احنا الطلبة ؟ عايزين نعرف عمرة الموتور بالتفصيل والخطوات والصور

[mr_astra]

بسم الله الرحمن الرحيم
لو تكلمنا عن محرك الـ 128 يعتبر من اسهل المحركات نظرا لتصميمة البسيط ووسع الحوض وسهولة العمل فية
وعلى فكرة مواتير الـ 128 من انعم المواتير اللى ممكن تسمعها
هانبدا بالفك وهنا هاننزل الموتور على الارض خالص مش هانشتغل فى الحوض ودة عشان الطريقة تمشى مع عمل شنبر او عمرة كاملة

خطوات فك الموتور من جسم السيارة
هانبدا نفك البطارية والكبالن الداخلية والخارجية وخراطيم البنزين الداخل والخارج والكابل المغذى للاسبراتير
ونبدا نفك الردياتير والخراطيم الداخلة والخارجة للموتور
هانفك واير الدبرياج
وطبعا اتياش البنزين فى الكربراتير
هانفك كابلات المارش ومن ثم المارش كليا وندخل على التقيل
اولا الموتور عند مثبت بـ 3 قواعد فى جسم السيارة
القاعدة الاولى وهى اللى فى كرتيرة السيارة الشمال ودى سهلة جدا لانها باينة وواضحة بمجرد فك مسمار التثبيت كدة القاعدة بقت برة اللعبة
تانى قاعدة اسهل بكتير لانها تعتبر شداد للموتور وهى موجودة اسفل الاستبن ودى هانفكها من جسم السيارة وكمان من جسم المحرك عشان الشداد دة طويل وممكن يلاخمنى وانا بسقط المكنة
وعشان تبقى عارف الموتور فى الـ 128 مش بيتشال بونش وانما بينزل على الارض وبنرفع الرعبية من فوق منة
نيجى بقى لتالت قاعدة ودى ارخمهم وهى القاعدة المثلثة الموجودة بالفتيس هانبدا بفك الـ 3 مسامير المثبتة للقاعة فى الفتيس وبعد الفك هاتقابلنا مشكلة القنطرة لانها هاتعوق نزول الموتور فى الارض وعشان نفك القنطرة هاندخل جوة صالون العربية ومن عند منتصف الصدر ( تحت القنصولة ) هانفك عدد 2 مسمار مثبت للقنطرة ودة بيتطلب انك تشيل جزء من الموكيت او اللارضية البلاستيك ولكن هتحتاج واحد معاك يمسك راس المسمار من جوة الصالون وانت بتفك الصامولة من تحت الحوض ولما نخلص نفك القنطرة من الجزء الامامى للحوض من عند القنطرة الامامية
طبعا مش محتاج انى افكرك انك لازم تكون محمل المكنة بالكامل على كوريك تمساحة كبير

[mr_astra]

كدة المكنة بقت فى الهوا ونبدا ننزل الموتور على الارض واحدة واحدة واما نطمن انة كليا بقى على الارض هانرفع العربية لفوق ونرجعها لورة عشان تبقى بعيد عن الموتور
لو عاوز تغشل المكنة بالجاز عشان تشتغل على نضافة وبال رايق ومالة اديها غسلة سريعة عشان كل حاجة تبقى منورة ادامك وكمان شكل ترشيح الزيت مش حلو

على فكرة انا نسيت اقول فى الفقرة السابقة نفضى زيت المحرك

دلوقتى متهيالى ممكن نفك الفتيس من الموتور عن طريق مسامير الداير وخد بالك احنا شايلين المارش من الفتيس ودلوقتى ممكن نركن الفتيس على جنب مش محتاجينة

نفك الدسك من على الموتور عن طريق المسامير المثبتة للدسك على الفولام ،،،،،، ونطلع الاسطوانة لانها ملهاش اى مسامير تثبيت

