دروس مستفادة من حدثة عربيتي الماتركس

[Badr Salah]

الجزء الثالث ( بناءاً علي رغبة الجماهير)

اشترينا الباب الجديد وتوجهت للسمكري الطيب اخو الحلاق عندي في العمارة
ركب الباب الجديد بشطارة وفضينا الباب القديم وركبنا حجته في الباب الإستيراد وظبط شوية
كدمات في صاج العربية وكده السمكرة خلصت.

وبدأت رحلة البحث عن الشخص المحترف اللي ها يرش العربية( البوهيجي او صنيعي الدوكو)
بدأت استقبل الآراء من جميع الأصدقاء
واحد كهربائي سيارات صحبي قلي ملكش دعوة انا بقة ها اوديك لأحد علماء هذا الزمان في رش العربيات واسمه الدكتور محمد العمدة وده بقة حاصل علي سبعة دكتوراة في رش العربيات الزيرو ( يعني اللي اول مرة ترش).
توكلت علي الله واخدت صحبي الكهربائي ومعاية اتنين اصحابي ورحنا زرنا البروفسير محمد العمدة دخلنا الورشة وطلع من حجرة العمليات وقلع الجونتي وطلع بص علي العربية
وقال تمام تمام ها ترش الباب وحته في الكبوت وحته صغيرة عند غطا التنك يبقة بلاش 1200 جنية علشان خاطر حسين (الكهربائي) يبقة الف جنية ...........قلت له ليه يا عم قلي انا ها اجيب لها بـ 400 جنية بويه (دوكو) قلت له يعني انت مصنعية ايدك 600 جنيه قلي اه ايوه
قلت له ماشي خد 600 جنيه وانا جايب البوية معايا (ترا ترا طخ طراخ طخ طخ)

ايوه دي المفاجأة انا كن نزلت مع واحد صحبي جبنا البويا نفس لون العربية من عند الحج احمد في ميدان سليمان جوهر في الدقي وجبنا نوع كويس جداً.

اول ما سمع ان انا معايا البويا اتحولت ملامح وشة للأنسان تاني غير اللي كان بيضح ويقول تشربوا ايه يا بهوات من فنتو ثانية. وراح قايل جبت البويا منين قلت له من عند الحج احمد . راح علي طول قلي البويه دي مش ها تنفع وها تبوظ العربية انا لازم اجيب البويا بنفسي ,قلت له ملكش دعوة خليها تبوظ العربية انا راضي انت رشها واي حاجة غلط انا اللي جايب اللون ده, قلي لا انا مش بقدر اشتغل غير بنوع بويه (زبالة ) معين المهم من هنا لهنا قال ها اخد الف جنيه واجيب البويه رحت انا سيبه وماشي وقلت له ها احوش الألف جنيه واجيلك استناني ها ها ها ها

طبعاً لفيت علي كذا واحد لحد ما لقيت صنيعي ابن حلال اخد البويه وقلي ده نوع محترم واخد مصنعية 300 جنيه واستغل فيها يومين يوم سنفر ومعجن الكدمات الصغيرة و اليوم التاني رحت معاه الفرن ودخلت علي الصنيعي اللي ها يمسك المسدس وظبطة بعشرين جنيه راح ماسك العربية مظبطها وطلعت بالسلامة ورحت له بعد اسبوع راح ملمع العربية بالمكنة والحمد لله بقة زي الفل

الدرس الثالت اللي اتعلمته

(اتأكد من نوع البويه اللي ها ترشها علي عربيتك لأن الصنيعية بيجيبوا بويه رخيصة ويحط الفرق في جيبه)

وده السبب اللي خلة البروفسير البوهيجي يرفض يشتغل في العربية لأنه عرف انه مش ها يعرف يطلع مكسب من البويه اللي كان ها يجبها ب 400 جنيه وانا جبتها ب 200 جنيه ونوعية انضف من اللي كان ها يحطها علي العربية ويبقة كسب في العربية 600 جنيه مصنعية و200 جنية فرق بويه.

[johnny161094]

الف شكر علي الموضوع الي اتعلمنا منو كتير و ايوه كدة افضحوهم عشان نعرف ناخد حقنا منهم

[MASalex]

شكرا يا أستاذ بدر على الموضوع الجميل
وياريت كل واحد يشارك تجاربة للآخرين

[sam ram]

مش عارف اواسيك على الباب و لا اهنيك على الاسلوب الجميل و الشيق
مصائب قوم عند قوم فوائد !!
قدر الله وما شاء فعل ... وان شاء الله الموضوع الجي يكون عن خبر كويس وبنفس الاسلوب الشيق والافاده ...
جزاك الله خيرا

[bahaa23973]

حمد الله على سلامتك و سلامة عربيتك و عرض شيق و مثير بس عايز اعرف فى جزء رابع ولا اكتفيت بالثلاثة و ياريت يكون فى رابع يلخص الدروس المستفادة ......... و شكرا