تقرير شامل عن الآفيو

[Ahmed.gunners]

الحقيقة انا شوفت حضرتك في منتدي اخر بنفس الاسم وحاطط نفس الكلام
يا استاذي انت كدة بتشوة سمعة السيارة وبتخلي واحد مثلا مشتري العربية مش حاسس بالحاجات دي غزبن عنوا هيقعد يدقق في السيارة ولو فيها مسمار بيزيق هيسمعوا ويدايق ودماغو تبتدي تلعب علشان حضرتك مهندس صيانة فبتشوف الحاجات دي غزبن عن ايرادك لانك مهندس وبتحس بالعربية بس ولاهي اكتر من 10 اعرفهم معاهم السيارة ولا حد اشتكي من اي شي مش معقول كل دول من القلة الي بتذكورهم انهم حظهم حلو والعربية انا سوقتها وعربية ممتازة ثابتة كويس لحد 130 140 عفشة ممتازة اناقة وسع ولا عفشة بتخبط ولا اي حاجة
ومن الاخر كدة لو العربية فيها كل المشاكل ازاي عايشة لحد دلوقتي وانتشرت الانتشار الغريب دة مفيش شارع الواحد بيمشي فية الا وبيكون في علي الاقل 3 او 4 سيارات افيو وسالت ناس كتيرة مش هقول الكل قال ممتازة لا الناس الي اشتكت منها بس بسبب خفتها علي الطريق بعد 130 وعن العفشة انها نشفة حبة
مش هقدر اقول اكتر من كدة لا مش معقول اكتر من كام الف سيارة افيو في الطرق المصرية كلها معيوبة او نسبة ولتكن علي سبيل مثال حضرتك 90% لان حضرتك ذكرت ان واحد من كل 10 اللة اعلم

[nadenono]

المشاركة الأصلية كتبت بواسطة Ahmed.gunners الحقيقة انا شوفت حضرتك في منتدي اخر بنفس الاسم وحاطط نفس الكلام يا استاذي انت كدة بتشوة سمعة السيارة وبتخلي واحد مثلا مشتري العربية مش حاسس بالحاجات دي غزبن عنوا هيقعد يدقق في السيارة ولو فيها مسمار بيزيق هيسمعوا ويدايق ودماغو تبتدي تلعب علشان حضرتك مهندس صيانة فبتشوف الحاجات دي غزبن عن ايرادك لانك مهندس وبتحس بالعربية بس ولاهي اكتر من 10 اعرفهم معاهم السيارة ولا حد اشتكي من اي شي مش معقول كل دول من القلة الي بتذكورهم انهم حظهم حلو والعربية انا سوقتها وعربية ممتازة ثابتة كويس لحد 130 140 عفشة ممتازة اناقة وسع ولا عفشة بتخبط ولا اي حاجة ومن الاخر كدة لو العربية فيها كل المشاكل ازاي عايشة لحد دلوقتي وانتشرت الانتشار الغريب دة مفيش شارع الواحد بيمشي فية الا وبيكون في علي الاقل 3 او 4 سيارات افيو وسالت ناس كتيرة مش هقول الكل قال ممتازة لا الناس الي اشتكت منها بس بسبب خفتها علي الطريق بعد 130 وعن العفشة انها نشفة حبة مش هقدر اقول اكتر من كدة لا مش معقول اكتر من كام الف سيارة افيو في الطرق المصرية كلها معيوبة او نسبة ولتكن علي سبيل مثال حضرتك 90% لان حضرتك ذكرت ان واحد من كل 10 اللة اعلم

