الاتجاة المشاكس (شيرى وسبيرانزا) موضوع للنقاش حول تجربة السيارات الصينية فى مصر

[حازم شاهين]

أكيد طبعا الصينين بيعتمدوا على أفكار الأخرين فى تطوير سياراتهم و منهم بيمشى قانونى و منهم بيسرق عينى عينك
أقصد بالقانونى إنه يستعين بمصمم أوروبى مثلا و يستعين بمكونات من شركات معروفة و يستعين بتكنولوجيا و إبتكارات شركات عريقة بالإتفاق معها.
لكن أكيد فيه مصنعين تانين بيقلدوا أو بيقتبسوا إذا ما كانش بيسرقوا من أول تصميم السيارة لغاية أصغر مسمار. أمال مش عايزين يعترفوا بحقوق الملكية الفكرية ليه.
كمان فى الصين عندهم استعداد يمطروا على الناس بالمنتجات من كل المستويات بس حد يقول هات بمعنى عندهم قدرة و طاقة إنتاجية هائلة - الظاهر إنهم لما بيعملوا صناعة من أى نوع بيبقوا عاملين حسابهم إن الطاقة الإنتاجية بتاعتها تغطى العالم كله بدون مشاكل بالإضافة إلى إن السوق بتاعهم الداخلى فى حد ذاته كير جدا و يقدر يكبر أى شركة بسهولة و بدون لإعتماد على أسواق التصدير ... زاى أمريكا (بدون تشبيه فى جودة الصناعه و الله - لكن فى حجم السوق بس) ..... أمريكا أسباب عظمتها إنها STAND ALONE يعنى الدولة الوحيدة اللى ممكن تكتفى ذاتيا (فيما عدا البترول) و ده اللى خلى شركاتها عملاقه رغم عدم اتنشارها خارجيا (فورد - جى إم - كرايسلار بالمقارنة بتيوتا و هوندا اللى بتعتمد على مبيعاتها فى أمريكا الشمالية علشان تقدر تتغلب على العمالقة الأمريكان) نتيجة لإن السوق الأمريكى من الضخامه اللى تخليه يستوعب الإنتاج المهول للشركات الأمريكية من غير ما تشغل بالها كتير بالتصدير ..... أسف الموضوع إتحول منى لكن أقصد إن السوق الصينى ممكن يكون شبه الأمريكى بس على أصغر يعنى يقدر يستوعب إنتاج كبير و تنوع كبير فى الموديلات و ده قبل ما يفكر فى التصدير

بالنسبة للعدد الكبير للشركات الصينى برضه علشان الصناعة لسة فى بدايتها و ده حصل فى اوربا و أمريكا لغاية ما ابتدت تظهر كيانات عملاقة تقدر تضم عدد من الأسماء تحت جناحها (زى ما حصل لفولكس و بى إم و رينو و فيات عبارة عن سبع تمن أسماء فى بعض) (جى إم و كرايسلر عبارة عن خمس ست شركات أمريكانى قديمة)

اللى يهمنى فى الموضوع ده إن الناس ما تستهونش بالصينى لأن بعد فترة ممكن يكون هو من أهم اللاعبين فى السوق و ممكن يكون قاعدة الصناعة فى العالم زى ما حصل فى اللإلكترونيات و الملابس مثلا - يا ترى لو إحنا فى مصر ممكن نستفيد إزاى من الأفكار و الخطوات دى.

[ابو جودة]

انا عن نفسى جربت الاكسبلوجان مو2008 عربية متوسطة على اد فلوسها بس مش وحشة

[ابوفادي]

ايه ياعم اللي انت بتقوله ده ليه بتكلم كده بدون علم وكانك متاكد ... لاحول ولا قوة الا بالله خليك موضوعي ومنطقي في كلامك

[ahmed1981]

صناعة السيارات في طريقها للإنتقال إلى الصين بصورة شبه كاملة
يعني اللي معوش صيني النهاردة
بعد خمس سنين هيركب ماركته المفضل ولكن صينية الصنع

هناك سيارات صينية الآن تنافس السيارات الكورية رغم أنها رضيعة بالنسبة للسيارات الكورية
لكن زمن التلاعب بالعملاء إنتهى
الكل كان من قبل يصنع في الصين ويجمع في كوريا وغيرها ويصدر لنا

آن الأوان للصين لكي تصدر مباشرة للأسواق

وسياراتها درجات كل حسب سعره
البيع بناءاً على التاريخ والسمعة الماضية بدون جدين إنتهى
إنتهى زمن ال 128 والشاهين أمام الهجوم الصيني

وللأسف فقد بدأنا صناعة السيارات قبل الصين بحوالي 30 سنة على الأقل
لكن إيه مش عارف

الآن أرى أنه مثلاً:
سبيرانزا إم 11 تنافس شيفورليه أفيو
بي واي دي إف3 تتحدى الفيرنا واللانوس
إكسبلوجن زويت تنافس لادا نيفا

والأفضل قادم في الطريق

أما أن يقول قائل إن الشعب المصري سهل الضحك عليه في السيارات بمظهر جذاب أو بمقدمة ملتوية
فهذا قول بعيد عن الحقيقة
فالمستهلك المصري قوي الذكاء
ولا تستطيع الضحك عليه بمظهر جذاب أو بحديث ممل عن أصالة سيارة من العصر الحجري يتم طباعتها حتى الآن

[MohamedGafar]

لأ ماأعتقدش إن لو معايا 65 - 70 ألف جنيه إني ممكن أشتري عربية صيني بأي حال من الأحوال! ده انا صاحبي معاه الجالينا اللى ب 160 ألف جنيه وخامات البلاستيك وطلاؤه وتقفيله جوه العربية سئ بشكل ملحوظ!. انا لو معايا المبلغ ده أشتري يا جيتا يا فانتازيا!
وفي حدود 65 - 70 ألف أشتري ياأفيو يا نوبيرا وبلاش شغل العك الصيني ده.

تحياتي.