تقرير شامل بالصور عن السيارة ليفان 320 ( تقليد الميني )

[MmFFoR]

بدأ ظهورها في العام 2008 في الصين تحت شعار ( ابداع ليفان - جودة ليفان )
ابداع تم انتزاعه من الشهيرة الميني كوبر طبعا

السيارة تم تصنيعا كنسخة كربون من السيارة الايقونة الميني كوبر التي تمتلكها بي ام دبلو حاليا مع تعديلات طفيفة في الفوانيس و تشويه للتابلوه الداخلي لتأتي بشكل من الداخل لا يتناسب مع شكلها المتميز من الخارج
و لكن تظل تحتفظ باللمسات الجمالية الخارجية للمحبوبة الميني

تمتلك السيارة العديد من الكماليات مثلها مثل اغلب السيارات الصينية الصنع في مصر
مثل تكييف زجاج و مرايات كهرباء كاسيت سي دي وسادة هوائية للسائق و غيرها من الكماليات

تم تزيد السيارة بمحرك من فئة ال 1300 سي سي بقوة منتزعة 80 حصانا فقط بمعدل تسارع 14.5 ث لسرعة 100 كم/س
و سرعه قصوى محددة اليكترونيا ( بهزر طبعا ) 155 كم/س



تتشابه السيارة مع اصدار ميني المسمى بميني كلب مان mini clubman


و الفوانيس تقارب الميني كونتري مان ذات الدفع الرباعي





بداية تسعير السيارة مع التوكيل كان 55 الف جنيه
ارتفع حاليا الى 57 الف جنيه ( برغم ان الموديل اصبح اقدم سنتين و وجب انخفاضه لا ارتفاعه )
و لكن تظل السيارة في فئة سعرية تعادل من 25 - 35% من السعر المتوافر للميني الاصلية!!














التوكيل المصري لشركة ليفان هي شركة سعودي جروب

و الان للمواصفات الفنية

الابعاد الخارجية

الطول : 3745 مم

العرض : 1620 مم

الارتفاع : 1430 مم

قاعدة العجلات : 2340 مم

الارتفاع عن سطح الارض : 135 مم



المحرك

المحرك امامى نوعه LF479Q3

مكون من 4 سليندرات فى صف واحد

سعته 1342 سى سى مكون من 16 صمام

يولد حوالى 88 حصان عند 6000 RBM

مزود بناقل حركة مانيوال فقط مكون من 5 سرعات

لتصل سرعته القصوى 155 كم/س

وليصل متوسط استهلاك البنزين 4.5 لتر لكل 100 كم(على سرعة 90 كم/س)



السيارة بتنزل ب3 فئات عالميا تبع اختلاف الامكانيات

اقلهم LX
والفئة المتوسطة EX
واعلى فئة VIP

اهم الامكانيات الاساسية فى السيارة

ABS+EBD

اتذار بعدم ربط احزمة الامان فى التابلوه

احزمة امان ثلاثية التثبيت

2ايرباج فى EX & VIP

عمود الدركسيون ممتص للصدمات

قفل الامان للابواب الخلفية للاطفال

مزيل للضباب والشبرة خلفى



اهم التجهيزات

فوانيس شبورة امامية

المقعد الخلفى قابل للطى لزيادة مساحة التخزين

جنوط مقاس 14 بوصة (ماعداLX)

تكييف مانيوال

وسى دى و4 سماعات


و اخيرا اراء مقتبسة عن السيارة:

انا كنت سيلز فالسعودي جروب (التوكيل اللي ماسك سيارات الليفان ف مصر)ال320 شبيهه الميني كوبر هي كشكل كويسه بس للاسف لو اشترتها مش هتلاقي ليها قطع غيار الافالتوكيل(السعودي جروب)والباور والفتيس مش ناشفين وله حاجه العربيه مع واحد صحبي وماشي بيها كويس بس هو حاليا عارضها للبيع

