عاوز رأيكم (رينو لوجان ولا شيفروليه لانوس)

[hossamhussein0]

المشاركة الأصلية كتبت بواسطة tigernet لانوس افضل لان ماتورها ماتور اوبل استرا 96 لوجان مش رينو المصممها رينو اشترتها من شركة مغربية اسمها دتسان ماتور لانوس موفير للبنزين اكثر من لوجان لان ماتور لانوس1500 و لوجان 1600 انا افضل لانوس

عفوا كلام سيادتك كله غلط أنا كان معايا لانوس علي الزيرو و بعتها و اشتريت رينو لوجان علي الزيرو و اسمحوا لي ان اقول رايي
الرينو هي أصلا داتشيا (الرومانية) و هي شركة تمتاز بصاج و بودي في منتهي المتانة بس تكنولوجيا مفيش و مواتير تعبانه لا تناسب الاجواء الحارة ،، قامت شركة رينو فرنسا بشراء شركة داتشيا منذ 5 سنوات و قامت ببيع السيارة الداتشيا لوجان علي انها رينو بس طبعا بعد تطوير عالي التقنية و موتور الميجان 1 و هو موتور مشهود له بالكفائة و التوفير

و بذلك أصبحت اللوجان تتميز بالقوة (الروماني بتاعت الداتشيا ) و تكنولوجيا و رفاهية الفرنسي و الاوروبي و طبعا لما رينو تضع علامتها علي عربية معناها أن كل ما فيها مطابق لمواصفات جودة رينو العالمية و دي لوحدها تسوي كثير

الرينو أكثر قوة و متانة و ثبات علي الطريق و أنا مجربها علي سرعة 180 كم و العربية الله اكبر راسية جدا و تقبل المناورات بثبات عالي جدا جدا بالرغم من أن طرقنا اسفلتها و ميولاتها زي الزفت وهي كمان جنط 15 بوصة فالبودي كله اعلي من اي عربية اخري بما فيهم طبعا اللانوس و عفشتها كمان مصممة للطرق الوعرة و بتوفر بنزين اكثر بكثير من اللانوس بالرغم من أن الموتور اعلي في السعة اللترية و كمان معاملات الامان اعلي بكثير في الرينو عن اي عربية اخري (أنا دست علي حجر في طريق مصر الاسكندرية الصحراوي أكبر من ضعف حجم كافة اليد و كنت فاكره كيس نايلون فاضي ملقي من اي عربية و كنت علي سرعة 100 كم ) ولله الحمد ماحصلش أي حاجة و كانت العربية ثابته زي ما هيه و العفشة تمام و لا أكن كان فيه حاجة و انا متاكد أنها لوكانت عربية كوري أو صيني كانت اتقلبت أو علي الاقل عامت في الطريق أو تضضرت العفشة ،، كمان الفرنسيين بيهتموا جدا جدا بوسائل الامان و الحماية القصوي للركاب فمثلا اللوجان بها الايرباج مش موجودعربية اخري من نفس الفئة و كمان فيه عوامل كثيرة في صالح الرينو مثل اتساع الصالون و الشنطه كل ذلك في صالح الرينو بس برضه ليها عيوب كالاتي :-

ان التصميم الفرنسي شاذ عن باقي العربيات " و دي مسألة نسبية ترجع الي ذوق المستهلك" مثلا التحكم في الزجاج ( لا يوجد وحدة مجمعة في باب السائق للاربعة نوافذ كما تعودنا في كل العربيات )
السنتر لا يستجيب مع باب السائق و لا بد من الضغط علي مفتاح في التابلوه لفتح السنتر (طبعا ذلك يحدث اذا كنت تستخدم المفتاح الغير موجود به ريموت )
ثمنها عند اعادة البيع مش زي اللانوس ( الرينو بتخسر كثير جدا )
توكيل رينو حرامي حرامي بكل ما تحمله الكلمة من معاني ( صيانة 20 الف + تيل امامي = 1300 ج )
ثمن اكسسوارها غالي جدا ( مراة الجنب "كهرباء" ثمنها 1000 جنيه ) بينما اللانوس قطع غيار رخيصة و متوفرة و ده اهم شئ انك ممكن تلاقي قطع الغيار في كل مكان ،،،،

