الطريق إلى الغردقة ... (و الناس مش مصدقة)

[حازم شاهين]

كنت رتبت إنى أطلع أقضى أجازة قصيرة فى الغردقة قبل العيد و زحمته و قررت إنى أخدها سواقة بالعربية اﻹسبيرانزا و د مش أول مرة على فكرة و لقيتها فرصة حلوة إنى أكتب عن الطريق و مواصفاته و مراحله لعل يكون فى ذلك فايدة أو تسلية للأعضاء.

اﻹستعدادات قبل اﻹنطلاق

السفر للغردقة بياخد وقت طويل و ممكن يضيع فيه نصف يوم بحاله فبالتالى لازم الواحد يحاول بقدر اﻹمكان يوفر أى حاجة ممكن تخلى السفرية مريحة بقدر اﻹمكان ، أهم حاجة طبعا التأكد من حالة السيارة و قدرتها على قطع 450 كيلو متصله بدون مشاكل و خاصةإن فيه مناطق طويلة من الطريق خالية من العمران و الحركة على الطريق ضعيفة و بالتالى المساعدة و النجدة ممكن تكون صعبة أو تاخد وقت طويل.
يفضل التزود بقدر من الماء و بعض المأكولات الخفيفة و لو فيه أطفال ممكن بعض الكتب أو المجلات أو ألعاب الفيديو أو دى فى دى ﻷفلام كارتون هتبقى مهمة لتسليتهم و مساعدتهم على تحمل طول السفر.
إعادة التزود بالوقود أعتقد إنها غير ضرورية لمعظم السيارات الحديثة و على الرغم من توافر محطات البنزين طول الطريق إلا أنها على مسافات متباعدة جدا فيجب الإحتياط التأكد من ملء خزان الوقود لتجنب نفاذ الوقود فى منتصف الطريق.


خريطة الطريق من القاهرة للغردقة


بداية الرحلة (الطريق الدائرى)

إبتدت الرحلة للغردقة بعد ما فولت التانك من محطة وطنية أول طريق العين السخنة و كانت الساعة 11 و نص.



و الوصول لطريق القطامية - العين السخنة يكون من خلال الطريق الدائرى (مخرج 9 ) بعد كارفور بحوالى أربعة كيلومتر للقادم من المعادى أو هو المخرج التالى لمخرج القطامية هايتس عند إلتقاء الدائرى مع إمتداد طريق الوفاء و اﻷمل .


طريق القطامية السخنة



يعيب بداية الطريق أو دخلة الطريق إنها عبارة عن طريق مكسر و مليان مطبات و ﻻ يرقى لمستوى طريق السخنة نفسة.



المهم مسكت أول الطريق و كانت اللوحات اﻹرشادية بتقول إن المسافة للغردقة 440 كيلومتر أما مسافة الطريق الحر (طريق السخنة) 110 كيلومتر و أقصى سرعة للسيارات الملاكى 120 كيلومتر يعنى لو الواحد مشى بالسرعة القصوى ياخد الطريق فى حوالى 55 دقيقة لكن المسافة دى بتاخد ساعة تقريبا نتيجة للتوقف فى البوابات و كمائن المرور.



و رسم استخدام الطريق خمسة جنيه للملاكى و يتميز الطريق بإنه واسع و الحركة عليه قليلة و خالى من التقاطعات و الدوران للخلف عن طريق أنفاق أسفل الطريق موزعة على طول الطريق .



و قلة حركة السيارات على الطريق بتشجع على الجرى و الواحد ممكن ينسى نفسه و يتجاوز السرعة المقررة لكن دايما الرادار بيبقى موجود و يا ويل إللى يقع تحت رحمته -150 جنيه الغرامة الفورية-



و طبعا زى ما ناس كتير قالت طريق القطامية يعيبه ضعف الخدمات فمحطات البنزين (إحتكار لوطنية فقط) و الكافيتريات نادرة عليه فبالتالى إستخدامه يفضل أن يكون بسيارة حالتها جيدة و ياريت يكون فى النهار لكن مسافته برضه تعتبر متوسطة و العمار موجود فى أوله و آخره فقط .


طريق العين السخنة الزعفرانة




ينتهى طريق القطامية السخنة إلى طريق السويس السخنة إللى لو دخلت فيه يمين يطلعك على بورتو السخنه و لو دخلت شمال تطلع على ميناء السخنة و ستيلا دى مارى و بالميرا و الشواطئ المختلفة لغاية اﻷدبية و السويس.



