سؤال بخصوص فنون القيادة علي العربية الالنترا 2011 ( اتمني الاجابة سريعاً )

[samehsaeed]

بص ياباشا ركز معايا والموضوع هيبقى بسيط بإذن الله

المشاركة الأصلية كتبت بواسطة xmoonx السلام عليكم ورحمة الله وبركاته لو سمحتم عاوز اسأل علي اسئلة فنية في القيادة مش المفروض ان العربية دي هيدروماتيك بتتطلع علي الاول من الدبرياج فقط ؟ بس لما بطلع من الدبرياج مبتخدش السرعة الكافية للطلعة .. وانا عاوزها تتطلع بسرعة جدا ... دا اول سؤال

المقصود بالهيدروماتيك اوتوماتيك وطبعا أنت بتتكلم على عربية مانيوال زي ما هو واضح وضوح الشمس بس واضح إنك خانك التعبير بس (وتقصد تقول إن حقنها انجكشن) المهم أنت أكيد تقصد إن العربية لما بترفع رجلك من على الدبرياج العربية بتتحرك حتى لو مش حاطط رجلك على البنزين بس طبعا لازم تكون العربية على الغيار الأول ، وده كلام سليم والوضع ده اسمه وضع السلانسيه اللي بتبقى فيه العربية ماشية واحدة واحدة كده بتتمختر أو زي ما بيقول الأعشى

تمشي الهوينى كما يمشي الوجي الوحل

وده طبعا بيتم نتيجة حاجة بسيطة جدا ممكن أشرحها على السريع وهي إنك لما بتبقى حاطط رجلك على الدبرياج بتبقى فاصل تروس الفتيس اللي بتنقل الحركة للعجل عن تروس الموتور اللي هو داير وشغال طول الوقت طالما أنت مدور العربية مش مبطلها
طيب ايه اللي بيحصل لما بترفع رجلك واحدة واحدة كده؟
التروس بتاعة الفتيس بتعشق مع تروس الموتور اللي هي دايرة زي ما اتفقنا وتبدأ تدور وبالتالي تنقل الحركة للعجل وتبدأ العربية تتحرك بس ده لازم يتم بالراحة قوي يعني ترفع رجلك عن الدبرياج واحدة واحدة كده وهتلاقي العربية بدأت تتحرك

(الكلام ده في العربيات الجديدة بس اللي الحقن بتاعها انجكشن، العربيات القديمة لازم لازم تدوس على البنزين وانت بترفع رجلك من على الدبرياج عشان العربية تتحرك وغير كده العربية هتفصل)
طبعا مفيش اختلاف إن أي عربية هترفع رجلك فيها من على الدبرياج مرة واحدة وأنت على أي غيار حتى لو الأول هتفصل منك يارب يكون التوضيح ده وصلك المعلومة.
بخصوص سؤالك بقى فالعربية مش هتطلع طلعة سريعة جدا إلا لما تدوس بنزين زي العربيات القديمة طب السبب ايه ؟
السبب إنك لما العربية بتتحرك على السلانسية بيبقى عداد الـ rpm على 1.5 أو 2 بالكتير ويمكن أقل
طيب عداد الـ RPM ده بتاع ايه ؟
ده اللي بيقيس عدد لفات الموتور
جميل طيب والموتور مسئول عن ايه؟
مسئول عن توليد الحركة اللي بتتنقل زي ما اتفقنا قبل كده عن طريق الفتيس للعجل طيب لو عدد لفات الموتور قليلة يبقى أكيد عدد لفات العجل قليلة وبالتالي العربية بتتحرك بالراحة،
طيب أزاي أرفع عدد لفات الموتور؟
ببساطة شديدة أدوس على دواسة البنزين وأكيد اللي بقوله ده الناس كلها عارفاه بس انا بحاول أبسط الموضوع عشان يبقى واضح للكل، يبقى كده العربية مش هتطلع الطلعة السريعة اللي أنت عايزها ديه إلا لما تتعامل معاها عادي جدا زي العربيات القديمة وتدوس على البنزين عشان ترفع عدد لفات الموتور وبالتالي الحركة بتاعته اللي هينقلها للعجل هتبقى كبيرة والعجل هيتحرك بسرعة طبعا لأن العلاقة بينهم علاقة طردية وبكده العربية تطلع بسرعة زي ما أنت عايز، باختصار شديد يعني ومن الآخر لازم تدوس بنزين عشان العربية تطلع بسرعة

المشاركة الأصلية كتبت بواسطة xmoonx لو انا استخدمت طريقة الموازنة بين كافة البنزين والدبرياح مثل نظام العربيات القديمة ؟ دا غلط وهيخلي العربية تفصل وتهنج مني وغلط علي الموتور ؟ ... دا تاني سؤال

لأ خالص مش هيحصل كده ومش غلط على الموتور ما تقلقش وأظن السؤال اللي فات وضح كده.

