ان شاء الله هستلم بكرة اللوجان اية الى المفروض؟؟

[tamora2002]

السلام عليكم

مع انى قليل لما اعمل رد او موضوع جديد بس المنتدى دة ابهرنى بالخبرات الى فية ربنا يباركلكم

طبعا بعد عناء شديد وحيرة مكنتش مقرر اجيب انهى عربية
استقريت على الوجان

طبعا بعد لما شوفت المواضيع الكتيرة عن العربية دى فى المنتدى الجميل دة

انا روحت انهاردة حجزت العربية من المصرية للسيارات . اجبارى
مفيش فى طنطا حد بيبعها غيرهم ..

وان شاء الله هستلم العربية بكرة الى هيا ال بلاك لين

ممكن اذا تكرمتم
اعرف الى الى المفروض ابص علية فى العربية . واذا كان المفروض اعمل حاجة بعد لما اخدها منهم ..
لانى اول مرة اشترى عربية زيرو .. طول عمرى بركب عربيات الوالد .

وان شاء الله هبقى اصور العربية كويس وتقرير عن استخدامى معاها فى القريب العاجل .

ولكم فائق الاحترام والشكر .

[tamora2002]

للاسف انا كمان ساعتين هروح استلم العربية ان شاء الله

ومحدش فادنى

لكم جزيل الشكر

[asom_6]

المشاركة الأصلية كتبت بواسطة tamora2002 للاسف انا كمان ساعتين هروح استلم العربية ان شاء الله ومحدش فادنى لكم جزيل الشكر

يعنى هو موضوع الاستلام ده ناس كتير اتكلمت عليه فى مشاركات كتير ... عموما النقاط المهمة دى لازم الواحد ياخد باله منها كويس :-
* الفحص البصرى للعربية بشكل عام مفيش خدوش من اى نوع - مفيش خبطات من اى نوع - الابواب والشنطة والكبوت مطبعين كويس مع جسم العربية
* فتح وغلق جميع الابواب والشنطة والكبود عدة مرات والتأكد من سلاسة الفتح والغلق
* حوض الموتور من اهم اماكن الفحص البصرى - جميع القرب مفيهاش تسريب - الوصلات سليمة - مهم جدا فحص البطارية لكونها سائلة وليست جافة فى اللانوس (( عند استلام سيارة صديق وجدنا البطارية مكسورة والحامض سبب تاكل فى دهان السيارة فى صينية البطارية والحوض بشكل غير ظاهر ))
* فحص الصالون ومهم نسبيا وجود الاكياس على الكراسى لان ده معناه عدم استخدام المعرض للسيارة فى التنقلات والحفاظ على الفرش الاصلى من ساعة خروجها من المصنع
* فحص عمل جميع الاشارات والانوار وطبعا التكييف على السرعات المختلفة وخروج الهواء من فتحات التابلوة
* احزمة الامان الخمسة وعدم وجود حزام تالف او عالق ((مزرجن))
*** مهم مهم مهم قراءة العداد كام ولا تزيد عن 70 كيلو داخل القاهرة اما فى باقى المحافظات فالموضوع راجع للمشترى من حيث موافقته على استلام عربية تم قيادتها من القاهرة اليه من عدمه -- وبالطبع الافضل عدم استلام عربية تمت سواقتها من شخص غير معروف على سرعة مجهولة فى فترة التليين وطبعا شبعت مطبات ونقر ((يعنى هيا عربية اللى جابونا)) فطبعا اتبهدلت والباشا السواق طاير بيها على الطريق
* فى تابلوة العربية ضمان وكتالوج الكاسيت وفى الشنطة الاستبن وطاسات العجل الاربعة والكريك وشنطة عدة --- كتالوج وضمان العربية بعد الترخيص
* يتم تجربة الكاسيت والراديو
* راجع على زراير رفع الزجاج للابواب الاربعة ولوحدة التحكم فى باب السائق لجميع الابواب وزر منع رفع الزجاج لباقى الابواب
* راجع على القفل المركزى للابواب من باب السائق وقفل وفتح السيارة بالمفتاح من الباب بالخارج عدة مرات
*** مهم مهم مراجعة مساحات الزجاج وعمل طلمبة غسيل الزجاج (( فى احيان بيكون الخرطوم مفصول والرشاشات مش شغالة))

ده باختصار اهم نقاط الاستلام وياسلام عليك لو خدتها معاك مكتوبة وشطبت على كل نقطة بعد استلامها علشان متنساش حاجة ((تشيك ليست))
طبعا لو فى نقطة جوهرية تؤثر على العربية أرفض الاستلام ولا توقع بالاستلام على اى شىء لأنك لن تشترى عربية زيرو كل يوم وأياك أياك تقع تحت ضغط استلم وخلاص ودى حاجات بسيطة وانا نازل بنية الاستلام مش معقول ارجع من غير العربية --- الانتظار احسن من الندم على التسرع فى الاستلام والمعرض ملزم يسلمك العربية فى الحالة التى ترضى انت عنها لانه بياخد فلوس مش ورق كوتشينة.

