خلاصة الكلام فى ظبط فيشة الاوكتان ( بالصور )

[mohamedbhit]

يااستاذنا الهمام استاذ عصام وتسمحلى اقولك انت مهندس كبير
انا خضت التجربة امبارح وطلعت بالطيارة انهاردة اقصد باللانوس 2007 بنزين 92 اللى كنت بدفع فى فلوس على الفاضى بسم الله الله اكبر حاجة تالته خالص
والتكييف شغال والحال بقى عال العال تسلم دماغك يا هندسة
اللى بيفكر اعملها ولا ما اعملهاش ميفكرش لان الفرق كبير وفايته كتير كتير كل عام انت واهل بيتك بخير حفظكم الله ورعاكم وشفاكم وعافاكم من كل سوء وزادكم من كل خير فى الدنيا والاخرة وامة محمد اجمعين
وشاكر ليك جدا ولاعضاء ومشرفين هذا الصرح العظيم وبالمناسبة دى اول مشاركة ليه بعد ماربنا رزقنى باللانوس حفظنا الله واياكم

[msr1192]

المشاركة الأصلية كتبت بواسطة عصام غنايم كتر الكلام حول فيشة الاوكتان وظبطتها المثاليه المترتبه على درجة اوكتان البنزين المستخدم فحبيت ان اوضح ظبطة الفيشه الصحيحه لكل نوع بنزين للتسهيل على الجميع بسم الله نبدأ فيشة الاوكتان عباره عن jamper او كوبرى مثل الموجود فى هارد الكومبيوتر تختلف الفائده منه بحسب طريقة توصيله للاطراف المختلفه مع الاختلاف الفيشه فى الانوس لها ثلاثة اوضاع مختلفه للتوصيل يتناسب كل وضع منها مع نوع البنزين المستخدم فى التشغيل ( 80 , 90 , 92 ) وطبعاٌ توصيلها الصحيح المتوافق مع نوع البنزين المستخدم يؤثر بالايجاب على اداء العربيه بصوره خياليه طيب مكانها فين ؟ تحت الكرسى اللى جنب السواق مباشره هنقدم الكرسى لقدام على الآخر و هنرفع فتحة الموكيت من تحته ( فى الانوس 1 هنلاقيها جنب الكومبيوتر اللى داخل العلبه السوداء ) ( فى الانوس 2 هنلاقيها جنب الضفيره الماره تحت الكرسى ) وده الشكل بتاعها طيب لقيناها شكلها ايه ؟ عباره عن فيشه داخل ليها ثلاثة اطراف ( بنى , اسود , بنى فى ابيض ) وفيشه موصوله بيها ( نصفها التانى ) موصله الطرفين ( الاسود , البنى فى ابيض ) بسلك اسود عليه ملصق مكتوب عليه 87 او 83 وده رقم الاوكتان اللى المفروض العربيه مظبوطه عليه وطبعا ده مش موجود بمصر الحبيبه طيب ممكن نظبطها على البنزين الموجود بمصر بأنواعه المختلفه علشان نحقق اعلى استفاده من الموتور ؟ ممكن طبعاٌ المصممين للسياره كتر خيرهم تركولنا المجال اننا نلعب برقم الاوكتان المناسب لكل واحد فينا ( بعكس عربيات تانيه كتير ) لايوجد بها هذا الخيار ( وده من احد مميزات الدايو ) خلص الكلام النظرى نخش بقى على العملى قبل اى حاجه نفتح الكابوت و نفك القطاش السالب من البطاريه بمفتاح عشره ونخش تحت الكرسى اليمين ونرفع الموكيت ونمسك الجمبر والفيشه هنشيل نصف الفيشه الموجود به الملصق بالضغط على سوكت المنتصف مع الشد للخارج هيطلع الجمبر فى ايدك وده شكله ونظبطه تبعاٌ لنوع البنزين المستخدم فى العربيه وليه 3 ظبطات ونبداء بكيس التوفير ( اقصدى بنزين التوفير ) 1_ ال 80 الجمبر فى ايدينا له ثلاثة فتحات اتنين متوصلين ببعض بالسلك الاسود والثالثه من غير اسلاك بكل بساطه هنوصل طرف تالت من السلك الوسطانى الى الفتحه الفاضيه ( زى متكون بتوصل شعرة فيوز بالظبط ) تمام كده هنرجع الجامبر للفيشه تانى ونرجعه مكانه ونغطيه بالموكيت ونوصل كابل البطاريه السالب تانى ونعمل ايدل ليرن بالمره علشان كومبيوتر العربيه يظبط نفسه على الوضع الجديد و بسم الله واطلع جرب 2 _ البنزين ال 90 هنعيد الخطوات السابقه بس المره دى هنشيل الفيشه وبس يعنى مش هنوصل اى حاجه هنسيب الفيشه فى الهواء كده ونعين الجمبر فى البيت تمام كده هنرجع الجامبر للفيشه تانى ونرجعه مكانه ونغطيه بالموكيت ونوصل كابل البطاريه السالب تانى ونعمل ايدل ليرن بالمره علشان كومبيوتر العربيه يظبط نفسه على الوضع الجديد و بسم الله واطلع جرب 3 _ البنزين ال 92 هنعيد خطوات الفك الاولى هنمسك الجامبر فى ايدينا ونفك الكلبسين اللى فى اطرافه بالضغط للخارج بشويش ونرجع الغطا البلاستيك للخلف وده شكله هنجيب مسمار 3 سم وندخله مع الفيشه اللى فى الطرف بالضغط لجوه بالشكل ده وبعدين نشد المسمار والسلك لبره هيطلع السلك معانا هندخله تانى بس الناحيه التانيه يعنى هننقله من الطرف ده الى الطرف ده مع الحفاظ على الطرف الاوسط متوصل زى ما هو وده شكله الجديد تمام كده هنرجع الجامبر للفيشه تانى وده شكله النهائى نرجعه مكانه ونغطيه بالموكيت ونوصل كابل البطاريه السالب تانى ونعمل ايدل ليرن بالمره علشان كومبيوتر العربيه يظبط نفسه على الوضع الجديد و بسم الله واطلع جرب انا عن نفسى جربت كل التوصيلات دى فى عربيتى قبل ما اقولكم عليها وده للأمانه عربيتى دلوقتى على التوصيله التالته لانها اقواهم فى اخراج قوة الموتور القصوى بالتجربه وبدون فشر ( من 0 الى 100 ) فى 12 ثانيه و اقصى سرعه بدون مشكله ( 180 ) ممكن ابقى انزلكم الفيديو بتاع تجربة التسارع دى ( للمتشككين ) ده بجانب ان استهلاك البنزين اتحسن بصوره كبيره المهم الموضوع كده خلص اى استفسار تحت امركم رقمى فى التوقيع وطبعاٌ متنسونيش من دعواتكم الجميله ( بالشفاء لى ولزوجتى ولاولادى وبالستر وسعة الرزق ) ده لو الموضوع عجبكم مستنى ردودكم و سلام مؤقت

