حقيقة الميجان

[Payoo]

المشاركة الأصلية كتبت بواسطة tronky أستاذ بايو البطارية الأولى كانت بايظة وزى ما قولت لحضرتك قبل كده أن دفعة 2005 كان فيها بطاريات بايظة ودى كانت بتتغير ببلاش ف التوكيل....و جابو واحدة بدالها ( الكلام ده على 10 الاف كم ).....والتانية أنا جايبها على 67 ألف كم.....

برضه العربيه إللي معايا بعد 26000 كيلو متر اتغيرت البطارية بتاعتها إللي كانت جايه مع العربيه بس مش على حسابهم ولا حاجه

وعلى فكرة البطارية مش بتتقاس بمشيت أد أيه....البطارية لو قعدت فى عربية مبتمشيش غير مشاوير محدودة مش هتكمل 3 سنين وهتبوظ

مقياس عمر البطارية بيقاس بالمدة وعدد الكيلو مترات
لو بتمشي بالعربيه بمعدل بسيط (مثلا 20ألف في السنه) هاتعيش معاك 3 سنين تقريبا
لكن لو بتعمل الـ10.000 في شهرين كده زي حلاتي يبقى البطاريه كبيرها سنة ونص سنتين بالكتير
وإذا جبت بطارية ومامشتش بيها خالص هاتبوظ بعد شهر بالكتير

وبعدين مفيش حاجة أسمها العربية بتاكل بطارية......البطاريات دى قدرات 55 أمبير 60 أمبير وهكذا....يعنى العربية لو قليل عليها ال 72 أمبير اللى هى نازلة بيها كان الأولى بالشركة أنهم ينزلوها ب 80 أمبير مثلا.....مش يستنوا على العربية 5 سنين بعد أنتاجها عشان جهابزة الميكانيكا والكهرباء فى مصر اللى مش عارفين يشتغلوا فيها يقولو أنها بتاكل بطارية.....

كلمة "العربيه بتاكل بطاريه" سمعتها من مهندس الاستقبال في توكيل العبور لما كلمته عن مدى دهشتي من إن العربيه في مدة لا تتعدى 3 سنوات ولا تتعدى 60ألف كيلو يتغير لها 3 بطاريات

يعني انا عربيتي دلوقتي فيها البطارية التالته وهي ماكملتش ال70 ألف كيلو
حاجه غريبه إن يكون ده حصل معاك وحصل معايا وحصل معا كذا واحد اعرفه
وكمان الكلام لما يكون خارج من واحد من التوكيل نفسه يبقى أكيد كلام مظبوط مش أي كلام وخلاص

ثانياً البطارية التالتة اللى معايا لسه شغالة يعنى العربية مكلتش 3 بطاريات فى 82 ألف كم ده بفرض أن البطارية بتتقاس بالكيلومتر.

وأنا البطارية التالته إللي معايا لسه شغاله لحد دلوقتي باقلها 10.000 كيلو
وربنا يستر عليها واكون بعت العربيه قبل ما تبوظ هيا كمان

وبعدين ما أنا قلت لحضرتك أنك بتشترى عربية 1600 سى سى عادية...يعنى مش تربو ولا فيها تجهيزات رياضية عشان تتوقع أداء رياضى.............

بالنسبة لموضوع الأداء الرياضي أنا ماتوقعتش أبدا أداء رياضي من عربيه عاديه وفي نفس الوقت أداء العربيه الميجان لا يرقى أبدا للأداء الجيد

وبعدين الأداء اللى حضرتك معترض عليه أنا بعدى بيه كل الألمانى ال 1600 ( جيتا باسات - فيكترا - أوكتافيا - الأسترا الجديدة ) يعنى لو أدائها وحش.....يبقى فى الأوجش منها..........عمالقة السيارات فى أوروبا

ومع احترامي لكلام حضرتك الكلام ده مش صح أبدا لان أداء الأوكتافيا يفوق اداء الميجان بكثير جدا وأنا معايا الأتنين

و معلش هطلب من حضرتك طلب.......حضرتك متعرفنيش قبل كده ف ياريت متفترضش أنى من النوع اللى حضرتك أتكلمت عليه اللى بيحب يدارى على عيوب الحاجة بتاعته لأنى مش كده...العربية لو وحشة هقول عليها وحشة أو على الأقل همتنع عن التعليق.....مش هدخل أدافع عنها.

