الى الاخ بوب الجامد اسباب تفضيل رينو سيمبول

[aymansour]

ان شاء الله ناوي اشتري عربية رينو سيمبول وهاوقول الاسباب وياريت تصححولي لوكنت غلطان قبل ما اتدبس
اولا انا عاوز عربية استعملها داخل القاهرة وممكن اسافر بيها مرتين تلاتة في السنة (سوهاج =450ك ذهاب فقط)
1- اقتصادية في البنزين
2-تجميع تركي يعنى قطع الغيار مش هتكون غالية قوى (حسب تصوري) بالاضافة الى ان التركي سمعته معقولة

ثانيا انا هاشتريها قسط يعنى مش هافكر اغيرها قبل خمس سنين على الاقل
1-شكلها عصرى ومقبول جدا (مش هيخنقك شكلها بعد شوية زي اللانوس مثلا أو اللوجان)
2-سعر اعادة البيع بعد 5 سنين هيكون قريب من سعر اعادة بيع النيو اكسنت بعد 5سنين برضو وهما نفس السعر حاليا (حسب تصوري)
3-بالاضافة لاني بحب التكنولوجيا العالية لاني مهندس اتصالات
ثالثا تمنها مايزيدش عن 80000 لانى مش هدفع مقدم كبير وعلشان القسط يبقى معقول
1- فكرت اوفر 13 الف واشترى اللوجان المغربي بس اللوجان 40% مغربي والباقى مش عارف فرنسي ولا روماني (ياريت حد يفيدني في النقطة دي )
2-فكرت في البولو تقفيل صيني لكن لما اشترى بولو صينى اشتريلها قطع غيار الماني ولا صينى ؟بالاضافة الى انها اغلي

3- النيو اكسنت سمعت ان البور الكهربا بيعمل مشاكل لكن السيمبول امان اكتر
رابعا انا عاوز عربية متبهدلنيش ومابهدلهاش
1- حسب الاراء اللي في المنتدي ان التوكيل بتاع رينو محترم ومعاملته جيدة
2-معنديش مشكلة في عمل الصيانة الدورية بتاعتها والمحافظة عليها
3- فيه ناس نصحتنى بالمستعمل بس انا مش عاوز بهدلة لكن منتظر نصائحكم
خامسا المساحات الداخلية جيدة بالاضافة الى ان الشنظة كبيرة
رغم ان عائلتى صغيرة (بنت وولد في الطريق ان شاء الله ) لكن ممكن وانا راجع من البلد يشبط معايا خمسة سته فممكن تلاتة يركبوا في الكنبة الخلفية واتنين في الشنطة وواحد يجرى ورا العربية .

انا في انتظار آرائكم واقتراحاتكم وتصحيح اي مفهوم خاطئ اكون اعتمدت عليه خصوصا رأي الاستاذ بوب الجامدptmnlo123per181

[Col.Eng.Khaled]

اللوجان 40% مغربي والباقى مش عارف فرنسي ولا روماني (ياريت حد يفيدني في النقطة دي )

الباقي فرنسي

سيمبول 40 % تركي و الباقي فرنسي

[aymansour]

الف شكر يا بشمهندس خالد على الرد السريع ده بس تفضل مشكلة اللوجان ان شكلها مش عاطفي ptmnlo123per172
ولكن انا كنت منتظر تعليقك هل حساباتي كانت مظبوطة ام لا

[Col.Eng.Khaled]

بالنسبة لحسبة إعادة البيع بعد فترة التقسيط ، أنا عملت كده .

التوكيل مش جنة رضوان لكن من أفضل التوكيلات في مصر (إيجابيات و سلبيات) .

موضوع الشكل موضوع نسبي ، شكل سيمبول حاجة و شكل لوجان حاجة

بس ما يمنعش أبدا إن شكل لوجان مقبول جدا (بالنسبة لي) ، كمان في تفاوت في سعر قطع الغيار بين العربيتين .

إجمالا في كل فئة سعرية الواحد بيضحي بشيء مقابل شيء آخر .

[aymansour]

الف شكر يا باشا على التفصيل بالفعل انا حاليا بافكر في انى اشترى اللوجان لان فرق السعر كبير ومغرى وممكن اتغاضى عن مسألة الشكل
وشكرا مرة اخرى على تأكيد مسألة اعادة البيع لاني ماكنتش متأكد منها