مركز المتحدة لصيانة السيارات اليابانى والكورى والصينى

[elsheikh2010]

السلام عليكم ورحمة الله وبركاته
من كتر الكلام الجميل ده انا لة شاء الله سأتابع الصيانة عندكم بالرغم من اني من البحر الأحمر الأحمر بس الطريق يهون عشانكم
ليا استفسار بسيط بتشتغلوا في الفيرنا وبتعملولها الصيانة الدورية بتاعتها زي ما التوكيل بنصح ولا لا؟؟؟ ارجو الرد لأني زهقت من غبور
وشكرا

[mody112]

هل بتشتغلوا فى BYD F3 ولا لا؟

[احمدماهردياب]

السلام عليكم ورحمة الله وبركاته

ارجو الرد من حضراتكم ضرورى

امامى سيارة دايو لانوس 2 موديل 2006 كانت عاملة حادث بسيط وتم تغير كبوت ورفرف وتم استعدال الشنب على البارد فقط والسيارة بصراحة ممتازة جداً وعدادها عامل 20000 كم يعنى تقريباً السيارة مركونة من بعد الحادث ..انا رفعت العربية فى البنزينة وقالى العربية تمام بالرشام بتاع المصنع مفيهاش غلطة إلا الخبطة اللى فى الشنب وطبعاً تم استعداله على البارد ..مع العلم انا ذهبت للسمكرى وبص على السيارة قالى زى الفل .......دلوقتى السيارة كان مطلوب فيها 52000 الف جنية ولكن صاحب السيارة مكنش يعرف موضوع الشنب المهم انا لما رفعت السيارة وشفت الخبطة نزلت فى سعرها وطلبت 47000 الف ......عايز اعرف منكم ضرورى اعمل ايه .....بصراحة انا ركبت العربية وسقتها العربية زى الفل والاستبن منزلش على الارض ....الرجاء الرد بسرعة قبل ما اشترى السيارة

[احمدماهردياب]

السلام عليكم ورحمة الله وبركاته

ارجو الرد من حضراتكم ضرورى

امامى سيارة دايو لانوس 2 موديل 2006 كانت عاملة حادث بسيط وتم تغير كبوت ورفرف وتم استعدال الشنب على البارد فقط والسيارة بصراحة ممتازة جداً وعدادها عامل 20000 كم يعنى تقريباً السيارة مركونة من بعد الحادث ..انا رفعت العربية فى البنزينة وقالى العربية تمام بالرشام بتاع المصنع مفيهاش غلطة إلا الخبطة اللى فى الشنب وطبعاً تم استعداله على البارد ..مع العلم انا ذهبت للسمكرى وبص على السيارة قالى زى الفل .......دلوقتى السيارة كان مطلوب فيها 52000 الف جنية ولكن صاحب السيارة مكنش يعرف موضوع الشنب المهم انا لما رفعت السيارة وشفت الخبطة نزلت فى سعرها وطلبت 47000 الف ......عايز اعرف منكم ضرورى اعمل ايه .....بصراحة انا ركبت العربية وسقتها العربية زى الفل والاستبن منزلش على الارض ....الرجاء الرد بسرعة قبل ما اشترى السيارة

[حازم شاهين]

بالأمس زرت مركز المتحدة مخصوص بناء على السمعة الطيبة و آراء الأصدقاء إللى بثق فيهم
و كان عندى مشاكل كتير فى العفشة نتيجة لإن حجات كتير عمرها الإفتراضى إنتهى و حجات تانية كانت معمولة بتصرف (يعنى الصنايعى إتصرف و حاول يحل المشكلة على قد ما يقدر بأجزاء من سيارات أخرى) نتيجة لعدم وجود قطع غيار العربية فى بورسعيد.
و كنت عملت صيانة الشهر اللى فات فى بورسعيد للعفشة و إتكلفت كتير لكن للأسف كانت النتيجة غير مرضية و أصوات التزييق و التصفير و التخبيط قلت صحيح لكن ما إختفتش.
المهم قررت إنى أروح لمركز المتحدة لعدة أسباب الحقيقة
السبب الأول إن كنت عاوز صنايعى شاطر و لو متخصص فى الإسبيرانزا يبقى أحسن
السبب التانى عايز مكان متوفر فيه قطع الغيار لإنى مش هعرف أتصرف و خصوصا إنى من بلد تانية
السبب التالت عايز مركز صيانة مش ورشة عفشجى لوحدة أو ميكانيكى لوحدة أو كهربائى علشان أعمل حجات كتير فى العربية فى يوم واحد لإنى على سفر
السبب الرابع و الأخير مش عايز أتعامل مع مراكز أبو الفتوح