فعلا أنا ماعفش حضرتك وليا الشرف أني أتعرف عليك خصوصا في حوار خلافي زي ده
وعلى فكره أنا لما قلت إن "إحنا كمصريين" (كنت أقصد أحنا كلنا مش حضرتك على وجه الخصوص) ولو التعميم ده زعلك يبقى حقك عليا لاني بجد مش قصدي أني اضايقك
لكن أنا عن نفسي زي أي حد بحب أبقى ناصح و واعي وأختياراتي تبقى أحسن اختيارات لكن مابحبش ادافع عن اختياراتي لو طلعت غلط

سؤال أخير.....حضرتك ليه مقلتليش أنت جايب العربية من الزيرو و لا لأ وجايبها عاملة كام كم لو مستعملة وهل كشفت عليها فى التوكيل قبل ما تشترى ولا لأ أو هل كنت بتروح الصيانات الدورية وهى فى فترة الضمان لو زيرو ولا لأ.....؟

أولا أنا شاري العربيه من احد المعارف القدامي وهو استاذ جامعي (وبيتعامل بالشوكة والسكينه مع العربيه ومع أي حاجه بيملكها) يعني استعماله راقي جدا جدا
وكل الصيانات بتاعت العربيه مسجلة في كتيب الصيانة المرفق مع السيارة بالتاريخ وبكامل البيانات التي توضح ماتم في السياره عن طريق الوكيل
وطبعا رحت التوكيل بعد كده عشان اكمل بقيت صيانتها لقيتها مسجلة طبعا بأسم صاحبها الأول (أستاذ الجامعه) ولحد دلوقتي بياناته هي إللي متسجلة في التوكيل مش بياناتي
ولقيته مغير البطاريه عند 26 ألف ولقيته مغير 3 بوبينات من الاربعه إللي فوق البوجيهات وانا غيرت الرابع
ولقيته مغير سينسور الـABS الشمال

العربية دى سرها فى المحافظة على الصيانات الدورية ليها سواء فى التوكيل أو برة التوكيل وأنا عن نفسى بتعامل مع واحد برة التوكيل

يبقى أنت معايا في أن العربيه دي لها سر وسرها في المحافظه عليها ورعايتها رعاية خاصة

يبقى العربيه مش زيها زي اي عربيه بتاعت شغل وبتستحمل

و يا ريت برضه تبقى توضحلى أكتر " أو أو أو أو " اللى فى الأخر دول بيرمزو لأيه ؟

أو ..... أو ......
أو تهنيج الكومبيوتر المتكرر أو اعطال الحساسات المتكرر

[aboelezz]

يا جماعة انا بجد احترت مش عارف ناس تقولي العربية تحفة وناس تغلط فيها وتقولي لا اعمل ايه مش عارف بجد انا احترت

[tronky]

المشاركة الأصلية كتبت بواسطة Payoo برضه العربيه إللي معايا بعد 26000 كيلو متر اتغيرت البطارية بتاعتها إللي كانت جايه مع العربيه بس مش على حسابهم ولا حاجه

مش على حسابهم ليه ؟؟؟ مش عشان العربية طلعت من الضمان؟ ولا ى سبب تانى؟

المشاركة الأصلية كتبت بواسطة Payoo مقياس عمر البطارية بيقاس بالمدة وعدد الكيلو مترات لو بتمشي بالعربيه بمعدل بسيط (مثلا 20ألف في السنه) هاتعيش معاك 3 سنين تقريبا لكن لو بتعمل الـ10.000 في شهرين كده زي حلاتي يبقى البطاريه كبيرها سنة ونص سنتين بالكتير وإذا جبت بطارية ومامشتش بيها خالص هاتبوظ بعد شهر بالكتير

حلو قوى.....يبقى أتفقنا أنك لو بتعمل 10 ألاف فى شهرين تلاتة يبقى البطارية كبيرها سنة ونصف سنتين,,,,حسب كلام حضرتك....و طبعاً الكلام على أى عربية مش الميجان...ولا أيه؟
طيب ما هوه ده اللى حصل معايا.....بطارية فيها عيب صناعة أتغيرت ببطارية تانية....البطارية التانية قعدت معايا سنتين وشهرين......والتالتة راكبة فى العربية بقالها حوالى 5 شهور أو 6 شهور.....يبقى أيه الجديد ؟؟