يا أخ أحمد من ناحية اني باشوه سمعة السيارة فأنا بالتأكيد بأذكر عيوبها لأنها معيبة فعلا و ده مابيتقالش عليه تشويه ده بتقال عليه تقييم.
و من ناحية انك سوقتها و كانت ثابتة فأنا ماجيبتش سيرة الثبات و لعلم سيادتك اني قفلت بيها العداد يعني مشيت بسرعة 200 كيلو في الساعة و بالتالي أنا لم أذكر نقطة الثبات بسوء.
أما عن كلام سيادتك إن أنا باشوف حاجات معينة في العربية و باحس بيها فده طبيعي جدا و الطبيعي أكتر ان أنا أنقل ملاحظاتي للزملاء في المنتدى اللي هو أصلا أهم حاجة فيه تبادل الآراء.
في مشاركتك انك قولت انك قريت موضوعي ده في منتدى آخر و بالطبع انت قريت المشاركات بتاعة الناس اللي بتشتكي من العربية و بنفس العيوب و رغم ده انت قولت ان مافيش حد بيشتكي غيري؟؟؟ لمعلوماتك يا سيد أحمد أنا نشرت الموضوع ده في كل منتديات السيارات في مصر و تلقيت عليه عدد جيد جدا من الردود و الميلات يفوق عددها ال 400 كلها و مجموع الردود المعترضة 18 رد فقط منهم رد حضرتك.
و النقطة المهمة ان كون السيارة بها عيوب فده مايمنعش من انتشارها و الدليل على كده انتشار الشاهين و اللادا في الوقت اللي كان فيه في السوق عربيات أفضل زي الإكسيل و الريسر و السويفت و كلها كان سعرها مقارب للشاهين و أرخص من الدوجان. المهم ان فيه أسباب غير جودة السيارة ممكن تبيعها زي مثلا الإشاعات اللي بيقولوها الناس بتاعة المبيعات. و في حالة الآفيو فالتصميم الخارجي الجميل لها هو ما أعتقد أنه العامل الأول في بيعها و يليه احتواؤها على محرك من عائلة المحركات التي أثبتت كفاءة في اللانوس. و أنا اشتريتها بعد أن ركبتها بالفعل خارج مصر في أسبانيا و تخيلت أن الإنتاج المصري سيكون فقط أقل في الكماليات و التشطيب و التقفيل و لكنني فوجئت بأنها سيارة أخرى تماما لا تشبه التي ركبتها إلا في الشكل.
أما أهم نقطة وردت في حوارك يا أحمد هي أن موضوعي سيجعل ملاك السيارة يركزون مع عيوبها و يدققوا فيها و -على حد تعبيرك- دماغهم حاتلعب و ان ده حايضايقهم و هذه المقولة سيادتك مقولة مصرية الصميم و غرضها الغطرشة على عيوب أي شيء طالما كانت عيوب بسيطة أو متوسطة أو كبيرة و لكنها مرت في الخفاء و لم تتحول لفضيحة و لهذا لم أسمعها في أي دولة متقدمة زرتها أو تعاملت مع أحد مواطنيها ,, فالأولوية عندهم هي البحث عن العيوب في كل شيء ثم إصلاحها و يلي ذلك تطويرها.
أرجوك يا أستاذ أحمد ألا تساهم في نشر هذه المبادئ ××××××××××××××××× و التي بدورها تكبل حركة بلدنا و تجذبها للخلف باستمرار

[Ahmed.gunners]

عموما حضرتك واستاذي الكريم المبجل انا الحمد اللة مش بساعد في نشر اي شي يودي الي الرجوع الي الخلف انا كل قصدي ان حضرتك بالمنظر لو واحد جايب السيارة ومقتنع بيها هتخلية يشك في نفسوا وفي اي صوت يظهر بالعربية
وبعدين من الواضح ان حضرتك داخل كل المنتديات علشان تحظر من الموضوع مش اكتر
وارجو من سيادتكم مراعاة الاسلوب ×××××× في مشاراكات حضرتك لان حضرتك كدة بتتهمني باتهامات ليس لديها اساس من الصحة

[AbOnOrA]

اولاً بالنسبة لملاك العربيه كنت اتمنى ان الردود تكون اهدى من كده ويبقى الرد بالتجارب الشخصية بتاعتكم اللى تأكد كلامكم مشفوعة ببعض التفاصيل
يعنى اخش اقول انا معايا العربيه ديه موديل كذا تقفيل كذا عاملة دلوقتى كذا المشاكل اللى فيها كذا وكذا بس مفيش المشاكل التانية ديه
كده يبقى كلام تمام
لكن اخش اقول لاء ابداًُ انا معايا العربيه وزى الفل وعشره على عشره وجامدة اخر تلات حاجات واى حد يقول كده يبقى تيتتيتتيتيت
كده مش تمام ومش كلام وزى ما بقول لعموم الاعضاء مياخدوش بكلام واحد بيشوه فى عربيه بدون دليل او تفاصيل مقنعة برضو ردودكم هتبقى بدون دليل او تفاصيل مقنعة كافيه

وبالتالى النتيجة -1 -1 الاتنين سواء اللى بيقول الافيو كويسه جداً او اللى بيقول انها سيئه جداً الاتنين مكسبوش حاجة لتعزيز رائيهم