المشاركة الأصلية كتبت بواسطة xmoonx لو انا علي مطلع كوبري او مطلع جراج .. وواقف تماماً وعاوز اطلع بالعربية .. الدبرياج مش كفاية عشان اطلع الطلعة دي .. اتصرف ازي ؟ وشكراً لكم واتمني الاجابة سريعاً

عندك حل من اتنين
الحل الأول: تنتش العربية
يا أما تفضل مخلي رجلك على الفرامل والدبرياج وبعدين لما تيجي تتحرك ترفع رجلك من على الفرامل وتدوس بنزين وتوازن الدوسة بتاعة البنزين برفعه من الدبرياج عشان العربية تتحرك بس لازم ده يبقى بسرعة شوية عشان العربية ما تبطلش منك ، يعني بالبلدي كده تنتش العربية.
الحل التاني: فرامل اليد
وده بيقى عبارة إنك بترفع فرامل اليد عشان العربية ما ترجعش لورا منك ولما تبدأ تتحرك بتبدا تدوس بنزين وتنزل فرامل اليد واحدة واحدة لحد ما العربية تاخد حركتها تقوم منزل فرامل اليد خالص.
وشوف أنت الحل اللي يريحك وأستخدمه ويارب تكون إجابتي كافية ومفيدة ليك وأهلا بيك في مصر موتورز

[bekeat]

المشاركة الأصلية كتبت بواسطة corsair هو ايه نوع العربية اساسا وهو ايه اللي هيدروماتيك وفيها دبرياج

برجاء توضيح السؤال

[حسام البورسعيدى]

المشاركة الأصلية كتبت بواسطة samehsaeed بص ياباشا ركز معايا والموضوع هيبقى بسيط بإذن الله

الله ينور يا باشا .. مفيش بعد كلامك كلام يتقال ..


بس انا عاوز اوضح نقطة بس ..

طريقة الموازنة بين البنزين الدبرياج بتبقا لازمه مع العربيات اللى مكنتها خفيفة (محتاجة عمره) او اللى عزمها ضعيف ..

وطبعا هى ليها تأثير سلبى على المدى الطويل على اسطوانة الدبرياج لانها بيتؤدى الى زيادة احتكاكها ..

انت دلوقتى بتعمل الصح .. انك ترفع الاول الدبرياج واول ما العربية تبدا تتحرك تزود بنزين وفى نفس اللحظة تسيب دبرياج ..

لكن لو طالع مطلع او مطب , بيكون فى تقل على العربية وبيحتاج عزم اعلى .. علشان كده لازم تدوس بنزين قبل ما ترفع دبرياج والا العربية هتبطل منك ..



انا حبيت اقولك كده لان فى ناس كتير بتستعمل طريقة الموازنة وبتبقى رجله تقيلة على البنزين ويفضل دايس نص الدبرياج لغاية ما العربية تطلع .. وبعد كده يستغرب ان اسطوانة الدبرياج مش بتعيش معاه ...



نورت منتداك يا جميل ..

[xmoonx]

والله العظيم ردود ولا احلي من كدا والف مليووووووووووون شكر للاستاذ samehsaeed
وللاستاذ سامح طبعاً

واسف علي موضوع الهيدروماتيك .. انا اختلط عليا الامر واتلغبطت

والف شكر ليكم كلكم واتشرفت بتواجدي معكم في المنتدي والف شكر مرة اخري للاستاذ samehsaeed

[samehsaeed]

المشاركة الأصلية كتبت بواسطة xmoonx والله العظيم ردود ولا احلي من كدا والف مليووووووووووون شكر للاستاذ samehsaeed وللاستاذ سامح طبعاً واسف علي موضوع الهيدروماتيك .. انا اختلط عليا الامر واتلغبطت والف شكر ليكم كلكم واتشرفت بتواجدي معكم في المنتدي والف شكر مرة اخري للاستاذ samehsaeed

ياسيدي على ايه بس أخجلتم تواضعنا وياباشا أنت تأمر وده أقل واجب نقدمه ليك بمناسبة انضمامك لأسرتنا أسرة Masr Motors ويارب تبقى عضو دائم وفعال فيها بإذن الله