المشاركة الأصلية كتبت بواسطة Payoo كلمة "العربيه بتاكل بطاريه" سمعتها من مهندس الاستقبال في توكيل العبور لما كلمته عن مدى دهشتي من إن العربيه في مدة لا تتعدى 3 سنوات ولا تتعدى 60ألف كيلو يتغير لها 3 بطاريات يعني انا عربيتي دلوقتي فيها البطارية التالته وهي ماكملتش ال70 ألف كيلو

م أحنا قولنا أن البطارية الأولى كان فيها عيب صناعة والمفروض متتحسبش.....زى العربية اللى بتنزل فيها عيب فى طنابير مثلاُ والتوكيل بيغيرها.....هتقول العربية قعدت معاك 100 كم ومغير الطنابير مرتين ؟؟؟؟ لأ نقول أن العربية أتغير فيها طنابير مرة واحدة بس
و مع أحترامى لكلام حضرتك.....مينفعش مهندس بطيخ حتى فى توكيل أياً كان يقول الكلام ده حتى لو صحيح.....ألا لو كان بيقوله لواحد صاحبه قوى مثلاً أو حبيبه....لكن أنه يقول الكلام ده لزبون......مينفعش لأن لو الزبون عمل مشكلة هوه هيتنفخ لا مؤاخذة ptmnlo123per1116

المشاركة الأصلية كتبت بواسطة Payoo حاجه غريبه إن يكون ده حصل معاك وحصل معايا وحصل معا كذا واحد اعرفه

أنا أعرف حوالى 18 واحد معاهم ميجان......من 2005 الى 2008....مانيوال وأتوماتيك.....اللى معاهم مو 2005 بس هما اللى كانوا بيتغيرلهم البطارية لو طلعت من الدفعة البايظة....غير كده لو العربية 2006 أو 2007 أو 2008 محصلش مع حد منهم الموضوع ده ومعرفش حد منهم غير البطارية خالص

المشاركة الأصلية كتبت بواسطة Payoo بالنسبة لموضوع الأداء الرياضي أنا ماتوقعتش أبدا أداء رياضي من عربيه عاديه وفي نفس الوقت أداء العربيه الميجان لا يرقى أبدا للأداء الجيد ومع احترامي لكلام حضرتك الكلام ده مش صح أبدا لان أداء الأوكتافيا يفوق اداء الميجان بكثير جدا وأنا معايا الأتنين

و أنا ليا 4 أصحابى معاهم A4 و 3 معاهم A5....مفيش مرة حد جرب يجرى معايا وطلع منى !!!!!!!!!!

ده غير أن ال A4 كانت مع صاحبى الأنتيم وكنا بنسافر بيها مع بعض كتير وكنت بسوقها كتيييييييير منه وعارف أدائها عامل أزاى وهى أحسن من الميجان فى أيه و الميجان أحسن فى أيه
لو تحب تجرب أنا معنديش مشكلة

المشاركة الأصلية كتبت بواسطة Payoo فعلا أنا ماعفش حضرتك وليا الشرف أني أتعرف عليك خصوصا في حوار خلافي زي ده وعلى فكره أنا لما قلت إن "إحنا كمصريين" (كنت أقصد أحنا كلنا مش حضرتك على وجه الخصوص) ولو التعميم ده زعلك يبقى حقك عليا لاني بجد مش قصدي أني اضايقك لكن أنا عن نفسي زي أي حد بحب أبقى ناصح و واعي وأختياراتي تبقى أحسن اختيارات لكن مابحبش ادافع عن اختياراتي لو طلعت غلط

الله يخليك يا باشا......بس أنا حبيت أوضح لحضرتك أنى مش من النوع ده.....لسبب وحيد....أنا مش هاخد ذنب واحد بيسألنى أو شاف مشاركتى على العربية وقرر أنه يجيبها وهى عربية سيئة زى ما حضرتك بتقول......أخد ذنبه ليه؟؟؟عشان العربية اللى معايا؟؟؟؟ما تولع أى عربية....الموضوع ميستاهلش.....ده غير أنها مش أول ولا أخر عربية ليا وهتتغير أن عاجلاً أو أجلاً

