ادى اخرة شركات النصب مش الربح عن طريق الانترنت

[AbOnOrA]

المصيبة انه كل الموضوع قائم على الجهل والطمع واصلاً الموضوع كله ملوش علاقة بالتسويق من قريب ولا من بعيد وياما اتعمل زمان قبل الانترنت حتى وبينتهى بنفس النهاية

اولاً الموضوع لا فيه تسويق ولا نيله ولا فيه شركة هبلة فى الدنيا ترضى تدفع ملايين الدولارات علشان ناس ملهاش علاقة بمنتجاتها يشوفو اعلاناتها ويعملو كليك عليها وفى الاخر لا هيشترو ولا حاجة انا شغال فى المجال ده وعارف بقول ايه التسويق الشبكى او التسويق الالكترونى او التسويق عبر الانترنت بقى ليه اصول وحسابات ودراسات وبيتاخد فيه شهادات وتخصصات مش هبل كدة وكل شركة بتعمل اعلان عارفه مين العميل المستهدف بالنسبالها وعندها النسب اللى تقيس بيها كفائه الاعلان وما اذا كان حقق نتائجه بتغيير ايجابى فى نسبة المبيعات او لاء

لكن هى حكاية التسويق ديه كلها مدخلينها فى الموضوع علشان الحبكة الدرامية مش اكتر وهيسوقو بيها سمعة الشركات والمتخصصين فى المجال ده بجد الله يخرب بيوتهم كمان وكمان

ثانياً كل الحكاية قائمة على النصب الهرمى مش الشبكى
لان الحكاية كلها ان فيه نصاب كبير يجيب صبيان تحتيه وبيكسبو مش مبيكسبوش بس بنسبة على كل مغفل يجيبوه تحتيهم فى الهرم وهكذا وفى الاخر الموضوع تراكمى واللى فوق بيكسب من اللى تحته من غير تعب ولا مجهود غير اساليب الوهم والنصب المعتادة فى الاقناع

انا بصراحة هطق من الموضوع ده من زمان ودلوقتى اكتر خاصة ان لحد دلوقتى وبعد ما اغلب الشركات ديه اتفضحت تلاقى ناس تقولك لسه دول كويسين وطيبين ومظلومين وده بيأكد سيكولوجيا النصب المعتادة اللى بيبقى المنصوب بيه بيتحايل على النصاب علشان ياخد فلوسة

[mody112]

