أدب الرحلات

[خالدخليفة]

حكايات سريعة
انا قلت نريحكو شوية من الحكايات الطويلة ونقول شوية تيك اواى
1/ مرة لقيت عربية ترمس ف طنطا مكتوب عليها ياناس ياشر كفايه قر ولما سالته هيحسدوك ليه ده شوية الترمس دول ميجيبوش 20 جنيه هتكسب فيهم كا م يعنى والعربية كلها بكام فضحك وقال اصل فى جيرانى ممعاهومش يجيبو لا العربية دى ولا شوية الترمس دول لكن هو ضحك وانا حزنت على الناس
2/مرة عم عبده كمسارى من كمسارية اسكندريةوقف فى وسط القطار وحلف على الشرطة كلها اللى م هيطلع 2 جنيه ونص (قيمة نص تذكرة من دمنهور لاسكندرية) هيقبض عليه وولا د العفريته متفهمش جابو طبلة منين وقعدو يطبلو ويغنو له فى القطار وهو فطس على روحه من الضحك ونسيهم
3/ مرة ركبت قطار 10 ونص بالليل من اسكندرية وده قطار اخره طنطا وبيركب فيه كل الحرامية والنشالين والمتسولين وكل ماتتخيله منى بنى ادمين بيقلبو اسكندرية كلها طول النهار وبيروحو دمنهور بالليل وانا ركبت ولقيت مناظر غريبة وعمالين يحومو حواليا رايحين جايين فجريت قعدت جنب الكمسارى وبقول له /القطار ده فيه حرامية قال م انا عارف طب ولما انت عارف مش خايف يسرقوك انت نفسك قال ميقدروش ده الدنيا تنقلب عليهم واستغربت انه عارف ان القطار فيه حرامية وبيتكلم بهدوء وسايبهم بدل م يبلغ عنهم
4/ مرة قامت خناقة بين 2 بياعين فى القطار من جهة وطالب فى الجامعة وزمايله من جهة وطبعا الطالب واصحابه كانو كتير وطحنو الواد وطبعا لم يتدخل احد غيرى وحاولت احوش عن البياع وفعلا خلصته من ايديهم وجرى على اخر عربية فى القطار ومفيش 10 دقايق لقيت حوالى 15 واحد منهم 4 معاهم سنج والباقى معاه سكاكين والناس كلها هربت وانا حصل لى نوع من الذهول واتسمرت مكانى ومسكو الواد وزمايله عوروهم وقطعوهم ولقيت بركة دم كبييييرة ادامى على الكرسى ولقيت واحد جاى عليا بسنجة ورافعها فى الهوا ولما قرب منى بص لى وقال / هو انت ؟ ايه اللى موقفك وراح زاققنى بعيد وقال اخرج من العربية اعمل معروف اتاريه كان عارفنى وروحت لشرطة القطار بقول له فى خناقة بالسنج ادام فقال ببرود خليهم ياكلو بعض ومشيت وانا محروق ومتغاظ
5/ مرة شفت واحد بيبيع مناديل ومسكوه شرطة القطار وهيدفعوه تذكرة فقلت له انت هتيجى على الغلبان هيكسب كام من المناديل علشان يديك م عندك باقى البياعين والا ده اكمنه جديد وقامت مشادة طويلة بينى وبينه انتهت انه اشترى دماغه منى وساب الراجل تانى يوم قابلته وهنركب سوا فبصلى وقال تاااانى انت موصوفلى والا ايه قلت له سيب الناس كلها ( وشددت على كلمة كلها) تاكل عيش فقال ماشى وسبته ومشيت
6/ مرة كنت راكب الاسبانى ومسافر قنا ودخل واد والقطار واقف على محطة القاهرة ورمى ولاعات على حجر الناس والمخبر سابه لحد م خلص العربية وراجع يلم الولاعات وقال له انزل ياكذا وقعدو يتناقشو واثناء المناقشة لميت انا الولاعات ونزلت اديتهاله فالمخبر شافنى وقال فين الولاعات اللى كانت هنا فاستعبطت قلت له اسأل بتاع الولاعات لسه هيطول لسانه قلت له احترم نفسك علشان ممسحش بكرامتك البلاط لانى راكب ومعايا تذكرة وانت ممسكتش معايا حاجة ومشى
7 / مرة راكب القطار الاسبانى ومسافر اسكندرية ودخلت بنت تبيع جرايد وبصيت لقيت المخبر قال لها امشى يابنت ال............... وراح ضاربها بالشلوت فى............ وانا اتعفرتت وروحت له / انت مجنون تضرب بنت بالشلوت فى........فقال ياباشا انا بحميك منهم دول نصهم حرامية فانا قلت /حرامية ايه دى بتاعة جرايد ولما هيا حرامية مبتقبضوش عليها ليه وكانت خناقة طويلة
8 /مرة معدى جنب قطار المساجين والمساجين نادو عليا اللى عايز تليفون واللى عايز يبعت رسالة لاهله واللى عايز اكل ولقيت الظابط جرى ورايا وقال لو ممشيتش هدخلك معاهم فقلت له دى مطالب بسيطة فطلع رخم وقال ايه الفلسفة دى طب تعالى وقرب من باب القطار ولقيت ريحة سيئة طالعة من جوه كان هيغمى عليا منها فقال لو ممشيتش مش هقبض عليك لكن هعاقبك بانك تشم فى الريحة دى لحد م القطار يطلع بعد ساعة
9 / من اصعب المواقف اللى تعبتنى نفسيا واحدة ست كبيرة معاها عربية زى كشك كده على رصيف 4 بتاع اسكندرية هيا فى نص الرصيف(موجودة لحد دلوقت) بتبيع شيبسى ومناديل
ست طيبة جدا مرة مستنى التوربينى وقعدت معاها وقعدت تتكلم معايا حزنتنى لان كان فى ركاب بيدوها مساعدات وبيوصلوها لحد البيت عندها لكن جيرانها حسدوها وحقدو عليا وبلغو عنها الشئون الاجتماعيه قطعو عنها مرتب بتاخده من الشئون حوالى 80 جنيه فقلت لاحول ولاقوة الا بالله حتى على ال80 جنيه لاتخلو من الحسد والغريبة ان الحسد وصل لدرجة انهم عرفو الناس اللى بتبعت مساعدات واتغالسو عليهم فبطلو يبعتو لها مساعدات خاالص
10 / اخيرا وليس آخرا مرة استهبلت وركبت قطار طلبة الكليات العسكرية وده قطار يعرفوه اللى بيركبو كل يوم وبيقوم من فايد حيث كلية الضباط الاحتياط لحد القاهرة وممنوع ركوبه للمدنيين المهم كنت ف بنها والفطار فى رمضان باقى عليه ساعة وتلت تقريبا المهم استعبطت واستنيت لما القطار طلع وروحت ناطط فيه لانى عارف بعد بنها هيقف القاهرة ومش معقول هيخلونى انط منه وهو ماشى وطبعا الطالب المكلف بحراسة القطار جه جرى وقال انزل ممنوع بقول له انزل ازاى والقطار ماشى ولجل الحظ بعد م قلت الجملة دى القطار وقف فى نص الرصيف متفهموش ليه فقال اهو وقف اهو انزل بقى ونزلت وطبعا فطرت فى الشارع
كفاية كده دلوقت

