تقرير مرور عام كام ع الايمجراند و 17 الف كيلو

[Mr Medo]

تقرير مرور عام كامل ع الايمجراند و 17 الف كيلو


كما وعدتكم ده تقرير شامل عن كيفية اقتناءى للايمجراند بالمميزات والعيوب واعذرونى لو التقرير طول بس لازم اى عضو جديد يتابع التقارير علشان يقدر يقييم العربية :-
بداية اوجه الشكر لله اولا وثانيا للوالدتى لانها كانت فاتحة ليا المجال اختار العربية اللى احبها او اللى مقتنع بيها عامة وثالثا للاستاذ Mohamed Bastawy لانه كان السبب ف اقتناءى للايمجراند عن اقتناع تام بسبب تقرير الاولى عن السيارة فى منتدى مصر موتوز
طبعا انا كنت زيي زى اى عضو بيدور ع عربية ومحتار يختار عربية فى فئة ال100 الف وميزدوش عن كدا بٌحكم انى لسا طالب جامعى فحبيت ابدء السلم من اوله واختار عربية تتناسب معايا و فى نفس الوقت تكون واسعة فى الصالون نظرا لسفرنا المتكرر
كنت اخترت M12 نظرا لان الايمجراند مكنتش نزلت اصلا وكانت عبارة عن اعلانات وبس وطبعا فى الوقت ده اختفت ال M11 وال M12 فقررت اختار الايمجراند وقولت اللى هتنزل فيهم الاول هشتريها وكان الحظ خدمنى فى الايمجراند والحمد لله بحمد ربنا ع اختيارى
===========
اهم المميزات :-
صالوان واسع
فرامل ABS Ebd
ماتور بتكنولوجيا CVVT " بس تعبان برده "
عفشة شبه محترمة بس الحمد لله زى الفل معايا
Air Bag
شاسيه تقييمه 9 من 10 " ودى هذكرها تحت "
ثبات خرافى عند سرعة 220
ثبات خرافى ع المنحنيات عند سرعة 120
=================
اهم العيوب :-
التكييف مش قد كدا بس ماشى الحال
المساعدين زبالة اخر حاجة
الكاسيت عار ع العربية
الصاج الخارجى شبه ضعيف
تيل الفرامل زبالة اخر حاجة
عضة فى الفتيس سيئة جدا
" زيت الباور - زيت الفتيس " من اردئ الانواع
الصدأ اللى ظهر فى العربية " تم التعامل معاه والحمد لله زى الفل معايا "
كاوتش الازاز اللى فى العربية ككل من اردئ الانواع
دى كانت مميزات وعيوب العربية بكل حيادية
نروح بقى لنقطة تقييم شاسيه العربية " 4 صنايعية اجمعوا ان الشاسيه ده ثانى اقوى شاسيه اشتغلوا فيه ع مدار شغلهم وصنفوه بانه اعلى من اللانسر ودى كانت اخر حاجة اسمعها فى الحرفين لما كنت بخلص العربية "
والكل اجمع طبعا ان صاجها ضعيف نسبيا او بمعنى اصح كل العربيات الجديدة كدا
==================
ما تم تغييره ع مدار العام " حساب التوكيل " :-
1- طلمبة المياه
2- معالجة الصدأ
3- الكاسيت
===========
ما سيتم تغييره بس لما استلم العربية ع خير
تيل الفرامل الخلفى " هيتم استبداله بتيل بيجو "
طقم دبرياج " لما يجيب اخره خالص لان استلمته من المعرض بايظ ومكنتش اعرف "
==================
تقرير الصيانات فى التوكيل :-
بداية كدا لما روحت لا بورواش كانت المقابلة زى الزفت ولا كنت عارف حاجة هناك وكان بتوع الأمن بيستلمونا من ع الباب ومفيش مهندسين استقبال بعدد كافى ومفيش فنيين والعربية زى ما تكون هتبات جوا علشان تغيير زيت وفلتر
اولا صيانة الألف :-
اهم المشاكل اللى واجهتنى
صوت تزييق فى الدريكسيون " لما يتم حلها "
التكييف سئ جدا " لما يتم حلها "
صوت الماتور كان عالى نسبيا " تم حلها بتتغيير الزيت "
تم تغيير زيت 5000 الاف ودفعت 163 جنيه نقدا
وشربت نسكافيه ب 8 جنيه برده وكيس شيبسى ب 4 جنيه " ابو جنيه ونص " هههههه
ثانيا صيانة ال 5000 الالاف :-
نفس الكلام بتاع الفنيين ومهندسين الاستقبال فى صيانة الالف
اهم المشاكل اللى واجهتنى
صوت تزييق فى الدريكسون " تم حلها "
التكييف سئ جدا " تم حلها بشحن الفريون "
لمبة التشيك انجن " حلوها ورجعت نورت تانى وطفت لوحدها "
تم تغيير زيت ال 5000 الاف وفلتر زيت ودفعت 262 جنيه نقدا
والمرة دى برده شربت نسكافيه تانى
ثالثا صيانة ال 10 الالاف " المشئومة " فى مركز كارتك العبور :-
اهم المشاكل اللى واجهتنى
استهلاك عالى فى البنزين " تم حلها ورجعت بعديها بأسبوعين "
اهم الكوارث اللى طلعت بيها من المركز
طلعلى صوت غريب مسافة مااضغط ع الدبرياج وطلع فى الاخر " طقم دبرياج " ويقولولك وربنا ما عملنا حاجة
السحب كان سئ جدا وتحس انك راكب 128
فضلت ادعى عليهم ولسا برده بدعى عليهم هههههههههه
صيانة ال 15 الف :-
اهم المشاكل اللى واجهتنى
استهلاك عالى فى البنزين " لم يتم حلها وانا حلتها بنفسى "
صوت غريب ظهر عند فى الكابوت " وكان الحل ان طلمبة المياه بايظة وغيروها والصوت اختفى "
التكييف كان فيه صوت طرقعة " وتم تغيير حاجة كدا مش فاكر هى ايه وتم شحنه فريون "
عضة فى الفتيس " تم حلها وارجعت بعد فترة واكتشفت ان المشكلة فى زيت الفتيس السئ ده "
تم تغيير زيت ال 10 الاف وفلتر زيت ومصنعيات ودفعت 442 جنيه نقدا
===============
اهم الاشياء اللى استفدتها من اقتناءى للايمجراند :-
اولا اتعرفت ع اجدع ناس هنا فى الجروب وحسيته بيتى التانى وأصبح ادمان عندى
ثانيا اتعرفت ع امكانيات الصين وانها أصبحت رائدة الصناعات ع مستوى العالم وبجد 3/4 من الحاجات اللى فى البلد هنا صينى وبجد بلد تستحق الاعجاب وياريت نتعلم منهم مش نقعد نتقض فيهم ونعيب فى صناعتهم واحنا مش عارفيين نصنع حاجة اصلا وفرحانين بالعربيات اليابانى والكورى وخلافه وطاييرين بيهم السماء وبنعيب فى العربيات لمجرد انها " صنعت فى الصين " !! واعجبى
ثالثا اتعرفت ع م/ سامى سمير مسئول قسم الشكاوى بغبور وكان ليا الشرف اننا قاعدنا مع بعض واتكلمنا عن حاجات كتير وان قد ايه العربية دى اكتسحت السوق واتكلمنا ان ان شاء الله هيبقى فيه اهتمام اكبر من الجميع للعربية لانها كلت السوق
رابعا اتعرف ع م/ علاء مسئول قطع الغيار فى غبور واتكلمنا عن حاجات كتير ومن اهمها اعجابه بالجروب وبالفكرة بشكل عام
خامسا اغلب المهندسين اللى غبور " اصبحنا توب تيم هههههههههه " بجد ربنا يبارك ف كل واحد بيراعى ربنا فى شغله
===================
ده كان تقريرى عن الايمجراند بكل حيادية
بالتوفيق للجميع
برده هكتب التوقيع اللى بحبه " محمد ميدو " اصغر مالك للايمجراند "