و أخير و عن تجربة

تحيا اللانوس كسيارة اقتصادية جيدة جدا مناسبة لمصر و تحيا اللوجان للركيب اللي عاوز جودة عاليه و عنده استعداد يدفع اكثر في الصيانة

[medo el sayed]

فعلا جملة جيدة استاذ حسام

تحيا اللانوس كسيارة اقتصادية جيدة جدا مناسبة لمصر و الى عاوز حاجة يلمها بسهولة لو مرتبه على كده .و تحيا اللوجان للركيب اللي عاوز جودة عاليه و عنده استعداد يدفع اكثر في الصيانه و ثمنها يقل جامد فى البيع الا بعد فترة لما تثبت نفسها فى السوق و يستقر اسعار قطع الغيار و تنتشر علشان احتكارها فى التوكيل هو الى بيرفع الثمن و لكن الكلام المنتشر ان اتفاقية اغادير على السيارات و ليست قطع الغيار

[elgdawy2007]

المشاركة الأصلية كتبت بواسطة elmanahry الكلام ده يتكتب ويقراه الاف من الناس يركبون اللانوس ومجربينها د ه كلام لا يمت للواقع بصلة اللانوس هدية الالمان لكوريا وهدية ابو الفتوح لمصر واذا كنت تحك فى المطبات باللانوس ده لانك بتعدى المطب بسرعة اما كلام صاحبك الطويل عن اللانوس فاعتقد انه يقصر رقبته اولا عمر اللانوس فى مصر كام وعمر اللوجان كام من اجل ان يعرف صاحبك عمر قطع الغيار اللهم اذا كان يبيع قطع غيار مضروبة رايت فى مركز صيانة الدايو فى العباسية سيارات دايو لانوس عاملة 300 الف كيلو والمواتير بنفس شدتها ولم يقل لى اى من معارفى وهم كثر ويملكون اللانوس عن اى شئ ضدها او ضد قطع غيارها

مع كامل احترامى لتعليقك ولكن بالفعل الكثير من الناس مالكى الانوس يشتكون منها كسياره لا يتوافر فيها عنصر الامان من ناحيه الفرامل فهى بكل اسف تفتقد الى الامان بخصوص الفرامل لانها ضعيفه جدا لو كنت على سرعه فلن تستطيع التحكم بالسياره فى حاله وقوع خطر لا قدر الله وعفشتها لا تتناسب بالمره مع الطرق المصريه ولا بد ان تتابعها بأستمرار لتربيط العفشه ثم ان كلام الاخ الطويل يجب ان تستوعبه جيدا فهو يقصد بصفه عامه ان قطع غيار الرينو وهى فرنساوى اصلا معمره عن قطع الغيار الانوس الكورى ولا داعى للزم فى الناس واتهامهم بأنهم من المحتمل انهم يعملون فى قطع غيار مضروبه وغير ذلك من الكلام بدون ان تستوعب اصلا مدلول الكلام وماذا يعنى وبالمناسبه انا لا اعرف الاخ الطويل هذا لا عن قرب ولا عن بعد ولكنى اؤيد صحه كلامه بالفعل واذا كنت تمتلك سياره لانوس فلا داعى للتحيز والتعصب لسيارتك الموقره وفرض وجهه نظرك ايها الاخ الفاضل على الناس كما لو كانت بالفعل قاعده مسلم بها لان بالفعل كل مالكى لانوس يعترفون انها موتور فقط غير ذلك فلا يوجد بها ما يميزها عن السياره اللوجان التى حازت على اعجاب كل من اقتنى هذه السياره وفى وقت وجيز جدا ..مع خالص شكرى وتحياتى اليك

[k11]

السيارة اللانوس هى الافضل على الاطلاق بشهادة الجميع وحققت نجاح قوى جدااااا فى مصر و فى كوريا

[shoka]

السيارة اللانوس كانت الافضل اما الان فهو عصر اللوجان
يكفى توكيلها محترم جدا
اسعر قطع الغيار داخل التوكيل الان ارخص من مثيلاتها وقطع الغيار منتشرة خارج التوكيل
واسعار الصيانات ثابته واعتقد انها معقولة
على فكرة انا كنت فى نفس الحيره لمدة اربعة اشهر ولكن بعد الاستخارة والاستشارة
ربنا اكرمنى باللوجان والحمد لله انى جبتها وانصحك باقتنائها