طب ازاى تبقى النتيجة 1- 0
يجى اللى بيقول الافيو كويسه يعمل تقرير مصور ويا سلام لو فيديو كمان يعرض فيه عربيه مستعملة من فترة معقولة مفيهاش الكلام ده
يجى اللى بيدافع عن الافيو يحضر مقابلة من مقابلات المنتدى ومعاه العربيه ونطلع معاه نعمل تست ونصوره بحالة العربيه واراء اكثر من عضو مشهود ليهم بالحيادية والخبرة

او على العكس
يجى صاحبنا اللى بيقول العربيه فيها فار عندة القلب يعمل تقرير مصور عن العربيه ويوضح العيوب
يحضر مقابلة ويورينا العربيه ونعمل احنا التقرير
يورينا صور جوبات الصيانة والاصلاح فى التوكيل
يورينا صور شكاوى او محاضر فى الشرطة او حماية المستهلك ضد التوكيل او مركز الخدمة
بالبلدى يدينا امارة ... لكن طول ما الكلام مرسل بالشكل ده لا عمرنا هنوصل لقناعة مؤكده ولا نقدر نرجح رأى

ده عموماً بخصوص موقف الطرفين

نيجى بقى للعربيه وبالمختصر المفيد
- العربيه لازم يبقى فيها عيوب تجميع وتقفيل زى اى عربيه فى شريحة السعر ديه وعيوبها اغلبها فى العفشه وال TPs اللى بسيبب اضطراب الايديال ديه ابرز العيوب لكن فيه ناس اشتكت من حاجات متفرقة حتى الدهان ناس طلعلها عيوب فيه

- عيوب العربيه مش كارثيه ومتخليهاش نصبه وخيانة والكلام المبالغ فيه ده كله بالعكس هو نفس مستوى جودة البدائل التانية المجمعة محلياً

يعنى عربيه عادية جداً لا هى كارثة ولا هى تحفه ومشاكل التوكيل هى مشاكل كل التوكيلات مفيش جديد

نيجى بقى لنقطة تانية
الاستاذ اللى داخل يقول انه اتوقف قبل كده علشان بيشتم فى منصور وان الادارة عملت معاه حركات نقص على حد تعبيرة الغير مهذب وداخل يحط رابط الموضوع بتاعة القديم
اولاً لو كنا احنا بندافع عن منصور كنا حذفنا الموضوع كله من البداية او الردود المتتابعة اللى كانت كلها اسائه فى العربيه او الموضوع اللى انا بتكلم فيه دلوقتى
ثانياً حضرتك لما اشتكيت بخصوص عربيتك اتحركنا وطلبنا منك بيانات العربيه وبعتها اتحركنا احنا كمان بجدية وصلنا صوتك للإدارة فى منصور ورد عليك مسئولين من هناك وتبين عدم صحة ادعائك وانك كنت عامل حادثة بالعربيه قبل كده وانها كانت السبب فى اغلب المشاكل ديه وحضرتك مكنتش حكيت الموضوع ده ومرديتش على المسئول فى منصور لما جبناه يكلمك واختفيت بعدها

ده الرابط
http://www.masrmotors.com/vb/showpos...&postcount=126

كمان انا عمرى ما عملت موضوع يمدح فى اى عربيه خاصة بشيفرولية عموماً بل بالعكس فى مواضيع كتير ومقارنات فضلت بدائل عليها فبلاش الاساليب الرخيصة ديه لانها بجد عيب احنا بنتعب ونجتهد علشان نوصل كلمة حق وندافع عن حقوق مستهلكى السيارات عموماً عيب تبقى ديه اخرتها

وارجو من الجميع التعامل بجدية ومسئولية كافيه سواء عندك مشكلة فى العربيه ابعتلنا كل التفاصيل وتأكد اننا هنبذل كل ما يمكن لاسترداد حقك طالماً انت واقف معانا وبتطالب ببيه
وللناس اللى عربيتها بتتعرض لحملات تشويه برضو ياخدو الموضوع بجدية ويحطو تقارير مفصلة عن العربيه ويحضورو مقابلات ويتفاعلو بموضوعيه ومن غير مبالغة
لكن اللى يقولك ثابته ل 160 والتوب بتاع العربيات دلوقتى والكلام ده ميليقش بينا خالص اصلاً

[احمد بدر1978]

كلامك حكم يا ابو نورة انا من كتر الكلام عليها مابقتش فاهم ان كانت حلوة ولا وحشة وبقيت كارهها رغم انها مع واحد صاحبى وهو بيشكر فيها بس كلام الاخوة هنا كرهنى فيها