حكايتى مع السيارات فى العراق !

[Dr. Bolbolan]

يا أستاذ جنيدى معظم الناس فاكره ان الدكتور مرفه منعم والفلوس عنده بالشوال أو بالعبيط وانه دايمآ زى أفلام عماد حمدى القديمة لابس بدله على طول وراكب سياره شيفورليه ( مش كورى طبعآ ) و جنبه مزه بتغنيله سوق على مهلك سوق ولما بيروح بيته ( أقصد القصر بتاعه ) بيقابل أمه وبيقولها عامله ايه يا تيزه !!!!!!!!!!!!! أرجوا أن يكون وصلك مفهومى !ptmnlo123per111


Dr. Bolbolan ptmnlo123per1127

[MosTafaFox]

متابع باهتمام موضوع رائع

[Dr. Bolbolan]

الحمدلله الغداء دلوقت كان جمبرى والواحد قاعد منور والذاكره انتعشت المهم بعد الهروب الكبير عرفت انى لازم أعمل بطاقة هويه من حته اسمها الكاظميهوركبت الآتوبيس اللى يودى على هناك وهو أتوبيس أحمر أخو أتوبيسات لندن بدورين وسلم داخلى ومرايه مقعرة من الآمام والخلف بس هنا الدركسيون على الشمال والباب من على اليمين وممنوع الوقوف وأحيانآ مافيش كومسارى ولكن تحاسب السائق الذى هو فى الغالب باكستانى أو مصرى بنسبه أقل ولايمكن يقف غير أمام المحطة بتاعته كمان هناك كانت أول مرة فى حياتى أشوف الميكروباصات واسمها هناك فورطه ولما يكمل عدد الركاب يقولك كبط بتشديد الباء وبرده الميكروباس له محطات بين محطات الآتوبيس ولا يمكن يقف غير فى محطته ( دا فى العراق من 30 سنه ومش عارفين نعمل كده فى مصر دلوقت ) المهم وصلت الكاظمية لقيت مسجد جميل وأمامه ساحه زى السوق قابلت أول شاب عراقى وسألته عن السفارة المصرية فقال لى انت مصرى ؟؟ قلت آه ياعم ايه أنا ماعملتش حاجه !! قاللى ماتخافش تعالى أوصلك السفارة ( مشى يعنى ) المهم دخل محل نظيف مطلع ريحة فلافل جنان واشترى كام ساندوتش وأعطاهم لى وقاللى كل ! لاحول ولا قوة الا بالله ! سبحان العاطى أنا كنت ميت من الجوع ( شوف ربك ) فقلت له شكرآ أنا مش جعان فقاللى مش ح أوديك السفارة الا لما تاكل دانت ضيفنا ! وأكلت ووصلنى السفارة وأنا أقول سبحان الله ! طبعا متخيل السفارة دى امارة موناكو ولكن دخلونا حجرة طويلة ضلمه مليانه بنشات خشب قديم زى الكنائس اللى بتطلع فى أفلام الكاوبوى القديمة وشخط ونطر وقلة قيمه وأخذوا فلوس مقابل الهوية ولما خلصوا بقوا يحدفولنا الباسبورات والهويات زى لما بتحدف لكلب عضمه ولو جدع يلقفها فى الهوا المهم خدت حاجتى وطلعت أجرى من السفارة وأنا بأهتف تحيا مصر تحيا مصر واستنيت أسمع الرصاص لكن الحمدلله عدت على خير ! المره القادمه نحكيلكم عن مواقف الميكروباس والتاكسى والمهازل التى كانت تحدث وكمان وصف لبغداد وشوارع بغداد !! ايه نكمل يا خوانآ لسه كتيرررررررررر

Dr. Bolbolan ptmnlo123per1127

[Dr. Bolbolan]

