الحمد لله على كل حال... العربية أتسرقت لثانى مرة

[zing0]

السلام عليكم
معلش إستحملونى شوية لإنى مخنوق جداً
أول إمبارح كنت فى إستضافة الأخ الغالى المخترم, اللى أثبت الواقع الفعلى أنه أكثر ذوقاً و كرماً من الواقع الإفتراضى للمنتدى...المهندس ahmed_eng2001 أتشرفت بمقابلتة جداً جداً
و عملنا شغل سمكرة و راجع البيت طبعاً فاصل شحن, ركنت العربية تحت البيت و شديت عليها الغطاء بتاعها
امبارح مرحتش الشغل, و خرجت بيها مشوار واحد فقط فى منطقة زحمة جداً و راكنها وسط حوالى 30 عربية و رجعت ركنتها تحت البيت تانى
نزلت التوفيقية أجيبلها شوية الأكسسوارات بتاعة الفنش بعد السمكرة و الدوكو و آخر الليل بأفتح الشنطة علشان أطلع الغطاء.... ملقتش الإستبن !!!!
طيب المرة اللى فاتت من حوالى 15 يوم و برضو الشنطة تتفتح و تتقفل بدون أى عنف و يتسرق منها كوريك تمساح 2 طن و كمبريسور واحد بستم
و المرة دى المكان و الزمان مختلف و يتسرق منها أستبن متهالك شنبر داخلى و جنوط حديد تعبانة

ده كده واحد بيتسلى عليا, و غالباً من المنطقة عندنا, بس إزاى؟ دى المنطقة كلها عارفانى و طول النهار واقف فكهانى بعربيته تحت البيت بقاله سنين على كده و عارفنى جداً. مش فاهم أى حاجة

قدر الله و ما شاء فعل, و بما إن العربية بقت "عالشارع" يبقى البيع أفضل حل و شكراً لحد كده عربيات.

إمبارح بحط إعلانها على دوبيزل و هتلاقى النت هنج. نمت طول الليل مقريف, حتى البيع مش عارف أبيعها, و عندى إجماع فى البيت بلاش تبيع.... و آخرتها؟

حد يدينى نصيحة لإنى كده هتجنن و ماشى بأكلم نفسى

[احمد على 1999]

لا حول و لا قوة الا بالله
ربنا رايد لك الخير
متعرفش الاستبن دا كان ممكن يتسبب فى ايه
استهدى بالله كدا و متزعلش نفسك
طيب مجربتش تغير كالون الشنطة ؟ و ممكن تركب انذار

[zing0]

شكراً يا بشمهندس أحمد على ردك الطيب
النهاردة رحت لسمكرى, قالى اللادا و الشاهين و الـ 128 و غيرهم كلهم شنطهم عالشارع و أى مفك يفتحهم
و قال ممكن نعمل حزام للإستبن زى اللى بيتعمل للبطارية كده بس مش فاهم هيلحم فين بالضبط

طلعت على متخصص ضبط أبواب و كوالين قالى أحسن حاجة تغير الكالون بكالون لانوس أو فيرنا ... هتشترى الكالون و الذراع و الوصلات و هيركبهم و الليلة دى فى حدود 200 ج (بس أنا حاسس إنها ممكن تتفتح برضو)

إن شاء الله ناوى أعمل إنذار بس لسه معرفش أيه أفضل نوع و بكام و منين
=======================
سؤال على جنب: هيا الماروتى كالونها نظام قديم و لا جديد, يعنى برضو سهل الفتح و لا الفتح من الداخل و لا صعب و لا إية؟

[mr_astra]

لعلة خيراااااااااااااا



عله خير .. حسن الظن بالله
قصة الوزير الذي كان دائمآ يردد عبارة
( لعله خير )
وكان هذا الوزير دومآ بصحبت الملك ولا يغب عنه ابدآ
كان يكرر عبارة لعله خير بكل نبآ يسمعه وكل جديد يلاقيه
وفي يوم من الايام تعرض الملك لحادث وقطع اصبع احدى يديه
وعندما سمع الوزير ما حدث فقال : لعله خير
وما ان سمع الملك هذا القول من الوزير الا وقد امر بسجنه
وقال له قطع اصبعي وتقول لعله خير؟
سآسجنك هنا في هذا القصر
فرد عليه الوزير لعله خير ان شاء الله
فضحك الجميع سخريه منه
وبعد عدت ايام كان هذا الملك وقافلته في طريق الى الديار
فظل قافلته ولم يعد يعرف اين اصبحوا ومشى وحيدآ بحثآ عنهم
فاعترضوه اناس من عبدة الاصنام وكانوا يبحثون عن رجل يذبحوه تقربآ للصنم ( قربان)
الذي يعبدوه
واخذوه الى قريتهم ليأدوا شعائر الذبح وعندما رأو اصبعه مقطوع فقالوا كيف نقدم لصنمنا
رجل ناقص. علها اهانة لصنمنا فتركوه يذهب
فعاد الملك الى دياره بعد ان اخلوا سبيله
فذهب يحكي قصته للوزير
فقال له الوزير قطع اصبعك وقلت لعله خير ان شاء الله
وامرت بسجني وقلت لعله خير ان شاء الله
لو لم يكن اصبعك مقطوع لكنت الان مذبوحآ عند عبدة الاصنام
ولو لم تآمر بحبسي لكنت معك واختاروني بديلآ عنك
فضحك الملك و استغفر الله وامر بالافراج عن هذا الوزير الذي عاد كما كان لا يغب عنه لحظه
اللهم أكتب لنا الخير اينما كان واصرف عنا الشر اينما كان

[Hisham.Elgazzar]

قدر الله وماشاء فعل

انا شوفت واحد جارى خرم الستارة اللى ورا وركب لها صوابع بتبات فى الستارة ونتا بتقفل الشنطة
عشان ماحدش يحاول يفتحها بأى حاجة

وماتمدش ايدك ف العربية تحت البيت بأى حال من الأحوال انا كنت بركب خراطيم باور لعربية اخو مراتى تحت بيتهم
تانى يوم البطارية اتسرقت ( عربية فيرنا ) الحرامية فكل مكان مش شرط واحد مستقصدك
انما ما تمدش ايدك ف العربية تحت البيت فأى ظرف من الظروف

العربية البولونيز فيها بوجيه فاصل ( متلتة ) وماعملتش فيها اى حاجة سايبها تحت البيت وربنا يستر

والعربية التانية مخبوطة ومرمية ف التوكيل عاوزين 6000 جنيه بقالى 4 ايام بجرى عشان استلفهم

قوووووول الحمد لله ربنا يعوضك خير معلش

هتخلى السمكرى يعملك الحركة بتاعت الصباعين اللى بيباتوا ف ضهر الشنطة
هتخلى الكوالينجى يركبلك كالون محمل يابانى او تركى بشرط يكون متأمن وصباع الشنطة اللى بيبات ف الكالون
يكون محمل هو كمان وعبارة عن حلقة مدورة تتلحم تمام مش مجرد صباع
هتعمل اتنين زرار بمفتاح فصل وكتاوت متوصل على كلاكس عالى تجيبه مستعمل من التوفيقية او سرينة مطافى صغيرة حمرا كدا ب 18 جنيه ( جبتها لنسيبى )

معلش قدر الله وماشاء فعل والحمدلله محدش عارف كان ايه اللى ممكن يحصل