حاجة تنرفز

[Injection]

أنا قعدت أفكر فى عنوان للموضوع وطريقة لتصميمه كويس ووضعه فى قسم الصيانة ملقيتش, فهجاوب هنا يا دوك:-

مواتير الأحتراق الداخلى ليها أنواع كتير, كل نوع بيعتمد على وسيلة مختلفة لتحويل الطاقة الناتجة عن أنفجار الوقود الى طاقة ميكانيكية, وأهم المواتير دى هى:-

الفلات هيد أو الموتور العادى بتاعنا


والهيمى



والوانكل أو الروتارى اللى بيعتمد على دوران المثلث ده فى أستخراج الطاقة


ومن حيث المواتير العادية بتاعتنا, ففروق التصميم كتيرة جدا بين المواتير, بس أهمها شكل وترتيب البساتم, يعنى فيه مواتير ترتيب البساتم جنب بعض على شكل حرف v وفيه على حرف w ومواتير بوكسر البساتم فيها متقابلة فى وش بعضها ومنها جه الأسم, ومواتير سترايت يعنى السلندرات جنب بعضها, زى أى موتور عندنا فى مصر, وهكذا.

دورة الحرق بتتم كالتالى, بيحصل أنفجار نتيجة لأشتعال خليط الوقود والهواء داخل السلندر, الأنفجار بيدفع البستم لتحت فبيولد طاقة حركية , بتنتقل الطاقة دى لعمود الكرنك ثم الى الحدافة ثم الفتيس ثم الكبالن أو الكورونة حسب نظام الدفع فى العربية ثم الى العجل.

الفروق بين المواتير زى ماقلت كتييييييييييييييييييير جدا وصعب أساسا تتجمع كلها فى مكان واحد, والفروق الأساسية هى اللى سبق ذكرها, فيه فروق تانية كتير, مواتير كامة واحدة ومواتير كامتين, أماكن شمعات الأشتعال والصمامات, تصميم البساتم والموتور, وتصميم مدخل الهواء بتاع الموتور, موتور بتربو و موتور بكمبروسر وموتور n/a وغيره وغيره كتير.

السعة اللترية هى حجم السلندر من جوه, مضروب فى عدد السلندرات, يعنى موتور 1.5 لتر مجموع حجم السلندرات (اللى بيحصل جواها الأنفجار) من جوه قد زجاجة المياه بالظبط, وطبعا كل ما السعة كبرت كل ما القوة زادت, بس التربو أحسن بكتير من زيادة حجم الموتور على الفاضى, لأن زيادة السعة بتأثر على أستهلاك البنزين جامد جدا وأشهر العربيات ذات السعة الكبيرة على الفاضى هى الأمريكانى, الكورفيت والموستانج والتشالنجر وهكذا, وتفرق معاك فى قوة الموتور وأستهلاك البنزين العالى بغباء.

الأنجكشن والكارب أنظمة لحقن الوقود, الأنجكشن هو النظام الأحدث والأكثر أقتصادية من الكارب, وبيعتمد على قراءة حساسات موجودة داخل المحرك زى حساس لنسبة الهواء والوقود فى العادم وحساس حرارة الهواء الداخل للموتور وهكذا علشان كمبيوتر العربية يقدر يحدد كمية الوقود اللى هيدخلها للموتور وتوقيت الشرارة, الكارب بيعتمد على أجزاء ميكانيكية لخلط الهواء بالوقود وأدخاله الموتور, وفكرة عمله أبسط, لكنها غير أقتصادية زى الأنجكشن, وبصراحة معرفش عن الكارب كتير.

البساتم حاجة والصبابات حاجة تانية خالص, البساتم هى الجزء المسئول عن تحويل الأنفجار لحركة ميكانيكية وده شكله


أما الصبابات فهى المسئولة عن أدخال الوقود الى السلندر وده شكلها


وبتبقى موجودة فوق السلندر, وفوق البستم بالظبط, وأدى صورة,و الصبابات هى الأجزاء اللى فوق, أما اللى فوق الصبابات فهو عمود الكامة المسئول عن فتح الصبابات والمدة اللى هتفتح فيها (عن طريق شكل الحدبة اللى عليه).



البستم مالهوش صبابات, السؤال هو السلندر كام صباب, السلندر البسيط بيبقى ليه صباب لدخول الوقود والهواء وصباب لخروج العادم, زى الصورة اللى فوق بالظبط, وفيه مواتير فيها 4 صبابات للسلندر, صبابين للهواء والوقود وصبابين للعادم, وده بيزود القدرة الحصانية للموتور وبيزود سهولة دخول الوقود والهواء وخروج العادم من الموتور, وممكن نظريا تزويد عدد الصبابات, بس معرفش فيه مواتير 6 صباب أو 8 صباب للسلندر ولا لأ.