المهم أنا طبعا أخدت اليمين إللى كانت اللوحات الكيلومترية كانت بتقول الغردقة 330 كيلومتر و الزعفرانة 75 كيلومتر و طريق الزعفرانة يتميز بإنه طريق مفرد و ملتوى و فى أجزاء كتير منه محصور بين الجبل و البحر و زحمة شوية و خصوصا فى اﻷجازات و اﻷعياد.

و الطريق ده رغم إنه خطر شوية لكن لمسافة 55 كيلومتر ونس و عمار فطول ما إنت ماشى هتلاقى فنادق و قرى سياحية و شواطئ ، و منظر البحر مع الجبل مع إنحنائات الطريق روعة بصراحة لكن أنا محبش أستخدمه بالليل .



و طول ما إنت ماشى هتلاقى أسماء شهيرة فى عالم السياحة زى موفنبيك و رامادا و أوشن بلو و بورتو السخنة لا سيندا و لا فيستا و عشرات القرى و الفنادق حاجة كده عاملة زى الساحل مبانى .. مبانى … مبانى لكن محدش بيستخدمها غير شهرين تلاته فى السنة

http://www.youtube.com/watch?v=hu-cNd90e-I

طبعا أكتر حته فى الطريق هايصة باستمرار هى منطقة بورتو السخنة و فيها مطاعم و بنوك و سوبرماركت و صيدلية و خدمات كتير و بورتو السخنة ممكن تكون أول إستراحة للمسافرين ﻹنها عمار و فسحة و خدمات و كل حاجة و مستويات مختلفة من اﻷسعار.



السرعة القصوى 90 كيلومتر لكن مفيش رادار فممكن تمشى زى ما انت عايز حسب ثبات و قدرة عربيتك لكن فيه ملفات حادة أحيانا محتاجة إنك تهدى و انت داخلها علشان المقابل على اﻷقل.

http://www.youtube.com/watch?v=tNorL417Ydw

قبل نهاية الطريق ده بحوالى 30 كيلومتر بتلاقى شرق الطريق محطة كهرباء الزعفرانة و هى محطة بتستغل طاقة الرياح عبارة عن آلاف المولدات الهوائية (و المولدات الهوائية دى بتعتبر هاى تك يعنى مش أى كلام) على إمتداد 18 كيلومتر و هى محطة يابانية التمويل و اﻹنشاء.



طريق السخنة الزعفرانة رغم إنه 80 كيلومتر فقط لكن بياخد حوالى ساعة نتيجة لمنحنياته الكتير و ضيق الطريق (كده دخالنا فى ساعتين تقريبا)


طريق الزعفرانة راس غارب




لزعفرانة دى عبارة عن قرية صغيرة على ساحل البحر و فيها إستراحات و محطات بنزين و بعض الخدمات لكن الكافيتريات أسعارها غالية شوية لكن أرخص من بورتو السخنة و إستخدام الحمام فيها بفلوس كمان (جنيه للفرد) هههههههههه و ممكن تكون الزعفرانة ثانى محطة توقف و إستراحة.

و يبدأ من الزعفرانة إزدواج الطريق مرة تانية و فيها نقطة تفتيش أو كمين ثابت ، و بتجاوز الكمين يبدأ طريق راس غارب و العلامات الكيلومترية بتقول الغردقة 255 كيلومتر و راس غارب 105 كيلومتر
السرعة القصوى على الطريق ده 110 كيلومتر للملاكى و الطريق فيه رادار معظم الوقت و إذا كان طريق القطامية السخنة نادر فى خدماته فطريق الزعفرانة راس غالب خالى تماما من أى خدمات على اﻹطلاق و ممل ﻷقصى درجة فالحركة عليه نادرة و نقاط المشاهدة و الرؤية قليلة (صحراء و جبال فى الغرب و بحر فى الشرق و بمر الطريق ببعض اﻷديرة داخل الصحراء و لولا وجود البحر كان هيبقى الطريق قاتل من الملل و اﻹجبار على إلتزام السرعة المقررة.



و يتم قطع الطريق فى حوالى ساعة أخرى (يبقى اﻹجمالى 3 ساعات فى حالة عدم التوقف)


طريق راس غارب الغردقة

موقع مدينة راس غارب

أخيرا و بالوصول لراس غارب (و يطلق عليها إختصارا غارب) و هى مدينة صغيرة قائمة على المواقع البترولية المحيطة و هى مدينة كاملة بها كل الخدمات و المرافق لكن بمستوى متواضع أو متوسط و بها كافيتريات و محطات وقود و أسعارها رخيصة، و بها نقطة تفتيش أو كمبن ثابت على الطريق.



