حكايتى مع السيارات فى العراق !

[Dr. Bolbolan]

سألتالراجل الطيب مهى طبيعة شغلى قاللى بس تقعد فى المحل لو احتجنا حاجه أو مشينا لسبب طارىء تبقى انت موجود ولو جت سيارة مع عميل علشان يسلمها تشيك عليها ! طبعا خاب أملى وكنت عامل زى عادل امام فى فيلم زهرة الصبار لما كان بيقول ح نبوس امتى وكدت أقولهم عايز أسوق ح نسوق امتى !؟ وبعد يومين 3 صاحب المحل جاله واحد قصير و أنيق وجلس معاه شويه قام صاحب المحل ندهلى وقاللى بتعرف تسوق قلت له طبعآ - قالى الآستاذ عنده سيارة بتاعة المكتب جنب بيته و عطلانه وهوه معاه سيارة تانيه دلوقت - خد انت سيارة من أمام المكتب وامشى وراه واكشف على السيارة العطلانه يمكن تصلحها ! قلت ماشى وأنا الفرحة تنط من عينى ! مش فاكر الراجل كان راكب ايه لكن أنا كان معى تويوتا كورولا موديل 81 طبعا كانت تحفة بالنسبه للكنب اللى كنا بنركبه فى مصر ! الراجل انطلق ( وكنا مساء ) بسرعه وأنا وراه دخل فى الزحمه وبقى ياخد اسات وخمسات وأنا برده وراه وبأميزه بالعافيه ! طار زى العفريت كأنه بيهرب منى ! الله دانا مش عارف بيته ولا أعرف أرجع المكتب تانى لوحدى لو تاه منى ! جه عند اشاره حتحمر وعداها بسرعه واحمرت على - ماسبتوش ! عارف اللزقه المسيحه ! المهم يمين شمال وصل الفيلا بتاعته وقاللى أدخل ! ليه ياعم فين السيارة العطلانه؟؟ قاللى واحد صلحها ومشى بيها ! يا نهار اسود هوه فيه ايه ! جاب لى ويسكى وبيره قلت له حدالله ! ابتديت أقلق - ولما شفت فيلم جرى الوحوش قلت الحته دى بتاعة محمود عبدالعزيز مقتبسه منى ( أنا صحيح فقير وغلبان انما جدع قوى !! ) - المهم الراجل شرب كاسين واتكلم فى التليفون وقاللى يلا نرجع المكتب ! ومشى بقه على مهله!
لما دخلنا المكتب كان الرخم أو الشرس ( الطيب والشرس والقبيح ) والطيب جالسين مع بعض ! قالوله ايه رأيك؟
قالهم أوووووف خوش ولد - شيطان ومافيش زيه ! ptmnlo123per111 أتاريهم ولاد اللئيمه عاملين لى اختبار علشان لما يتركونى لوحدى يطمنولى !! وهنا برده درس آخر ( حتى فى دول العالم العاشر ستجد من هو أزكى منك واللى يعيش ياما يشوف !!!! ) ptmnlo123per1106 Dr. Bolbolan

[Dr. Bolbolan]

تانى يوم جانى الشرس و أعطانى مفتاحين ! واحد بتاع محل مغلق أمام مكتب السيارات والتان لمحل مغلق برده على نفس الصف بس بعيد حوالى 25 متر وقالى تفتح المخزن الآولانى وتنقل الحاجات اللى فيه للتانى ptmnlo123per1106 نهار أبوه اسود ! قلت ياواد على رأى اسماعيل ياسين ( خليك بااااااارد ) ماشى - فتحته لقيت عزبة شلبى وأم شلبى كمان جوه ! بطاريات قديمة مساعدين قديمه كاوتشات قديمه صاج رفارف ! لاحول ولا قوة الا بالله - استعنت بالله وحيث أنى كنت بألعب كمال أجسام أياميها ( طبعآ دلوقت بقيت مسخره ) قلت ياواد كآنه تمرين ونقلت كل حاجه وبعد ما رجعت قاللى عندك ورا مطبخ صغير اعملك شاى - طبعآ كنت محتاجه جدآ وأنا بعمله قاللى اعمللى معاك استكانه ( ربع شاى صغير خفيف ) - ptmnlo123per195 قمت دالق الشاى ومغرق الدنيا وقلت له معلش ياعم أصل أنا أول مرة أعمل شاى فى حياتى !ptmnlo123per154 قاللى خلاص ماعدتش تعمل شاى !
ومشى المعفن ده وجاء الطيب وحكيت له على اللى حصل وزعل جدآ وجمع الشركاء مساء وقال لى أمامهم انت هنا معزز مكرم لا تشيل حاجه ولا تعمل شاى لآحد ptmnlo123per122بعديها يا بهوات كنت بأعمل شاى وقهة ( لنفسى طبعآ ) كل 5 دقائق ! وعرفت أسرار الشغل بسرعه بدون أن يشرحولى شىء وكانوا بيغسلو الزبون ويشطفوه ويمشى وهوه مبسوط ! و أهم حاجه عندهم جسم السيارة لآن مافيش سمكرة ولا حاجه وكان استيراد الصاج صعب جدآ يعنى تشترى سياره أسهل لكن الموتور بتعمل له عمره كامله فى يوم وتانى يوم تكون السيارة دايرة وماشيه وهى تلين نفسها بمعرفتها ! وكان عندهم 100 سيارة نصفها بتاعتهم ونصفها ايجار !


أعتقد استراحه قصيرة للقراء بس حد يقوللى لو شاف فى حياته غلب زى كده يقوللى ولا عزاء للآطباء !

Dr. Bolbolanptmnlo123per1127

[Dr. Bolbolan]

انت فين يا عم جنيدى !ptmnlo123per195 أنا مسافر مصر انشاء الله ptmnlo123per154 وسأكمل قريبآ باذن الله !

خش انت بقى وأمتعنا بحكاياتك عن الدول اللى زرتها الخ الخ الخ
والسلام عليكم ورحمة الله وبركاته


Dr. Bolbolan ptmnlo123per1127

[Meemo The Beast]

بصراحة أشك إن ممكن حد يحكي بهذا الإسهاب و خفة الدم و الأسلوب الأدبي الجيد

[Dr. Bolbolan]

شكرآ يا عم ميمو يا وحش والله دا بس من ذوقك أنا حاليا فى مصر وانشاءالله أكمل بس نفسى

عنوان الموضوع يتغير لآنى اكتشفت ان ممكن عنوان مثير على موضوع مش قد كده يجذب قراء كتير !

عموما انشاء الله لما نخلص قصة العراق ونخش على دول تانيه ح أبقى أعمل عنوان يدل على

المضمون ! ومره أخرى شكرآ جزيلا ptmnlo123per154

DR. Bolbolan ptmnlo123per1127