و من زمان و أنا عارف بموضوع مركز المتحدة و سواء من هنا و الفضل لأخى أحمد فاروق أو من نادى الإسبيرانزا و أعضاءه الكرام و حسيت إنه هيلبى كل شروطى إللى قولتها

قررت فى البداية إنى ما أجيبش سيرة إنى حازم بتاع مصر موتورز (علشان كان فى نيتى إنى أكتب عن تجربتى فكنت عايزها تجربة شخص عادى بدون أى مجاملات)

المهم وصلت الساعة تلاتة إلا ربع و أول من قابلنى كان الأخ تامر قولتله إنى إتأخرت فى المجى علشان جاى من بورسعيد (فى دماغى مواعيد التوكيل مكنتش أعرف إنهم بيسهروا) الحقيقة اللى فهمتها بعد كده إن المشكلة مش فى إنى جاى متأخر شوية المشكلة بالنسبه لهم هى إن كل مشاكل العربية لازم تتحل طالما قدامى سفر و مش هقدر أرجع ليهم بسرعة لو ظهرتلى اى عيوب.

المهم تامر سلمنى لمحمد و منه للأسطى حسين لتجربة العربية و حكيتله إيه إللى بشتكى منه بالتقريب و حالة العربية و الموضوع إستغرق دقيقتين تلاتة
بعدين العربية دخلت الورشة و إترفعت على الونش الساعة 3 و إتفقنا على الشغل مبدأيا بعد الونش و فضلت على الونش لغاية الساعة 10 مساء .

الشغل مبدأيا كان تغيير مقصات و مسمارين ميزان و قاعدة جمل و قاعدة خلفية بالحديد بتاعه و ضبط الفرامل بالفيلر و صنفرة التيل و خراطة الطنابير إذا لزم الأمر

و كان فيه ملاحظات تانية بس إتفقنا نأجلها ليوم تانى علشان أكون عامل حسابى (كنت بفكر فى ان الوقت متأخر على كل ده بالإضافة لإنى مكنتش عامل حسابى)

أهم ما فى الموضوع إن الشغل ما توقفش فى العربية طول السبع ساعات دول بأمانة غير ساعة ما العمال كانوا بياكلوا لقمة و لفترة قصيرة بس محدش منهم ساب العربية و إشتغل فى حاجة تانية زى ما بنشوف فى الورش أو حتى فى مراكز الخدمة (بصراحة أكتر حاجة كانت بتضايقنى فى مراكز الخدمة أو عند الصنايعية هو منظر العربية مفتوح الكابود بتاعها و محدش بيقرب لها لمدة نص ساعة أو حتى ساعة بحالها و ده محصلش إمبارح خالص و أتمنى تفضل دى طريقتهم و خصوصا إن ما شاء الله الوضع مختلف حاليا عن الصور فى أول الموضوع و حاليا تقريبا مفيش مكان فاضى فى المركز).

