كلام في السيارات 1(حازم خضر)

[mohamed ibiza]

كلام استاذ فادي صحيح من الناحية النظرية بس التجربة بتدي انطباع تاني يعني انا عندي 280 و هي سيارة فخمة عائلية هدفها الاول هو الراحة و طبعا بس انا جريت بالعربية دي و اخدت بيها منحنيات صعبة علي سرعات 140 -150 كيلو مع ذلك محستش بأي نوع من انواع الانزلاق او عدم الثبات و كنت فاتح الشباكين اللي ادام و فتحة السقف

انا بس مختلف معاك في التجربة فقط يا باشا لان انا جربتها بس

[sam ram]

على فكره برضو ....
قاعده العجلات الكبيره Wheel base ... بتحسن ثبات العربيه ...
علشان كده العربيات الصغيره اوي(الاقتصاديه ) ... بالرغم انها خفيفه لكن ثباتها في الطراوه .. لأن تماسكها ضعيف و العجل رفيع ..
التماسك Grip مهم جدا وبيأثر جامد على الثبات ... لان الوزن الخفيف اسهل في المناوره لكن لو بيحصل للعربيه uplift ... بمعنى ان الهوا اللي بيعدي تحتها يخفف وزنها النسبي يبقى التماسك ضعيف ... و بالتالي ضاع الثبات ....

فالوزن مفيد في التماسك grip ... لأنه بيرسي العربيه على الارض ... و ليس في الثبات ... لأنه بيأثر سلبيا في المنحنيات نتيجه قوه الطرد المركزي بسبب وزن العربيه ...
لكن في نفس الوقت التماسك بيفيد في الثبات ... الكلام مش متناقض ... لكن العلاقات فيها تعارض ( وزن - تماسك - ثبات )

وتوزيع الوزن اهم من الوزن ... ودي قصه طويله اوي .... لكن عموما مرسيدس من اقدم الشركات اللي راعت النقطه دي .... علشان كده ابيزا بيحس بثبات ممتاز بال 280 ... قاعده عجلات طويله ... توزيع مثالي للوزن ... كاوتش عريض ...
ده طبعا غير تقنيه مرسيدس و انظمه التعليق ....
ربنا يباركلكم فيها يا ابيزا ...


معلش انا حاسس انكم بتتكلمو في وادي و انا مع نفسي في وادي تاني ...
بس اصل الموضوع نسبي و في عوامل و متغيرات كتيره جدا ...
يعني مفيهوش اوي صح و غلط ... على اد ما فيه متغيرات و عوامل ايجابيه و سلبيه ...
يعني ممكن نقول ان دي بعض العناصر اللي تأثر على ثبات العربيه
عرض الكاوتش
ارتفاع العربيه (الارتفاع الكلي - الخلوص عن الارض )
وزن العربيه
توزيع وزن العربيه
نوع العفشه و حالتها
الانسيابيه
طول وعرض قاعده العجلات
تماسك الاطارات بالطريق وحالتهم و نوعهم
الانظمه المساعده
نوع الجر :- امامي - خلفي - 4×4 ptmnlo123per154
الشكل :- سيدان - هاتشباك - MPV
دول اللي جم في دماغي دلوقتي

واسف على الرغي ... بس اصلي بحب اوي المواضيع دي ...
و مبسوط بالنقاش .. بينعش الذاكره و يشغل دماغ الواحد
ptmnlo123per1105


ما تتكلم يا سومو ....
مش دي داخله في الحته بتاعتك برضو

[bmkbmk]

شكرا يا فادى باشا على المعلومات القيمة بس كلامك بيشجعنى انى اطرح سؤال ....

ماذا تعنى لك لكمة ثبات ؟؟؟؟؟
هل هو ان العربية ماتميلش فى المنحنيات و لا ماتتزحلقش فى المنحنيات ولا الهوا مايوديهاش و يجيبها على السرعات العالية فى خط مستقيم .... يعنى من وجه نظرك بغض النظر عن انواع الثبات الرياضى و الراحة الداخلية.... امتى تقول العربية ثباتها ممتاز ؟؟؟؟؟؟؟


شكرا يا سامى باشا على مشاركاتك المفيدة و التى تنم عن دراية حقيقية

و كلام حضرتك كله صح و منطقى

و طبعا معروف ان الوزن بيتناسب عكسيا مع الثبات علشان قوة الطرد المركزى زى ما حضرتك تفضلت
و فى الحالة دى ممكن نقارن ثبات السيتروين بالبورش مثلا بما ان وزهم اقرب لبعض

الفكرة اللى انا بقوله ان فعلا المرسيدس قادرة بشكل غريب بانظمتها و تقنياتها على تخفيف العامل ده جدا ... طبعا هى مش هتتحدى فيزياء الكون ولا حاجة بس بتعالجه بمستوى عالى جدا

و زى ما قلت قبل كدة البى ام الفئة الخامسة مثلا فيها تلات أو اربع مستويات من الثبات بتقدر حضرتك تختار بينهم و انت سايق
و انا شفت حلقة عنها مش فاكر فى برنامج ايه و هما مشغلين الثبات الكامل ده و بيجربوها فى المطر ... والله العظيم فعلا بقى بتتحدى قوانين الطبيعة العربية ماشية على جبل طالع نازل و منحنيات و مطر و شد و فرامل ... ان العربية تتتعع من مكانها ولا تتزحلق سنتى مفييييييش... تحس انها ماشية على قضيب قطر او لانش ماشى فى المية بتاعت المطر بكل سهولة و سلاسة.....

