رحلة علاج الرادياتير (الجزء الثانى)

[aymangalal]

السلام عليكم
ده الجزء الاول(خدلك صابونة)عشان اللى عايز يتابع الموضوع من بدايته لكن كتبت الموضوع فى قسم استراحة مصر موتورز للافادة العامة
والجزء الثانى بين ايديكم فى هذا القسم:
---------------------------------الجزء التانى بقى (رحلة علاج الرادياتير)

اتصلت بأخى نزل لجارنا(بتاع شكمانات وجدع جدا) فى الورشة بعت معاه صنايعى واكن فاكر المشكلة فى الميكانيكا او حاجه بسيطة فى الرادياتير تتصلح فى وقتها وعى ما الصنيعى جه كان هوه (جارنا بتاع الشكمان) حصله (لحقة يعنى) بعربيته الفولفو الكبيرة دى (مش عارف موديلها) عشان يقطرنى
لكن ماينفعش نمشى عكس من على الدائرى ونرجع المرج تانى وماينفعش يقطرنى ويرجع بظهرة
زقينا للرجوع بالظهر لغاية الطلعة اللى طلعت منها ونزلت عكس(مضطر طبعا) لغاية ما عدلت نفسى وقطرنى ووصلنا لورشة وابتدينا نتعامل مع المشكلة فى ورشة ميكانيكى صاحبة:طبعا الصنايعية عارفين بعض ....
رحلة العلاج.....
الميكانيكى بدأ يفك الرادياتير عشان يلحم مكان الخرم بـ R&D اول ما لمحته راح للمسمار اللى ماسك الصدر فى الرفارف (خمنت على طول انه مش عارف سكة الردياتير ده) قولته :عايز تعمل ايه يا اسطى وانا اريحك
قالى: اوسع عشان اخرج القميص(المروحة لانها بتخرج الاول)
قولته:طب مال المسار اللى عندك بالقميص؟؟
قالى : لا انا بشوف حته بس عشان اوسع للقميص (تانى-نفس الاجابه)
قولتله: طيب سيبهولى وانا اخلصك منه عشان عارف سكته وعارف ان الحوض ضيق قوى ومقرف
دخلت الرادياتير (كنت فكيته وركبته اثناء التجديد) فكيته وطلعتهوله
لقيت مكان اللحام اللى كان فيه فعلا طق وعمل خرم واسع شوية عشان كده الميه فضيت على طول والعربية سخنت
سألته :ايه السبب ؟؟؟ مع ان اللحام ده بقاله فترة كويسة جدا وماسك زى الحديد
قالى: اللحام بيحك فى الصدر عشان كده طق بعد ما نخلص هانحط ورا اللحام حته كاوتش يعزلة عن حديد الصدر
المهم الراجل اشتغل ولحم تمام
اخدت منه الرادياتير وركبته وكله زى الفل مليناه ودورة ميه كده وسحب هواء
ودور يا معلم
الحمد لله العربية شغالة والحرارة بتزيد70 ... بتزيد80... بتزيد90 ...بتزيد 100 .... بتزيد 110 والمروحة مش بتشتغل.... الله.. الله ..الله ..!!!!!!
حاسب يا عمممممممممممممم بطلت وشوفت التيرموستات وفيش المروحة راكبين ومافيش مشاكل ... فكيت الفيش ووصلتهم ببعض بره التيرموستات(قفت الدايرة) المروحة اشتغلت يعنى الوصلات والمروحة تمام امال ايه ؟؟؟؟؟
يا التيرموستات لدع من الخونة واتحرق.... يا الكتاوت هى اللى اتحرقت
والفيصل عند الكهربائى ومؤقتا كده نوصل المروحة على بعضها عشان تبرد الرادياتير ومش مهم تفصل طالما العربية دايرة(يعنى مش هتاخد من البطارية)
قلت الكبوت والكهربائى جنب الميكانيكى افتح الكبوت ياعم وشوف القصة .... ما تفتح.... الله ؟؟؟ افتح .... كالون الكبوت قفش ع اللسان ورأسة والف وير ماهوفاتح
ايه الحل .... على طول عند الاسطى(محمد اكره) بعده بكام متر من هنا لهنا فتح وعدل وظبت ... رجعت للكهربائى لقيتة قفل وكنا داخلين على الساعة 12 بالليل
قولت مش مهم ....المهم الرادياتير اتلحم ومابيسربش والمروحة شغالة حتى ولو مش بتفصل) واحنا مروحين (اخويا-وبتاع الشكمان جارنا-وانا) لقينا كهربائى فاتح
سلام عليكم يا اسطى مجدى : برده عارف بتاع الشكمان (الراجل ده عمل معايا اكتر من الصح وماسابنيش-ربنا يبارك له) وقولنا القصة من انشانتيه الى اوريفوار
الكهربائى جاب م الاخر وقال غير التيرموستات ودى لعبة بتاع الرادياتير عشان يفك على مسؤليته لو حصل حاجه كده ولا كده اثناء الفك والتركيب هايتصرف بمعرفته
انا اكمنت وقولت الحمد الله انها رسيت على تيرموستات
بكره ان شاء الله(على النهارده) ايجبه واركبه هى شغلانه؟؟؟؟
روحت وركنت العربية تحت البيت واطمنت عليها وغطيتها وبوستها على كبوتها وطلعت و

[فادي مكرم]

كويس كدة
واهه المروحة هتقوم بالازم يا ايمن
وسؤال الحلقة بقى
سحب الهوا ؟؟ ازااى
و عندى المؤشر فى العادى ثابت عند تلت الامبير واقل من التلت كمان
بس بحط ايدي ع الكبوت او الردياتير مش بقدر
حاسس انه الترموستات مشيع
وقلت اجيب ترمومتر مية و اشوف الليلة ماشية ازاى

[نبيل عبدالرحمن]

حمد الله على سلامتك يا أيمن وسلامة العربية ، والله تجربتك دى مفيدة لنا وطريقة عرضك للحكاية جميلة ، تسلم ايدك