المشاركة الأصلية كتبت بواسطة Payoo ولقيته مغير البطاريه عند 26 ألف ولقيته مغير 3 بوبينات من الاربعه إللي فوق البوجيهات وانا غيرت الرابع ولقيته مغير سينسور الـABS الشمال

أحنا أتفقنا على البطارية والكويل فى مو 2005 كان فيهم عيوب.......يبقى هوه مغير سنسور ABS زيادة صح ؟؟؟
أنا العربية معايا ومع ال 18 اللى أعرفهم مغيرتش حاجة برة الضمان غير عندى.... طنابير و بعض الناس طرمبة مياه ( 2 بالعدد )

المشاركة الأصلية كتبت بواسطة Payoo يبقى أنت معايا في أن العربيه دي لها سر وسرها في المحافظه عليها ورعايتها رعاية خاصة يبقى العربيه مش زيها زي اي عربيه بتاعت شغل وبتستحمل

معلش بأه...كده نرجع لنقطة حضرتك قولت زيها قبل كده.....وأعذرنى على التعميم المرة دى بس ده عن تجربة.....90% من الشعب المصرى عاوز عربية يركبها ويعمل فيها اللى هوه عاوزه ومتقولش أى......هل شركات العربيات بتعمل العربيات عشان كده؟؟؟ يعنى هل فى شركة واحدة بتقولك أن أنت ممكن متعملش صيانة؟؟؟ لا أعتقد....لأن كل حاجة ليها عمر أفتراضى لازم ناخده فى الأعتبار.....يعنى لو حضرتك مثلاً مغيرتش كاوتش العربية وهو بايظ هيأثر على مختلف مكونات العفشة......يبقى مترجعش بعد كده تقول أن العربية الفلانية عفشتها وحشة...لأن الغلط منك أنك مغيرتش كاوتش بايظ وهو بدوره أثر على العفشة وبوظها...........ولا أيه؟

المشاركة الأصلية كتبت بواسطة Payoo أو ..... أو ...... أو تهنيج الكومبيوتر المتكرر أو اعطال الحساسات المتكرر

أسمحلى أرد بأقتباس من أحد المنتديات على الموضوع ده وأؤكد لحضرت الكلام المكتوب بحكم خبرتى كمهندس كمبيوتر بقالى 8 سنيين شغال.......كمان اللى كاتب الكلام ده مهندس كمبيوتر عربيات المعروف عندنا بأسم ECU واللى هوه موجود فى أى عربية أنجكشن من التمانينات الى الأن......أقراء الكلام ولو فيه حاجة مش واضحة قولى
وقبل ما أقتبس بس....لو كمبيوتر العربية بيهنج زى ما حضرتك قولت كده يبقى وارد جداً ان أى واحد معاه العربية الكمبيوتر يهنج منه......صح ؟؟؟ طيب الكمبيوتر لو هنج العربية مش هتعرف تعمل أيه أو تمشى أزاى.....صح؟ يبقى صاحبنا ده وغيره وغيره وغير هنقول عليهم يا رحمن يا رحيم.......ألا لو فيه حاجة بتخلى الكمبيوتر لو هنج يعرف برضه يتصرف ويمشى العربية.....الحاجة دى أسمها Fail Safe .........بأسم الله نبتدى؟

واحدة من أشهر الحاجات اللي طلعت على الميجان (و الناس بتعتبرها نكتة ) إن العربية بتهنج ، يعني ساعة ناس تقولك الكارت بيهنج و ساعات يقولك العربية بتقف لوحدها و ساعات يقولوا لزم تعمل reset عشان تكمل مشوارك و وصلت النكت انها لو هانجت و هي ماشية بتتقلب و إن الكوتش بيتعمله set-up على العربية عشان تمشي عدل و حاجات كدة

