السلام عليكم . الحقيقة من ساعة ماشفت المنتدى على النت وان باقعد عليه فترات طويلة وتقريبا قرأت عدد كبير من المواضيع وفتحت اغلب الاقسام المهم لما لقيت قسم السيارات الكلاسيكية توقعت انى هلاقى مواضيع عن سيارات الاعضاء فى المنتدى لكن لقيت اغلب الموضوعات عن سيارات قديمة فعلا بس منقولة من مواقع .
انا عجبنى جدا موضوع ال 504 والسيارة الحلم . انا هكلمكم عن تجربتى مع سيارة رينو 6 . فى احد الايام من حوالى كده 20 سنة مثلا قلت اعدى على والدى فى المحل بتاعه وكان امام المحل معرض سيارات استعمال يعنى الهونداى والتمساحة 504 ممكن 128 احيانا لكن لقيت الوالد مركز على عربية غريبة واقفة قدام المعرض شكلها غريب قوى ومضحك كمان لقيته مركز معاها المهم مشغلتش بالى وقعدت معاه شوية ومشيت طبعا نسيت اقول اننا كان عندنا 504 مو79 فابريكة جوه والسقف .
تانى يوم وانا معدى على الوالد لاقيت العربية الغريبة راكنة برضه بس بعيد شوية فى اخر الشارع واتضح انها كانت بايتة هنا المهم سالته ايه حكايتها عرفت انه بتاعة تاجر سيارات من اسكندرية صديق صاحب المعرض وسايبها عنده كام يوم ولما سألته عن سر اهتمامه بيها الغريب قالى يابنى العربية دى رينو وانا ياما ركبتها فى شبابى لما كنت فى فرنسا .الحقيقة ماهتمتش خالص وقعدت اسخر من العربية . المهم عشان مطولش بعد 3 ايام بالضبط كان الوالد شارى العربية طبعا فوجئت لكن لما شفت فرحة والدى بيها كتمت الضحك وفكرت فى حاجة تانية ان العربية دى مفرحاه وبتفكره بشبابه وطبعا اى واحد بيحب ان الاب او الام فى هذا السن يعيشوا اى لحظات سعيدة . العربية مكنتش غالية كانت ب 7000 فمش مشكلة يعنى خصوصا لوعرفنا ان البيجوبتاعتنا ايامها ب 43 الف المهم فتحت العربية اتفرج عليها اتضح الاتى العربية رينو 6 موديل اظن اواخر الستينات (مش عارف ممكن ارفع صور لها ولا لا لكن ممكن تشوفوها على جوجل ) العربية فابريكة بره وجوه ايوه بره وجوه كانت مرفوعة فترة طويلة جدا لدرجة ان فرش الفبريكة الفيران قطعته كله اغرب حاجة فيها هو مكان الفتيس لان عصاية الفتيس خارجة من منتصف التابلوه وطالعة لفوق والنقلات عكس العربيات بتاعنا خالص يعنى الاول فى اقصى اليمين ولقدام والتانى تحته طبعا قعدت فترة على ماتعلمت عليه التابلوه بتاعها والدركسيون كانوا من الجلد المحترم المهم خدتها للسروجى عشان يعملها فرش جديد لما فك الاستوفة لقىنا تحتها تخيلوا ايه السفنج عليه طبقة قطن عشان العرق, الفوانيس الامامية زجاجها كان مكسر طب اعمل ايه جبت القزازة بتاع الفيات 125 لقيتها على ادها بالضبط بعد كده لقينا العربية واطية من قدام قوى لدرجة ان الرفرف الامامى يكاد يحك فى العجل فذهبت الى كذا عفشجى كله يفتح بقه ويستغرب محدش عارف . لحد مارحت لواحد مشهور قوى بص عليه بتركيز ونام تحتها وفجأأأأأة راح قايم وراح عند نص العربية ورا الباب الامامى ونزل تحتها واكتشف السر العربية لها حاجة اسمها تقريبا عمود العزم المهم بيجيب حاجة زى ايد الكوريك ويلف العربية تطلع لفوق طبعا من الناحيتين بقينا مدهوشين. بعد كده لقيت العربية مبتسحبش كشفت عليها الميكانيكى ( طبعا بعد مابدى استغرابه برضه من العربية ) لقاها عاوزة اسطوانة طبعا نزلت القاهرة وانا متيقن انى مش هلاقى حاجة خالص لكن المفاجأة لقيتها عند واحد فى شارع شبرا كان عنده حاجات كتيرللعربية عمار يامصر رجعت تانى وركبت الاسطوانة بقت زى الفل . وكمان اربع فرد كاوتش
العربية دى بصراحة مع الوقت اكتشفت قيمتها كانت حمالة اسية يعنى لو عاوز اشيل طوب بقيت اشيله فيها سافرت بيها بور سعيد ورحت بيها القاهرة كنت باجرى بيها واعدى الميه وثابتة ماشاء الله وكنت بافرح لما الناس يشاورولى ويستغربوا واحيانا يقلى تبيع لحد ماجه الوقت اللى كبرت وبقيت اتحرج اركبها وفضلت مركونة شوية وبعدين بعتها بصراحة بعد السنين دى باقول ياريتنى سبتها يكفى انها من ريحة الوالد لكن اللى حصل . وكل جديد يوما سيبلى ويبقى الدهر ماكتبت يداه
27-09-2012, 08:40 AM
رينو 6
رد: رينو 6
المواضيع المتشابهه