اولا احب اشكرك على خدماتك بجد تسلم ايدك
ثانيا عندى معلومة صغيرة وهي ان البنزين ليه قوانين عالمية ثابتا بس كل دلة ليها مسمياتها فالبنزين اللى عندنا هوه اللى موجود فكل دول العالم ولما زمان نزل البنزين العادي والسوبر كان بنزين 83 الى هوه دلوقتة بنسمية 80 وبنزين 87 الى هوه بنسمية 90 وهتلاقي ان دلوقتي فية بنزين رقم الاوكتان بتاعة دوليا 91 ده الى هوه بنسمية عندنا 92
ليه سؤال بقي ايه معنى كلمة ايدل ليرن وازاي يعني يتعمل

[msr1192]

المشاركة الأصلية كتبت بواسطة خالداونو أشكرك شكرا جزيلا يا ابو فارس سيارتى كانت مضبوطه على 87 وغيرت الفيشة وكانى راكب حصان جامح ومن ساعة ما عدلت فيشة الاوكتان نفسى اروح امون البنزين مش عاوز يفارق التانك جزاك الله كل خير وربنا يخليلك فارس انت استاذ بمعنى الكلمة وتحياتى لجميع اهل دمياط ودة رقمى للتواصل يا جميل يا استاذ فيشة الاوكتان 01005688830 اخوك خالد سعد عبد العظيم مدرس اول لغه انجليزية بمحافظة المنيا

غيرتها لاية وحطيت بنزين كام

[احمد على 1999]