نجيب بقى مفتاح لقمة من نوع كويس اوى المانى على سبيل المثال ونفك الـ 4 مسامير بتوع الحدافة بس هاتقابلك مشكلة هنا انك كل اما تيجى تفك تلاقى عامود الكرنك بيلف منك وللتغلب على هذة المشكلة بنجيب نص سبيكة قديمة طبعا ونوضؤرها على سنون الفولام وعلى جسم الموتور فى اتجاة معاكس لحركة الفك اللى هو شمال طبعا ،،،،،،،،يعنى لو انا واقف ادام الموتور من ناحية الفولام وهافك الـ 4 مسامير طبعا عكس عقارب الساعة يبقى السبيكة تتثبت من الناحية الشمال وللاسفل (يا رب تكون فاهم قصدى)
وبعد الفك هتلاقيها لزقة مش عاوزة تتطلع نجيب شاكوش متوسط ( 1 كجم مثلا) وندق دق خفيف اكنك بتكسر بندق وخايف لتكسر اللى جوة البندقاية والدق ميكنش فى حتة واحدة ولكن على محيط الفولام بصورة متالية ومتتابعة وخلى بالك من الخابور اوعى يضيع منك
نلف المكنة ونبدا بفك الدينامو كليا مش السير بس ونفك وش التقسيمة البلاستيك
ونهوى بلية الشداد ونخلع سير التقسيمة ونشيل كل الكلام دة على جنب
دلوقتى هانفك طنبورة الكرنك طبعا هانفك المسمار المثبت ليها ودقتين هتلاقيها بقت برة وخلى بالك من الخابور
تيجى نفك الكربراتير ملوش لزمة عندنا وكمان الاسبراتير لحسن يتكسر المفروض كنا فكناة والموتور فى العربية بس مش مهم ملحوقة
ولا اؤلك ما تيجى نشرب كباية شاى عشان التقيل جاى

[mr_astra]

دلوقتى انا عارف ان فى مشكلة عدم تثبيت المكنة على الارض وعمالة تتحرك وتوقع منك ،،،، طب ما تيجى نفك كرتيرة الزيت وطبعا دى سهلة جدا عن طريق فك مسامير الداير كلها وننيم المكنة على جنبها ونفك طلمبة الزيت عشان ما تتكسرش وطلع ترس طلمبة الزيت عشان ما يضعش فى الورشة

ونطلع المكنة على تزجة معدنية نضيفة ونضع المكنة على الجزء السفلى ليها (ناحية البيلات)

تعالى بقى نفك الهد ودة بيتطلب اننا نفك غطاء التاكيهات وبنفس مفتاح العزم الالمانى نفك وش السلندر عن طريق اننا نهوى جميع المسامير بالتتابع المعروف ومن ثم نفكها كلها ودلوقتى بقى عندنا وش السلندر مفكوك والبساتم باينة ،،،،بنظرة الخبير نبص على سطح البساتم ونشوف نسبة الكربون على سطح البستم هل جميعها متساوية ام ان فى بستم او اكثر نسبة الكربون علية اكثر ولا كلهم عليهم نسبة كربون متحجر وعامل تخانة فوق وش البستم لان طبعا دة لة مدلول لو ان فى بستم السطح بتاعة علية نسبة كربون عالية ومتحجرة دة بيدل على ان البستم بيطولة زيت اما من الشنابر واما من الصبابات

نخلى كل بستم فى النقطة الميتة العليا ونحرك البستم بادينا حركة افقية عشان نشوف خلوص البستم فى الشميز ونكرر دة مع الاربع بساتم

اما بخصوص وش السلندر انا مش عاوز اشوف حاجة فية لانى ناوى اعمل كل حاجة فية من قواعد ودلايل وطقم صباب عشان دة مخ المكنة ولازم يتعمل زى ما قال الكتاب وخصوصا ان التكلفة مش عالية دنا بتعامل مع 8 قواعد وطقم صبابات بـ 90 جنية الفرنساوى اللى هو احسن حاجة

