استرجاع سيارة الشركة المسروقة

من اسبوع كدا الساعه 7 الصبح فوجئ سواق الشركة باختفاء سيارة الشركة النصف نقل من اسفل مكتب الادارة

وطبعا بلغنا بالخبر المشئوم ده وطبعا طلعوا علي المديرية عملوا بلاغ واللي يغظكم ان العربية اتفتحت بسهولة جدا ودارة في ثانية واللي سرقوها كلمونا في نفس اليوم بليل وقولولنا ان العربية في حتة اسمها كوم السمن

المهم طبعا بعد ما سئلنا عن المنطقة ديه عرفنا انها بمثابة دولة داخل دولة يعني معروفة انها بؤرة عربيات مسروقة والشرطة طبعا ولا هيه هنا وعرفنا كمان ان كل تعاملتهم بالسلاح والمخدرات والالي

المهم لما اتصلوا بينا طالبوا في البداية 30 الف جنيه

طبعا قولنلهم عند امه يا ادهم

من هنا هنا نزلت الفدية ل 10 الاف جنيه

المهم طبعا وفقنا ولحظي المنيل قالولهم في الشركة اننا هنسلملكم العربية في عين شمس

وطبعا محدش من عين شمس في الشركة غير العبد لله

طبعا بعد محيله من صاحب الشركة والمدير وفقت اني انا ابقا الوسيط اللي هيسلملهم الفلوس

طبعا ادونا معاد من يومين عند محطة المترو وطلع فشنك طبعا علشان يعرفوا اذا كان في حد معايا ولا لا

ولقيت الراجل بيتصل بيا بيعتزلي عن الميعاد المطلوب وانه معرفش يجيلي لانه كان معاه شغلانه في اسكندرية يعني كان بيسرق عربية من اسكندرية علشان كدا معرفش يجيلي

المهم قالي نخليها بكره الظهر عند سنترال عين شمس

طبعا زمايلي كلهم كانو معايا بس من غير ما حد يحس ومأمنين المكان ومكنش معايا غير سواق الشركة اللي جاله اسهال ومكنتش حامل غير همه هوه

المهم من الساعه 12 الظهر واقف عند السنترال

لحد الساعه 2 كل ده في اتصالات بيني وبينه وهو كمان كان بيأمن الطريق

لحد ما لقيته بيتصل بيا ويقولي انا واقف جنبك اهو

طلع شاب عنده بتاع 35 سنة وشكله فعلا زي الزفت واخدله يجي 100 بشله في وشه وايده

ولقيته فتح الجاكت اللي كان لبسه ولقيت مطوطين وفرد وبيمد ايده في جيبه و بيدي السواق الرخصة بتاعت العربية وبيقوله ديه رخصتك قاله اه هيه وبعدين لقيته بيقولي فين الفلوس قولتله فين العربية الاول قالي طيب متقلقش انا قولتله انا مش قلقان فين العربية قالي المنطقة ديه لو عايز افرتكهالك بأشارة واحده هفرتكهالك هههههههههههههه كنت عايز اقول راجل يا حمزة بتاعت الاعلان ههههههههههه

المهم لقيته بيقولي اتمشي معايا شوية كدا هتلاقيها جايه هناك وفعلا اتمشيت معاه مسافة 50 متر ولقيت عربية الشركة جيه من بعيد

المهم الواد اللي جي سايقها بقوله انزل من العربية لقيته بيجعر ويزعق في الواد اللي معاه وبيحلف انه ما ينزل من العربية الا لما ياخد الفلوس

قولتله خليك في العربية وفلوسي في جيبي

راح الواد اللي كان جي بالموتسيكل اللي ادانا الرخصة زعق فيه وقاله متخافش وانزل من العربية ونزلته فعلا وركبت سواق الشركة واديته الفلوس ولقيته بيقولي فين الحلاوه بتاعتي قولتله ان شاء الله هبقي اقابلك واديهالك

المهم بعد ما خدنا العربية الحمد لله بسلام لقينا بقا الاستبن بتاعها مسروق ومكنة رفع الزجاج مسروقة وكان السواق مشتري فردتين جداد لقينهم اتغيروا بفردتين قدام

المهم استعوضنا ربنا فيهم ومشينا

ومن ساعتها وانا لحد دلوقتي حاسس ان دماغي هتنفجر من الصداع

فعلا الموقف ده ربنا ما يوريه لحد اي نعم الواحد كان متماسك وهو بيتكلم معاهم بس من جواه قلق الدنيا كله لاننا مش عارفيين الموضوع لو حصل فيه اي مشكله ايه اللي هيتم

طبعا شرطة زي قلتها ولا بيتحركوا من مكانهم خطوة واحده

الظابط لما روحنا بالغنا قالنا ان العصابة احتمال يتصلوا بيكوا في اي وقت شوفوهم عايزين كام واديهولهم

يعني من الاخر لو عربيتك اتسرقت هاتها انتا بنفسك ومتنتظرش ان الشرطة تجيبهالك

ومتحاولش تقابل اللي سرقوها بليل او في مكان هادي

انا بالعافية لما خليتهم رضيوا انهم يقابلوني عند سنترال عين شمس

قولتلهم مش عايز العربية وخليهالكم علشان كدا وافقوا انهم يجوا عند السنترال

متفكرش انك تقاومهم لانهم بيبقوا اكثر من شخص متخفي وواحد او اتنين بس اللي ظهرينلك

متدفعش فلوسك الا لما تقعد في عربيتك

متخاطرش بنفسك لو حسيت ان في خطر

وربنا يسترها علي الجميع

[mar mar]

كويسانك رجعت سليم
حمدلله علي سلامتك وسلامه العربيه

[حسن شرف]

الحمد لله على سلامتك وانت غالى عندنا ياكورسير وعا
وزك توصفلى احساسك كان ايه؟

المشاركة الأصلية كتبت بواسطة mar mar كويسانك رجعت سليم حمدلله علي سلامتك وسلامه العربيه

الله يسلمك يا مرمر وربنا يسترها علينا جميعا

[nktis]

الظابط لما روحنا بالغنا قالنا ان العصابة احتمال يتصلوا بيكوا في اي وقت شوفوهم عايزين كام واديهولهم ???
الكلام ده بجد ؟؟؟ ايه يا عمنا افلام الرعب ديت فكرتني بالمليجي ورستم...؟
الف حمد الله علي سلامتك ...
الكلام اللي الظابط قالهولك ده بجد..؟؟؟