في قطع غيار بتبقي ناقصه فالتوكيل نفسه يعني تروح التوكيل تحتاج قطعه غيار معينه يقولك دي مش موجوده وممكن تنتظر شهر او شهرين لحد ماتتوفر قطعه الغيار وانا بقولك علي مسئوليتي الشخصيه السعودي جروب من اسوء التوكيلات وللاسف خدمه مابعد البيع والصيانه فيه سيئه جدا جدا جدا لاقصي حد تتصوره فنصيحه لوجه الله ابعد عن الليفان

فكرة العربية مع ولدى و عامل بيها 9000 كيلو و الحمد الله لم يظهر فيها مشاكل غير ان الكلكس باظ و راح التوكيل و اتغير غير كده مافيهاش اى حاجة

العربية معايا من مارس 2010 وعاملة لحد دلوقتي 25000 كيلو العربية ماشاء الله محترمة جدا .. والصيانة الدورية أسعارها كويسة في التوكيل والتوكيل عامة كويس بس عليه بعض التحفظات في التعامل وللمعلومة العربية اتخبطت في الباب والرفرف الأمامي يمين عجلة عربية لوري وانا علي الطريق دخلت فيهم كان بيحاول يعديني من ناحية اليمين المتخلف عقليا والنتيجة ان العجل بتاعة رشق في الباب والرفرف والحمد لله اكتشفت ان صاجها محترم واستحمل خبطة كبيرة زي دي وعلي فكرة انا لاشغال في التوكيل ولا ليا مصلحة انا أصلا والدي مهندس سيارات وانا ركبت عربيات كتير وغاوي شغل وتصليح في العربيات نصيحة مني سيبك من الكلام اللي مش مظبوط وبيتقال عن العربية العربية بقالها معايا سنة وشهرين والحمد لله زي الفل وقطع غيارها كمان رخيصة الباب ب 500 الفانوس بتاعها عدسات زي البي ام ب 350 المراية كهربا ب 300 فلتر الزيت ب 15 طقم البوجيهات الاصلي ب80 لوح زجاج الباب ب 60 ده مثال لبعض قطع الغيار هي دلوقتي اسمع انها زادت 2000 جنيه وبقت موديل 2011 ب 57 الف

نصيحه اخويه : لو هتشترى عربيه صينى لمجرد انها شكل تقليد لعربيه مينى كوبر فانصحك بلاش انت مش كل يوم بتلاقى خمسين الف جنيه ترميهم على الارض انا رحت شفت العربيات الليفان دى و ركبتها و لفيت حواليها و فتحت كبوتها كمان فى معرض بيع لهم فى وسط البلد قريب من التحرير (جنب مول البستان لو تعرفه) و من الواضح جدا ان خامات العربيه الداخليه و قطع الغيار البلاستيكيه المستخدمه فيها مصنعه من اردأ انواع البلاستيك الصينى اللى تعتبر فوانيس رمضان بالنسبه لها نعمه (و هذا ما يفسر رخص ثمنها) ثانى حاجه و هى الاهم : توكيل ليفان (سعودى جروب) من اسوأ التوكيلات الموجوده فى مصر و يعتبر ابوالفتوح و منصور و غبور بالنسبه لهم رحمه و اسال اى حد من ملاك شيرى الشكل القديم عن مدى سوء هذا التوكيل و هتعرف سياسه سعودى جروب انهم بيستوردوا ستوك عربيات (مثلا الف عربيه من ماركه x ) و يبيعوها و يخلوا عندهم شويه قطع غيار و اكسسورات خارجيه (لزوم النصب على الزبون) و بعدين تيجى تسأل متلاقيش اى حد فى التوكيل عارف حاجه عن العربيه دى لو حصلت فيها اى مشكله جامده فى الميكانيكا او العفشه او المحرك ده غير ان اى مشكله تقابلك تعتبر سوء استخدام + الضمان اللى بيديه لمده سنه واحده فقط لا غير و بعدها كل سنه و انت طيب كله بعد كده بفلوس

ب55الف عربية شكلا جميله ووخده الشكل القديم من الميني كوبر بتاعة 2005 كانت عجبتني فترة وفكرت فيها ركبتها بصراحه الفرش الي فيها يخوف بلاستيك بطريقة ضعيفه جدا وابعد عن الصيني وعنيله احلا غنوة الصراحه