ما تنساش تحل المانفول من وش السلندر ملوش لزمة يروح للخراط

هانبدا نفك البيلات والبساتم من البلوك ودلوقتى بقى اسمة بلوك مش موتور
طبعا هاننيم البلوك على الجنب ونفك مسمارين البيل رقم 1 (من ناحية وش التقسيمة) ونطلع قاعدة البيل بالسبيكة بتعتة وبخشبة الشاكوش ندق على ذراع البيل عشان يخرج بالبستم بتاعة من البلوك وبعدين نركب نص قاعدة البيل المحلولوة ونشبط المشمارين بتوعها فى باقى البيل ونكتب علي سطح البستم بزنبة ارقام رقم 1 فكدة يبقى عندنا البستم بالبيل كامل كامل كامل والبستم مكتوب علية رقم 1 ومتخفش البيلات مش هاتتلخبط مع بعضها لانها مكتوب عليها الارقام
بس فى حاجة مهمة اوى اوى هنا اية هى؟؟؟ اتجاة البستم فى الشميز ،،،،، فية بساتم ( الاصلى ) بيكون مرسوم عليها سهم على سطح البستم بيشاور على مكان معين فى البلوك لو مكنش اعملة انت او شوف تجويف الصبابات على سطح البستم فى اى اتجاة عشان فى التقفيل بامر الله نراعى اتجاة البستم فى الشميز
وبنفس الطريقة هانفك الـ 4 بيلات

[mr_astra]

بكدة انت جاهز تودى الشغل للخراط وتعالى نتكلم شوية فى اعمال الخراطة للاجزاء المختلفة للموتور
اولا لازم تنقى خراط سمعتة كويسة والمكن بتاعة متعاير وجديد لان نسبة نجاح العمرة 99% بتعتمد على توفيق ربنا والخراط

طبعا انا قلت لحضرتك ان الجندى فى احمد بدوى من احسن الناس اللى ممكن تتعامل معهام وبالمناسبة انا كنت بشتغل عندة صبى فى اجازات المدارس والكلام دة من سنين كبيرة طبعا ولما كبرت وكنت ماسك شغل فى الغردقة (محركات ومولدات بحرية) معظمها كاتربلر كنت بوديلة شغلى لان فى ربط وحزم يصل لمرتبة الالمان فى الشغل

هو اية اللى ممكن يتم علية اعمال الخراطة وهابدا بالوش

لو كراسى عامود الكامة مبوشة الخراط بيعملها كراسي
طبعا الخراط هاينفض الصبابات واتفقنا اننا هانغيرهم بجديد نوع فرنساوى وهاينفض القواعد عدد 8 وهاينطر الدلايل عدد 8
بالنسبة للدلايل وطبعا انت عارف ان الصباب بيتحرك جوة الدليل حركة ترددية او راسية ومعلهوش حمل اوى لكن الدليل نفسة ممكن يسرب زيت داخل غرفة الاحتراق ،،،، صحيح ان الدليل بينزل شحط فى مكانة انما مش كفاية انا عاوز اامن شغلى مليون فى المية فبطلب من الخراط انة يعمل دلايل بكراسي واسمها دلايل يابانى وهى عبارة عن ان جسم الدليل من الخارج بيعمل فية سن رفيع جدا بارز عن جسم الدليل عشان اما يشحط الدليل فى المكان بتاعة فى وش السلندر السن دة يعمل زى اويل سيل معدنى يمنع مية فى المية اى زيت يتسرب لغرف الاحتراق

عمل 8 قواعد للصبابات ودى بيعملها على المخرطة وبعدين بيعملها فريزة وبعدين بيريح الصباب على القاعدة بتعتة بالرودية

لو ان وش السلندر فى تاكل من مجارى المياة الخراط بيلحم التاكل دة وبيقشط مكانة ودة المسموح بعملة فى الوش انما يقشط الوش بالكامل عشان مقفع والكلام دة مرفوض بالنسبة لى والحل البديل وش سلندر استيراد ستاندر

