بطاريتك باظت وخلاص مفيش امل خش وجرب قبل ما تشترى جديد

[azzat 55]

شكرا على مجهودك الرائع

[NicEgypt]

دة يعتبر مسكن .. لكنة ليس حل كامل
خصوصا لو البطارية فيها ربع تالف وصاحب السيارة لا يعلم ذلك
ايضاَ مخصص فقط للبطاريات السائلة وليست الجافة طبعا
لكنها تجربة جيدة ورائعة تحي البطارية لفترة مؤقتة لحد ما تيجب جديدة

[aymanay32]

المشاركة الأصلية كتبت بواسطة haitham_computer السلام عليكم ورحمة الله وبركاته انا كتبت الموضوع ده فى منتدى فيات وبعدين قولت اكرره هنا لتعم الفائده لو جيت فى يوم عشان تدور العربيه لقيت المارش بيعتل فى الدواره واكتشفت ان البطاريه نامت ودورت العربيه زق طبعا فروحت قست شحن البطاريه قالك الدينمو تمام والبطاريه خلاص كده وهتشترى غيرها وانت قولت البطاريه اللى حيلتى باظت باظت جرب اللى هاقولك عليه ده مش هيكلفك كتير وان شاء الله هتدعيلى انا جربته مرتين فى البطاريه اللى معايا والحمد لله رجعت تشتغل من تانى . عايز تعرف هنعمل ايه :- صلى على رسول الله الاول "صلى الله عليه وسلم " ملحوظه قبل البدء " تعامل مع المواد بحرص ولا تجعلها تلمس جلدك او اصابعك " - اول حاجه *طبعا هنفك قواطيش البطاريه ونبقى عارفين فين الموجب وفين السالب وبعد كده لو عندك اى حاجه بتشتغل 12 فولت يعنى مثلا مروحه ردياتير قديمه او صب ووفر او حتى كام لمبه من بتوع الصالون او التابلوه هنوصلهم بالبطاريه ونسيبها لغاية ما البطاريه تفضى شحن خالص وللعلم ممكن تاخد يوم كامل او اكتر على حسب كميه الشحن اللى فيها "امبير وفولت " بعد ما نفضى منها على اد ما نقدر من الشحن والافضل للاخر خالص هنفك الثمانيه عيون اللى فوق البطاريه ونفضى منهم كل الحمض اللى فيها . - نشترى باه 5 زجاجات مياه مقطره و 5 زجاجات حمض من عند اى حد بتاع بطاريات او قطع غيار للعلم ثمن الزجاجه جنيه ونصف فقط اى الثمن الاجمالى 15 جنيه وان شاء الله 5 كافيين . - هنفضى الـ 5 زجاجات مياه مقطره بالتساوى فى الـ 8 عيون للبطاريه حتى يغطى الماء المقطر الاللواح التى تراها بعينيك داخل البطاريه . -بعد ذلك نقوم بغلق العيون ونضع البطاريه على التونجر "جهاز لشحن البطاريات " لمدة يوم (يعنى نبيتها عالشحن ) طب واحد هيجى يقولى انت هتصعبها ليه ما احنا ماشيين حلو هاجيبه منين انا التونجر ده هاقوله انا باه لو مش موجود عندك التونجر ده يبقى ترجع تركب البطاريه مكانها فى العربيه وخد بالك من الموجب والسالب كويس وبعد كده دور العربيه زق وخد بيها مشوار على طريق سريع يعنى قيمة نص ساعه مثلا او اكتر وكل ما تمشى اكتر يبقى افضل عشان البطاريه تشحن المهم فى الموضوع تكون انت اصلا متاكد ان الدينمو عندك تمام وبيشحن كويس بدون مشاكل . بعد المشوار او الشحن على التونجر بطل ودور على البطاريه باذن الله هدور مارش ومن اول تكه كمان - طب يا عم انت فى 5 زجاجات كمان بتوع الحمض هنرميهم ولا ايه لا طبعا ان شاء الله بعد ما البطاريه تشحن وتلاقيها شغلت المارش وقام عليها نفك البطاريه تانى وتروح فاتح ال 8 عيون مره تانى ومفضى منهم كل المياه اللى احنا حطنيها اللى هى المياه المقطره وبعد كده تفضى زجاجات الحمض وتملى بردو العيون كلها لغاية ما الالواح اللى قدامك تتغطى وتروح قافل العيون كويس وتركب البطاريه مكانها وان شاء الله هتحس ان البطاريه رجعت جديده . واى استفسار انا فى الخدمه ان شاء الله واتمنى صالح الدعاء وللعلم هذا الموضوع من الالف الى الياء اجتهادا منى والحمد لله ولا يوجد على اى منتدى اخر واتمنى عند النقل ذكر المصدر . وانتظروا موضوعين تانى جامدين جدا واحد عن الكربراتير والتانى عن الكبالن ان شاء الله ولكنى انتظر التفاعل مع هذا الموضوع اولا . والسلام عليكم ورحمة الله وبركاته *

اشكرك على هده الفكرة و سوف اطبقها قريبا انشاء الله و اخبرك بالنتيجة

[honest]

جزاك الله كل خير ومنتظرين باقى موضوعاتك

[احمد على 1999]

طيب انا عن تجربة لما اشتريت اخر بطارية جافة للعربية بتاعتى ( لانوس 2002 ) الراجل قالى عمرها من سنة ل لسنتين !!
فبفضل الله قعدت سنتين و 8 شهور و بعدين شحنتها على التونجر 24 س مع ان الراجل قالى و اكد لى ان مفيش أمل فالحمد لله قعدت 8 شهور كمان يعنى توتال 3 سنين و نص لغاية دلوقتى و من 3 أيام شحنتها تانى 24 س و ادعولى ربنا يسهل و تقعد شوية كمان لانى مش حعرف اشترى واحدة تانية دلوقتى
فده برضه يأكد كلام حضرتك ان الى بيتعمل ده محاولة لاستغلالها لاخر عمرها الافتراضى الكلى