عاوز اشترى سايبا برايد ومحتاج اسأل عن اماكن بيعها

[A.Elsawaf]

السلام عليكم ورحمة الله وبركاته

انا كنت عاوز اشترى سايبا برايد العربية اللى شاددنى سعرها جدا ... المهم انا رحت اتفرجت عليها فى التوكيل بس كان فى مشكلة ان اللى موجود دلوقتى مافيهوش باور وهى غالبا العربية اللى كانت نازلة من غير كماليات وهم ركبولها تكييف ... فسألت عن امكانية انهم يركبولى باور على حسابى قالولى انهم مبيركبوهوش ... فدلوقتى فى معارض معينة ممكن الاقى عندهم العربية دى اسأل عندهم كده يمكن الاقى عندهم العربية اللى فيها باور؟؟؟

ولو مالقيتش يا ترى العربية دى الدركسيون بتاعها خفيف ولا لأ وفى امكانية ان انا بعد ما ضمانها يخلص بعد كده ان انا اركب ليها باور؟؟

[AbOnOrA]

غريبه موضوع العربيات اللى من غير باور وتكييفها راكب هنا ده اولاً وبصراحة لو العربيه مش بتكييفها الاصلى يبقى اشتريها فاضيه وركبه انت او متشتريهاش خالص لانها تبقى حركة وحشة اوى من ناشيونال موتورز بصراحة العربيه طول عمرها سواء الكورى اوالايرانى كانت بتنزل بتكييف بلدها او فاضيه لكن فاضيه ويتقيفلها تكييف دى حاجة تدايق

نيجى للمهم
العربيه زى اى عربيه متصممة للباور ومن غير ينفع ببساطة تجيب قطع غيار الباور وتركبها بره مفيش مشكلة
لكن عامة الدريكسيون خفيف زى اليابانى القديم ومش محتاج باور فى معظم الوقت وده سواء راجل او ست حتى اللى بتسوق الباور مش هيدايق
بمعنى اوضح مش هتحس انك محتاج الباور الا لو بتركن وراكب العربيه ناس كتير ساعتها بس هتحس ان الدريسكيون تقيل غير كده الدريكسيون ممتاز من غير باور خاصة على السرعات لدرجة انى من الناس اللى بتشجع عدم تركيب باور للعربيه ديه كمان

[ألفريد ألفي]

...
بلاش موضوع يركبوا تكيف ده لأنه بصراحه مستحيل يكون زي الاصلي .. دور هتلاقي .. وقت ما اشتريت قالولي مفيش غير لون ابيض وكنت عاوز اللون الاسود ولقيته في فرع المهندسين بتكيف وباور . يعني الهاف اوبشن .
وزي كلام ابو نورا فعلا هي مش محتاجه باور بجد ناعمه انا ركبت مع واحد عاملها تاكس وكانت بدون باور واستأذنته سقتها شويه .. حسيت بان الفرق بينها وبين عربيتي لا يذكر ..
لكن بدون تكيف ما أنصحش .
ألفريد .