أرجو المساعده بخصوص فتيس سيات 133

[kareem.elbehiry]

السلام عليكم ورحمة الله
أنا إشتريت عربيه سيات 133 من إسبوعين وفي أول مشوار بيها لقيت الغيار التاني بيرد من مكانه ومش عايز يثبت ووالدي ساقها وهو ميعرفش إن فيها العيب ده ففضلت كل شويه تعمل معاه كده فقرص على الفتيس فالعربيه شبطت في الأرض ومرديتش تمشي المهم جيبنا صنايعي حل الكوبلن وسقط الفتيس وبعدين وديته لصنايعي معرفه قاللي مجموعة الأول لازم تتغير علشان الترس إتكسر وغيرهالي بـ 300 جنيه ووديته للميكانيكي اللي سقطه فركبه تاني مكانه على أساس إن كله تمام وبعد أول ركوبه لقيت نفس العيب تاني فروحت للي عمل الفتيس قاللي إنت أصلك ماقلتليش وقعدنا نرغي بتاع نص ساعه وهو بيحلف أنه مكانش يعرف موضوع التاني ده المهم سألته أيه الحل قاللي لازم أغير مجموعة التاني كمان بنفس الثمن فمبقيتش عارف أعمل أيه التصليح الأول إتكلف 540 جنيه بالزيت وشويه حاجات عبيطه السؤال لحضراتكم وآسف على الإطاله هل أغير الفتيس ولا المجموعه وهل حد يعرف صنايعي فتيسات قريب من فيصل يقدر يقولي الموضوع هيتكلف كام قبل ما يشتغل علشان الموضوع ما يفتحش تاني في المصاريف . وجزاكم الله خيراً

[كومندا]

540 جنيه فى اصلاح الغيار الاول
وزيهم فى اصلاح الغيار التانى ليه هوه الفتيس على بعضه بكام
شوف الاسطى حمد مخترع منوال بدون دبرياج وهوه اكيد هيقدر يسعدك

[kareem.elbehiry]

شكراً جزيلاً على الرد أخي الكريم , الفتيس إستيراد لقيت حد كاتب إنه بـ 1300 وده اللي خلاني أصلح ده من الأول , يا ريت لو حضرتك معاك نمرة تليفون الأسطى حمدي تكتبهالي وحضرتك ما تعرفش هو قريب من فيصل ولا لأ علشان أنا يا دوب بأسوق على قدي ولسه ما طلعتش رخصه فما بروحش بالعربيه أماكن بعيده للأسف .

[kareem.elbehiry]

معلش تكمله للأسئله الموتور اللي في العربيه موتور 127 هل لو جيبت فتيس 127 وخليت الموتور قدام الموضوع ده يكلف كتير ؟

[adham.com]

بص يا باشا
معلش هرغي شوية و يا ريت تستحملني

لو هنفترض إن الفتيس فيه مشكلة بغض النظر عن إيه نوع المشكلة

بتروح للميكانيكي و بيحل الفتيس
و تاخد الفتيس توديه لبتاع فتيسات
بتاع الفتيسات بيقولك انا مصنعيتي قبل ما أشتغل كذا
بخلاف أي قطع بايظة ... الزبون يتكفل بيها (سواء غوايش أو برميل أو ترس معين أو جوانات أو خراطة أو سيليكون)
و بتاخد الفتيس و تروح للميكانيكي يركبهولك تاني و تحط زيت جديد و تدور و تتكل علي الله


المصنعيات
100 جنيه للميكانيكي تنزيل الفتيس و تركيبه مرة أخري
80 جنيه مصنعية بتاع الفتيسات فك و تركيب (لو فتيس 6 غيار بيكون المصنعية أعلي .. 120 تقريبا )
20 جنيه طقم جوانات و أنبوبة سيليكون
50 أو 100 الزيت حسب النوع إللي هتشتريه طبعا



تعالي بقي علي قطع الغيار

بتاع الفتيسات المفروض أنك من غير ما تقوله علي المشاكل إللي عندك في الفتيس ... هو الباشا بمجرد ما يفك الفتيس حتة حتة بيقولك هو فيه إيه .. بدون ما تقوله ... و هنا بقي انت بتحس إنه راجل فاهم و لا راجل (لامؤاخذة ..... )

و ساعتها بيقولك إن القطعة الفلانية ثمنها كذا ... لو هو ما قالكش ثمنها يبقي برده ... راجل لامؤاخذة

و هنا بقي بتقدر تحدد إنت عايز تصلح الفتيس (في حالة لو التكاليف قليلة أو بسيطة مثلا)
و لو التكلفة دخلت في أكثر من 60% من ثمن الفتيس إستيراد
يبقي خسارة فيه التصليح
تجيب واحد إستيراد و تريح نفسك

-------------
نقطة مهمة إزاااااااااااااي الفتيس بتاع السيات ثمنه 1300 جنيه
أكيد في حاجة غلط في السعر

أومال العربية كلها بكام


دة الفتيس بتاع ال127 الستة غيار عامل 900 جنيه إستيراد

بخصوص بقي تركيب فتيس 127 عندك دي الله أعلم إيه نظامها

علي العموم لو الأمر وصل ل إنك تغير الفتيس .. يبقي هات فتيس 4 غيار عادي و سعره 500 جنيه في الوكالة أو عند اي حد بتاع إستيراد

و برده إللي يساعدك في حل مشكلة زي دي و يقدر يفيك أكثر هو المخترع العبقري (الأسطي حمدي مخترع المانيوال بدون دبرياج ) و مكان نزلة المعتمدية عالدائري قرب ميدان لبنان
و آدي رقمه 01065229805

و لو حابب تتفرج علي فيديو ممكن يفيدك شوية عن منظومة الفتيس و مكوناتها
دة فيديو أنا عامله ... أتمني إنه يفيدك

http://www.masrmotors.com/vb/showthread.php?t=119684

انا عامل مشاركتين .. كل مشاركة فيها فيديو