بعد المرور من نقطة التفتيش تدل العلامات الكيلومتيرية أن الغردقة باقى عليها 150 كيلومتر و سفاجا 210 كيلومتر و يستمر تحديد السرعة القصوى بـ 110 كيلومترات و الرادار متواجد على الطريق فى أوقات و أماكن مختلفة.



بعد 30 كيلومتر نصل إلى رأس شقير ثم عدد من المواقع البترولية حتى نصل إلى منطقة جبل الزيت فى منتصف المسافة بين غارب و الغردقة تقريبا و هى أكبر منطقة بترولية بعد رأس غارب و لولا هذه التجمعات البترولية ﻷختفت معالم الحياة و الخدمات من الطريق و هى بالفعل نادرة جدا.

ثم نصل أخيرا قبل مدينة الغردقة بثلاثين كيلومتر لنقطة تفتيش أو كمين الغردقة و هى اﻷخيرة فى رحلتنا و هى حد نهاية سرعة 110 كسرعة قصوى للملاكى لتصبح السرعة المسموح بها 90 كيلومتر للملاكى.



ينقسم بعد هذه النقطة الطريق إلى فرعين طريق الكورنيش و هو طريق ساحلى مفرد فى معظمه يمر بمدينة الجونة على بعد 24 كيلمتر من الغردقة و هى مدينة سياحية قطاع خاص ملك شركة أوراسكوم و تمتلك نادى الجونة الشهير و بها مطار خاص و عدد من الفنادق و النوادى و ملاعب الجولف و المستشفيات و المدارس اﻷجنبية و فيلات علية القوم …...إلخ



و ينتهى الطريق الساحلى بحى مبارك 11 و مبارك 7 و منطقة اﻷحياء و هى أول مناطق الغردقة السكنية.



أما الفرع الثانى فهو الطريق الدائرى اﻷوسط و هو طريق مزدوج ينتهى عند مطار الغردقة و منه إلى حى مبارك 5 السكنى

و بذلك نصل بسلامة الله لمدينة الجن و الشياطين و عروس البحر اﻷحمر بعد حوالى أربعة ساعات و نصف إلى خمس ساعات فى حالة عدم التوقف .

أخيراَ

أنصح من يرغب فى القيام بهذه الرحلة التأكد من سلامة السيارة و اﻹطار اﻹحتياطى و إحضار جركن مياه للمحرك كإحتياط لكثرة اﻷماكن المنعزلة و ضعف حركة السيارات على معظم الطريق
كما أنصح بالتزود بالوقود فى الزعفرانة كنقطة منتصف كإحتياط للطوارئ
أما لراحة المسافرين فيجب التزود بالمياه و بعض المأكولات الخفيفة و التوقف كلما سنحت الفرصة لفك العضلات و دخول الحمام و إراحة اﻷعصاب و تجديد النشاط و أفضل أماكن التوقف بورتو السخنة يليها الزعفرانة مع توقع بعض الزيادة فى أسعار معظم الطلبات.
أخيرا السفر مع صحبة و خاصة فى حالة السفر ليلا للإستئناس أو للتبديل فى القيادة

بقى أن أقول أن تواجدى فى الغردقة كان مفاجأة كبيرة لكثير من الناس إللى مش مصدقة.

إلى اللقاء فى رحلات أخرى إن شاء الله

بعض الصور من تصويرى و اﻷخر من مواقع على اﻹنترنت

رحلة سعيدة ان شاء الله...بس حكاية حلوة اوي وشغل على مية بيضة ...عشرة على عشرة...يا باشا

[lovelyboy]

حمد الله ع السلامة يا حازم باشا
ويا رب تكون انبسط

[بدر بسيونى]

انا لسه مسافر الطريق ده تسلم ايدك ياحازم باشا

[atgps]

أولا حمد الله على السلامة يا أستاذ حازم وان شاء الله تقضى أجازة أكثر من سعيدة.
ولكن للعلم السرعة داخل الغردقة 60 كم/س حتى فى أوسع الطرق بها والرادارات منتشرة بكثرة سواء فى طريق النصر وخصوصا بجوارالمطار وبطول الطريق المؤدى الى معظم منتجعات جنوب الغردقة حتى سهل حشيش.