وان شاء الله على البركة والف مبروك

[tamora2002]

اولا احب اشكرك جدا جدا جدا على اهتمامك وردك المحترم و المفيد .

انا طبعا ان شاء الله هعمل بنصيحتك وهكتب الكلام دة ان شاء الله

للاسف حدث شىء سيئ من المصرية للسيارات ..

انا حجزت العربية . ب 30 الف
وباقى 42 الف ..

كنت المفروض استملها انهاردة زى ما كانو متفقين معايا .

طبعا لما احجز العربية . معاناها انى خلاص اشترتها . ومينفعش تتباع . لانى دافع مقدم ليها..

اروح النهاردة وشايل ال 42 الف وفرحان :D

روحت للمصرية . ابص على العربية وانا داخل مش لقيها .
اخش اقولهم السلام عليكم

انا فولان الفولانى وحاجز عربية والمفروض استلمها دلوقتى ..

يقوم قايلى . للاسف يا باشا العربية اتباعت بعد لما انت مشيت امبارح . بيقولهالى فى وشى كدة ..

قولتلة طيب انا المفروض حاجزها ودافع 30 الف امبارح والمفروض متتبعش لانها محجوزة وفى فلوس مدفوعة ليها . وازاى تقولولى تعالا استلم بكرة . وهيا اتباعت . وكمان لية مش تتصلو بيا تقلولى معلش الاستلام هيتأخر او او . لازم اجى عندكم عشان اعرف انها اتباعت .

يقوم يقولى يا باشا ولله غضب عننا . واحد جة ومعاة الفلوس كاش كلها فا بعناها واحنا قولنا عصفور فى اليد .....

اقوم انا طالع فية واحقق معاة اكنى بحقق مع متهم عندى فى القسم ..

واقولة ازاى تتباع مدام انا حاجزها يقولى يا باشا ولله احنا اسفين احنا غلطانين بس الراجل فلوسة كانت موجودة .. ومش عارف اية كلام فور دمى ..

قولتلة خلاص انا مش عايز العربية .. خد وصلك وهات فلوسى.

طبعا قعد يماطل . ويقولى طيب شوف العربية دى ومش دى .. وكلام مينفعش خالص . جالى مدير الفرع قالى معلش دة حظأ شخصى ومش عارف اية . يوم الاحد ان شاء الله هنتصل بيك تيجى تستلم .

فا ربنا يسهل ويصدقوا فى كلامهم واستلم يوم الاحد .. و متشكر جدا على ردك

[asom_6]

عارف حضرتك اللى انت بتحكيه ده حاجة لا تصدق فعلاً , أيه كم الأستخفاف بالعميل والفهلوة فى البيع والشراء دى ,المفروض انك بتتعامل مع توكيل محترم مش مع صالة بتجيب عربيات بالطلب .... ياراجل ده انت حاجز بحوالى نص ثمن العربية وجاهز بالباقى عند الاستلام والميعاد هم محددينه فعلا يقومو يبيعو العربية لأول زبون يدخل من الباب ... يا العربية كده اصلا متباعة بعد سدادك للمقدم واصبحت مجرد امانة لدى المعرض لحين سدادك باقى تمنها واستلامها من عندهم ومينفعش طبعا يبيع حاجة اساسا مش بتاعته لكن للأسف فهلوة التاجر غلبتهم وقلك نستفيد بالبيعة دى واهو نبقى نطيب خاطر المشترى الاصلى بكلمتين لما ييجى ويستنى معانا على ما تفرج وتجينا دفعة جديدة.

هذا النوع من التصرفات التطفيشية للزبائن تقوم بها بعض الفروع للتوكيلات وعلى فكرة السبب الاساسى يمكن فى عدم شرائى للوجان على الرغم من اقتناعى بها كسيارة واتجاهى للانوس هو المعاملة المستفزة فى توكيل العالمية للسيارات وطريقتهم فى المعاملة وكأنك بتطلب منحة او هبه مش بتشترى بفلوسك ((العربية مش موجودة دلوقت هتستلم كمان اربع شهور وتدفع مقدم 10 الاف جنية ولو مدفعتش مش هنحجزلك واذا كان عاجبك هو ده النظام )) خلونى الحقيقة اتعقدت من التوكيل والعربية ومنهم واتجهت فورا لتوكيل منصور واشتريت اللانوس.

الحقيقة انت مكانش المفروض تتنازل ابدا عن انك تسترد فلوسك ولا تتعامل مع هؤلاء الاشخاص ,ولكن بما انك وافقت على الانتظار لغاية يوم الاحد زى ما قالوا فهو كذلك ولكن ولا يوم زيادة عن يوم الاحد وعند اول تسويف او مماطلة استرد فلوسك منهم فورا لان ساعتها الناس دى هتبقى غير محترمة بجد والبعد عنهم غنيمة.

مش عارف بصراحة بس أنا متغاظ قوى من الحركة بتاعتهم دى