انا كنت زيك بالضبط محتارة بين الاتنين بس بعد معاناة ولف وتدوير ومقارنة جبت المينى كوبر الصينى او اسمها الحقيقى مينى ليفان وسعرها 55 الف جميع الكماليات مانيوال مفيش منها اوتوماتيك والناس فى التوكيل محترمة ومتعاونة جدا ومريحانى جدا جدا واحلى حاجة عجبتنى فيها انهم قالولى فى التوكيل ان صاج السيارة المينى ليفان دى الوحيد فى نظيراتها الصينى اللى نزل مصر اللى سمكه 0.9 مم والباقى كله زى ماكتير يعرف 0.7 مم يعنى متانة اكتر وعلى فكرة فيه منها لون واحد وفيه منها لونين انا بتاعتى ابيض وسقفها والجناب اسود ومكتوبة كدة فى الرخصة ابيض فى اسود

سوف اقدم معلومه يمكن تفيدك بحكم ترددى على التوكيل وانا لست اقتنى سيارة 320 بل 620 لاكن لم يمنعنى هذا من سؤال من يملكون تلك السيارة فى التوكيل عن كل شىء يخصها والحقيقة من قول 3 قابلتهم انهم يشكرون فى السيارة لاكن لما لاتذهب بنفسك للتوكيل واكيد ستجد احد منهم يقوم بعمل صيانه واسئله وهذا افضل كذلك بالنسبه للتوكيل معاملتهم مع العميل جيده وبالنسبه لى اجد ان مشكلتهم تتمثل فى ضعف خبرة بعض المهندسيين وانا لدى مشكله بسيطه وفى انتظار حلها وهناك شخص محترم تستطيع اللجوء اليه فى حالة وجود مشاكل لاقدر الله وهو نائب المدير ...كذلك يوجد لديهم مهندس صينى لاكن حتى الان لم اتشرف بكشفه على مشكلة سيارتى ربما لانها ليست مشكله عويصه...وسوف ارد عليك مره اخرى عند حل مشكلتى ام عدم حلها وبناء عليه تستطيع بنفسك الحكم على التوكيل.

فيديو دعائي للسيارة

http://www.youtube.com/watch?feature...&v=M4lVc7vKcGE

دعاية السعودي جروب

http://www.youtube.com/watch?v=9UCbE...eature=related

و ادي مستر بين مع الليفان كمان

http://www.youtube.com/watch?v=HatoA...eature=related

اختبار التصادم الصيني لليفان 320 ( 3 نجوم )

http://www.youtube.com/watch?v=fEXfy1BeAOw

للمعلومة العامة

موتسيكلات شركة ليفان الصيني مغرقة الشوارع لانها كانت شركة دراجات نارية ثم انتجت مركبات نقل قبل ان تتوجه لتصنيع السيارات


برجاء من مالكي السيارة اضافة اراءهم للفائدة

[MmFFoR]

عملنا التقرير و مفيش زباين!!

[ابوشروق]

العربيه دى رغم سعرها الرخيص
مش منتشره خالص
ده الواحد بيقابل فى الطريق المنى كوبر الاصلى كتير
يظهر كده ان البلد مليانه فلوس وأحنا منعرفش
شكرا ممفور:018A1D~ 146:

[mms]

بارك الله فيك وشكرا على على الجهد المتميز ...........وانا لاحظت من التقرير ان السياره تعتبر جيده لكن المشكله فى التوكيل . وده عيب عربيات جيده كتير ...........!!!

[محمد عبد النور]

بصراحة هيا تحفه وسعرها كويس بس انا مبدئى انى مشتريش اى حاجة تقليد خالص على الرغم انى بموت فى الكوبر من زمان بس للاسف تيجى الصين تعمل عربية شكلها وتسرق مجهودات ناس تانية وانا اساعدهم على كده لا طبعا بس هيا الصين معملتش 128 ليه اكيد كانت هتنزلها ب 10000 جنيه ههههههه خصوصا انها سيارة الشعب المصرى