التقرير الشامل للميجان 2008

[akram2025]

بسم الله الرحمن الرحيم

أولا أنا سعيد جدا بموقع مصر موتورز و اتمنى له النجاح و الدوام انشاء الله ليكون احسن منتدى سيارات عربي
وأول مشاركة ليا سوف تكون عن سيارتي الجديدة رينو ميجان 2008
تقرير شامل عن السيارة بعد وصول العداد 1000 كم لعله يكون مرجع و دليل لكل من يريد اقتناءها:

ستكون ايضا درجات التقييم هي:
1 ضعيف جدا 2 ضعيف 3 مقبول
4 جيد 5 جيد جد ا 6 ممتاز

أولا الشكل الخارجي:

بصراحة السيارة من الخارج هي ملكة جمال السيارات وده طبعا بين السيارات التي في نفس المستوى السعري و انا حاسس اني اتجوزت عروسة جديدة وبحب امشي معاها ،،،،، اقصدي بيها في كل مكان عشان الناس تشوفها.

بجد احساس جميل فقط النظر لخطوط الميجان العصرية و طبعا العربية مغرية جدا من الخارج و لكن يعيبها الصاج الضعيف و خصوصا الرفارف و الإكصدامات المصنوعة من الفبر... و ده كما يقال لإمتصاص قوة الصدمات.

المصابيح : ممتازة

المصابيح الأمامية و الخلفية لامعة بشكل لافت للنظر و ذات اضاءة هايلة و البكيتات في الأكصدام الخلفي و الأمامي تعطي احساس بالقوة و الفخامة.
الغمازات المثلثة في جوانب العربية مثيرة للغاية.

علوا السيارة: جيد جدا

السيارة علوها رائع عن الأرض رغم كل المطبات العملاقة الموجودة في شوارعنا.

نزلت بسيط تحت العربية و بجد منظرها من تحت رائع خصوصا التقفيل و تصفيح اسفل السيارة.

الجنوط : جيد

تعطي احساس بسيارة رياضية جريئة.
لكن في نفس الوقت الخامات المصنعة منها الجنوط ضعيفة و الجنط قابل للثني في أي مطب ناشف لو بسرعة عالية.

قتحة السقف البانوراما: ممتازة

شكل فتحة السقف من الخارج شبابي جدا و في نفس الوقت فخم و يعطي احساس برفاهية السيارة.

ثانيا التجهيزات الداخليه:

طارة الدريكسيون: جيد جدا

الدريكسيون رائع و شكله جذاب و لكن العيب الوحيد تحتاج الي الضغط بقوة على الكلاكس لتشغيله... يمكن الوضوع تعود بس فعلا الكلاكس يحتاج الضغط بقوة و على أطراف المقود ليعمل.

دراع الأشارت و النور: جيد

مع استخدام الأشارات قد يدور جزء تشغيل الكشافات بسبب انه خفيف و يسبب انطفاء الكشافات الأمامية!!! و فكرة تشغيل و ايقاف نور الشبورة ظريفة حيث ان لفه مره واحده لأعلى لتشغيله و مره أخري في نفس الأتجاه لإلغاؤه كما يوجد نور شبورة خلفي مدمج في الكشافات الخلفية و يتم تشغيله بأستخدام جزء تشغيل فوانيس الشبورة الأمامية و لكن بلفع لأسفل وليس لإعلى.

دراع المساحات: جيد جدا
والمساحات نفسها تختلف عن أي مساحات سياره أخرى من حيث التصميم.

الفتيس ( ناقل الحركة ) : جيد جدا

من حيث الشكل معقول و لكن كان يمكن جعله اكثر فخامة بتغيير الجزء السفلي الدائري المكتوب عليه وضع الفتيس بأخر مستطيل.... و ده رأي شخصي.

من حيث المضمون فهو ناقل حركة ليس رياضي حيث انه يتم رفع الغيار بسرعة أكثر من المتوقع مما يؤدي إلى سحب ضعيف و تأخير في التجميع.

تسارع السيارة: جيد
السيارة أدائها كما ذكرت ليس رياضي كالمازدا و الإلنترا و تسارعها غير قوي و لكنه جيد.

قوة الموتور: جيد

لا تتوقع ان السيارة ستصل لسرعة 200 بسهولة مثل المازدا و الإلنترا و لكن ادائها احسن من الميتسوبيشي.... و لكني وجدت صعوبة في الارتفاع بسرعة السيارة بعد ال 170 ويقال ان السيارة سيتحسن أدائها بشكل ملحوظ بعد صيانة ال 5000 كم.

