استلمت سيراتو 2012 النهاردة
الحمدلله بعد انتظار اسبوع كامل عدا عليا كأنه سنة , استلمت النهاردة سيراتو 2012 لون فضي هاي لاين . العربية ما كنتش باينة اوي في المعرض الحقيقة خصوصا انها كانت متحاوطة بكيا كادينزا واوبتيما فمكنتش مالية عيني قوي الحقيقة ساعتها . طبعا وانا نازل بيها من المعرض قلبي كان هيقف خايف لاني اول مرة اسوق اوتوماتيك ده غير ان العربية زيرو والموضوع ده بيخلي قلبك ع العربية بزيادة ويعتبر بالنسبة ليا من عيوب الزيرو القاتلة, بس الحمدلله شوية كده وقدرت اتغلب على الرهبة دي . اول حاجة بالنسبة للعربية ان شكلها الخارجي جميل جدا وانسيابي ومن احلى العربيات في فئتها بالنسبة للشكل الخارجي . الصالون مش بجودة الشكل الخارجي للاسف يعني اعتبره اقل درجة من الكروز والفورد فوكس .النظام الصوتي اكتر من رائع وفعلا الصوت مجسم وواضح جدا ومش محتاج تعللي الصوت قوي حتى وانت فاتح الشباك.
العزل داخل الكابينة ممتاز والحاجة الوحيدة المزعجة صوت احتكاك الكاوتش على الطريق وصوته عالي فعلا وغالبا ده بسبب الجنوط 17.
اه صحيح مفيش حدفة شمال !!!!!!!!!!!!!!!
بالنسبة لثبات العربية .. انا عايش في الطائف يعني مدينة جبلية يعني كلها منعطفات حادة جدا ومع المنعطفات الحادة دي انا محستش بيها تماما فعلا الجنوط الكبيرة عاملة عمايلها في المنعطفات فعلا اداء اكتر من رائع مع المنعطفات والملفات . تحكم العربية رائع . العربية في التليين فمش قادر احكم على الموتور وان كان انا عندي سيفيا 2001 ومتورها جبار وانا متوقع ان السيراتو غالبا هيكون اداءه افضل.
المفتاح الذكي والبصمة فعلا لذيذ وممكن يتقلب لمفتاح عادي والحمدلله فيه مفتاحين بيتسلموا مع العربية
الكاميرا الخلفية بتحتل مكان من مراية الصالون بمجرد ما تجيب R وللاسف الصورة صغيرة كنت متوقع تبقى اكبر من كده
فتحة السقف فعلا فلوسها حلال بتدي راحة نفسية وتحسسك ان الصالون اوسع .
طبعا كل طوبة او زلطة في الطريق بحس بيها بسبب الجنوط.
انا تقييمي المبدأي ان السيارة جيدة جدا وكان ممكن تبقى ممتازة لو كانت الجنوط 15
وان شاء الله اشرككم في كل جديد
|
02-04-2012, 01:34 AM