السلام عليكم انا كان ليه تجربة مع الموضوع ده ( زى اغلب المصريين ) فى البداية الكلام اللى هقولوا ده تم مع ناس اصحابى وكمان قرايبى اللى حصل كالتالى واحد صاحبى قالى انا دخلت فى مشروع كده اسمه التسويق الشبكى ودفعت مبلغ مش عارف كام ودخلت ب 3 اسامى ومستنى عشان اكسب 10000 $ طبعا مهتمتش ولا كانى سمعت حاجة منه وبعديها بكام شهر كلمنى واحد صاحبى تانى ( واتاريه هو السبب فى دخول صاحبى الاولانى الموضوع ده ) وقالى عاوز اقابلك واتقابلنا وقعد يشرحلى الموضوع واحدة واحدة وكلمة كلمة (طبعا الموضوع ده بيعتمد على القدرة فى الاقناع وكمان انك تفهم طبيعة اللى قدامك وتعرف ان معظم الناس طماعة وبتجرى ورا الربح السريع والسهل )طبعا انا اقتنعت بالفكرة جامد واللى خلى الفكرة تشعشع فى دماغى زيادة انه قالى انه كسب هو واتنين تانى اعرفهم برضه انا مبلغ ال 10000 $. طبعا لما اى حد يسمع المبلغ ده بيتوهم وتبتدى الاحلام الوردية تبان انها بتتحقق قدامه بس كان فى حاجة مهمة جدا الا وهى انك لازم تقنع اكبر عدد من الناس انهم يشتركوا معانا والا مش هتشوف ولا نكله قلتله سؤال مهم وهو طب ماكيد فى حد من الناس اللى هتدخل دى هتلبس الشايب ) يعنى هييجى وقت واصحاب الشركة يقولولك امك فى العشة ولا طارت زى ما حصل كده )قالى ايه اللى يخلى الشركة تعمل كده طول ماهى بتكسب (رد اقنعنى برضه ) المهم اتفقنا على ميعاد عشان ادفع الفلوس وابقى عضو جديد فى الشركة ولما جه الوقت الموعود حصل شوية ظروف كده والحمد لله اتاخرت شويتين وكانت الفكرة اللى شعشعت فى دماغى ابتدت زهوتها تروح وتبرد وتجمد وميبقاش ليها اى30 لازمة وبينى وبينكو الفلوس اللى كنت عامل حسابى انى ادخل بيها كنت حطتها فى العربية والحمد لله وكبرت دماغى . وفى نفس الوقت واحد قريبى كلمنى تانى انه دخل فى شركة تانية ودفع 3500 ج واخد منهم حوالى 50$ والمبلغ ده قالى هياخده منهم كل اسبوع وقالى ايه رايك تبقى معانا قولتله ده انا كان عندى حوار زى ده بالظبط وكنت عاوزك تبقى انت اللى معانا والحمد لله بقى الوضع على ما هو عليه. وبعدين كلمنى اخر واحد وقالى شوفت اللى حصل قلتله خير قالى الفلوس احت والشركة قفلت واصحاب الشركة اتقبض عليهم قلتله الحمد لله (قدر الله وما شاء فعل ) وبكده يبقى اللى اخد فلوس منها وكسب حلال عليه واللى فلوسه راحت ربنا يعوض عليه دى تجربتى وحبيت انقلهالكو

[crime]

الموضوع ده معارفى واصحابى بيتكلموا فيها اكتر ما بيتكلموا ف السياسه
بس انا تمام مبخشش ف شغل مبفهمش فيه

[AbOnOrA]

هو كدة بالظبط

[AbOnOrA]

سقوط محاسب "جلوبال آد مارت" المتهم الرئيسى فى "التسويق الإلكترونى"

قرر، اليوم، الثلاثاء، محمد سمير، وكيل نيابة قسم أسوان، برئاسة المستشار مصطفى صابر، مدير النيابة، وبإشراف المستشار بهاء الوكيل، المحامى العام لنيابات أسوان، حبس المتهم الرئيسى بالنصب على المواطنين، وتلقى الأموال، والاشتراك فى إدارة إحدى الشركات الشهيرة للتسويق الإلكترونى، وتدعى "جلوبال آد مارت".

كان اللواء حسن عبد الحى، مدير أمن أسوان، قد تلقى إخطاراً بتجمع العشرات من ضحايا المتهم حول الشركة، وحاصروا مقر عمله مطالبين أجهزة الأمن بالقبض على المتهم، وعلى الفور تمكنت مباحث قسم أول أسوان برئاسة، المقدم أمير كامل، القبض على المتهم وتبين أنه يدعى "بهاء.ر.أ"، محاسب يعمل لدى شركة "جلوبال آد مارت"، إحدى شركات التسويق الإلكترونى الشهيرة فى النصب على المواطنين والحصول على أموالهم.

تحرر المحضر اللازم، وأخطرت النيابة التى تولت التحقيق، ووجهت للمتهم تهمة توظيف أموال والنصب على المواطنين، وحصوله على مبلغ مليون جنيه تقريباً نتيجة أعمال نصب على ضحاياه.

خدو بالكو اليوم السابع كاتبه ايه التسويق الالكترونى وده اللى لسه عمال اقوله المصطلحات دخلت فى بعضها وهيبقى النصب اسمة تسويق وتتشوه صورة ناس متخصصين وشركات جادة كتير شغالة فى مجالات التسويق الالكترونى والتجارة الالكترونية عموماً