بغداد يامليون خسارة يا بغداد - كانت مدينة جميله من 30 سنة وتخيلوا مع فلوس البترول والتطور الحتمى كانت حتكون ايه دلوقت والله يجازى اللى كانوا السبب - دا أنا حتى بأدخل عليها بالجوجل دلوقت وشايفها برده حلوه ! يعنى قبل ما أوصل لها كانت فعلا فى خيالى زى أفلام على بابا وعلاء الدين ! يعنى بيوت بقباب ومآذن لكن وجدتها مدينة جميله نظيفه و منظمه ليس به منازل أعلى من 4 أدوار الا كام عماره وفندق والباقى فلل وطبعا زى كل مدينة فى العالم فيه مناطق فقيرة ! بس اللى غاظنى هناك ان فيه محلات بيره وخمره أكثر من محلات عصير القصب فى مصر ! وأنا فضلت 6 شهور أشوف محلات مكتوب عليها يوجد بطل بيره يوجد بطل بيرة !! فقلت فى نفسى أكيد دى محلات خمره وبيعملوا مسابقات زى الآفلام الآجنبى واللى يشرب بيرة أكثر يبقى البطل بقه ويدوله فلوس كتييير
ولم أسأل أحد عن معنى بطل البيرة ده علشان طبعآ ما هى مفهومه بس الحمدلله انى ماسألتش لآن فى الآخر فهمت انها Bottle Beer يالهوى على الذكاء ! المهم المواقف هناك مثل سوق عكاظ!
الملاكى واقف يحمل زى التاكسى ومافيش فرق وتلاقى واحد ببدله أنيقة يطلع كده مدير عام أو عقيد شرطه أو جيش واقف بينادى على الركاب وبيتقاول مع ناس فقراء جدآ ليركبوا سيارته !! وطبعا سبب ذلك ان الكل هناك مسلح وضرب النار فى الرأس على طول يعنى ميت ميت ! وبعدين كان عندهم قاعده ان رجال الجيش لهم الآولويه فى كل شىء ! يعنى أصغر عسكرى ممكن ينزلك من الآتوبيس أو السيارة ليركب مكانك لآن ده عنتر زمانه وهوه اللى حيخلص المعركه وكمان الناس هناك يحبون المال حبآ جمآ ! هما مش بخلاء بل مسرفين بس طماعين ! وبعدين لهم عاده سيئه جدآ على الطريق لو عرف انك وافد وتقود سيارة !! أحكيها المرة القادمه مع أنواع السيارت والبنزينات والبنشرجى ! معلهش لازم أتوقف كل شويه أولع سيجارتين تلاته ( عاده سيئه جدآ ومضره للصحه)

Dr. Bolbolan ptmnlo123per1127

[Dr. Bolbolan]

السيارات اللى كانت موجوده فى البلد معظمها يابانى خاصة التويوتا بأنواعها ثم النيسان ثم الآمريكانى خاصة الكابريس ثم المرسيدس والفولفو و الفولكس ولم أرى فيات الا فى الشركة التى عملت بها بعد ذلك ( فيات 127 برازيلى ) والتاكسى هناك كان معظمه تويوتا كريسيدا والبنزين هناك كان تقريبا 98 يعنى بيخللى الشكمان أبيض والسيارة تتعفرت عفاريت ! والحاجه الغريبه يبدوا ان البنزين كلما ازداد نقائه بتبقى ريحته وحشه جدآ يعنى تدخل البنزينه كآنك داخل بكابورت لا مؤاخذه ! وغسيل السيارات هناك له محطات خاصه غير البنزينه وبيغسلوا السيارات بماء ساخن فعلا كان بينظف السيارات جدآ وزيت السيارات اسمه ( دهن ) وبتاع الكاوتش اسمه ( بانشرجى ) والمفك اسمه ( دينافيس ) يعنى واحد يقولك ( دب الدينافيس ) يعنى سيب المفك أو ارميه على الآرض !
والكاوتش ( تاير ) سهله دى ! وامشى على طول يعنى ( جوبل ) ولوف يعنى لف وآكو ينى فيه أو يوجد وماكو يعنى لايوجد وكان فيه واحد صاحبنا اسكندرانى عندما يذهب لشراء شىء ويقول له البائع ماكو ! كان بيرد عليه بسرعه رد لامؤاخذه مش حلو والحدق يفهم ! وعلى طرق السفر العاده السائق يلم الآجرة فى منتصف المسافة وبيمشوا زى المجانين ( سرعه مع غشم ) والعاده السيئه عندهم سواء تاكسى أو ملاكى انه لو عرف انك وافد وتقود سيارة مثلا وكان عنده رفرف مخبوط يقوم خابطك تانى فى نفس الرفرف وياخدك على الشرطه ويقولك عوضنى واذا فتحت بقك - سجن أبو غريب على بعد 40 كم وما أدراك ما سجن أبو غريب ! أول لكم على معلومه تعرفوها أول مرة ؟؟ سجن أبو غريب يقع مباشرة على طريق سريع وقصاده من الناحية التانيه من الطريق مقابر الكرخ !!؟؟ يعنى ممكن تدخل السجن ده على حاجه هايفه وتتخرج على طول على المقابر !
وسيارات التاكسى هناك ألوانها زى تاكسى عداد المنصورة والزقازيق ! وليس عندهم سيارات موتى ! أو تكريم الانسان ! اللى بيموت هناك بيحطوه فى صندوق خشب عادى خالص فوق شبكة السيارة من فوق !! ولو كان شهيد بتقف السيارة دى أمام بيتهم وفرقة زى بتاعة حسب الله وجادوليو يعزفوا أغانى وموسيقى مفرحة !!
أى والله العظيم ! ليه مش هوه رايح الجنه !!؟؟؟

استراحه قصيرة يا اخوانى وسنعود ( ملحوظه لو فيه حد متضايق من الكلام ده ممكن أتوقف ببساطه ) وشكرآآ


Dr. Mowafi ptmnlo123per1127