دى تقريبا جميع اعمال الخراطة فى وش السلندر وبيتغسل بعدها غسيل من نار والخراط بيجب شنيور وبيركب فية فرشاة سلك وبينضف مجارى الهواء والعادم من اول مكان المانيفولد لغاية الصباب وبيرجع بيلمع وزى الجديد ودى نقطة مهمة جدا عشان اى رواسب بتعمل ممانعة للهواء الداخل للموتور او العادم الخارج منة ونرجع نغسل الوش تانى بالجاز بعد التقفيل النهائى ونسيت اقول لحضرتك انك مش هاتعتمد على جلد الصباب اللى بيجى فى طقم الجوانات لان خامتة مش تمام وانما بنجيب جلد صباب فرنساوى وبندية للخراط او هو بيكون عندة عشان ما يعطلش على الزبون

يستحسن اما تيجى تستلم الوش من الخراط تخلية يختبرة ادامك والطريقة انة بيحط جاااااااااااز مش بنزين على الصبابات ونتركها لمدة كافية ونشوف لو فى ترشيح للصباب من عدمة يعنى كمية الجاز لازم ميحصلهاش اى فقد
وبكدة يبقى الوش بتعنا تمام التمام

[mr_astra]

البساتم

اولا ما فيش اى اعمال خراطة بتتم على البستم
لازم بالعين نشوف جسم البستم من برة هل فى خرابيش او مجارى نتيجة الاحتكاك او حتى فى جزء مكسور من البستم لان من المفروض ان جسم البستم من الخارج يكون بيلمع
كمان سطح البستم لازم يكون متساوى ومفهوش اى كسر

نيجى بقى لنقطة فى غاية الاهمية

مجارى الشنابر
احنا عمالين نتكلم ان المكنة عاوزة طقم شنبر وبتنفخ زيت والكلام دة ،،،،، طب انا اية ضمنلى ان الشنبر الجديد اللى هاركبة هايمنع الزيت المتسرب لغرفة الحريق ،،،، هاتقولى دة جديد ومش متاكل هارد عليك واؤلك طب ما يمكن مجرى الشنبر فى جسم البستم هى اللى متاكلة ومبوشة يعنى مهما حكمت الشنبر من جدار الشميز وفى بوش فى البستم نفسة هايخلى الزيت يتسرب لغرف الحريق
طب الحل اية ؟؟؟؟؟؟؟؟؟؟
هانسيب الحل شوية كدة ونتكلم على الشمايز
حاجة من اتنين اما اننا هانشغل البستم القديم ونعمل شميز جديد على البستم
او نجيب طقم بستم جديد زيرو 10 على اعتبار ان البستم القديم كان ستاندرد ونوسع فى الشمايز الموجودة
طب الحالة رقم 2 دى سهلة بستم جديد وطقم شنبر جديد نفس الزيرو او المقاس وهانوسع فى الشمايز الموجودة وخلصنا على كدة
طب لو هانشغل البساتم القديمة لانها سليمة ومش مكسرة ولا مجرحة وكان فيها بوش فى مجارى الشنابر وبالاخص شنبر الزيت !!!!!!ساعتها لازم نجيب فرش لشنبر الزيت ودة بيكون عبارة عن سلك زنبركى او سلك واخد شكل تمنيات وسبعات معرج السطح يعنى ووظيفتة انة بيخلى شنبر الزيت مضغوط لبرة شوية وبيملى البوش الموجود مكان شنبر الزيت

ودة الحل اللى اجلناة فى الفقرة السابقة

عاوزين بقى نشوف الشنبر اللى احنا اشترناة وطبعا بعد عمل شمايز جديدة او توسيع الشمايز الموجودة هل مناسب هلى محمل زيادة
بمنتهى البساطة نركب الشنبر ( واحد تلو الاخر) فى الشميز وعشان نضمن استواؤة بوش البستم ندخلة الى منتصف الشميز ونشوف الخلوص بتاع الشنبر كام ملى ومن هنا تقدر تحكم على الشنبر قبل التركيب مناسب من عدمة والخلوص بتاع الشنبر لا يجب ان يتعدى 0.5 ملم فى اى جزى من اجزاء الشميز من اول الشميز لاخرة ودة ترجع لمدى مهارة الخراط لازم الخلوص يكون واحد مفهوش اى اختلاف

وبكدة يبقى خلصنا اعمال اشمايز والبساتم والشنابر