طيب فين الحقيقة في الموضوع دة و فين النكتة ؟

طبعاً واضحة النكتة .. إن مفيش عربية بتتقلب لما تهنج ، لكن فين الحقيقة ؟

كلنا بنسمع عن حاجة اسمها كمبيوتر العربية و نسبة كبيرة من الناس مش مستوعبة إيه هو دة بالضبط لدرجة إن في ناس بتسأل هو دة بيكون فين في الشنطة ورا ولا تحت الكنبة ولا فين (والله ما تهريج أنا سمعت السؤال دة بنفسي )
الإجابة ببساطة : مفيش حاجة معينة اسمها كمبيوتر العربية ، العربيات الحديثة كلها عبارة عن نظم منفصلة (موتور ، شاسيه ، فرامل ، تكيف ، إضاءة ، ...) و كل نظام من دول بيتحكم فيه وحدة تحكم إلكترونية مبنية على micro-processor أو CPU يعني ذي اللي في الكمبيوتر بالضبط بيكون دوره تظبيط الأداء بتاع الوحدة دي على أحسن ما يكون (يعني بتاع الموتور يطلع أقصى قدرة منه ، و بتاع التكيف يطلع أكتر و أحسن تبريد منه و هكذا و كل وحدة من دول بنسميها ECU)
و طالما في CPU و كمبيوتر يبقى أكيييد في سوفتوير (طبيعي أمال يعني هتألف لوحدها ) ، و طالما في سوفتوير يبقى أكيد في إيه ...؟ قولوا انتو بقى يا حلوين ؟
أكيد في تهنيج بمعنى إن ممكن السوفتوير يعمل حاجة خارجة عن المألوف بتاعه و بالتالي الوحدة بتاعته تقف لحد ما يتعملها reset (دة إذا ما عرفتش تصلح وضعها خلال ثواني ) ، و دة اللي بنسميه ال-fail-safe يعني أول ما تلقي نفسها خرفت تحول تصلح الوضع في ثواني من غير ما تأثر على الأداء و لو معرفتش بتروح موقفة نفسها عن العمل في حالة أمان و تقول أنا في عندي مشكلة (تنور لمبة تحذير عشان السواق يعرف إن في مشكلة ) لحد ما سيادتك تعمل start تاني أو تروح تصلحها لو منفعتش تشتغل تاني.

تمام لحد كدة ؟ نقول تمام ، طيب ليه التعقيد دة ما طول عمرنا عايشين بعربية من غير الفيلم دة كله و ماشية تمام ، الإجابة ببساطة إن زمان مكنش في عربية 1600CC بتطلع 115 حصان ، و كان التكيف بيخليها تتقل في السحب ، دلوقتي الوحدات بتاعة الكمبيوتر دي بنها شبكة Network بتخلي التكيف لما ييجي يشتغل يبعت يقول للموتور زود البور شوية عشان السواق ميحسش إن أنا اشتغلت و لم تحب تسحب أو تعمل kickdown ممكن الموتور يقول للتكيف استنى شوية و وقف الكباس لحد ما نعدي السحبة دي (ثواني متحسش بيها )
كل الكلام دة بيحصل عن طريق السوفتوير اللي على وحدات الكمبيوتر بتاعة العربية ال-ECUs

و كل ما زاد حجم السوفتوير زادت إمكانيات الراحة اللي في العربية و زادت امكانياتها و كمان زادت فرصة إلتهنيج و مشاكل السوفتوير المعروفة .

ثورة السوفتوير في العربيات دي ابتدت من حوالي ٨ إلى ١٠ سنين و واحدة واحدة كل العربيات بتتجه ليها ، من أوائل العربيات اللي ابتدينا نشوف فيها الثورة دي في مصر كنت الميجان و ابتدت بعديها تبان في الحاجات التانية (يعني كل الحاجات اللي ابتدت تتصمم بعد الفترة دي زي اللانسر الجديدة و الكورلا الجديدة والمازدا و الباسات و غيرها و غيرها ) و هتبتدي تبان فيها مشاكل سوفتوير طبيعية مع الوقت و بتتحل

بس الميزة الجميلة بقى في حكاية السوفتوير دي إن ممكن تتصلح بمجرد إن احنا بنعمل فيرجين Version جديدة تنزل على ال-ECU (مين فينا مجابش موبايل Nokia و طلع فيه مشكلة تهنيج و راح عمله update ؟؟ )