فا كلام حضراتكم صح بالنسبة لقوانين الثبات .... انما الالمانى يفوق كل التوقعات بجد و علشان كدة بنصح بالتجربة و ليس الكلام فقط علشان تعرفوا يعنى ايه ثبات

و برده مش مقتنع ان ثبات الستروين او البيجو مثلا احسن من الالمانى لا طبعا والف لا ... اعذرونى يا جماعة بس انا والله مجرب المرسيدس و البى ام دول .. بجد مافيش ولا كلمة ..... انتو هتخلونى اروح ااجر ستروين علشان اروح اجربها بس . و اقارن بين ثباتها و ثبات الالمانى ... مع انى عارف النتيجة من قبل ما اجرب لكن علشان اقطع الشك الواحد فى المليون باليقين ....

تنصحونى اجرب سيتروين ايه يا جماعة ... ايه اثبت عربية عملتها ستروين علشان اروح اجربها ؟؟؟؟؟؟؟؟

صحيح و لو حد شاف فيلم رونين بتاع روبرت دى نيرو كان فيه مطاردة بين بيجو و بى ام شوفو الفرق بينهم فى الثبات البى ام وحشششش بينما تتراقص البيجو يمينا و يسارا ......طبعا ده مش مبرر ولا حاجة بس حاجة افتكرتها قبل ما اخلص الرد بتاعى ... و اوعو تفتكروا انى باخد معلوماتى من الافلام انا لا اقتنع بعربية الا بعد تجربتها

و شكرا لحضراتكم جميعا

[فادى]

بالضبط زى ما قالك أستاذ سامح, الثبات بيعتمد على عوامل كتير من الصعب حصرها و تحديد ثبات سيارة ما بدقة,
بس انا حسيت انت بتسأل يعنى أنهى أكثر ثباتا السيارات الصغيرة و لا السيارات الكبيرة؟
السيارات الصغيرة غالبا تعانى من نسبة طول لعرض قليلة, و من كاوتش غير عريض,
فى المقابل السيارات الكبيرة عرضها أكبر و كبر حجم المحرك بيسمحلها بان اطاراتها تبقى أعرض, لكن فى المقابل تعانى من ثقل الوزن و عادة من نعومة نظام التعليق لأن الراحة ليها أولوية فى هذه الفئة,
بالطبع السيارات الرياضية هى الأكثر ثباتا فهى لا تعانى من كل هذه العيوب,
لكن فى النهاية احنا مش بنتكلم فى تجارب, انا بتكلم عن سمعة متوارثة بدون تحديد سيارة معينة, السيارات الفرنسية مشهورة بالثبات من زمان,
هى دى المعلومة اللى بحاول أصححها, بدون الدخول فى تفاصيل فلا شىء يمنع أن تكون المرسيدس أكثر ثباتا من بيجو مثلا (عن نفسى لا اعتقد ذلك), لكن هنا يعتقد الناس انو الالمانى مشهور بالثبات و ده غير صحيح على الاطلاق(و لكنه ليس مشهورا بالعكس) ,
الألمانى مشهور بالاعتمادية و جودة البناء.
الفرنسى مشهور بالثبات.
الايطالى مشهور بالطابع الرياضى و الأعطال!
السويدى مشهور بالأمان.
الامريكانى مشهور بالمحركات الكبيرة و سهولة القيادة.
دى بنسميها السمعة المتوارثة و ليست كلها صحيحة, فمثلا لم يعد الايطالى كثير الأعطال بل تقدمت فيات خطوات واسعة فى موضوع الاعتمادية و تفوقت حتى على الألمان مؤخرا, السويدى لم يعد الاكثر امانا فمرسيدس تقدم وسائل امان اعلى من فولفو بكثير,
فهل مازال الفرنسى أكثر ثباتا؟ معرفش.

[bmkbmk]

شكرا يا باشا على توضيح وجهة نظرك

انا فهمت الاختلاف دلوقتى جاى منين .. انا مركز فى التجارب و انت مركز فى السمعة المتوارثة و استاذ سامح مركز فى الشرح التقنى و الفنى .

عموما يا باشا المناقشة اسعدتنى جدا و فادتنى و يا ريت يكون فيه مناقشات كتير من النوع ده

و الاستفادة المتبادلة و توضيح وجهات النظر بشكل حضارى و ثقافى بين كل اعضاء المنتدى المحترمين