الساعة 5 تقريبا كان الكهربائى عنده مشوار فإتطلب منه إنه ينهى كل طلباتى فى أمر الشغل قبل ما يمشى و جه واحد ما كنتش قابلته أول ما وصلت و سألنى إذا كان فيه أى طلبات تانية فى كهربة العربية علشان الكهربائى هيمشى فقولتله على حاجتين سهلين بس أنا كنت مستغلسهم علشان مكان وصولهم صعب شوية و هم ماكينة رشاش المياه و نور الشبورة (فى دماغى برضه إنى وصلت متأخر فركزت فى المهم فقط) لكن الحقيقة الحاجتين إتعملوا فى ربع ساعة أو 20 دقيقة بالكتير بما فيهم فك و تركيب فانوس الشبورة و ماكينة الرشاش

المهم شغل العفشة على الساعة 6 كان تقريبا قرب ينتهى و كانت العربية بتتقفل لكن كنا نسينا خراطة الطنابير و صنفرة التيل فالناس مكانش عندها أى مشاكل إنها تفك تانى .

طبعا موضوع إنى جاى مخصوص من بورسعيد ده كان سبب فى إثارة فضول الإستاذ محمود حسين (و هو الشخص إللى جالى يسألنى على أى حاجة عايزها قبل ما الكهربائى يمشى) و هو شخصية محترمة و نشيطة و لبقة و بيعرف إزاى يكسب الناس (رجل مبيعات من الطراز الرفيع بس مع صبغة إنسانية واضحة) و طبعا ما سبنيش إلا و هو عارف إنى عضو فى مصر موتورز و كنت فى الإدارة و الحقيقة إنى قولتله بعد ما شوفت معاملة الناس معايا و مع شغلى لمدة 3 ساعات تقريبا قبل ما الأستاذ محمود يعرف المعلومة دى و المعاملة ما إتغيرتش كتير فى الواقع غير إنى إتعزمت على حاجة ساقعة لتانى مرة (أول مرة و أنا زبون عادى بس علشان جاى من سفر).

و بعدين على الساعة 7 و نص لما العربية إتقفلت الأسطى حسين إكتشف إن لسه فيه مشكلة فى الناحية اليمين (و هى سبب كل المشاكل و الأصوات إللى بسمعها فى العربية) و كانت المشكلة فى وجود بوش ملحوظ فى صرة العجلة (و دى حاجة فيها خطورة) فكان لازم تتعمل ما ينفعش تتأجل ، المهم الناس فكت الجنب اليمين لتانى مرة بدون أى إمتعاض أو تردد الصراحة رغم إن الورشة إبتدت تفضى و العربيات معظمها مشى .

المهم إتغير السرة و تم التقفيل للمرة التالتة لقينا مشكلة تانية إن الفردة لسه عاملة بوش مع الطنبورة فالناس فكت للمارة التالتة الحمد لله الأخيرة و المشكلة طلع علاجها بسيط فى الأخر عبارة عن وردة بس عريضه شوية (موضوع فنى غريب الحقيقة) المهم الشغل فعليا كانت بتشطب الساعة 9 تقريبا.

موضوع السرة ده سببلى مشكلة إن فلوسى كانت خلاص على قد التكلفة بالظبط أو أقل حاجة بسيطة و ما كانش ينفع أمشى فاضى كده فطلبت من الأستاذ محمود يوصلنى لأقرب ماكينة صراف ألى على ما العربية تتقفل الراجل متأخرش بصراحة رغم إن كان فيه حد ليه معاه عشم جامد جايلة مخصوص علشان يخلص له حاجة فستأذن منه و رحنا رزعنا مشوار أخد ساعة بالتمام و الكمال و خصوصا إن الدائرى كان مقفول فزود المدة لغاية ما رجعنا و إضطر الأستاذ محمود يخلص الراجل إللى جايلة متعشم بالتليفون للأسف و أنا كنت فى نص هدومى بصراحة

على ما رجعنا كانت العربية إتمسحت و بعد التجربة و توضيح المطلوب بعد كده مشيت من المتحدة الساعة 10 و نص تقريبا و لله الحمد.

نسيت أقول إن الأصوات الزقزقة و الصوصوة و الرزع و الخبط إنتهت و الحمد لله

إنطباعى عن التجربة إيجابى جدا الحمد لله
و الشكر موصول لكل الناس فى المتحدة من أصغرهم لأكبرهم و أتمنى تكون تجربتى مفيدة
و سلام عليكم