بعد كل اللي فات دة نتكلم تحديداً عن الميجان ، أيوة بتحصل فيها ساعات حركات نص كم و بقولها تاني بتحصل "بتحصل " ، بس كلها حاجات عبيطة و مش مشاكل خطيرة و مش ممكن ، تاني مش ممكن تحصل حاجة خطيرة (عشان فكرة ال-fail-safe اللي قلنا عليها ، غير بقى لو ربنا كاتب لواحد حاجة لا قدر الله و دي مفيش منها هروب )
طيب إيه أمثلة إلتهنيج اللي بيحصل :
١- الكاسيت ساعات ميرضاش يعلى ولا يوطي الصوت (بس شغال ) ، ببساطة إطفيه و شغله خلاص (حصلت مرة واحدة معايا )
٢- ينور لمبة الأعطال من غير سبب واضح و تروح لوحدها بعد ثانية واحدة
حاجات من النوع دة ، و بتحصل في كل العربيات اللي فيها سوفتوير بالحجم دة مش بس الميجان

الخلاصة إن دي حاجة عادية مش حاجة خاصة بالميجان ، وهانشوفها كتير في كل العربيات اللي هتطلع بعد كدة (و أنا أهو و انتو أهو )

أسف مرة تانية للإطالة و اتمنى أكون أفدتكم . مع خالص تقديري

معلش الأقتباش طويل شويتين بس مفيد.......خلينا بأه بعد الكلام اللى بيتقال على الميجان ده نصبر كام شهر كده لحد لما الكورولا الجديدة ( اللى المفروض أنها من أكتر العربيات مبيعاً نظراً لأعتماديتها العالية أو فى مقولة أخرى من وجهة نظر المستهلك المصرى......عربية تركبها وتدور وتمشى فى أشارة الى قلة أعطالها ) خلينا نصبر لحد لما تكمل سنة كده ونشوف هتعمل أيه و نشوف الناس اللى كانو متعودين يصلحو برة التوكيل هيعرفوا يعملو كده تانى ولا لأ بعد ما العربية نزلت بالكماليات والتجهيزات اللى نزلت فى الميجان من 5 سنينptmnlo123per154

بس متنساش.............لازم تقرأ الأقتباس

تحياتى

[AbOnOrA]

اولا اسمحولى احييكم انتوا الاتنين على الاسلوب الراقى فى الحوار واحترام الاخر رغم الاختلاف الحاااااااااد بينكم فى الراى

وانا شايف ان اختلافكم نموزج من اختلاف الناس ككل على النوعية ديه من العربيات high tech

واعتقد ان الاختلاف مش ممكن يتحسم ابدا لان فيه ناس دايماً يهمها الاعتمادية والاداء بشكل كبير وفيه ناس يهمها التكنولوجيا والكماليات اكتر وده صعب تغييرة

بس انا ليا شوية تعليقات بسيطة على الموضوع خاصة انكو دخلتو فى السوفت وير ونظم المعلومات عامة وده تخصصى

1-

و هكذا و كل وحدة من دول بنسميها ECU)

ال ECU تطلق على وحدة التحكم فى المحرك فقط اما الوحدات المسئولة عن النظم الفرعية يمكن تسميتها CU او وحدة تحكم فقط

والامر اشبة لوحدات التحكم فى كروت ( الصوت - الشاشة - الشبكة ) وكل دول متصلين بوحدة تحكم مركزية اللى هيا CPU فى الكمبيوتر

2- اعطال نظام المعلومات فى السيارات مش بس ناتجة عن مشاكل السوفت وير انما جزء كبير منها راجع لاجهزة الادخال واللى هيا فى الحالة ديه بتبقى السيسنورز فلو قراية السنسور غلط او غير دقيقة هتبرجل ال CU وده اللى بيؤدى للتهنيج او على الاقل اصدار اوامر خاطئة وبالتالى نتائج خاطئة

3- بالفعل ظهرت مشاكل فى العربيات الحديثة وفى الكرولا كمان راجعة لسوفت وير ال M-MT او نظام التحكم فى نقلات الفتيس (زى الستب ترونيك والايزى ترونيك فى ماركات اخرى) ويتم حلها فى مراكز الخدمة

