سخونة الفليشيا

[سعيد بديع]

السلام عليكم

الحمد لله رشيت العربيه وتمام التمام

وبعد ما رشيت ظهرت مجموعة مشاكل

العربيه بتسخن نار والمروحه مبتشتغلش فقلت اكيد الترموستات ضرب

روحت للكهربائي فقفل علي الترموستات وبرضه المروحه ما اشتغلتش فخلعها وجربها بره ومشتغلتش فقالي انا كنت شاكك فيها بس قولت اتاكد

المهم نزلت اشتري مروحه

ناس قالتلي ان مروحة 128 بتركب عليها وبتشتغل كويس وجبتها ب 130 جنيه

وروحت عشان اركبها منفعتش لان قواعدها في القميص بتاع الريادتير محتلفه

روحت وجبت الكبيرة السته ريشه ب 250 جنيه وبرضه منفعتش وقابلت نفس المشكلة

فاخدت القميص معايا عشان اجيب عليه مروحه وخلاص

وعند بتاع قطع الغيار كانت المفاجاة

قالي انت متاكد ان عربيتك فليشيا فقلته اه طبعا فقالي بس القميص ده بتاع اوكتافيا هو الريادتير بتاع نحاس ولا المونيا فقلتله المونيا

فقالي كده التبريد متعدل وراكب عندك ريادتير ومروحة الاوكتافيا

فقلتله ماشي هاتلي مروحة الاوكتافيا فقالي المروحه ب 450 جنيه

فقلتله يا نهار طب وبعدين ده العربيه خربت بيتي

فقالي تقدر تروح تجيبها استيردا

روحت علي بتوع الاستيراد وملاقتهاش

فضلت ادور عليها لحد ما واحد قالي ممكن يركب عليها مروحة الفورد السته ريشه فقلتله مفيش مشكلة وركبنا المروحه واحتاجت تعديل بسيط وعملناه واشتغلت زي الفل

وجات ساعة الحساب فسالته حسابنا كام فقالي 350 جنيه فقلتله كده كتير دا الجديدة ب 400 جنيه فقالي لا الجديدة ب 450 وانا اخر كلام عندي 300 ومن هنا لهنا اخدتها ب 250 ورجعت للعربيه وركبتها بنفسي واشتغلت وتمام التمام

والله يا جماعة ملحقتش امشي بالعربيه وابتدت كل اللي يشوفني يقولي ايوه يا عم سعيد كده نورت ومبروك وربنا يسهله وتعليقات من اللي انتوا عارفينها وركنت العربيه وطلعت الشقه ونزلت عشان امشي العربيه شويه وتسخن واشوف المروحه والدنيا

ادور العربيه مدورش ... الصوت ده انا عارفه دا صوت المارش وشكله الترس فوت

المهم الشباب زقوني ودورت ورحت للكهربائي

فقالي ترس المرش مفوت وهنجيب غيره بس استنا نفك المارش عشان نطمن ان مفيش حاجه تانيه بايظه

وفك المارش وبمجرد ما فك الترس شميت ريحت شياط رهيبه فقالي الاوتماتيك كمان محروق .... فقلتله والعمل قالي المارش كله شايط من جوه وهتشتري ترس واوتماتيك وهيرجع يبوظ فياريت تشتري مارش واحتفظ بالقديم كقطع غيار ولو ان مفيش حاجه فيه سلميه

ورحت اشتري المارش بكام يا عم الحاج

قالي الاصلي التشيكي عامل 400 جنيه

قلتله طيب الاقيه عند بتوع استعمال الخارج فقالي اه هتلاقيه وتشيكي برضه

روحت عن واحد متخصص سكودا وسالته عن المارش استيراد فقالي 400 جنيه

فقلتله ليه يا عم ده جديد برضه ب 400 جنيه

قالي لا ده مش اصلي ده صيني ومكتوب عليه تشيكي

فسيبته ورحت سالت واحد تاني بتاع مارشات فقالي كل اللي عندي المارش السريع بس ياباني

قلتله وايه الفرق قالي مفيش هو ياباني ومتعدل يركب عليها

فاتصلت بالكهربائي اساله علي الياباني فقالي كويس وشغال هاته طالما ممعاكش فلوس وهيشتغل كويس متقلقش

بكام يا عم المارش الياباني قالي 350 قلتله ليه ده الاصلي التشيكي بتاعها عامل 400 جنيه ومن هنا لهنا وبعد رحلت فصال شاقه اخدته ب 270 جنيه بالعافيه

ورحت للكهربائي ركبته ودارت العربيه تمام التمام بعد تعديل بسيط علي قواعد المارش

وروحت بالعربيه فتحت الجراش وركنتها

النهارده بقي بعد المغرب احتاجتها في مشوار

دورت العربيه مشيت تمام التمام بدون اي مشاكل وفجاة ابتدا امبير الحرارة يعلا ويعلا ويعلا ركنت العربيه اشوف المروحة لاقيت المروحة شغاله زي الفل بصيت علي الميه لاقيت الميه بتغلي