[هانى ظريف منصور]

شكرا على التقرير

[ahmedenen]

شكرا على التقرير الجميل والمصداقيه بس ليا ملحوظه ان الاعطال دى كتير جدا على عربيه عمرها سنه واحده بس دا لو افترضنا ان ك اشتريت اى عربيه استعمال مش جديده مش هيظهر فيها كل ده
ودى وجه نظرى المتواضعه

[Hisham.Elgazzar]

المشاركة الأصلية كتبت بواسطة ahmedenen شكرا على التقرير الجميل والمصداقيه بس ليا ملحوظه ان الاعطال دى كتير جدا على عربيه عمرها سنه واحده بس دا لو افترضنا ان ك اشتريت اى عربيه استعمال مش جديده مش هيظهر فيها كل ده ودى وجه نظرى المتواضعه

هو الموضوع مش كدا
المشكلة ان صاحب الموضوع بيعمل بيها سباقات وتخميس وحجات غير عادية
لكن فيه عيوب تانية برضو ما ننكرش
الإسبرانزا الإنفى أفضل منها كتير من حيث الصاج والموتور والعفشة
والعربيات أرزاق

[ahmedenen]

فعلا العربيات ارزاق والغريب ان رغم عيوب الاميجراند سوقها ماشى ماشاء الله