4- بس كمان تقنيات حديثة كتير نزلت فى عربيات فخمة زى المرسيدس والبى ام ولكزس وميركورى الخ الخ وكانت رائدة بس مكانتش بتعمل المشاكل ديه وده راجع لقوة مراكز الابحاث التابعة للشركة ديه والتزامها بمعايير اعلى فى الجودة

واخيرا وده راى شخصى فى الموضوع ككل

انا شايف ان كل ما العربيات دخلت فيها مكونات الكترونية هتقل اعتماديتها وتكثر اعطالها وتبقى اكثر تعقيدا فى صيانتها

كمان شايف انى لما احب اشترى عربية high tech لازم ادور على عربية شركتها معروف عنها التزامها بالبحث العلمى ويكون تاريخ الموديل قديم فيكون خد وقتة فى المراجعة والتعديلات والتطوير

وده اللى بيخلى الدنيا كلها تثق فى سيارات مجموعة فولكس او بى ام ومرسيدس عن باقى السيارات الاوربية لانها بتقدم توليفة متجانسة من التكنولوجيا والاعتمادية وده اللى بيميز الالمانى عن الفرنساوى حتى الان وان كنت اتوقع ان ميجان الجديدة تبقى اكثر نضجا واعتمادية عن الحالية

يجب ملاحظة ان قطاع كبير من اللى بيشتكوا من العربية بيشتروها مستعملة خاصة بعد ما سعرها نزل جامد فى السوق وممكن تكون حالتها سيئة او ميتعاملش معاها بالقدر الكافى من الصيانة والمتابعة فاكيد المصحلة هتكون ان فيه ناس كتير بتتعب من العربية

اسف للاطالة وسعيد جدا بالحوار القييم اللى بينكم ده

[tronky]

أستاذ أبو نورا.........شكراً لك أولاً
ثانياً أى CU أو Contorl Unit لازم تبقى ألكترونيك.....ولا أيه ؟ يعنى هى فى الأخر ECU بس الأختلاف عن زمان هو وجود أكتر من ECU لمختلف أجزاء العربية...........وبيكون هناك ما يقوم بالتوصيل بينهم زى ما حضرتك قلت.

ثالثاُ أى ECU مبتبقاش من أنتاج الشركة المصنعة للسيارة مهما بلغت قوة أدراة الأبحاث فى الشركة دى.....يعنى الشركة الرائدة فى المجال ده فى العربيات واللى معظم الشركات بتاخد منها هى Seimens بلا شك
الأختلاف ممكن يكون راجع لعوامل كتير زى متطلبات شركة السيارات فى ال ECU المختلفة وتصميم العربية نفسها والمحرك والفتيس......هو يمكن ما يميز الألمانى عن غيره من الأوروبى أو الفرنساوى ( فى أعتقادى الشخصى ) هو تجربة ال ECU المختلفة لفترات طويلة كفاية بحيث أن الشركة بتتأكد من خلو ال ECU من العيوب بقدر الأمكان......وفى الأخر الكمال لله وحده.........ولازم تشوف عيوب معينة ولو أختلفت النسب.

أنا ليا أخ عايش فى بلد عربى وكان معاه C180 مو 2005 جابها قبل عربيتى بكام شهر كده........وأنا بشترى كان بيقولى أنه عنده مشكلة فى لمبة ال ABS وأنها منورة على طول مع أن العربية مكملتش 6 شهور.......وداها التوكيل وصلحوها بعد أسبوع لعدم توافر السينسور اللى بايظ فى وقتها..........و أهى أسمها مرسيدس ومش متجمعة فى مصر ولا حاجة..................و على فكرة باعها أول السنة عشان عيب فى كمبرسور التكييف و كان فاضل عليها 3 أسابيع وتطلع من الضمان.........وداها التوكيل وقالوله أنهم غيروه بس هوه كان شاكك عشان أداء الكمبرسور مفرقش كتير عن الأول.........المهم أنه باعها عشان الكمبرسور ب 22 ألف ريال
و برضه زى ما حضرتك قولت..........العربيات الجديدة أبتدى يحصل فيها مشاكل.......و فى رأيي كلها مشاكل بسيطة ولكن عدم قدرة المستهلك المصرى على أستيعاب التكنولوجيا بسهولة وبالتالى ......................... .......أعتقد أنتو عارفين