وقفت شويه لحد ما بردت وكملت مشواري

خلصت ورجعت علي الكهربائي فقالي ان المكنه محتاجه ميكانيكي ياخد هواها

سوالي هنا هروح لميكانيكي ولا لحد بتاع ريداتير

انا اصلا عايز انضف الدورة واطمن ان مفيش تسريب ... وده مكانش موجود اصلا بس انا برضه كنت عايز اطمئن عشان مسافر اسكندرية كمان كام يوم ومش هينفع تعمل معايا الناقصه

اظن الكهربائي يقصد هوا دورة التبريد

دلوقت مين هياخد هو المكنه ..... المكيانيكي ولا بتاع الريادتير

بشمهندس جوده ياريت تفيدنا في الموضوع ده

[sakr1964]

لا حولا ولا قوة الا بالله عاوز الحل خربش العربية ووسخها بشوية زيت وشحم علشان تبعد عنك العين

[toto_ys]

مع احترامى ليك انت جبت لنفسك وجع القلب العربيه دى كلها مشاكل هو انا بعتها من شويه
عملت كل حاجة علشان السخونه ومافيش فايده فيها
بس فى حاجة مش فاهما ليه فى ناس بتشكر فيها ويقولك سحبها جامد ودى حكايه اكيد مافيش حد منهم ركب عربيه تانيه وشاف السحب بيبقى ازاى

[sakr1964]

طريقة تفريغ الهواء من دائرة التبريد

ازاى تسحب الهوا و بنفسك من غير ماتروح عند ميكانيكى و لة

حد
الطريقة سهله جدااااا
هنا بقى هتكون العربية بردة جداااااا علشان جوان وش السليندر والوش السليندر نفسة
اولا هتفك الخرطوم الراجع على القربة قلى بيبقى فوق ودور الموتور على السلانسية هتلاقى الخرطوم بيفضى مياة خلية يفضى وبعدين لما المياة بتقطع والقربة تفضى فاضى المياة فى القربة واديها سنة سنة متواصل للحد ماخرطوم الراجع بتاع القربة ينزل مياة شغال زى منتا اديها مياة للحد ما تلاقى المياة نازلة بغزارة من الخرطوم مش سرسوب ضعيف ركب الخرطوم الراجع بالقفيز وزود و ظبط مقاس المياة على شرطة الماكس بالظبط علشان هنحتاج المقاس دة بعدين ومتقفلش غضاءالقربة لسةمخلصناش
خلصنا لالالالالالالالالالالالال الالالا لسة احنا مسحبناش الهوا كله
هنعمل اية بقى تانى و عاوزك تكون صبور جدااااااااااااااا
هتلاقى فى خرطوم تخين قلى بيبقى رابط ما بين الكوعة قلى فوق ورابط ما بين الرداتير كل دة و العربية دايرة على السلانسية ويفضل تكون مخلى صحابك بيراقب معاك مؤشر الحرارة للحرص
هتعمل اية هتخنق الخرطوم دة بايدك ويفضل تاتنية علشان تحبس المياة ولمدة دقيقة وسيب مرة واحدة وعينك فى القربة هتلاقى فققيع مياه او برقيع مياة فى القربة اخنق تانى و تالت ورابع وشوية وسيب
وطول الخنقة يعنى دقتين وبعدين زود الخنقة 3 دقايق بس مش تخنق لربع ساعة لالالالالالا واخنق و سيب هتقولى طيب هخلص امتا هقولك للحد لما تيجى تخنق وتسيب و متلقيش برقيع خالص او فققيع
هتلاقى بقى اية المياة ناقصة من القربة يبقى احنا كدة شغالين صح لية بقة ناقصة علشان المياة حلة محل الهواء زودها وظبط على الماكس تانى هتقعدلك بتاع خمس ايام مراقبها كل يوم الصبح قبل ما تطلع بيها كدة هتلاقى المياة بتنقص منك بتاع كوبيةمياة كل يوم كدة تقريبا عادى جدااااا متقلقش علشان احنا طردنا الهواء والمياة بتحل محلة سنة سنة يعنى بنسيسها خالص
للحدما تلاقى المياة اتظبط لوحدها وبتنقص حاجات بسيطة جدااااا
وبكل صبر وحرص

[سعيد بديع]

المشاركة الأصلية كتبت بواسطة toto_ys مع احترامى ليك انت جبت لنفسك وجع القلب العربيه دى كلها مشاكل هو انا بعتها من شويه عملت كل حاجة علشان السخونه ومافيش فايده فيها بس فى حاجة مش فاهما ليه فى ناس بتشكر فيها ويقولك سحبها جامد ودى حكايه اكيد مافيش حد منهم ركب عربيه تانيه وشاف السحب بيبقى ازاى

والله يا اخي العربيه فعلا ممتازة وسافرت بيها اكثر من مرة وكانت زي الفل بس كل المشاكل دي حصلت لما المروحة باظت وان شاء الله ناخد هواها وهترجع زي الاول واحسن