الصالون: جيد جدا

مساحة الصالون هايله و الفرش الجلد اعطى فخامة و تميز اكثر للسيارة و مش بيعرق بسبب الفتحات الموجودة فية بس بيسخن لما العربية تكون في الشمس وده بسبب لونه الأسود أيضا...
العيب الوحيد ممكن يكون ان الأسفنج بتاع الكراسي كثافته عالية سنة زيادة مما يعطي احساس بقساوة المقعد.... مش عارف ده بسبب الفرش الجلد ولا ده مقصود لإطالة عمر المقاعد و يقال ايضا ان الكثافة العالية لإسفنج السيارة هو لإعطاء إحساس بعدم التعب عند القبادة لمسافات طويلة.

العدادات و التابلوه: جيد جدا

العدادات شيك والأضاءة البيضاء بتاعتهم جميلة و سهولة الوصول لأي معلومة عن طريق الزر الموجود بذراع المساحات و الخامات المستخدمة في التابلوه جيدة و التابلوه نفسه يعطي احساس الجلد و ليس البلاستيك بسبب قابليته للضغط وكأنه أسفنج مضغوط أو جلد ( احساس جميل ) ان التابلوه مش بلاستيك زي بعض السيارات الياباني.

ميزة التحكم في مستوى اضاءة كشافات السيارة هي ميزة هايلة مش موجوده في أي سيارة.

العيب الوحيد في التابلوه هو مكان مثبت و محدد السرعة و زر ظبط اضاءة العدادات و زر ظبط مستوى الكشافات فمكانهم كلهم جميعا اسفل المقود على الشمال وموقعهم خلال القيادة غير مرأي بالمرة و قد يحدث التباس في استخدامهم.... مثال عندما اريد ان اغير مستوى الكشافات اجدني اغير مستوى اضاءة العدادات و ليس مستوى الكشافات!!!

ثبات السيارة: جيد جدا

بجد السيارة ثابته ثابته ثابته.... أول يوم استلمت السيارة من القاهرة سافرت بيها الغردقة حيث مكان عملي و أكيد الكل عارف ملفات العين السخنة شكلها ايه و رغم ذلك لم أضطر الي استخدام الفرامل الي في أوقات محدودة جدا و مفيش اي احساس بالهوا يهز أو يغربل العربية او أي كلام من ده خالص..... ثابته ثابته.

الفرامل: ممتازة

من الأخر زي فرامل الطيارة.... الفرامل أكثر من هايله و حسيت بفرق التكنولوجيا العالية في فرامل السيارة في أكثر من موقف.

التحكم في السيارة: ممتاز

العربية سهله جدا في التحكم فيها حتى في السرعات العالية.

العفشة: مش هتبان دلوقتي بس هي ناعمة جدا و هايلة في المطبات.

ملحوظة : سقف العربية واطي سنة حتى اني منزل الكرسي لتحت على الأخر ،،،، يمكن عشان أنا طويل شوية .

سقف البانوراما: جيد جدا

من جوا فتحة سقف البانوراما تعطيك شعور بالحيوية و الأنطلاق... و لكن لا أستطيع استخدامه في السرعات العالية بسسب صوت الهواء العالي عند فتح السقف البانوراما
الشماسات في الجزء الخلفي من السيارة و دمجها في الأبواب فخامة غير عادية.

عزل السيارة: ممتاز

السيارة معزولة بشكل هايل بحيث انه حتى في السرعات العالية لاتشعر بأي صوت خارج السيارة.

الملخص:

• المميزات:

أحسن سيارة في سعرها و حتى سعر 200 الف جنيه برضه أحسن سيارة مع ان سعرها في حدود ال 150 الف.

كماليات غير عادية.

شكل أكثر من رائع.

جوده عالية في التقفيل.

صالون واسع و جميل.

توكيل ذو سمعة أكثر من هايلة.

• العيوب:

أداء متوسط أو عادي لأداء الموتور ولا تتوقع أداء رياضي أو قوي يضاهي شكل السيارة.

سعر إعادة البيع سئ للغاية بس لو مش بتفكر تغيرها قريب يبقي مش مشكله.

سيارة يجب الأهتمام بها و اعطائها أولوية قصوة لجميع احتياجاتها و شغلها كله في التوكيل و في الواقع ده عيب و ميزة. يعني باختصار لازم تحطها في عينيك عشان دي عربية بنت ناس.

يا رب ماكونش نسيت حاجة و مستني ردودكم الحلوة ....

[AbOnOrA]

تقرير شامل جدا يا اكرم تسلم ايدك

فعلا اسأل مجرب

ارجو التثبيت

[akram2025]

طبعا فيها مثبت سرعة بس ده إختياري

[ahmedsalah]

تسلم ايدك تقرير جميل اوى بصراحة وربنا يباركلك فيها هيا فعلا عربية جميلة وشيك جدا بس سمعتها انها ضعيفة اوى فعلا ده غير تكاليف الصيانة الباهظة

[أبو عبد الرحمن]

تقرير ممتاز يا أكرم
وربنا يباركلك فيها
فعلاً العربية دي جميلة جدًا وبنت ناس زي ما قلت
وربنا يوعدنا !