصورتين دول وعلمت علي اماكن البارومه وهي تحت الكاوتش البلاستيك اللي انا عامل عليه علامه في الصوره

[Islam Carr]

الف مبروك
مفيش اى مشكله فى الصدا او البارومة
ليها علاج طبعا
تحياتى لك

[nader hassan]

الف مبروك عليك مفيش حاجه اسمها بدايه النهايه للعربيه اى حاجه ليها حل وبأذن الله حتظبت وحتبقى زى الفل المهم انتا دفعت كام فيها؟

[memodina1]

عادى يا عم بتتعمل بسهولة جدا عند السمكرى وترش وانسى مفيش برومة اسمها بداية نهاية العربية الا اذا كانت فى الشاسية وبصراحة العربية شكلها نظيف وزى الفل بس روح ظبط البارومة او الصدا دا وبس كدة وسهلة جدا وبيحط مادة عازلة كمان تقعد طووووول العمر متقلقش نفسك خالص العربية دى اساسا حلوة جدا وشغالة تاكسى على طول وحمالة قسية والله

[Muhammed_Kamel]

المشاركة الأصلية كتبت بواسطة Islam Carr الف مبروك مفيش اى مشكله فى الصدا او البارومة ليها علاج طبعا تحياتى لك

أولا شكرا علي الرد والاهتمام ثانيا الله يبارك فيك ثالثا : ليا استفسار هل علاجها ده سهل يعني بإذن الله ؟؟ وبيبقي نهائي ولا لا ؟؟ وهل بيأثر علي تمن العربيه ولا لا ؟؟