[Injection]

متاااااااااابع مذكرات الخليفة, بس على كده حضرتك بتسافر كتيييييير, وعندك خبرة كبيرة فى الحياة, أنا أبن خالى عامل زى حضرتك كده, أينعم هو مش لاقى ياكل بس عنده حكايات وخبرات أنا مقدرش أجمعها فى 500 سنة.
أنتخبوا خالد خليفة للرئاسة.

[خالدخليفة]

المشاركة الأصلية كتبت بواسطة Injection متاااااااااابع مذكرات الخليفة, بس على كده حضرتك بتسافر كتيييييير, وعندك خبرة كبيرة فى الحياة, أنا أبن خالى عامل زى حضرتك كده, أينعم هو مش لاقى ياكل بس عنده حكايات وخبرات أنا مقدرش أجمعها فى 500 سنة. أنتخبوا خالد خليفة للرئاسة.

والله ياعم انت ناوى تحبسنا
رئاسة مرة واحدة
بالمناسبة مرة حلمت انى بقت وزير وصحيت حكيت لوالدى زعل جدا وحلف وقال / والله العظيم لو قبلت الوزارة لا اانت ابنى ولا اعرفك
فانا استعجبت ياحاج ده حلم يعنى انت شايف مندوب حسنى مبارك واقف بيخبط على باب البيت
وشوية والمدام جابت العشا فكان كشرى
فقلت له بذمتك حسنى مبارك هيفكر يعين واحد بيتعشى كشرى وزير ؟؟؟؟؟؟؟؟؟؟
فضحك لكن برضه زعلاااااااااااااان عجيبة

[Injection]

المشاركة الأصلية كتبت بواسطة خالدخليفة والله ياعم انت ناوى تحبسنا رئاسة مرة واحدة بالمناسبة مرة حلمت انى بقت وزير وصحيت حكيت لوالدى زعل جدا وحلف وقال / والله العظيم لو قبلت الوزارة لا اانت ابنى ولا اعرفك فانا استعجبت ياحاج ده حلم يعنى انت شايف مندوب حسنى مبارك واقف بيخبط على باب البيت وشوية والمدام جابت العشا فكان كشرى فقلت له بذمتك حسنى مبارك هيفكر يعين واحد بيتعشى كشرى وزير ؟؟؟؟؟؟؟؟؟؟ فضحك لكن برضه زعلاااااااااااااان عجيبة

هههههههههههه, شكل الوالد بيحب الحكومة قوى هههههه

[خالدخليفة]

هو بيكره الحكومة جدا وعلشان كده مش عايزنى ابقى من الحكومة
تقولش الموضوع ده بجد ههههههههههههههههههههههههه هه