العربية متبرجلة ومش مظبوطة

[samehlila]

بسم الله الرحمن الرحيم
1 - المشكلة في ضعف طرمبة البنزين غالبا لانك بتقول ان لما سديت الراجع اتظبطت شوية
2 - كويل الاشعال اللي راكب عليه اسلاك البوجيهات ضعيف و بيتلت و ده غالبا السبب لان انا عدي عليا عربيات كتير نوبيرا فيها العطل ده بتلاقي العربية مخنوقه في السحب و العادم مش كويس و بتغيب في الدوارة و السلانسية مش مظبوط و العربية بتميل لانها تبطل
جرب برده الحاجات دي و عرفنا وصلت لاية

[soltanfriend]

والله بجد يا جماعه مش عارف اشكركم ازاى على اهتمامكم وردودكم السريعه
ربنا يجازيكم كل خير ان شاء الله
الحمد لله يا جماعه بعد عناء طويل ومكلف تم اصلاح المشكلة والمشكلة كانت فى وش الاسبراتير كان فيه شرخ بسيط والشاشكوش الذى بداخلة كانت قطعه الابلاتين التى بداخلة مفتته تماما ودا كان بيخلى الشاكوش يسرب الشحنة وما يوزعش الكهرباء على حسب ما فهمت من الصنايعى غيرتهم والعربية على طول ظبطت وطبعا بقت احسن من الاول لأنى تقريبا غيرت كل حاجة ممكن تتغير لغاية ما وصلت للعيب

[samehlila]

معلش طلب غلس شوية ياريت بعد كده اللي يبقي عايز مساعدة يشرحلنا عربيتة يعني انا كل ده بتكلم عل اساس ان العربية اليكتروني و مكان الاسبراتير فيه كويل علشان كده قلت المشكله من الكويل ياريت لو نتفق مع الناس في المنتدي اللي عايز يحل مشكلهفي عربيتة يعرفنا النوع و سنة الصنع و انجكشن ولا لأ و اسبراتير ولا كويل

فيه حاجه تانيه حضرتك قلت ان العربية ركبت كمبيوتر و قال ان الحساسات مفيهاش مشكلة طيب حساسات ليه طالما مفيش فيها كويل ولا انجكشن اللي اعرفه ان الكمبيوتر و الحساسات دي لتنظيم ضخ الوقودو زمن الاشعال انما في العربيات اللي مبنية علي اسبراتير دي بتبقي تنظيم الاشعال فيها عن طريق دوران الاسبراتير نفسه من الموتور و الله اعلي و اعلم

ياريت تفيدني و لو بصورة لموتور عربيتك تبقي مشكور علشان نستفيد كلنا

[sharooo]

اكيد يا جماعه كان لازم نسال من الاول عن نوع السياره ..عشان نعرف هنفكر في اي اتجاه
الحمد لله انها اتحلت على خير.وانا رايي انها لو عربيه اليكتروني يبدا بطلمبه البنزين لان الاخ بيقول انها اتحسنت لما سد خرطوم الراجع
بالمناسبه سدد خرطوم الراجع خطر جدا وممكن يسبب دمار المتور (وخروج البيل من جانب المتور)
ياريت متحاولش تعمل كده وخلى الميكانيكي يجرب حاجات تانيه غير كده

[احمد على 1999]

الحمد لله و شكرا يا استاذ سلطان على اطلاعنا على الحل النهائى لاكتمال الفائدة