فى الأنجكشن والكارب أو فى أى موتور, اللى بيفرق هو تصميم الصباب ووزنه وسهولة فتحه وده اللى بيفرق فى الهورس باور بس بنسبة صغيرة, أما اللى بيفرق بنسبة كبيرة فهو فتحة الصباب, لو أكبر بتسهل دخول خليط الوقود والهواء للموتور, ومدة فتح الصباب بتفرق جدا فى العزم والهورس باور, علشان كده فيه مواتير بيبقى فيها توقيتين للصباب, واحد لعدد اللفات القليل علشان يدى أكبر عزم والتانى لعدد اللفات العالى للأستفادة من أخر نقطة باور فى الموتور.

الفروق هى الموتور كام صباب وحجم الصباب الواحد قد أيه, وهل الموتور أنجكشن ولا كارب, ولو أنجكشن الكمبيوتر مظبوط أزاى ولو كارب برضه مظبوط أزاى, وشكل مدخل الهواء بتاع الموتور وفلتر الهواء, وأنابيب نظام العادم ومقاومته لغازات العادم, كل حاجة فى الموتور بتفرق, ممكن موتور 1500 يطلع 85 حصان وموتور تانى تكنولوجيته أحسن و1500 يطلع 150 حصان بتربو أو حتى من غير, ومواتير الفى تيك بتاعت ميتسوبيشى أبسط مثال 1600 وبتطلع 170 حصان.

الدورة بتنتقل من الحدافة الى الديسك والأسطوانة ثم الى الجير اللى أنت مختاره فى الفتيس عبر عدة تروس ثم الى الكرونة أو الكوبلن ثم الى العجل, اللى بيفرق بقى هو النسبة بين قطر الترس الخارج من الموتور الى ترس الفتيس اللى أنت مختاره, لأن عدد لفات الموتور ثابت, اللى بيحدد السرعة والعزم والهورس باور بعد كده هى النسبة ديه, وغير كده حالة الأسطوانة والدبرياج لو حالتهم وحشة بيضيع الهورس باور والعزم بتاع الموتور على الفاضى.

مينفعش تحسب الهورس باور من الموتور نظريا وهو فى الهواء كده من غير أجهزة.

بنحسبها على حاجة أسمها داينو وده جهاز بتتحط عليه العربية, وبتاخد الترس الرابع(علشان النسبة بينه وبين ترس الموتور 1) وبتمشى عليه لأخر الغيار, وبيلاحظ سرعة العجل ويقدر يقولك التورك والهورس باور بتاع العربية, وممكن بمعرفة وزن العربية براكبها, وسرعة العربية القصوى وتسارعها تحديد الهورس باور ومنه التورك (شكلى أبتديت أفتى لأنى مش فاكر الحسبة بالظبط)

ودورة التبريد بتبقى أما هواء أو مياه, وغالبا بتبقى دورة واحدة أنما ممكن تعمل دورة تانية أو أكثر بطرق عديدة أبسطها فتحة على الكبوت من فوق لتبريد الموتور.

دورة التبريد بتمشى حوالين بلوك الموتور من جوه فى مسارات محددة والمياه بتاخد الحرارة من بلوك الموتور وتروح على الراديتير, تعمل تبادل حرارى مع الهواء ثم الى قربة المياه وتتكرر الدورة طالما الموتور شغال.

تشخيص الأعطال كورسير لسه عامل عنه موضوع هيعجبك قوى, أنما كده كأنى بقول لحضرتك أشرحلى أمراض علم النفس.

ده overview عن الحاجات اللى حضرتك طلبتها, ولو عندك أى أستفسار أنا موجود.

وأنا لسه مستنى باقى موضوع الأضطرابات يا دوك.

[sad-bird]

يا خسارتك في تجارة يا انجكشن
لو انك اختصرت كتير في الموضوع لكن يلا بقى امري لله
نسيت تقول ان الصبابات دي اللي على راسها وش السلندر واللي فيه تاكيهات العربية اللي بتظبط منها زمن الحركة علشان دخلو وخروج الهواء للماتور

تسلم ايدك يا انجكشن ومستني الاضافات
اما موضوع الاضطرابات فلسه شوية

[Injection]

يا باشا ده أنا لو كنت كملت مكناش هنخلص, الموضوع فعلا كبير قوى, علشان كده قلت overview ,بس أضافات أيه؟