المشاركة الأصلية كتبت بواسطة msr1192 اولا احب اشكرك على خدماتك بجد تسلم ايدك ثانيا عندى معلومة صغيرة وهي ان البنزين ليه قوانين عالمية ثابتا بس كل دلة ليها مسمياتها فالبنزين اللى عندنا هوه اللى موجود فكل دول العالم ولما زمان نزل البنزين العادي والسوبر كان بنزين 83 الى هوه دلوقتة بنسمية 80 وبنزين 87 الى هوه بنسمية 90 وهتلاقي ان دلوقتي فية بنزين رقم الاوكتان بتاعة دوليا 91 ده الى هوه بنسمية عندنا 92 ليه سؤال بقي ايه معنى كلمة ايدل ليرن وازاي يعني يتعمل

ده تقريبا مالوش لازمة الا فى حالات نادرة
لان لو البطارية اتفصلت لمدة تزيد عن عشرة ثوانى فبيتمسح من كميوتر العربية خطوات التعامل مع صمام ضبط هواء السلانسيه IDLE AIR CONTROL VALVE
لان كميوتر العربية هو الى بيحدد حركات الصمام (تقريبا حاجة و خمسين وضع للصمام) بناءا على الاتى
1- درجة حرارة المياه (يعنى زى الشفاط ايام زمان ) و انت بتسخن بيقبى قافل الهواء علشان يعلى نسبة البنزين الى الهواء و بعد ما العربية تسخن بالتدريج الصمام بيفتح حتة حتة من خلال الكمبيوتر الى بيعرف من خلال الثرموستات الكهرباء الى راكب على يمين البلوك تحت الكويل
2- لو شغلت التكييف المفروض لو مافيش تحكم فى الصمام ده العربية حتبطل على السلانسيه لكن الكميوتر لما يحس ان التكييف اشتغل (من خلال حساس ضغط الفريون) علاطول يحرك الصمام علشان يحافظ على RPM السلانسيه و العربية متبطلش
3- اثناء التغيير ما بين النقلات ( يعنى لما تدوس دبرياج ) الصمام ده بيحافظ على الRPM انها متقلش علشان العربية متبطلش
4- التوقف السريع تلاقى برضه الصمام ده معلى ال RPM شوية يديك فرصة لو حتمشى تانى تبقى سهل تطلع و لو طولت شوية فى الوقوف بيرجع ال RPM طبيعى تانى
5- و يمكن ليه حاجات تانية انا مش عارفها دلوقتى

المهم الطبيعى ان الكمبيوتر عارف
فلما بتفصل البطارية و تيجى توصلها تانى بعد مدة (10 ثوانى فاكثر) الكميوتر بينسى كل حاجة عن التحكم فى الصمام ده
فتعمل الخطوات دى علشان يتعلم IDLE LEARN

طريقة ال idle learn
1- يفضل تكون العربية باردة
2- افصل البطارية لمدة 10 ثوانى على الاقل ( يكفى فصل الطرف السالب )
3- وصل البطارية
4- افتح الكونتاكت على الوضع on بدون ادارة المتور لمدة 5 ثوانى
5- الكنتاكت off لمدة 5 ثوانى
6- الكنتاكت on لمدة 5 ثوانى ثم قم بادارة السيارة ( على الوضع p لو الفتيس اتوماتيك )
7- انتظر حتى تصل السيارة لدرجة حرارة التشغيل الطبيعية ( و ذلك عندما تعمل المروحة و قد يمر من 10 الى 15 دقيقة للوصول لهذه الحرارة )
8- قم بتشغيل التكييف لمدة 10 ثوانى ( لو بها تكييف)
9- افصل التكييف لمدة 10 ثوانى ( لو بها تكييف)
10- لو السيارة فتييس اوتوماتيك امسك فرامل اليد ثم اضغط على الفرامل و ضع الفتييس على وضع d
11- قم بتشغيل التكييف لمدة 10 ثوانى ( لو بها تكييف)
12- افصل التكييف لمدة 10 ثوانى ( لو بها تكييف)
13- بطل الماتور و بهذا تنتهى عملية التعليم

[waleed_d82]

اولا بشكر حضرتك كتير علي مواضيعك المفيدة جدا والشرح الواضح المصور واحلا ما فية انه بيعلم الواحد انه يشتغل بنفسة
ثانيا انا عايز اعرف اعمل ايدل ليرن ازاي وياريت صور لية ودا كلام حضرتك في الموضوع :
ونعمل ايدل ليرن بالمره علشان كومبيوتر العربيه يظبط نفسه على الوضع الجديد